“Imagining East Timor”: Colonialismo. Catolicismo. Nacionalismo. Hermenêutica oan ida ba celebração jubilosa 500 (PARTE 2)

“Imagining East Timor”: Colonialismo. Catolicismo. Nacionalismo. Hermenêutica oan ida ba celebração jubilosa 500 (PARTE 2)

 

Martinho G. da Silva Gusmão

Docente ba filosofia política no hermenêutica iha Instituto Superior de Filosofia e de Teologia (ISFIT), Dom Jaime Garcia Goulart, Dili

Ema balun hakerek iha facebook dehan, sorte lori netik Portugues sira mai ne’e mak missionário sira tabele tuir. La sala! Tan liu husi bula Romano Pontifex (1455), Papa Nicolau V haraik ba Liurai Portugal atu hari’i igreja ka mosteiros iha “territórios descoberto e descobrir”. Nune’e mos, Papa Calisto III hametin tan ho bula Inter Coetra (1456) atu Infante Dom Henrique hetan knar “mestre da Ordem de Cristo” no iha “jurisdição espiritual” ba Padroado de Tomar (= bele hari’i no fo rikusoi ba kreda iha rai tasi-balun tomak).

Iha 1495, Dom Manuel sae ba kadunan Portugal nian! Tinan tuir mai, nia duni sai hotu judeu sira no muçulmano sira husi nia rain. Hotu tiha, nia foti haruka ninia aswain sira atu hahu “descoberta dos caminhos marítimos para a Índia”, no “descobrir príncipes cristãos antigos” hodi hametin relação política internacional foun. Ne’e duni, wainhira Vasco da Gama no nia alin Paulo Gama, Nicolau Coelho ho ema seluk naran Gonçalo Nunes sai husi Tejo (8 de Julho de 1497), armada hirak ne’e composta husi militar, mercenário no missionário, la’o haleu continente sira Africa, Asia no America! Nune’e ho código M3, Liurai Portugal halo operação conjunta ida “espada e cruz”.

Iha 15 de Agosto de 1511 mak Afonso de Albuquerque hadau no ukun Malaca! Nia hari’i “fortaleza” (benteng pertahanan) iha Malaca, no haruka ninia armada atu hakur tasi no laloran hodi to’o iha Molucas! Iha Malaca, Albuquerque foti tiha Islam sira mesjid ida iha neba atu halo igreja. Husi ne’e mak hahu evangelização to’o insulinda tomak! Liafuan “insulinda” hatudu ba reino sira iha Flores, Solor, Adonara, Lembata, Sumba, Roti, Sabu, Pantar (Alor), Timor no Maluku (Molucas). Tan ninia devoção bo’ot tebes ba Na’i-Feto, nune’e, Albuquerque dedica kreda foun ne’e ba Nossa Senhora Anunciada. Frei Domingos de Sousa, OP nebe sai confessor ba Albuquerque mak kaer kreda ida ne’e, hamutuk ho ninia capelão militar Padre Álvaro Mergulhão. To’o 1521, nia sai ona Catedral ba Diocese Malaca. Iha 25 de Abril de 1545, Francisco Xavier to’o iha Malaca. Tinan tuir mai, nia ba visita Amboina no Ternate. Iha 1547 nia fila ba Malaca!

*****

Ho celebração jubileu 500 ne’e, bele ka lae ita dehan – Igreja Católica iha TIMOR LESTE hahu iha Oecusse, 1515? Lae! Tan, TIMOR uluk nian iha 1515 la’os TIMOR LESTE ohin nian! Maibe, evangelização ne’e hanesan fini ida atu lori kuda iha rai ida karik, bele dehan missionário sira hetan ona rai ida ne’e sei nakonu ho du’ut, ai-tarak no fatuk! Hein hamos lai! Los duni, hanesan Dom Basílio do Nascimento dehan, Igreja Católica nu’udar “mater” (inan) ida karik, ninia “oan feto bo’ot” mak Oecusse! Tan, iha 24 de Junho de 1641, primeiro baptismo fo ba Liurai Feto iha Mena (Atapupu) no Lifau (tinan oin mak ita celebra 375 anos). Segundo baptismo, iha loron ruma Julho 1670 nian iha Manatuto (tinan ne’e celebra 345 anos). Seidauk 500 anos! Primeiro seminário hari’i iha Oe-Cusse, 1770; no segundo seminário hari iha Manatuto, 1774. Tau hamutuk Oe-cusse ho Manatuto iha pacote ida, ita bele ona hare fini TIMOR LESTE – loromonu no Lorosae nebe halo Igreja Catolica sai hanesan “surface unity”!

Problema mak COLONIALISMO ne’e hanesan ho CATOLICISMO ka lae? Dala barak ita halo anachronism/ confusing the analytic categories wainhira ita hanoin katak catolicismo no colonialismo ne’e mai hamutuk, tan ne’e sira hanesan de’it. Maibe, ho teoria  COLONIALISMO ita la bele explica didi’ak social constructing nebe Igreja Católica halo. Hare ba historia TIMOR LESTE nian, CATOLICISMO halo genealogia ida, maibe liu husi “the paths not taking” (dalan nebe COLONIALISMO la la’o tuir); no dala barak liu Igreja hatudu “in a discredit colonial paths” (Igreja ho governo colonial funu hasoru malu; hanesan mos iha ocupação Japonesa no invasão Indonésia nian).  

Ita nia memoria sei matak hanoin iha Indonesia nia tempo, sira soe piada no insulta Bispo no Padre sira dehan “berkepala dua”, “tidak tahu berterima kasih”, “anti pancasila”, “pastor FRETILIN GPK”, to’o grupo Pemuda Pancasila ho Gadapaksi (garda pemuda pendukung integrasi) kaer manutolun tuda Bispo Belo iha Jakarta (maski subar metin iha partido histórico nia laran), no iha 1999 sira oho padre, madre, seminarista, catequista no sarani sira!

Se ohin loron, ukun an ona, na’i-ulun político balun hahu dehan “hasai batina mak halo política”, “padre/ madre sira hare Igreja la los ona mai mete tan política”; “padre balun halo política maibe halo moe an de’it”; “hetan ona subvenção publica, maibe ko’alia kritika nafatin”; “padre ho madre sira moris la hun la dikin”; “balun kokorek no kokotek maibe la tolun” ... ida ne’e hatudu nafatin traço (ai-fatin) husi crise naruk entre catolicismo no colonialismo.

*****

Maibe, CATOLICISMO mak nune’e duni! Hanesan Papa FRANCISCO nia lia-menon ba Dom Basilio do Nascimento, Dom Alberto Ricardo da Silva no Dom Norberto Amaral (17/03/2013) hatudu duni oinsa mak Igreja Católica ninia característica “in a discredit colonial paths”. Keta haluha, Papa ida ne’e mai husi eis-colonizado Argentina ho “terra mãe” (mother land) Italia no Espanha nebe hatene saída mak colonialismo no saída mak catolicismo ho conflito oi-oin to’o hetan independência! Santo Padre nia liafuan, “Amados irmãos no episcopado, quis limitar-me a três pontos, objecto das vossas preocupações: o primeiro, a vossa contribuição como consciência crítica da nação; o segundo, movida por entranhas de misericórdia, a Igreja inteira sai em missão; e, enfim, exprimir a Boa Nova da salvação nas línguas locais”. Amo Papa nia liafuan bele hatama iha categoria nebe ha’u bolu (1) catolicismo político; (2) catolicismo doutrinal/ tradicional; no (3) catolicismo popular (cf. Martinho G. da Silva Gusmão, Timor Lorosa’e, 2003, pp. 160-165)

“Consciência critica da nação”:

catolicismo político  

CATOLICISMO ne’e SACRAMENTO POLITICO ida. Baibain, iha Igreja Católica ita hatene sacramento 7: baptismo, eucaristia, crisma, penitencia, extrema unção, ordem (sai na’ilulik) no matrimónio (sai kaben-na’in). Saída mak sacramento político? Tuir Doutrina Social da Igreja Católica dehan “La política ... è una delle forme più alte della carità, perché è servire il bene comune” (Politica ... hanesan forma ida aas liu husi caridade, tan ida ne’e mak atu hametin bem comum). Papa Francisco hatudu katak Igreja Católica nia política iha Timor Leste mak “... contribuição como consciência critica da nação”. Ha’u nia mentor konaba política iha Indonesia, Romo Y.B. Mangunwijaya hakerek konaba TIMOR TIMUR iha livro ida “Politik Hati Nurani” (1997), hodi dehan “Gereja di Timor Timur adalah pejuang sejati dari kemanusiaan yang adil dan beradab”. Romo Mangun mak ajuda ha’u atu formula “dekolonisasi hati-diri” wainhira halo mestrado iha teologia política (cf., Martinho G. da Silva Gusmão, Beriman dengan Imajinasi: Resepsi Novel-Novel Y.B. Mangunwijaya Dalam Perspektif Teologi Estetika [tesis pasca sarjana], STF Widya Sasana: Malang, 1998). Husi ne’e mak hau hatudu ona ideia konaba “sacramento político”.

Maibe, atu sai “consciência critica da nação” ne’e nia folin karun teb-tebes. Conflito barak, odio no vingança barak husi “político” sira ba “padre” sira; ema insulto (tolok no hateten at) no halo perseguição ba padre sira wainhira hatudu “oposição” ba política formal. Bele dehan, complexidade ida ne’e mosu ona husi 1515 to’o 2015; tinan 500 ona! La’os ona fiar sarani nian mak sai sasukat, maibe “interesse política” nian nebe hamosu conflito barak. Ninia consequência, fakar ran no lakon moris. Iha fulan Setembro 1999 deit, padre 4 mak mate: Pe. Hilario Madeira, Pe. Francisco Soares, Pe. Tarcisius Dewanto SJ no Pe. Albrecht Karim SJ; seminarista 3: Fr. Jacinto F. Xavier, Fr. Fernando dos Santos no Fr. Valerio P. Da Conceição; hamutuk ho madre 2: Me. Erminia Cazzaniga FdCC no Me. Celeste P. De Carvalho FdCC. La sura igreja no residência hamutuk ho documento murak barak mak mutuk iha akudesan laran!

Tebes, historia catolicismo nian dala barak fase duni ho padre sira nia ran! Tuir Dom Carlos Filipe, mártir dahuluk mak Frei Duarte Tavasso, OP nebe mos kaer ukun nu’udar governador do bispado (Malaca, 1668-1670) mate hamutuk ho sarani 12. Tuir mai, mate lubuk ida tan! Iha funu Manufahi, 1912, ema oho Padre Manuel Alves Pereira wainhira lori ema barak sai husi Maubara atu halai ba Maubisse. Iha funu Japones nian 1942, militar oho Pe. Norberto Oliveira Barros no Pe. Antonio Manuel Pires iha Ainaro (fakar mina-rai no sunu moris de’it iha sarani sira oin); mate mos timor-oan Pe. Abilio Caldas iha Lacluta (1943). Amo Fernando Madeira superior iha missão Hatolia nian mate hamlaha iha ai-laran wainhira halai hamutuk ho sarani sira husi brutalismo militar japão nian!

Igreja Católica hanorin duni, katak bom pastor (bibi-atan di’ak) mak ida be “dá sua vida pelas suas ovelhas” (Jo 10, 11), hanesan Jesus Cristo nebe dehan “dou a minha vida pelas minhas ovelhas” (Jo 10, 15). Maibe, padre ho madre sira nia mate ne’e mak sai sasukat ba sarani sira nia fiar; “Se o grão de trigo que cai na terra não morrer, permanecera só; mas se morrer, produzirá muito fruto” (Jo 12, 24). Se padre no madre sira la kaer kilat ka meik no kroat ruma, maibe aten-brani nafatin moris iha povo nia let nebe tauk no nakdedar hasoru laloran no tasi siak funu na’in sira, tan “Ninguém tem maior amor do que aquele que dá a vida por seus amigos” (Jo 15, 13).

Maibe, padre sira nia política hatudu bebeik “consciência critica” ka lae? Dala barak mos lae! Liu-liu hasoru poder no osan. Tuir historia, husi 1562 wainhira hari’i ona centro missionário iha Solor (Flores) hodi mai Timor, na’ilulik sira hala’o mos knar “governador do bispado”. Saida mak mosu iha 1515 to’o 1562, no husi 1562 to’o 1702? Quase la iha historiador ida mak la dehan katak iha tinan naruk hirak ne’e padre sira kaer “poder espiritual e temporal”. Husi ne’e padre dominicano sira hahu mos husik hela sira nia moris atu halo bisnis ai-kameli to’o monopólio mercado. Tan bisnis boot ona, sira husik hela moris na’ilulik nian. Nune’e, mosu ona conflito ho jesuíta no franciscano sira. Sira halo duni “voto da pobreza”, maibe ai-kameli morin liu maka’as liu!

Hodi serbi “Maromak ho mammon (maromak osan)” mak hamanas “conflito de interesse” iha mercenário, militar no missionário sira nia let! Liurai no família real tama tan, ahi han rai! Povo no sarani sira mak sai vitima. Tan sa mak iha 1769, Lifau sai akudesan? Iha versão la hanesan: governador António José Teles de Menezes halai husi Lifau (11 de Agosto de 1769) tan povo la gosta nia hahalok hasoru missionário hodi duni nia ho ninia militar sira (?); ka, nia lakohi missionário sira sei “manda” iha Lifau hasoru ninia governação, ne’e mak nia sunu mohu tiha Lifau hodi halai mai Dili (?). Hahu 10 de Outubro de 1769, Dili sai ona “capital” ba Timor de’it. La’os ona Lifau (nebe mos sei capital Solor-Timor). Maibe, ninia sintense: conflito político no económico mosu ona iha historia uluk nian, serbi ba “Maromak no Mammon”: missionário sira hasoru mercenário/ militar sira tan bisnis!

To’o 1818, sarani barak nia fiar “agonizante”: la mate la moris, la manas la malirin tan missionário sira nia política no bisnis. Tuir historia, iha 1640 iha ona Igreja hamutuk 22 iha Timor tomak. To’o 1818 ne’e hela de’it 3: Lifau, Dili no Manatuto! Maski conflito ne’e mosu nafatin, maibe governo la haluha padre sira nebe hatudu “consciência critica” ne’e hodi sustenta sira nia moris. Hanesan governador Vitorino Freire Gusmão fiar nafatin padre sira nebe “halo política”, maibe naran katak defende nafatin povo no Estado (colonial) ninia dalan ba justiça no damen nian!

Iha Indonesia nia tempo, padre no madre sira halo política tuir pancasila nian hanorin “kemanusiaan yang adil dan beradab”. Maski mosu conflito barak no hafuhu malu, to’o Pemuda Pancasila tuda manutolun ba Bispo, maibe governo Indonesia halo kapela barak, igreja barak, inclui Catedral Dili nebe inaugura husi Presidente Soeharto no hetan bênção husi Papa João Paulo II. Wainhira Dr. Mari’i Alkatiri sai chefe do governo mosu “conflito político” nebe la furak, maibe nia mos iha coragem atu hadi’ak fali relação ho Igreja. So to’o Kay Rala Xanana Gusmoa mak relação ne’e di’ak liu fali (quase hanesan governador Vitorino Gusmão nian, nune’e mos Xanana Gusmão nian sustenta nafatin Igreja, maski “critica” iha nafatin).

Husi itinerário badak ne’e ita hare ona oinsa mak consciência critica da nação ne’e mai husi fini ida nebe hun no abut metin klean tebes iha historia TIMOR LESTE nian. Lei-Inan confessa duni hodi hakerek, “Na sua vertente cultural e humana, a Igreja Católica em Timor-Leste sempre soube assumir com dignidade o sofrimento de todo o Povo, colocando-se ao seu lado na defesa dos seus mais elementares direitos” (Preâmbulo CRDTL). Nune’e mos dehan, “O Estado reconhece e valoriza a participação da Igreja Católica no processo de libertação nacional” (artigo 11^o no. 2). Ne’e duni, Igreja Católica halo política nu’udar “consciência critica da nação”! Iha duni ema balun ka grupo ki’ik-oan ida nebe la gosta padre sira hatudu bebeik “consciência critica da nação”, tan ne’e sira piada, tolok no hateten at. Maibe, ida ne’e mosu tan sira nia qualidade intelectual mukit no ki’ak tebes atu hatene historia TIMOR LESTE nian katak povo ida, rai ida, fiar ida no néon ida!

“Misericórdia ... sai em missão”:

catolicismo doutrinal/ tradicional 

Iha facebook Dom Carlos Filipe hakerek “Iha tinan 1976, tropas indonésias atu tama Soibada. Iha loron 20 fulan juñu 1976, comandante Nicolau Lobato ba foti tiha estátua Nossa Senhora nian, lori ba subar iha knua Malus-Hun, iha aitarak-laran”. Dom Alberto Ricardo matebian fo sasin iha TVTL katak molok ba halo funu, Comandante Nicolau Lobato ba reza lai iha capela no husu ba nia belun padre ne’e atu halo missa requiem ida ba nia se mate karik! Nune’e mos, iha internet, jornalista Portugues nian halo entrevista ho Francisco Xavier Lopes da Cruz, oinsa mak nia conserva nafatin nia devoção ba Nai Feto no rai metin bandeira Portugal nian nebe nia hatun ikus ona iha Atauro! Nicolau Lobato no Chico Lopes personifica saída mak ha’u hanaran catolicismo doutrinal ka tradicional. Husi geração foun ita bele hatudu tan Taur Matan Ruak no Rui Maria de Araújo!

Sei iha líder timor oan barak mak, maski iha facão política la hanesan, maibe iha catolicismo doutrinal/ tradicional nia laran, sira bele tur hamutuk no ko’alia. Exemplo boot liu, wainhira Dom Carlos Filipe no Dom Basílio lidera sorumotu Dare I (Setembro 1998, Dare) no Dare II (Junho 1999, Jakarta), líder sira hotu disponível tebes, la’os tan identidade política maibe tan catolicismo nebe sira hetan husi Seminario Dare (no, colégio Soibada).

Nicolau Lobato halo ha’u hanoin Professor Joseph Ratzinger (agora, Papa emérito Bento XVI) nia livro “Einführung in das Christentum. Vorlessungen über das Apostolische Glaubensbekenntnis” (1968; hau iha versão italiano Introduzione alla cristianesimo, 2002). Hare husi ne’e, (1) Nicolau Lobato no líder lubuk ida tan, sira mai husi educação “credo” Niceano (sec. IX) nian nebe haksumik hela “la necessita della fede cristiana per justificare ... la política” (lori fiar sarani nia atu hametin ninia política). Fiar sarani la’os de’it iha altar, maibe mos mai husi rai, mai husi ema kolen, terus no susar! Husi biban seluk (2), política mos sadere an ba fiar (moral) atu bele fo energia, motivação no orientação ba ema hodi luta; la’os sadere an ba kilat no meik ho kroat de’it. Nicalau Lobato (no, Cico Lopes) hatudu lição boot ba ita atu (a) labele halo politização religião – katak, lori religião católica nu’udar “militante partido” hodi halo funu; (b) labele halo mistificação política – katak, devoção no adoração ba liberdade política atu lakohi hakruk ba moral no dignidade humana. Hamutuk ho Prof. Ratzinger ha’u hanoin katak Nicolau Lobato hatudu ona “metanoia espiritual” ida kmanek no kmook tebes: líder ida nebe sente-an ki’ik no ki’ak maibe fiar metin katak nia sei manan funu tan hetan tulun husi Na’i Maromak. Ho liafuan badak, Nicolau Lobato ne’e hatudu SACRAMENTO POLITICO ida – “la hare Igreja husi organização hierárquica, maibe hare ninia organização política husi fiar sarani nian” (Ratzinger: 262).

Tuir mai, le tiha Prof. Ratzinger nia livro, ha’u imagina hikas Kay Rala Xanana Gusmão no Dom Martinho da Costa Lopes ninia “convergência” ka “apaziguamento ideológico” iha Mehara/ Lospalos, 1982. Ita hatene katak, wainhira hahu funu FRETILIN hatama mos ideologia no filosofia Karl Marx nian. Tuir Marx nia hanoin, “The philosophers have only interpreted the world, in various ways; the point is to change it” (cf., Karl Marx Selected Writings, ed. David McLellan, 2002, p. 173). Filosofo sira hakarak interpreta oi-oin mundo ne’e; maibe, ida ema buka liu mak halo buat foun iha rai ne’e! Tebes ka lae? Marx nia doutrina ne’e halo ema lakohi hanoin naruk. Ninia resultado, iha tempo badak nia laran FRETILIN nia luta hahu namtate ona. Ha’u hanoin katak Igreja Catolica lakohi monu iha filosofia marxista nian atu “hatur fiar sarani nian iha Factum, maibe tau fali iha Faciendum” (Ratzinger: 24). Nicolau Lobato hatudu “factum” – nia fiar katak, ninia luta ne’e sei to’o rohan tan nia fiar iha Maromak nia tulun. FRETILIN nia sala mak sira fiar liu ba “faciendum” – katak, hasai tiha religião no lalika fiar Maromak, maibe fiar-an katak sira mak bele halo buat hotu, halo ona lalehan no rai no buat buat hotu ema hare no mos la hare! Iha ne’e Xanana Gusmão no Dom Martinho fiar ba “transformação” – hatur iha NACIONALISMO foun ida nebe hamosu mehi ida, katak, “the rational construction of the optimal institutions of a community that make a happy life possible and that are held upa t a critical mirror before existing abuses” (Ratzinger, Church, Ecumenism and Politics, 1988: 238).

Nicolau Lobato, Xanana Gusmão, Dom Martinho, Dom Carlos Filipe no Dom Alberto Ricardo, hatudu uluk ona saída mak ikus mai Papa Francisco dehan “Entretanto o Evangelho convida-nos sempre a abraçar o risco do encontro com o rosto do outro, com a sua presença física que interpela, com o seu sofrimentos e suas reivindicações, com a sua alegria contagiosa permanecendo lado a lado. A verdadeira fé no Filho de Deus feito carne é inseparável do dom de si mesmo, da pertença à comunidade, do serviço, da reconciliação com a carne dos outros. Na sua encarnação, o Filho de Deus convidou-nos à REVOLUÇÃO DA TERNURA (Evangelii gaudium: 88).

Maski nune’e, catolicismo político hatudu nafatin dilema ida ne’e: “Quando os presbíteros levantam a voz para defender a justiça e os direitos humanos, são acusados de ‘fazerem política’. Quando se retiram do campo, são reprovados pelo seu ‘silencio político’. Face a este dilema, seria difícil imaginar o clero como uma realidade compacta na esfera política” (cf. DR. Domingos Sequeira, Os Presbíteros Diocesanos e o seu Envolvimento na Política: Proibição e Excepção, Roma, 2004). Wainhira hasoru todan no susar, terus no tanis, fakar ran no mate mak Bispo no Padre sira foti lia atu defende justiça no direitos humanos, ukun-na’in sira sei hakilar ‘subar batina laran halo politica’. Maibe, wainhira Bispo no Padre sira hakiduk ka taka odamatan no janela igreja nian, sira be atu lakon ona iha funu hakilar ‘batina mutin tauk ten la halo buat ida’.

“Exprimir a Boa Nova da salvação nas línguas locais”: catolicismo popular

Wainhira Papa Francisco tenik “línguas locais”, nia la’os de’it hatudu ba “língua materna”, maibe mos teologia inchoativa ida – katak, oinsa mak ho “língua” ita bele hato’o Maromak FutarLia ba ema nebe rona! Tan sa mak catolicismo ne’e maioria iha Timor Leste? Papa JOÃO PAULO II dehan katak «uma fé que não se torna cultura – ... – é uma fé não plenamente acolhida, não inteiramente pensada e não fielmente vivida». Santo ida ne’e hatudu katak ita nia fiar no ita nia lisan moris hamutuk iha cultura ida nia laran. Nia sai catolicismo popular ida!

Língua materna mak defini identidade nacional Timor-Leste. Igreja Católica mak hahu defeni ida ne’e. Ita bele hakfodak, maibe, na’ilulik Timor oan rasik mak hahu promove “língua local” ne’e. Nia mak Frei Padre Gregório de Virgem Maria Barreto, OP! Nia mak amo-lulik primeiro timor-oan iha 1826. Iha tinan barak nia laran, nia hala’o knar iha Oecusse, Dili no Manatuto. Tan ninia “ineradicable nativeness”, padre ida ne’e hetan acusação nu’udar político ida nebe halo reunião “clandestina” iha nia uma atu forma governo foun. Governador interino Frederico Leão Cabreira Valente (1838-1842) haruka caputra hodi ba soe iha Surau (Lautem). Wainhira sai husi “dadur”, nia fila mai hela iha Manatuto. Iha 1848, padre ida ne’e sai comissário atu halo estudos ruma konaba limite no fronteira Timor-Oriental no Timor-Ocidental. Wainhira reino Larantuka la simu tratado atu português husik hela Solor no holandês fo Oecusse no fa’an Maubara, Padre ne’e mak ba Flores atu halo povo iha neba hakmatek. Nia tama-sai iha governação colonial nian dala barak. Amo Barreto hahu husu atu traduz catecismo ba lian Tetun no Baiqueno. Nune’e, ideia konaba língua-materna hahu ona! Tradução ne’e iha tebes ka lae, ita la hatene. Maibe, Pe. Barreto mak loke dalan atu timor-oan nebe sai na’ilulik hakarak ka lakohi tama iha zona “abu-abu político”. Padre sira timor oan sei la fase liman hanesan Pilatos ba timor oan nia terus no susar, tanis no halerik ...! Ne’e duni, “nativeness” no “nationalism” hahu!

Tuir mai, Bispo António Joaquim de Medeiros mos promove tétum nu’udar língua oficial Igreja Católica nian. Iha 1875, nia hakerek relatório ida. Iha neba mak nia husu atu missionário sira hahu aprende “língua própria das províncias que exerçam o seu sagrado ministério”, atu nune’e sira bele ona haklaken Evangelho, halo catequese no rona confissões husi sarani sira “na sua própria língua”. Liu-liu wainhira ba visita Viqueque, Luca no Barique, nia husu atu missionário sira aprende tétum. Nia dehan katak tétum “... a pronuncia é mui doce e se adapta bem ao Portuguez”. Ne’e duni, padre Medeiros ninia hanoin no obra boot liu mak: haruka missionário sira atu hatene “línguas locais”!

Iha ocupação Indonesia nian, Igreja Catolica “independente” nafatin hodi hili Tetum nu’udar língua oficial. La’os bahasa Indonesia. Decisão nebe Dom Martinho foti hametin liu tan ho tradução livro litúrgico sira tomak iha Dom Carlos Filipe nia tempo.

Maibe, husi ne’e tomak Papa SÃO JOÃO PAULO II nia lian mak importante liu – nia halo missa ho Tetum iha Taci-tolu 12 de Outubro de 1989. La halo missa ho Portugues ka Bahasa Indonesia. Dados histórico hatudu, katak, wainhira hahu invasão husi Indonesia iha 1975, sarani católico iha Timor Leste to’o de’it 29% (150.000 resin). Seluk animista. Wainhira Dom Martinho da Costa Lopes kaer hikas knar nu’udar Administrador Apostólico Ad Nutum Sanctae Sedis, sarani sira hahu moris buras, sae to’o 50%, iha 1983. Liu tiha ida ne’e Dom Carlos F.X. Belo, SDB ukun hikas Igreja Catolica. Sarani sira aumenta ba bebeik! To’o 1989, wainhira Papa João Paulo II mai visita Timor Leste, catolicismo habelar-an to’o nakfera ho 98% kedas.

Ita bele halo conclusão ho Papa Francisco nia liafuan – “que a vossa fé seja a vossa cultura”. Ida ne’e mak determina NACIONALISMO.