Timor-Leste invoka ajenda kona-ba Konsolidasaun Pás no Konstrusaun Estadu

Timor-Leste invoka ajenda kona-ba Konsolidasaun Pás no Konstrusaun Estadu nian durante Asembleia Jerál Nasoins Unidas nian tinan 2013

Prezidente Repúblika Demokrátika Timor-Leste, Taur Matan Ruak, lidera Delegasaun Timor-Leste nian iha Asembleia Jerál Nasoins Unidas nian tinan 2013. Reprezenta husi Timor-Leste Ministru Estadu no Negósiu Estranjeiru no Kooperasaun, José Luís Guterres, Ministra Finansa, Emília Pires no Ministru Edukasaun, Bendito Freitas.

Forum anuál, ne’ebé nafatin hala’o iha fulan Setembru, halibur líder mundiál sira Estadu-membru Nasoin Unidas nian atu informa kona-ba kondisaun país no rejiaun sira, no mós, atuhodi ko’alia no diskuti kona-ba dezafiu koletivu globál oioin.

Ne’e mak hanesan tinan ba dahuluk ne’ebé Timor-Leste marka prezensa iha Asembleia Jerál, hafoin remata tiha ho susesu iha Misaun Nasoin Unidas nian ba Timor-Leste (UNMIT), iha Dezembru tinan 2012. Retirada  ho susesu UNMIT nian hosi Timor-Leste  konsidera hanesan marku importante ida ba trajetória dezenvolvimentu Timor-Leste nian, ho Autoridade Nasionál ne’ebé hetan ona rezultadu di’ak kona-ba harii Estadu iha setór oioin. Liuliu iha setór Seguransa Nasionál, hetan ona louvor tanba konsege mantein pás no estabilidade iha país.

Prezidente, dirije ba Asembleia Jerál, hateten: “ Povu timor-oan daudaun ne’e, iha ona nia liman, responsabilidade tomak atu harii ninia futuru. Nasaun ne’e hasoru dezafiu ho esperansa no optimizmu ne’ebé aas”.

Membru delegasaun Timor-Leste nian hotu kumpre duni programa ida ne’ebé okupadu tebes ho eventu no sorumutu sira durante hela iha Nova Iorke. Ministru Guterres partisipa iha sorumutu bilaterál sira, ne’ebé inklui serimónia kona-ba estabelesimentu relasaun diplomátika ho Trinidade no Tobago, Letónia no Lituánia. Iha biban hanesan, asina akordu kooperasaun téknika ida ho Repúblika Arjentina. Entre sorumutu oin-oin Altu-Nível nian hirak ne’ebé mak nia partisipa, nia sai mós nu’udar elementu ida husi painél, eventu ida ne’ebé hetan tulun husi Timor-Leste, Finlándia, Guatemala, Filipina no Ruanda ne’ebé hanaran “Atu garante sosiedade ne’ebé pasífika, justa no fleksível iha periódu pós-Ajenda Dezenvolvimentu tinan 2015”. Durante eventu ne’e, reflesaun sira, kona-ba jornada harii pás nian ba Timor-Leste, simu ho interese boot tebes.

Ministra Finansa, Emília Pires, partisipa iha eventu no sorumutu oinoin, ne’ebé inklui ninia aprezentasaun  hodi reprezenta Timor-Leste, iha Intervensaun ida iha Mesa Redonda nian iha “Eventu Espesiál hanesan meiu ida atuhodi aselera Objetivu Dezenvolvimentu Miléniu nian”. Iha biban ida ne’e mós, nia reprezenta Timor-Leste hanesan prezidente g7+ nian, iha tempu han matabixu/ Sorumutu Ministeriál Nível-Aas ne’e, ne’ebé organiza hosi Timor-Leste, Sudão do Sul no Dinamarca, ne’ebé hanaran “Koloka Dame iha Fuan ba Dezenvolvimentu Sustentadu”. Eventu ida ne’e fó biban ba Timor-Leste atu hodi promove Ajenda ba Harii Dame no Harii Estadu no muda komunidade internasionál atuhodi tau Dame hanesan prioridade, nu’udar aliserse importante ba dezenvolvimentu sustentadu. G7+ halo beibeik nia deklarasaun liuhusi emblema: “ Laiha dame sei laiha dezenvolvimentu no laiha dezenvolvimentu sei laiha dame”.

Nu’udar prezidente ba g7+, Timor-Leste lori, ba ajende globál, esperiénsia ida únika kona-ba estratéjia públika no lideransa ne’ebé lori nasaun sai hosi situasaun ne’ebé frájil (fraku hela), liu hosi Harii Dame no Harii Estadu. Fórum g7+ hosi estadu 18 ne’ebé iha kondisaun frájil no afetadu husi konflitu halo nafatin presaun kona-ba komunidade internasionál atu  muda forma envolvimentu tradisionál ba modelu foun ida ne’ebé bazeia ba iha rezultadu no optimizasaun rekursu nian sira ba rezultadu hirak ne’ebé efikaz, ba prazu ida naruk.

Ministru Bendito Freitas, aleinde aprezentasaun hirak seluk, halo mós aprezentasaun ida iha “Eventu kona-ba Direitu Umanu ba Edukasaun iha ajenda dezenvolvimentu nian pós-2015”, hodi diskuti knaar edukasaun nian iha Timor-Leste no nia aprezenta mós proposta ba knaar edukasaun nian iha períodu pós-Ajenda Dezenvolvimentu 2015. Nia hatete katak, “edukasaun mak dalan importante ba dame, dezenvolvimentu no respeitu ba direitu umanu sira”.

Porta-Voz V Governu Konstitusional, Ministru Agio Pereira, hatete katak, “delegasaun ne’e fó kontribuisaun ida importante iha Nova Iorque, hodi aumenta vizaun Timor-Leste nian iha senáriu globál, hodi estabelese rede kooperasaun foun no hodi defende ajenda harii dame no harii Estadu. Esforsu hirak ne’e sei fó benefísiu ba Timor-Leste nune’e mós ba país sira seluk, hodi buka nia dalan ba  reziliénsia (habiit-an)”.

Agio Pereira

Ministru Estadu no Prezidénsia Konsellu Ministru no

Porta-Vóz Ofisiál Governu Timor-Leste

Díli, Loron 8 fulan-Outubru tinan 2013