“Imagining East Timor”: Colonialismo. Catolicismo. Nacionalismo. Hermenêutica oan ida ba celebração jubilosa 500 (PARTE-3 hotu)

“Imagining East Timor”: Colonialismo. Catolicismo. Nacionalismo. Hermenêutica oan ida ba celebração jubilosa 500 (PARTE-3 hotu)

 Martinho G. da Silva Gusmão

Docente ba filosofia política no hermenêutica

Instituto Superior de Filosofia e de Teologia (ISFIT),

Dom Jaime Garcia Goulart, Dili

Husi artigo sira liu ba, ha’u hatudu katak CATOLICISMO mai hamutuk ho COLONIALISMO. Maibe, iha dalan laran dala barak ida-idak la’o ninian! Ita la nega katak 1515 ne’e hahu “primeiro contacto” ho Portugues sira, “provavelmente”, “presume-se”! Maibe, dehan fali dehan “Timor Leste nia historia hahu husi Oe-Cusse” ne’e hanesan “jusnaturalista” ida, katak, ema sira be fiar “... na imutabilidade da razão humana” to’o ikus mai hanoin katak sira mak “... capaz de descobrir verdades eternas, de valor absoluto, que correspondem plenamente à racionalidade de todo o universo” (cf., N. Bobbio, Dicionário de política: 581). Hodi liafuan seluk, ita hanoin fali OE-CUSSE hori uluk hanesan los ohin loron! Teki-teki ema balun naklosu sai mai dehan katak sira mai iha Oe-Cusse ne’e mak fohin descobre lia-los no dalan moris ba TIMOR LESTE tomak. Festa tinan 500 iha Oe-Cusse ne’e hanesan política da historia atu defini ema balun nia estatuto política iha historia Timor Leste nian!

Ha’u hakerek konaba história da política! Ha’u fiar katak TIMOR LESTE nu’udar NAÇÃO no PATRIA hahu 28-NOVEMBRO-1975. Ida ne’e mak data monumental no monumento sine qua non ba ita nia política tomak. TIMOR LESTE ninia “raison d’être” ka nia moris no nia mate, nia destino tomak mak ne’e! Loron ne’e mak ita hamrik nu’udar “Estado de direito democrático, soberano, independente, baseado na vontade popular e no respeito pela dignidade da pessoa humana” (CR artigo 1^o no. 1, 2). Lori hisik kosar-wen no mata-wen, terus todan no fakar ran mak iha 20-MAIO-2002 ita hadau fali husi invasor Indonesia nia liman! Loron 20 de Maio (1974) hanaran “dia da revolução”, la’os de’it “dia da restauração” (2002). Ho ida ne’e ita taka “circulo imperial” COLONIALISMO Portugal ho sira nia “grandeza no miséria”; hodi hakur liu tan “idade tragédia” nebe NEO-COLONIALISMO Indonesia ho sira nia “primaveras de beleza e sangue”.

Husi ne’e ita la ko’alia ona TIMOR, ka TIMOR ORIENTAL ka TIMOR-DILI ka TIMOR TIMUR, maibe TIMOR LESTE (“TIMORES”). Iha hermenêutica, liafuan “Timor Leste” hatudu ba “consciência da determinação histórica” ida (alemã: Wirkungsgeschichliches Bewußtsein), katak, saída mak ita moris ohin loron la’os mai husi memoria histórica uluk nian, maibe moris nebe ita koko no hala’o hela ho ita nia consciência, no iha biban hanesan la taka matan ba efeito nebe mai husi historia (cf., Martinho G.S. Gusmão, Phronesis as Fundamental Virtue of Hermeneutics [tese mestrado], Universidade Pontifícia Gregoriana, Roma: 2005, pp. 89-90).

Ho liafuan Wirkungsgeschichliches Bewußtsein ne’e mak ha’u koko atu reinterpreta Nicolau Lobato ninia discurso 20 de Maio de 1978 (https://www.youtube.com/watch?v=lGCoHwnDz3s) konaba “inconfundível consciência nacional”, molok nia mate iha 31 de Dezembro tan tiru malu namanas ho ABRI iha Mindelo (entre Maubisse, Turiscai no Manufahi). Ba ha’u, discurso ida ne’e hatudu ninia lucidez no clareza iha repertório orquestral NACIONALISMO, CATOLICISMO, COMUNISMO nebe eloquente tebes! Surpresa bo’ot ida ba ha’u, tan Nicolau ninia linguagem la dok husi Presidente SOEKARNO wainhira “Bapak Bangsa” (Indonesia) ne’e koko atu hatur ninia doutrina política NASAKOM (Nasionalis, Agamis, Komunis). Soekarno ho Nicolau Lobato mate iha Soeharto nia liman.

Hanesan Ben Anderson dehan ona, katak liu husi “ineradicable nativeness” ho lian Tetun no “a popular catholicism” mak hamosu “profoundly nationalizing effects”: TIMOR LESTE! Anderson halo ninia teoria konaba “nationalism” ka “nation-ness”, Nicolau Lobato hatudu iha pratica, tan ne’e mak ninia NACIONALISMO “has grounded itself firmly in a territorial and social space inherited form prerevolutionary past”. Ho Anderson nia liafuan, ha’u fiar metin katak nacionalismo la’os doação husi colonialismo. Nia mai husi “cultural artefacts of a particular kind” nebe moris tan “profound emotional legitimacy” (Benedict Anderson, Imagined Communities: Reflections on the Origens and Spread of Nationalism, 1983). Hare husi ne’e, ha’u sente katak so NICOLAU LOBATO no KAY RALA XANANA GUSMÃO mak “founding fathers” ka fundador do Estado. Sira seluk tama iha classe “líder histórico” de’it ba! Lalika ida-idak naklosu sai iha media comunicação social hodi halo auto-proclamação “hau mak fundador do estado”! Barak demais mos susar bo’ot, tan osan la to’o atu selu LPV no “projeto piloto” sira.

“Imagining East Timor”: Consciência Nacional

Iha discurso ne’e, Nicolau Lobato koko atu fanu povo ninia CONSCIÊNCIA NACIONAL. La’os conceito de’it mak nia hato’o, maibe consciência nebe moris tan hatene an katak moris iha “explotação do homem pelo homem” (original iha francês: l’exploitation l’homme par l’homme) no alienação nia laran. Ida ne’e vocabulário MARXISMO nian. Uluk knana’in (1) Karl Marx ko’alia konaba “explotação” nu’udar “an object for its potential benefits” – katak usa recurso natural, recurso político no hipocrisia moral nebe “the pharisaical capitalist ... creates, perpetuates and exploits” (hare: Capital I, ch. 15: 3) hodi susu povo nia bokur. Ha’u fiar, Nicolau Lobato lakohi kedas hare FRETILIN ida nebe matan-naklosu ba recurso natural no político hodi falun metin ho hahalok capitalista falsa ka laran makerek sira nebe hanaruk no hatodan povo nia terus no susar, tanis no  halerik; nia ran la halai kedas hare ukun-na’in trata povo Timor-Leste hanesan “fahe krekas”! Ida seluk (2), “explotação” mos bele significa wainhira ukun na’in sira (grupo ki’ik oan ida) goza “surplus”, maibe população barak liu mak ki’ak no mukit tan la hetan acesso ba bem-estar (kemakmuran). Nune’e ita bele hare momos “not only how capital produces, but how capital is itself produced. The secret of profit making must at last be laid bare!” (hare: Capital I, ch. 6). Keta haluha, Marx ko’alia “capital” (capitalista) ba ema sira be iha osan rasik. Sira hatene oinsa mak fila liman atu sira nia osan aumenta, maibe oinsa mak sira nia osan rasik bele sai maka’as liu tan. La hanesan ho ita nia ukun-na’in balun, la iha osan rasik maibe hasai orçamento geral do estado hanesan fali sira nia osan rasik. Bele dehan, “projeto piloto” ZEESM ne’e hanesan “the pharisaical capitalist” (kapitalisme semu) nebe Marx acusa nu’udar “the secret of profit making” nebe grupo oan ida hamosu iha oligarquia FRETILIN nia laran. La’os Nicolau Lobato nia mehi! Ka, Nicolau Lobato mehi at hela iha lalehan?

Tan ne’e, nanis ona Nicolau Lobato sadik Povo tomak atu “reconstruindo (TIMORES) com o seu próprio suor, com o seu próprio sangue ... um povo que surge do sistema desumano do colonial, um povo que renasce das cinzas do esquecimento”! Iha marxismo ida ne’e mak “class consciousness”; ba lobatoismo (to’o xananaismo) ida ne’e bele hanaran “consciencia maubere”. Liafuan “Maubere” (mai husi Dr. Jose Manuel Ramos Horta, fundador lolos ASDT no FRETILIN hamutuk ho Nicolau Lobato) atu articula “proletar” (ka, “maubere” ne’e kona liu ba “lumpen proletar”). Iha conceito “Maubere” (Buibere), Lobato hanoin hamutuk ho Marx konaba “objective situation of a class and subjective awareness of this situation”. Husi ne’e mak povo ida hatene konaba “the increasingly political struggle of the tiers état with the ruling classes of the ancien régime” (cf., M. Isván, Aspects of History and Class Consciouness, 1971).

Ha’u sente Nicolau Lobato hatudu momos katak ita la’os ki’ak no mukit tan capitalismo ninia explotação, maibe liu-liu husi “cinzas do esquecimento”! Marx ko’alia konaba dominação capitalista/ burgessa nebe hamoris de’it “alienação”, nune’e mos Nicolau Lobato fekit konaba “cinzas do esquecimento”!

Ohin loron Povo Oe-Cusse na’i-ulun sira haruka atu bidu haksolok tan Portugues mak hahu ita nia historia iha 1515. Maibe ita tenki “consciente” katak, iha tinan 500 nia laran, colonialista Portugal mak tuda tama ita ba cinzas do esquecimento (= “alienação”, tuir Marx nia liafuan). Tan sa? Padre Jorge Barros Duarte (uluk hela iha Manatuto) hakerek katak Portugal halo “política aparthedistas” wainhira  hari’i ESCOLA PUBLICA iha Timor (cf. Em Terras de Timor, 1987: 47-48). Imagina to’ok: husi 1515 to’o 1915 mak hafoin Governo colonial loke escola município iha Dili. Wow, tinan 400 nia laran la iha escola. Iha tiha ona 1935 mak loke Liceu Dr. Francisco Vieira Machado. Maibe, to’o tiha ona 1960 mak governo loke 1^o–3^o ciclo. Tuir Diploma Legislativo n^o. 154 (1938), katak sistema educação fahe ba rua: ida ba “indígena” (rai-na’in oan sira) nebe fo de’it ba Igreja Católica atu kaer maibe governo mak “fiscaliza”; ida seluk ba “europeu e assimilado” (malae no mestiço sira nia oan) nebe governo colonial mak kaer. Maibe, diploma ida ne’e hakerek kedas, “Não é permitida a europeus e assimilados a frequência das escolas e classes indígenas ou inversamente, a frequência de indígenas nas escolas e classes de europeus e assimilados” (artigo 55^o). Katak, malae no mestiço sira labele ba tama iha escola timor-oan rai-na’in nian; nune’e mos timor-oan sira labele mai kahur fali ho malae no mestiço sira. Tuir mai, Artigo 56^o dehan “O Colégio Liceu de Dili receberá cada ano gratuitamente para ensino um aluno recomendado pelo Superior das Missões Católicas, educado nas Escolas das Missões e que pelas suas qualidades de inteligência, carácter e classificações obtidas, o Governador julgue digno e merecedor dessa recompensa”. Ne’e katak, escola Liceu bele de’it simu timor oan sira wainhira padre superior sira halo “permohonan” ba governador, no temi ho liafuan laran aat dehan governador “julgue digno e merecedor” (= dianggap layak dan pantas) mak nia bele simu. Se governador dehan labele, padre nia “permohonan” husik anin lori semo lakon mos di’ak hela. Nicolau Lobato “termasuk” mai husi escola missão nian nebe hetan “recomendação” husi Padre sira atu tama Liceu iha Dili. Hanesan mos líder sira seluk nebe bele de’it hetan “consciencia” foun tan escola missão nian husi Soibada to’o Dare! Tebes, ita nia líder NACIONALISTA moris husi cinzas de esquecimento nebe COLONIALISMO halo! CATOLICISMO kari hela fini consciência foun ba Timor oan.

Rahun liu tan, Portugues sira tama husi odamatan iha 1515 no halai sai husi janela iha 1975. Rona mai! Ministro dos Negócios Estrangeiro Mário Soares ho Ministro da Coordenação Interterritorial Almeida Santos dehan momos katak Timor ne’e tuir lolos Indonesia nia rai pedasuk ida, Portugal lalika sibuk ida – “Timor é uma ilha indonésia que tem pouco a ver com Portugal”. Nune’e, fo independência total ba Timor hanesan “irrealismo atroz”! Sa tan atu kaer metin Timor Lorosae iha província ultramar Portugal nian “nos custa muito dinheiro” (maibe, ohin loron ba Fundação Mário Soares, tinan-tinan Estado RDTL fo osan US$200.000 resin atu halo atividade)! Los, Presidente da República no Comandante em Chefe das FALINTIL (Presidente da FRETILIN) Nicolau Lobato ko’alia los tebes – ita luta iha no husi “cinzas do esquecimento” nia laran!

Karl Marx hakerek: “Religious suffering is at the same time an expression of real suffering and a protest against real suffering. Religion is the sight of the oppressed creature, the feeling of heartless world, and the soul of soulless circumstances. It is the opium of the people” (cf., Karl Marx Selected Writings, 2002, p. 72). Maibe, hare husi historia Timor Leste nia luta ba independência, justru CATOLICISMO mak hatudu “a protest against real suffering”. Iha linguagem litúrgica, ita rona bebeik sarani sira hananu: “liu husi rai fuik ema halerik, liu husi nakukun ema tanis”, hamutuk ho vocabulário seluk tan: “ki’ak”, “mukit”, “hamlaha”, “hamrok”, “tanis”, “halerik”, “funu”, “mate”, “fakar ran” – hanesan Marx dehan karik, Igreja ne’e “the sight of oppressed creature, the feeling of heartless world, and the soul of soulless circumstances”. Ho Ben Anderson nia liafuan dehan, “... a popular Catholicism has emerged as an expression of a common suffering … This Catholic commonality in some sense substitutes for the kind of nationalism …”! Iha religião católica, Povo Timor Leste la lakon iha akudesan laran. Nune’e, CATOLICISMO hatudu “religious pathos” (fuan no laran nakonu ho fiar ba moris ne’e nia lulik) hodi hola ema nia néon no klamar atu luta hodi manan moris di’ak no luta to’o moris rohan laek!

Igreja Católica kari tiha ona fini ba “literacy and basic education with the awakening of a critical and combative political consciousness” (Paulo Freire, Education for Critical Conscience, 1974). Hanesan temi ona, iha 1770, Igreja loke seminário ida iha Oe-Cusse; iha 1774, loke tan seminário seluk iha Manatuto. Hau fiar katak, iha tempo COLONIALISMO nian, Igreja hatudu uluk ona katak, “... basic education is the primary object of any plan of development ... and ... literacy is ... ‘a priviledged instrument of economic progress and of development’ ...” (Papa PAULO VI, Populorum Progressio: 35). Ohin loron Papa FRANCISCO husu atu Igreja Catolica sai nafatin “consciência critica da nação”, la’os de’it husi Padre foinsae sira maibe mos sarani foinsae no intelectual sira nebe kaer metin nafatin espírito Nicolau Lobato nian iha Povo no Nação nia oin, iha Estado no Politica nia laran.

Unidade Nacional: Convergência iha Ideologia no Fiar

Ho consciência nacional ne’e, Nicolau Lobato halo apelo ba UNIDADE NACIONAL – (1) unidade iha POVO Timor Leste nia let; (2) unidade ho Comite Central FRETILIN; no (3) hamutuk fo liman ba malu atu hametin IDEOLOGIA nacional. Dala ida tan, infelizmente, nia mate sedu liu atu bele hametin plataforma política ida ne’e. Ikus mai liu husi RER (Reajustamento Estrutural da Resistência) mak Xanana Gusmão koko hikas fali atu halo “ideological turnaround” ba luta armada, clandestina no diplomática (cf., Resistir é vencer! The Autobiography of Xanana Gusmão, 2000).

1)                 UNIDADE iha POVO TIMOR LESTE nia laran

Ba Nicolau Lobato, ho unidade mak ita bele hametin an no iha kbiit atu hasoru funu-baluk sira. Unidade ida ne’e rahun no namtate, tan ita la iha hanoin no hakarak hanesan. FRETILIN, tuir Nicolau Lobato, moris atu bele dinamiza unidade ida ne’e. Iha fatin seluk (agora liu husi TVTL), nia hateten katak FRETILIN mosu atu halibur “TODOS NACIONALISTAS” (hahu ona ho pluralismo la’os partidarismo) nebe hakarak funu hasoru COLONIALISMO no DIVISIONISMO! Nia tau UNIDADE NACIONAL nu’udar sasukat kdasar ba independência. Mate tiha, ikus mai Xanana Gusmão mak lori hahu hikas unidade ida ne’e liu husi CONVERGENCIA NACIONAL atu luta nafatin hodi foti fali ita nia independência.

FRETILIN mosu atu sai povo nebe luta! La’os partido único. Ema ida mesak nia forsa sei la to’o atu satan netik anin fuik no tasi siak iha laloran revolucionário nia laran. Se mesak, FRETILIN sei sai de’it “setitik embun dalam samudra revolusi” (liafuan Soekarno nian). Nicolau ninia liafuan mak ne’e, “A FRETILIN identifica-se com o POVO! A FRETILIN torna-se POVO ... o POVO é a FRETILIN”. Iha ne’e, Nicolau Lobato sai ona husi partidarismo atu lori ninia política tama fali movimento popular ida. Nia halo ona evolução ba ninia projeto político rasik. Tuir ha’u nia hanoin, movimento popular ne’e mak lori Nicolau Lobato atu formula “nova ideologia” nebe hanaran NACIONALISMO. Liu-liu nia koko atu “ressurja o nacionalismo marcado exatamente pela reação histórico-cultural ao ‘imperialismo’ do colonizador europeu, isto é, NACIONALISMO ANTICOLONIAL e que, ... também por reação àquele que percebe como o inimigo, o opressor ou o ocupante” (António M. Bessa & Jaime N. Pinto, Introdução à Política, 2002: 80).

Nia hatudu katak liu tiha tinan 400, ohin FRETILIN lori tinan 4 atu tuba-rai metin hodi luta ho POVO MAUBERE ida ne’e. Liu tiha tinan 12 (katak, 4 x 3), Xanana Gusmão koko fali halo Reajustamento Estrutural da Resistência (RER) hodi nune’e nia hari’i Conselho Nacional da Resistência Maubere (CNRM). Agora, liu tiha tinan 40: oinsa mak ita hanoin hikas UNIDADE DO POVO ida ne’e? Celebração iha OE-CUSSE ho ninia estatuto nu’udar “zona especial” no tratamento “exclusivo”, Nicolau Lobato ninia klamar sei dehan saída ba ita?

2)                 FRETILIN: “Raison d’état”

Ba unidade nacional ida ne’e, Nicolau Lobato insiste katak “direção incontestável do Povo Maubere” mak Comite Central FRETILIN. Tuir ninia hanoin, iha CCF ne’e nia laran de’it mak ita tomak bele hare “uma radicalização das ideias de unidade e independência da nação e é aplicada a um movimento político, o movimento nacionalista, que se julga o único e fiel intérprete do principio nacional e o defensor exclusivo dos interesses nacionais” (cf., N. Bobbio, Dicionário de Política: 799). Dala ida tan, iha Nicolau Lobato nia imaginação política, FRETILIN mak bele kaer metin kuda-talin unidade nacional ne’e!

Atu hametin unidade ne’e, CCF banati tuir “principio justo” no “utilizando o método correcto”. Iha “luta armada prolongada”; “guerra da massa” nia laran, nia hametin ema tomak katak “a única realidade que marca na hora presente é resistir”, tan ne’e “FRETILIN é o POVO que luta!” Husi liafuan hirak ne’e ita bele hare ona oinsa mak nia halis ba MAOISMO.

Mao Tse Tung hanorin katak partido revolucionarista iha função “didática” hodi hatudu “political correctness” (politicamento correcto): buat hotu no buat tomak nebe lao tuir partido nia mata-dalan, “realizar na pratica” (“a pratica é a criteria da verdade”). Nune’e mosu duni “pensamento correcto” nebe hatudu oinsa mak ita hakat tuir mata-dalan nebe partido hatur tiha ona, atu ema hotu hare definição “correct” nu’udar buat hotu nebe “grupo” hatur ona. Husi ne’e mak la’o to’o movimento “new left”. Ha’u fiar katak ho “método correcto” Nicolau Lobato la’o iha dalan “new left” atu halo eliminação sistemática ba discriminação tomak, exploração hotu, racismo no sucoismo, no seluk tan (cf., E. Kurzweil & W. Philips, Our Country Our Culture: The Politics of Political Correctness, 1994).

Método correcto nebe Mao kaer atu halo ninia política mak “eliminação” – tortura, veneno to’o oha no massacre ba ema sira nebe la tuir ninia linha política, to’o ninia colega no camarada sira nia fo haris ho ran de’it (cf., Jung Chang & Jon Halliday, Mao: Kisah-Kisah yang tak Diketahui, 2007). Maibe, Nicolau Lobato ninia “método correcto” oinseluk: ba ema sira iha CCF nebe nia hare katak sei “atrapalha” ka “estraga” estratégia da luta, nia haruka atu ba halo “missão exterior”. Nia hatene katak hasoru Indonesia ne’e sei todan no kolen, susar no nakdedar. Tan ne’e di’ak liu haruka sira atu ba liur, atu nune’e labele fai husi kotuk, ka, kili husi laran!

Maibe, reclama FRETILIN nu’udar “direção incontestável do Povo Maubere” rona ba hanesan Nicolau Lobato fakar masin iha tasi laran. Husi sikun ida, ita nia povo ai-lebo sira barak liu la’os ema matenek no hatene política. Nune’e, wainhira intelectual oituan de’it no burguesa mos la barak, ita nia “capacidade revolucionaria não podia evidentemente ser grande” (cf. Paulo Pires, Timor: Labirinto da Democracia, 2013: 23). Ne’e duni revolução nebe FRETILIN lansa kala hela naran de’it ona. Husi sikun seluk, ita nia sociedade nakfera ona tan sistema partidarismo nebe mosu teki-teki de’it halo “primordial sentiment” lakon. Uma lisan, uma lulik no uma kreda nebe sai hanesan “símbolo comunidade” (comunitarianismo) namtate no naksobu ona. Autoridade tradicional mout tama taci revolução nia laran, maibe iha FRETILIN nia laran rasik (Comite Central) ema balun foti-an sai fali “ba’i-no” hodi lakohi hakahur sira nia moris ho povo ai-lebo “fahi krekas”, “fuk naruk la fase” sira! La iha tan “unicidade” iha uma laran rasik. Nune’e, “irrealismo e à ânsia do poder da FRETILIN e à imaturidade e ingenuidade politicas da UDT!” (P. Pires: 97) ne’e nia folin karun tebes: Portugal hi’it sasan halai lakon husi janela, Indonesia haksoit tama hodi baku rahun janela no odamatan Timor Leste nian.

Maski nune’e, Nicolau Lobato hatudu energia foun ida iha ninia linguagem política. Nia lori ita atu hanoin tuir dalan foun – “raison d’état”. Liafuan “raison d’état” (razão de estado) mai husi duca do Richelieu, Eminentissima e Reverendissima Cardeal Armand Jean du Plessis (1585-1642), Primeiro Ministro iha Imperador Luis XIII husi França nia ukun. Nia hanorin katak, ba Estado nia di’ak ema hotu tenki hakruk no fo nia moris tomak atu halo no manan buat hotu; interesse nacional mak sai sasukat moral no halo nafatin “the balance of power” atu nune’e ukun na’in sira labele mehi katak sira mak matenek liu no hatene halo buat hotu maibe ikus mai atu hatudu de’it sira nia manias ba sira nia “selfish interests” de’it. Maski Cardeal ne’e hanesan príncipe ida iha Igreja Catolica nia laran, maibe ninia hanoin konaba “raison d’état” mos hatudu atu fiar sarani nian sai hanesan “masin no naroman” hodi hari’i estado foun no moderno (H. Kissinger, Diplomacy: 56ff; H. Küng, Etica mondiale per la política e l’economia: 39ff). Tan ne’e, Nicolau Lobato hahu ona hanoin atu hasai FRETILIN husi “partidarismo” ba movimento foun iha “pluralismo democrático” ida nia laran. Infelizmente, nia mate iha funu laran.

Xanana Gusmão mak reinterpreta hikas “movimento” ne’e! Nia koko atu sai husi partido FRETILIN hodi hahu espírito NACIONALISMO foun ida iha CONVERGENCIA NACIONAL nia laran. Historia hatudu duni katak la hodi Igreja Catolica, movimento nacional mos bele namtate tan. Iha ne’e mak Dom Martinho da Costa Lopes no Dom Carlos F.X. Belo SDB hatama ona ideia “raison d’état” hanesan Cardeal Richeleu halo iha tempo uluk nian.

Bele dehan, Dom Martinho no Dom Carlos Filipe hamutuk ho Nicolau Lobato no Xanana Gusmão mai husi CATOLICISMO foun ida nebe “has being learning the beautiful but harsh truth that the Christian faith does not cut us off from the world but immerse us in it, that church is not a fortress set appart from the city ... political dimension of the Christian faith: in the precise sense of the repercussion of the faith on the world, and also of the repercutions that being in the world has on the faith”. (Archbishop Oscar Romero, Voice of the Voiceless: The Four Pastoral Letters and Other Statements, 1985, p. 177). Quase hanesan líder balun be ko’alia fiar an los katak Igreja Católica mak FRETILIN, FRETILIN mak Igreja Católica. Ne’e wainhira tsunami política hahu ona. Wainhira hakmatek ona mak dehan “kokorek no kokotek maibe la tolun”.

3)                 IDEOLOGICA Nacional

Ikus liu, Nicolau Lobato ko’alia konaba IDEOLOGIA nebe “materializamos na pratica”. Iha biban seluk, nia dehan “pratica é a criteria da verdade”! Ne’e marxismo-comunismo nia liafuan. Marx dehan, “The philosophers have only interpreted the world, in various ways; the point is to change it”; nia hatutan, “The question whether human thinking can reach objective truth – is not a question of theory but practical question” (cf., Karl Marx Selected Writings, 2002). Hamutuk ho “principio justo” no “método correto”, nia la’o duni ho ideologia COMUNISMO-MAOISMO.

Ba ha’u, buat nebe impressionante tebes mak maski Nicolau Lobato adopta COMUNISMO-MAOISMO, maibe nia mos hare hetan ona saída mak iha teoria política hanaran “apaziguamento ideológicas” katak, ideologia sira hahu namtate ona tan labele ona sustenta sistema política moderna; nune’e buka dalan foun. Ninia liafuan chave mak: “rever o caminho”, “juntar grande esforço”, “remover obstáculos”, “corrigir os erros” hodi lori ema tomak ba CONSOLIDAÇÃO DA DEMOCRACIA. Iha historia, sistema política sira hanesan Adolf Hitler nian, Mussolini, Lenin, Stalin, Mao no seluk tan declara katak sira mos REGIME DEMOCRATICO ida. Ho método correcto, dala barak sira sai “asu-fuik iha asu-fuik sira let” – homo homini lupus est! Liu husi terror no ameasa, espionagem no tortura, to’o elimina oposição ho hahalok brutal no cruel sira hametin “regime democrático” ne’e; sira halo moris ne’e sai tiha “omnia belum contra omnes” (ema hotu sai funu-baluk ba ema hotu).

Ha’u hanoin, iha aspecto ideologia ita nia foinsae sira bele halo estudos klean liu tan no luan liu tan. Iha Lei-Inan, ita la usa conceito “regime democrático”, maibe CULTURA DEMOCRATICA nu’udar apaziguamento ideológico. Oinsa Nicolau Lobato kari fini ida ne’e no Xanana Gusmão hamoris no haburas iha ninia “ideological turnaround” sei hein estudos luan liu tan no klean liu tan. Ha’u sei koko atu hakerek tan lai ...

Iha discussão ida iha Hotel Timor, dala ida Ir. Mario V. Carrascalão dehan “ita husu to’ok, ohin loron FRETILIN nia ideologia ne’e saída? CNRT nia ideologia mak nebe?” Ema balun husi partido CNRT no FRETILIN koko atu hatan. Sira nia resposta la’os los ka sala, ideologia iha tebes ka la iha! Ba ha’u, ohin loron CNRT ka FRETILIN ninia “ideologia” la iha duni, ne’e tan política moderna tama ona iha “crepúsculo ideológico”, nebe antecipa tiha ona husi Nicolau Lobato no Xanana Gusmão rasik. Hanesan Gonzalo Fernandez de la Mora hakerek nia livro ida ho titulo El Crepusculo de las Ideologias (1971), dehan katak Marxismo/ Comunismo neneik sei iis kotu, tan “expansão capitalista” nebe fahe rikusoi ba ema barak to’o kraik iha “pirâmide da distribuição da renda”; nune’e sei mosu “poderosos grupos capitalistas e agentes da auto-reforma do capitalismo” nebe sei halo política “fahe rikusoy” hodi hari’i “Estado de bem-estar”. Hanesan filosofo F.W. Nietzsche haklaken “God is dead”, nune’e mos matenek na’in sira iha “crepúsculo ideológico” sei hateten “the death of ideology”.

Ho celebração tinan 500 iha OE-CUSSE no tinan 40 INDEPENDENCIA ita halo projecto piloto ida atu hetan modelo “DEMOCRACIA DO BEM-ESTAR”, wainhira “as opções variaram entre mais plano e menos mercado, mais mercado e menos plano” (cf., A.M. Bessa & J.N. Pinto, Introdução à Política: 24-25). Katak ita halo plano barak liu ho “projeto piloto” bo’ot no gasta osan barak maibe la iha mercado; ita mos hare mercado bo’ot oi-oin maski la iha plano ba neba! Hau hare iha facebook, belun ida iha Autoridade ZEESM nia laran posting foto tomate ho hudi tasak hodi dehan katak sira mos sosa “produto local” husi Povo Oe-Cusse nian. Idiota duni! Oinsa mak Estado “investe” Povo nia osan US$ 200-300 milhões (at liu tan mak la iha aprovisionamento, la iha fiscalização, la iha relatório) iha Oe-Cusse hodi ba loke “mercado tomate no hudi tasak” de’it? Maibe los karik, iha Oe-Cusse mosu ona fundador do Estado foun ida ba Republica Banana-Tomate!

Ba ha’u la’os JUBILEU 500 ne’e mak problema. La’os OE-CUSSE, la’os DILI mak sai problema. Ida be halo isin-fulun hamrik ne’e mak festa ida ne’e hatudu de’it POLITICA DA HISTORIA atu ema balun nebe obriga-an sai fundador do estado hodi fakar rai-rahun ba povo nia leten, nahe osan rihun no tokon hodi sira nia oligarquia bele goza iha ema seluk nia mata-wen no ran. Ida ne’e festeja “pharisaical capitalist” (Karl Marx).