VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20160302

Deklarasaun Bancada PD iha Visita Governador Geral Austrália Peter Cosgrove ho Sra. Cosgrove

DECLARAÇÃO
POR OCASIÃO DA VISITA DO
GOVERNADOR GERAL DA AUSTRÁLIA PETER COSGROVE
E SRA. COSGROVE

Dili, 3 deMarço de 2016

Jacinta Abu Cau Pereira
Presidente da Comissao D
Excelentíssimo Senhor Governador Geral da Austrália
Peter Cosgrove e Senhora

Bem vindu mai Uma Fukun ida ne’e no bem vindu mai Timor-Leste, rai ida nebe laos foun ba Sua Excelência. Iha tinan 1999 no 2000, wainhira Timor-Leste iha hela situasaun difisil teb-tebes, Sua Excelênsia lídera forsa Austrália nian hodi tulun tau hikas paz no estabilidade iha rai ida ne’e. Povo Timor-Leste lahaluha Sua Exselênsia nia intervensaun iha momentu nebe difisil.

Intervensaun nebe Sua Exselênsia halo iha Timor-Leste la’os kestaun justisa ho humanidade de’it,  maibe mos tanba Austrália ho Timor-Leste, jeografikamente, besik ba malu, nune’e mos relasaun histórika entre povo rua, povo Austrália no povo Timor-Leste. Relasaun ho amizade ida ne’e hahuu kedas desde II Guerra Mundial, maski povo Timor-Leste nudar kolonia Portugal nian no hasoru susar oi-oin, maibe nia hili tulun forsa sira Austrália nian hodi hasoru avansu forsa japonez sira nian. Tan ne’e mak povo rai rua ne’e konsidera malu hanesan povo belun.

Iha periudo okupasaun Indonezia nian, povo Timor hasoru funu ida la humano no desigual. Timor oan sira rihun ba rihun terus no mate tanba luta ba ninia libertasaun no ukun-rasik-an. Iha momento sira difisil tebes ne’e, povo Austrália fo nia apoio no solidariedade maka’as ba povo Timor. Apoio ho solidariedade ida ne’e hanesan kestaun relasaun historika entre povo Timor-Leste ho povo Austrália. Publiku no komunidade internasional tomak hatene, maski povo Austrália fo nia apoio ho solidariedade maka’as ba povo Timor, maibe Governo Austrália hili dalan seluk, nebe la reflekte relasaun ho amizade entre povo rai rua ne’e. Maski Governo Austrália politikamente la a favor ba Timor-Leste iha periúdo okupasaun Indonézia nian, maibe presiza rejista mos buat diak nebe Governo Austrália halo, hanesan bele simu Timor oan sira nebe halai husi funu, hodi hela iha Austrália. Ohin loron, Timor oan sira ne’e barak sai sidadaun Austrália nian. Ida ne’e mos hanesan vantajen ida hodi hametin liu tan relasaun entre Timor-Leste ho Austrália.

Exeselênsia sira,

Hafoin Timor-Leste hetan tiha nia ukun-an, relasaun entre povo Austrália ho povo Timor-Leste sai metin liu tan. La’os entre povo de’it, relasaun entre governu Austrália ho Timor-Leste mos diak tebes.  Relasaun diak ida ne’e tenki mantein nafatin no hametin liu tan liu husi koperasaun iha setor oioin.

Maski Timor nia relasaun ho Austrália diak tebes, maibe iha fukun ida, nebe Governo husi rai rua ne’e nian presiza tuur hamutuk hodi rezolve ba interesse rai rua ne’e nian. Fukun ida ne’e mak fronteira marítima entre Austrália ho Timor-Leste.

Ita hotu hatene, manifestasaun sira nebe halu iha Austrália no iha Timor-Leste, nebe organiza husi povo rai rua ne’e nian, ho objetivo ida de’it, husu ba Governo Timor-Leste ho Governo Austrália, atu tu’ur hamutuk hodi rezolve fronteira maritima.

Povo Timor-Leste nune’e mos povo Austrália hakarak hatene kona-ba ninia fronteira maritima, tanba ida ne’e implika ba kestaun soberania rai ida nian. No Povo Timor hakarak definisaun ida ba fronteira marítima nebe justa tuir direitu internasional!

Ho relasaun nebe diak tebes entre Timor-Leste ho Austrália ne’e mak, Bancada Democrática, hakarak husu ba Sua Exselência, Governador Jeral Peter Cosgrove, atu uza ita boot nia influênsia hodi hato’o ba governo Austrália hodi hahu’u negosisaun kona-ba fronteira marítima ho autoridade sira Timor-Leste nian.

Ba Partido Democrático, solusaun ida nebe justa ba fronteira maritima mak uza median line. Espera governu Australia bele iha vontade diak, hodi tuur hamutuk ho Governo Timor-Leste, hodi hahuu halo negosisaun kona ba fronteira maritima.

Obrigado barak
Jacinta Pereira

Sem comentários:

Enviar um comentário

Nota: só um membro deste blogue pode publicar um comentário.