POLEMIKU LIAN MATERNA IHA TIMOR-LESTE: UZA LIAN MATERNA HODI HANORIN KA HANORIN LIAN MATERNA? NO OINSAA NIA IMPORTANSIA?

Husi Estanislau S. Saldanha, Staf Dosenti ho Peskizador iha Center for Applied Research and Policy Studies (CARPS), DIT


Ohin loron mosu polemika makas iha Timor-Leste konaba uza lian materna hodi hanorin labarik sira foin hahu eskola. Polemika nee mosu tanba UNESCO ho Ministeriu Edukasaun atu halao projetu pilotu lian materna iha distritu tolu: Lautem, Manatuto ho Oecusse. Grupu ida konkorda atu hanorin labarik sira hahu eskola uza lian materna tanba fasilita labarik sira hodi aprende konseitu baziku, aprende lian ofisial ho hametin lian materna nudar kultura ho identidade nasional ida. Grupu seluk la konkorda tanba tuir sira nia hanoin hanorin uza lian materna hanesan politika foer husi liur nian hodi harahun unidade nasional, hamosu diskriminasaun ho sukuizmu. Ka hanorin uza lian materna bele hanesan malisan ida iha edukasaun hanesan temi husi Pe. Martinho Gusmao iha artigu nebee publika iha Forum Haksesuk. Artigu badak nee hakarak hatur uluk konseitu lia materna, klarifika diskursus nebee sala konaba introdusaun lian materna, ho haree nia importansia uza hodi hanorin labarik sira foin hahu eskola.

Sa Ida Mak Lian Materna?

Badauluk, hau hakarak esplika oituan sa ida mak lian inan (ka lingua materna)? Nunee atu “haklot” diskusaun ita nian nebee bele extende sein rohan tanba deit interpretasaun termu la hanesan ka interpretasaun lateral (interpretasaun tuir idak-idak nia hakarak).

Tuir Cambridge Dictionary Online, lian materna katak lian dauluk nebee aprende momentu sei kiik, laos nebee aprende iha eskola ka boot ona (The first language that you learn when you are a baby, rather than a language learned at school or as an adult). Iha Wikipedia mos hatoo katak lian materna hanesan lian ida nebee aprende uluk (the language (s) one learned first...), ka lian nebee identifika ho ema sira nebee kualia nee (the language (s) one identifies with/as a speaker of), ka lian nebee hatene diak (the language (s) one knows best) ka lian ida nebee uza beibeik (the language (s) one uses most).

Nunee lian materna mak lian nebee labarik sira aprende uluk, ka lian nebee labarik sira lor-loron kualia ho nia inan-aman ka ho ema seluk ka lian nebee labarik sira hatene diak liu. Tanba nee, lian materna ba labarik balu iha Uatulari mak Makasae ho Naueti; iha Distritu Lautem mak Fataluku, Makeleru, Makasae; iha Bobonaro mak Bunak, Kemak ho Tetun Terik; iha Oecusse mak Baekenu, no Ainaro mak Mambai ho seluk tan. Iha parte seluk, labarik sira husi inan-aman mai husi distritu no hela iha Dili, sira la koalia ona sira nia inan-aman nia lian materna, no lor-loron sira kualia Tetun ho inan-aman ho ema seluk. Maka labarik sira nee nia lian materna mak Tetun, maske nia inan-aman nia lian materna seluk. Ida nee importante hodi hatene tanba iha persepsaun balu katak labarik sira nia lian materna mak lian materna inan-aman nian.

Uza Lian Materna Hodi Hanorin ka Hanorin Lian Materna?

Ema barak interpreta sala konaba projetu pilotu nebee sei halao iha distritu tolu. Sira interpreta sala tanba sira la le didiak kontiudu konseitu projektu pilotu nee. Sira hanoin projetu nee atu hanorin lian materna. Nunee sira la fiar projetu nee sei hetan susesu. Tanba iha Timor Leste lian barak, rekursu limitadu, lian materna seidauk sistimatizadu ho razaun seluk. Aat liu tan sira balu dehan hanorin lia materna sei harahun unidade nasional, hamosu sukuizmu ho instabilidade nasional. Ka dehan politika foer ema liur nian hodi fahe Timor oan no troka lian ofisial.

Hau hanoin projetu pilotu nee laos hanorin lian materna maibe uza lian materna hodi fasilita labarik sira foin hahu eskola atu aprende. Labarik sira foin hahu eskola liu-liu iha area sub-distritu rural barak mak la hatene Tetun ho Portugues alias sira kualia deit sira nia lian materna. Nunee susar tebes hanorin sira ho Tetun no Portuguese. Karik obriga uza Tetun ho Portugues dala barak halo eskola ladun atraktivu, no labarik sira iha tendensia dekora deit, no la hatene kontiudu materia nebee hanorin. Nia implikasaun mak numeru labarik sira nebee para eskola bele aumenta.

Belun balu dehan, iha Portugues nia tempu, hanorin labarik sira ho Portugues diak hela, ho ohin loron halo ema matenek barak, no agora halo nusa mak uza Tetun ho Portugues ladiak fali? Hau dehan metodu hanorin uluk oinseluk, uluk uza aprosimasaun hanorin kolonial nebee violentu no kontra direitus ema nian. Uluk la uza metodo dialogu maibe liu husi impozisaun. Mestri sira obriga labarik sira aprende ho Portugues. Bainhira labarik sira kualia lian seluk sira baku, tebe, basa, hanehan kadeira ka meza ba labrik sira nia ain ou liman fuan ou haruka hakneak oras ba oras. Se mak uluk eskola iha tempu Portugues nian, konserteza sira hatene saida mak palmatoria, rota, ai-sanak ka sukaer sanak. Labarik sira la ba eskola, administrador postu ho sefi suku bolu inan aman sira hodi siak ka baku. Esperiensia pesoal ho observasaun hau nian durante eskola iha Eskola Primaria Uatulari iha tempu Portuguese nian hatudu ida nee. Labarik balu tauk la ba eskola ka hili dalan para eskola tamba tauk mestri sira halo torturas fizikas hasoru sira. Balu ba nafatin duni eskola, tamba tauk inan-aman baku ou obriga mak ba eskola maski labarik sira hetan tiha ona trauma iha eskola tamba torturas sira nebee mestri sira halo ba sira. No hau fiar meius nee iha mos fatin seluk. Metodu hanorin nee halo labarik sira la iha opsaun, sira tenki obriga aan hodi aprende ho kualia Portugues.

Iha tempu agora, metodu hanorin “obrigatoriu ho violentu” la serve ona. Tanba metodu nee kontra direitus umanus ema ho labarik sira nian nebee konsagra iha Konstituisaun RDTL ho konvensaun internasional direitus ema ho labarik sira nian. Nunee mestri sira tenki buka meius diak halo eskola sai atrativa, ho estimula labarik sira interese ba eskola hodi aprende, no evita labarik sira para sedu eskola. Mos metodu hanorin violentu bele transfere deit karakter violentu ba labarik sira. Nunee labarik sira haree violensia nee hanesan buat ida baibain, nebee eventualmente bele kontribui hodi forma karakter violentu iha sosiedade nia laran. Maka uza lian materna hodi hanorin labarik sira sei sai hanesan meius ida hodi halo eskola ho metodu hanorin atrativa ba labarik sira.

Importansia Uza Lian Materna Hodi Hanorin Estudu barak ona hatudu rezultadu diak tebes ba labarik sira foin hahu eskola bainhira hanorin uza lian materna. Uza lian materna hodi hanorin sei tulun labarik sira tama ho susesu iha eskola (Kosonen, 2005), inan-aman sira fasil komunika ho mestri sira no partisipa iha prosesu aprendizajem labarik sira nian (Benson, 2002), benefisia grupu disvantajen sira, inklui sira nebee iha area rural ho komunidade indijena sira (Hovens, 2002), prestasaun akademiku diak, ladun repete materia nebee simu (UNESCO, 2005 ho Boonroj, 2010). Bainhira labarik sira hatene diak lian materna, sira aprende lian seluk lais liu tan (Skutnabb-Kangas, 2004, Cummins, --- ho Frankfurt international School/FIS,---). Nunee mos sei halo labarik sira fiar an (confidence), sinti iha harga diri (self-esteem) ho apresia nia identidade nebee uniku iha sosiedade multikultural (Sanedeera, --- ho Boonroj, 2010).

Rezultadu estudu sira nee mos bele hatan argumentu sira katak uza lian materna sei habeik ho halo labarik sira nia kapasidade ba lian ofisial ka lian seluk sei kiik nebee sei difikulta sira hetan servisu, eskola ho konvivensia internasional. Razaun sira nee kontraditoriu ho situasaun aktual labarik sira foin hahu eskola nebee sei la eskola ho termu sientifiku aas, seidauk hatene lee ho hakerek no dok tebes husi “idade servisu”. Iha nee, metodu hanorin apropriadu liu maka uza meius hanorin halimar (learning and teaching by playing methods), ho simulasaun via komunikasaun verbal ho audio-vizual (oral communication, and simulation and audio-visual methods). Nunee fasil tebes esplika konseitu baziku ho aprende lian seluk dala ida deit uza lian materna. Tanba nee, materia hanorin bele uza materia nebee iha, maske iha lian seluk. Tanba transferensia materia sira nee ba labarik via komunikasaun oral ho audio-vizual nebee mestri sira halo via lian materna nebee labarik sira hatene diak. Husi estudu sira nee mos justifika oinsa labarik sira hetan notas diak tebes uza lian materna, maske teste uza lian ofisial ho exame tuir standar nasional.

Edukasaun mak meius apropriadu ho efetivu hodi valoriza ho prezerva lian ho kultura ida. Tanba nee, estadu valoriza ho dezenvolve lian Tetun ho lian materna (Artigu 13 Sec 2 Konstituisaun RDTL) sei efetivu liu via uza hodi hanorin iha eskola, ka ba labarik sira foin hahu eskola. Estadu mos tenki rekuinese ho garante sistima ensinu baziku universal, obrigatoriu ho posibilidade gratuita ba sidadaun sira (Konstituisaun RDTL Artigu 59 Sek 1), no afirma ho valoriza personalidade ho patrimoniu kultural (Artigu 6 Sek g Konstituisaun RDTL). Nee signifika katak Konstituisaun RDTL nudar lei inan ba lei hot-hotu fo dalang ho obriga governu hodi valoriza ho dezenvolve Tetun ho lian materna via meius nebee apropriadu ho efetivu liu, no hamosu meius atrativu hodi estimula labarik sira eskola ho aprende matenek ho valor umana diak seluk iha nia patrimoniu kultural (inklui lian materna) nudar identidade sira nian. Tanba nee, ita la bele dehan hanorin labarik sira uza lian materna sei kontra lei.

Bainhira hanorin labarik sira uza sira nia lian, laos halo sira dezenvolve deit kapasidade intelijensia, maibe halo sira sei hadomi mos sira nia lian, kultura, ho ema seluk nian. Hatoman labarik sira hodi valoriza ema seluk nia lian ho kultura sei halo labarik sira bainhira boot, sei hakesi aan iha unidade ida nebee fundamenta iha diversidade, eventualmente kontribui ba paz ho prosperiedade iha sosiedade ida (Kadel, 2010). Nunee edukasaun halo labarik sira sai matenek ho iha kompetitividade aas iha nia kultura ho identidade laran. Edukasaun la bele halo labarik sira sai fali ema seluk. Ka tuir Anacleto Ribeiro (2012) edukasaun tenki hanorin Timor oan sai Timor oan diak ida, laos hanorin Timor oan sai fali malae oan diak ida. Nunee uza lian materna hodi hanorin labarik sira foin hahu eskola nia argumentu sei antagoniku ho razaun ema balun nian katak politika nee sei harahun unidade nasional, hamsou sukuizmu ho habeik labarik sira.

Maktaka

Politika lian materna nebee atu introdus husi Ministeriu Edukasaun ho UNESCO foka ba oinsa uza lian materna hodi fasilita labarik sira foin hahu eskola atu aprende, laos hanorin lian materna. Tanba labarik sira iha area balu la hatene Tetun ho Portugues. Nunee lian materna bele uza hodi halo tranzisaun gradual labarik sira husi aprende iha lian materna ba Tetun ho Portugues sein elimina prosesu hanorin/aprende konseitu baziku iha inisiu eskolaridade. Mos halo inan-aman sira partisipa iha prosesu aprende labarik sira nian. Nunee lian materna sei la troka Tetun ho Portugues nudar lian ofisial iha sistema edukasaun tomak, sei la ameasa unidade nasional, la hamosu sukuizmu ho habeik labarik sira, no la kontra lei ruma, tanba Konstituisaun RDTL (Art. 6, Art. 13 ho Art. 59) nudar lei inan fo dalang ba ida nee.

Estudu barak ona hatudu katak hanorin uza lian materna ba labarik sira foin hahu eskola sei tulun labarik sira aprende lalais konseitu baziku, performa akademiku diak, ho aprende lian seluk lais, dezenvolve kapasidade kognitivu, halo labarik sira abitua moris iha ambiente diversidade nian. Maske nunee, hanorin uza lian materna iha Timor Leste presiza estudu hodi haree nia efetividade. Projetu pilotu hanesan metodu sientifiku ida hodi analiza metodu, prosesu ho rezultadu politika nee nian. Bainhira rezultadu diak ho efetivu, politika nee bele kontinua, maibe rezultadu ladiak bele hapara.