Martinho G. da Silva Gusmão
Mestrado Teologia Politica – STFT Widya Sasana Malang
Mestrado Filosofia Politica – Pontificia Universidade Gregoriana, Roma
Professor ba Filosofia iha ISFIT, Fatumeta, Dili
Husi “DEMOCRACY” ba to’o “IDIOCRACY”, Hanesan husi “DEMISTIFICAÇÃO FALHADO” ba to’o “INTELECTUAL FALSU”
Iha Estados Unidos Americano (EUA), artista sira halo film ho titulo IDIOCRACY (2006) – 20th Century Fox. Film ida ne’e ninia genre mak science fiction comedy, ko’alia konaba soldado Americano ida nebe hola parte iha “hibernation experiment” – katak, hatama ema iha geleira malirin los laran atu moris naruk, to’o tinan 500 mak hasai husi kulkas laran. Nune’e, nia tama iha 2005, sai fali iha 2505. Sai husi kulkas laran, soldado ida ne’e hasoru mundo foun ida, laos ona utopia maibe dystopia.
Wainhira Donald J. Trump lakon iha eleição 2020, nia provoca no sunu ninia apoiante sira tama Washington … sira koko atu “hadau meja” Congress (joint session entre Senat no House of Speaker). Meja la monu, maibe Presidente Trump mak ameaçado. Nune’e, comentario lubuk ida iha CNN, MSNBC too ABC, BBC no DW, inclui Al Jazeera hatudu katak mundo tomak hakfodak … oinsa mak bele mosu “our Democracy turn to be our Idiocracy” – ita nia demokrasia nakfilak tiha ona ba ita nia idiokrasia; “Trumpism is a cataclysm of democracy in march” hodi lori USA tama duni iha IDIOCRACY. Tuir lolos, idiocracy nee mosu iha 2505, maibe afinal 2020 deit nia kona tiha ona!
UTOPIA (Thomas More) katak, hatudu ba mundo ida nebe iha deit mehi laran mak bele hetan. Hanesan lider balun dehan “Hau sei halo lalehan iha rai ne’e”, to’o halo buat hotu ema hare no mos la hare. Ninia resultado, ko’alia barak too kosar suli maibe resultado la hare ho matan. Maibe, filosofia utopia ne’e mos hatudu ba oinsa mak ita ema hakarak nafatin atu buka moris diak, no moris nakonu liu tan.
Ba fali DYSTOPIA (John Stuart Mill), atu dehan soldado mandado tama kulkas 2005, sai mai iha 2505 nia ne’e hetan deit mak situação desumano, “exploração do homem pelo homem” (Karl Marx & Friedrich Engels), governação tiranica, no desastre naturais. Ho liafuan badak, buat hotu nebe nia hare sira ne’e hatudu ba “cataclismo” nebe hamonu sociedade ida. Baibain, filosofia Dystopia ne’e mosu iha obra da arte sira (fiction). Fou-foun mosu iha 1932 mak hanesan Aldous Huxleyho nia obra Brave New World; iha fali 1949, George Orwell hakerek Nineteen Eighty-Four; no iha 1953, Ray Bradbury hakerek Fahrenheit 451. Husi livro fiction ne’e ita bele hare oinsa mak arte koko ke’e sai problema social, politica, economia, religião, psicologia, ciencia no tecnologia iha Estado totalitario nia laran ka Estado avançado nebe hahu FALHADO.
Uluk lider FRETILIN 74/75 (hau la hakarak bok ema nia “Partido Fretilin”) ko’alia bebeik konaba UTOPIA nudar “construção da sociedade nova” (Nicolau Lobato, Mensagem Natal 1974) ka “construir uma nova sociedade livre da exploração do homem pelo homem” (mensagem ba FALINTIL, 1975); nune’e mos José Alexandre Gusmão hakerek poema “Mauberíadas” (1974) hodi hanaran UTOPIA nudar “esperança … mundo novo”. UTOPIA laos hanesan ita hanoin badak dehan “mehi mamuk”. Lae! UTOPIA ne’e hanesan sasukat ida atu hare buat nebe “SEIDAUK IHA” (Noch nich Bewußtsein) moris seidauk too rohan, nune’e hamosu nafatin “mehi” ka ESPERANÇA ba moris foun no moris diak. Hau kaer tuir filosofo Marxista-Ateu Ernst Bloch nebe hakerek Das Prinzip Hoffnung volume 1, 2, 3 (Prinsip Pengharapan). Husi ne’e mak hau hare katak ita luta tinan 24 nia laran, ohin loron ita hotu bele ona “[…] melihat langit yang baru dan bumi yang baru” (Wahyu 21, 1). Tuir lolos ne’e, ita hotu fiar katak MAROMAK tun mai rai ne’e atu nune’e, “[…] menghapus segala air mata dari mata mereka, dan maut tidak aka nada lagi; tidak aka nada lagi perkabungan, atau ratap tangis, atau dukacita, sebab segala yang lama itu telah berlalu” (Wahyu 21, 4).
Ikus-ikus ne’e hau gosta le Bloch ninia obra sira (sai materia filosofia iha ateismo contemporaneo nebe hau hanorin iha ISFIT Fatumeta) tan – maski nia hanesan marxista-ateu ida maibe nia hakerek livro (Das Prinzip Hoffnung, volume 3) hanesan halo homilia todan ida. Nia halo critica maka’as ba Marx, foti husi Biblia barak --- Exodo, Profeta sira (Isaias, Jeremias, Ezquiel), Evangelho (liu-liu Lukas) no Apocalipse (Revelation). Bloch dehan, Religião (Cristã) ninia essencia mak “protes” hasoru injustice no foti lian hasoru buat falsu sira; laos hanesan fali Marx dehan, “opio ba povo”. Husi nia mak hau aprende katak saida mak FILOSOFIA (politica) dehan konaba UTOPIA, nee TEOLOGIA (politica) hanoin konaba ESPERANÇA (Jürgen Moltamaan & J.B. Metz), hodi hamosu ida mak teologia da libertação, no teologia praxis sira seluk. Tan ne’e hau admira tebes Nicolau Lobato ho Xanana Gusmão, wainhira sira na’in rua hakerek konaba UTOPIA no ESPERANÇA.
Ita fila ba IDIOCRACY, hau atu dehan artista sira halo film iha 2005, maibe la to’o tinan 500, iha 2020 de’it USA nia democracia nakdoko oituan de’it, maibe kona duni. USA hetan independencia iha 1776 nudar Estado de direito Democratico moderno. Ita iha Timor-Leste mehi hari’i DEMOCRACY, maibe loro-loron ita mak “patina” hela iha IDIOCRACY nia laran. Iha 1975 ita hahu luta ba UTOPIA DEMOCRACIA … la to’o 2025 (katak, la too tinan 50) ita selok malu ona iha DYSTOPIA IDIOCRACIA. Hahu husi “hadau Meja PN” (Dili – 20.05.2020), ne’e barak ka oituan, ita hahu ona IDIOCRACY; iha Washington (USA), sira hahu iha Loron Epifania, 06.01.2021 mak hatudu katak “idiocracy” ne’e subar iha ita nia let hotu.
Iha UTOPIA uluk nian, FUNDADOR sira hanoin konaba “sociedade nova”, labele tan iha “malae ukun ita rai// … susu ita rai boku// ita isin bokur” (Borja da Costa); “kaer rasik kuda talin// ukun rasik ita rain” (Borja da Costa); hamoris “democracia no seio da massa” (Nicolau Lobato). Iha DYSTOPIA ohin loron, FURADOR sira mak koko atu hamosu IDIOCRACY hodi tonka ho “commercialism” hamutuk ho “anti-intelectualism”.
ATENSAUN – hau dehan “fundador sira”, katak ema hotu-hotu nebe hahu movimento politico iha 1974-1975 iha ASDT-FRETILIN. Ema ruma mak sai mesak no moris mesak iha “hau mak fundador” nia knuk laran, ne’e fora da area cobertura hau nian. Nune’e mos, hau dehan “furador sira” – katak ita hotu, dala ida tan “ita hotu” nebe lakohi le sa tan lakohi halo tuir Democracia no Constituição nia haruka hodi hanorin fali buat FALSU, nee tama hotu iha “furador sira”.
Saida mak hanaran Estado IDIOCRACY? Tuir critico film balun, sira dehan Idiocracy ne’e sustenta husi COMMERCIALISM no ANTI-INTELECTUALISM.
Koalia konaba COMMERCIALISM, hau la dun iha jeito. Diskusaun ka imagem nebe artista sira halo iha film nia laran ne’e hau compreende, maibe atu explica fali tuir Timor-Leste nia situação, hau tenki buka dalan seluk.
Hau hahu ho exemplo: Belun ida servisu nudar Funcionario Publico. Dala ida ami hasoru malu, nia husu atu “empresta osan”. Hau hateke nia oin, hau hamnasa tiha. Maibe, hateke nia matan laran, hau hahu sente katak “something wrong”!! Hau jura ba nia, katak, hau mos osan la iha. Hau promete atu ajuda nia hasoru took ema boot balun. Nia hateke hau, nia mak hamnasa fali. Hau hakfodak! Hau nia pergunta – se funcionario public de’it mos dada iis ona osan la iha, sa tan ami “rakyat” rai-aat sira ne’e? Maibe, depois hau nia maluk sira halimar iha FB dehan OGE2020 aprova ona, “#colek Amo Martinho”; depois dehan OGE2021 aprova ona “#auoooo”! Ikus mai ema boot mai explica dehan ita nia osan hatama hotu iha BANCO FEDERAL … nia funan sae maka’as …!!! Depois, SESTA BASICA … empresario sira hatama sasan, ministro sira sosa hodi fahe ba Povo! Fahe hotu tiha, EMPRESARIO ki’ik sira nia OSAN nee GOVERNO lori hanesan TUSAN. Husi biban seluk, Povo iha area rural dehan “ami la precisa sesta basica” (sira iha fehuk, ai-farina, kulu, modo tahan, hare no batar). Buat nebe ema sira iha area remota husu mak OSAN. Agora, oinsa mak bele lori osan ba Povo, se OGE2020/ 2021 aprova tiha (promulga ona??), depois Ministro fo sai katak hatama hotu iha FEDERAL BANK??? Auuooo!!!
Atu halo teoria karik, ita nia Estado (husi I too VIII) nakonu ho COMMERCIALISM … katak, buat hotu-hotu depende ba projecto, faan hira sosa hira, projecto hamlaha, projecto moras, projecto dalan, projecto be-mos, maibe hotu-hotu depende ba OGE. To’o POLITICA mos tama hotu iha zona commercialism --- exemplo, maski escola matenek maibe tama Partido Feuk ka Partido FohoLolon dirigenti diuk, maibe lori netik osan hodi “sosa kadeira” depois hetan fali funan fuan liu husi raga ho bote, luhu ho lisun povo nia susar. Ida ne’e halo katak Governo ne’e “VIABILIZADO” ka “RIDICULARIZADO”?? --- VIABILIZADO katak UTOPIA, halo ita bele hare dalan lori ita mehi duni atu lao ba oin; RIDICULARIZADO katak DYSTOPIA, halo ita patina iha fatin oin nakukun hare fitun meiodia boot.
Husi momento “ridicularizar” ne’e mak IDIOCRACY hatudu hahalok ANTI-INTELECTUALISM. Ba ema sira nebe sustena “idiocracy”, ema seluk nia hanoin nebe la tuir sira nia Governo mesak INTELEKTUAL FALSU. Sira ne’e ANTI-INTELECTUALISM, tan hatudu hostilidade to’o “mistrust” (la fiar) ba katak inteligente (hanoin ho ulun rasik) nee buat diak, moris nudar intelectual nee kmanek no intelectualismo nee kmook. Ema sira nebe afilia ona ba Partido, wainhira kaer ona ukun no tur ona iha kadeira poder nia leten, hare katak EDUCAÇÃO no FILOSOFIA ne’e “miring”, maibe mos dun-matak obra da ARTE, LITERATURA (inclui jornalismo) no CIENCIA mesak imparsial, nakonu ho motivação politica. Jornalista no academico nebe hakruk ba Estado nia linha politica ne’e mak matenek no honesto … sira nebe ko’alia la tuir ukun na’in nia hakarak ne’e mesak “profeta falsu”, “intelektual desonesto”. Ne’e lagu lamaaa … uluk iha AMP mos nune’e … to’o agora Governo Viabilizado mos hanesan.
Dala barak liu mak ANTI-INTELECTUALISM sira ne’e hatudu an hanesan sira mesak de’it mak hatene liu Povo nia moris, sira mak defende Povo nia interesse ba moris di’ak. Nune’e sira lori meios hotu-hotu atu sai POPULISTA hodi contra maka’as ACADEMICO sira no dehan aat nudar “elitism”, liu-liu hadaet ba ninia afiliação politica.
Ita tenki haketak lai liafuan rua “ACADEMICO” no “INTELECTUAL”, hodi hakait fali ba malu. Timor oan lubuk ida hetan sorte atu halo karier ACADEMICO, hodi escola husi S1 ba S2 to’o S3 iha rai liur. Fila Nmai Timor, hotu-hotu temi “Doutor”. Hau mos hetan sorte boot, bele ba estuda iha Indonesia (Flores, Jakarta mai fali Malang), liu ba Roma (Italia) depois tuir curso balun iha Paris (França) no Oxford (UK) to’o Bielefeld (Jerman), nune’e la barak maibe hau bele ko’alia Tetum, Bahasa Indonesia, Italiano, Ingles no Portugues; barak ka oituan, hau bele le Espanhol, Frances no Alemão. Dadaun ne’e, hau nia estudante ida husi ISFIT Fatumeta halo “compilação” ba hau nia artigo sira, no hau hakfodak oituan katak nia consegue formula tema sira nune’e nia sei publica Volume 7 kedas. Iha Mestre ida iha Lospalos no ida iha Baucau hasoru hau, hatudu sira nia koleksi ba hau nia artigo sira … husi kedas Indonesia nia tempo too mai agora. Hau admira tebes! Laos gaba an … maibe, admira katak sira le tiha artigo depois iha ideia balun nebe sira la concorda no halo discussão ho hau. Hau dehan buat ida … hau aprende husi sira nia leitura. Hau hakerek iha iha FB, ema SHARE de’it mak dala ruma husi 100 to’o 500. To’o agora, hau hakerek ona livro 12 iha lian 4 – Tetum, Bahasa Indonesia, Ingles no Portugues; iha artigo balun traduz iha Frances no Japones.
Hau temi obra hirak ne’e atu dehan, dala ruma ema hasai titulo ACADEMICO oi-oin maibe la significa katak sira nia moris INTELECTUAL mos buras lalais. ACADEMICO ne’e sukat husi Ijazah ka Diploma. INTELECTUAL nee sukat husi obra cientifica (teoretica) no ciencia popular, hakait ba PRATICA SOCIAL. Ema ida hasai ijazah tiha, maibe baruk la le no la hakerek, katak, nia ne’e academico matenek ida maibe intelectual baruk ten ida.
Iha area TEORIA nian, hau hakerek livro ida de’it konaba HERMENEUTICA no RETORICA. Livro ida ne’e, ninia orginal hau hakerek ho dalen Ingles (disertação iha Gregoriana Roma, 2005), halo exame iha dalen Italiano (extract publica iha jornal analecta universidade nian) … ikus mai publica nudar livro iha Kanisius, Yogyakarta (2013). Iha Timor, hau nia livro ne’e la dun terkenal. Maibe, iha Indonesia estudante FILOSOFIA sira iha UGM ho IAIN (Yogyakarta) no hau nia escola rasik STFT (Malang) kaer ba halo diskusaun no teoria ba peskisa (Al Quran ho Biblia), to’o Kupang mos estudante Protestante sira usa nudar teoria ba sira nia estudos/ pesquisa.
Iha CIENCIA POPULAR, hau hakerek liu mak konaba Timor-Leste. La barak ba mos, iha netik livro 10 resin, no sei mosu tan volume 7 husi hau nia estudante. Artigo sira ne’e mai husi hau nia paper no hands-out nebe hau lori ba ko’alia iha Universidade lubuk ida iha rai-liur, hanesan United Nations University (Tokyo), Charles Darwin University (Australia), University of California Santa Barbara (USA) nune’e mos iha UNTL no UNDIL, UNPAZ … to’o World Religious Peace Forum (WRPF, Seoul) nune’e mos Asian Conference of Religions for Peace (ACRP, Jakarta no Tokyo) to’o European Bishops Conference – Commissions for Justice and Peace ho CCFD (Catholique Commission pour la Fame et Devopment (Archidiocese Lucerne/Geneva mak convida). Lubuk ida shaa …
Iha PRATICA SOCIAL, hau nia experiencia la barak … uluk, fila husi Malang (Indonesia) iha 1998-1999 hau ajuda Bispo sira atu sai hanesan “assessor” (katak, “hiasan”) hodi bele halao DIALOGO DARE I no DARE II; fila husi Roma, hau ajuda bispo no liderança75 halo FORUM MAUBISSE I, II no III (2010 – 2012) – Kay Rala Xanana Gusmão, Ramos Horta, Mario Carrascalão, Mari Alkatiri, Lu-Olo, Taur Matan Ruak no Jose Luis Guterres. Dala ida tan, “ajuda”, de’it.
Nune’e mos, iha nivel “Campones” nian, hau nia pratica social mak liu husi hau nia CENTRO DO DESENVOLVIMENTO COMUNITÁRIO (CDC), Baucau. Nudar “Centro” ida, hau design fatin ne’e atu fo formação INTELECTUAL (laos ACADEMICO), atu sira hare rasik ho matan, hanoin rasik ho ulun no kaer rasik ho liman; husi sikun “Desenvolvimento”, hau hakarak atu foinsae sira nebe mai moris iha fatin ne’e hodi hamoris “mentalidade verde”, katak han husi kolen rasik no hemu husi kosar-wen rasik, la husu esmola la tane liman; no ikus liu, “Comunitario” katak fiar ida, neon ida moris hamutuk iha damen laran.
Hau agora dedika hau nia pesquisa no hakerek konaba NICOLAU LOBATO ho XANANA GUSMÃO nia pensamento. Sira na’in rua mak FUNDADOR lolos, tan hola knar tomak iha area POLITICA, MILITAR no INTELECTUAL.
Hau nia area mak HERMENEUTICA, teoria no filosofia. Liu husi dalan ida ne’e, hau koko atu halo DEMITOLOGISAÇÃO ba NL no XG, maibe liu-liu halo CRITICAL HERMENEUTIC atu ita labele halo sira sai ideologia mamuk ida. Tan sa mak “demitologisação”? Tan sira na’in rua la’os MITOS maibe REALIDADE historica ida. Sira iha kakutak atu hanoin, sira iha fuan atu sente no sira iha liman-ain atu kaer no lao tuir ain-fatin. Ema sira nebe tabele tuir sira mak koko halo MISTIFICAÇÃO ba sira nudar lider CARISMATICO … afinal, sira na’in rua simplesmente “SEMINARISTA” sira nebe FALHADO tan la sai Padre, maibe biban duni sai fali saida mak filosofo Aristoteles dehan “SHEPHERD OF PEOPLE” (Bibi-Atan Povo nian), tan hatudu “dalan, lia los no moris” ba POVO atu hatene buka dalan dalan los no lia-los: UKUN RASIK’AN.
Hahu 1989 hau hanorin iha SD iha Dili, depois hanorin SMP iha Jakarta (no Soibada), hanorin mos SMA iha Malang (sai mos konsultan ba maluk mahasiswa lubuk ida husi Timor no Indonesia atu sira bele hakerek skripsi no tesis) … ikus mai sai dosen. Hau sura, kariera academica tinan 31 … tan ne’e, hau haluha lakon livro hira mak hau le ona, matenek na’in sira hira mak hau foti sira nia liafuan … to’o artigo hira ona mak hau hakerek mos, hau la sura ona. Sa tan nudar docente filosofia, hau sai orientador/ examinador ba estudante sira iha ISFIT (estudante 75-100 karik) … sira estuda/ halo pesquisa konaba filosofo barak (bele to’o 25) karik! Ne’e be, se hau hakerek karik konaba intelectual boot sira, ne’e hanesan “senjata otomatis” no hotu-hotu mesak “ultima bala” …
So que, hau hakfodak los … iha fali ema nebe halo pesquisa, halo estuda klean no hakerek naruk kona deit ba hau. Makaas!!! Hau contente tebes katak iha duni ema nebe hakerek naruk, ko’alia barak maibe “SUBJECT” mak ida de’it … PADRE MARTINHO GUSMÃO. Ema sira ne’e estuda maka’as atu hatene oinsa mak Padre Martinho ne’e hatudu ninia INTELEKTUAL FALSU. Estuda naruk tiha, sira rame-rame hakerek lisuk “disertasi” ida kona deit ba Padre Martinho Gusmao, intelektual falsu. Hau koko buka tun baka sae, Universidade ida nebe mak hanorin maudabak sira ne’e atu hamosu Faculty of MARTINOLOGY. Hau orgulho, tan iha duni ema nebe dedika ninia estudos, ninia matenek, ninia peskiza no ikus mai hakerek teoria INTELEKTUAL FALSU. Infelizmente, hau labele fo medalha condecoração ba juara I suma cum laude, tan ID-FALSU. Maibe, diak liu lalika lakon imi nia tempo – tan MARTINOLOGIA seidauk iha ninia status academico, no Ministerio Educação sei la fo ACREDITAÇÃO ba imi nia faculdade ne’e. Taka tiha imi nia Universidade la iha qualidade nee diak liu tan …
Hau hakarak fo balansu foun:
1) Se ID-FALSO gosta hakerek bebeik konaba MARTINOLOGY, imi nia matenek sei la aumenta, sa tan hasae imi nia qualidade intelectual … tan hau laos MITOS no laos MITICO. Imi gasta tempo, no soe saugati deit imi nia matenek wainhira halo MISTIFICAÇÃO ba hau. Mai ita rame-rame halo grupo ka comunidade foun nebe hadau malu le livro barak, no fahe matenek ba malu, halo discussão academico (hanesan matenek na’in sira iha liur halo Timor-Leste Studies Association/ TLSA) … bele karik le iha lingua oi-oin. Se la mampu no kakutak mamuk karik, mai hau ajuda … hau bele le iha Tetum, bahasa Indonesia, Ingles, Portugues, Italiano, Espanhol … oituan-oituan hau bele sani iha Frances no Alemão (ho kamus Alemão-Italiano, hau brani). Se ID-FALSU mampu deit mak Tetum, no hatene de’it mak Padre Martinho Gusmão … klot no kolot demais. Favor, lalika sai hanesan “kodok di bawah tempurung”.
2) Hau gosta liu imi halo DEMISTIFICAÇÃO ba Nicolau Lobato ka Xanana Gusmão. Ida ne’e bele halo rame palco academico … tan iha Timor-Leste ne’e POVO TOMAK (husi Lospalos to’o Oe-Cusse) nia ulun laran ne’e dader Nicolau, loraik Xanana; meiodia Xanana, kalan Nicolau. Avenida Nicolau, Rua Xanana, Instituto Xanana, Centro Nicolau …!!! Agora, imi ba halo fali MISTIFICAÇÃO ba Martinho Gusmão, coitado liu!! Ka, kolen ona halo rumores DEMISTIFICAÇÃO ba Xanana no Nicolau, no la agoenta ona mak mai sibuk fali ho Martinho Gusmão?? Auoooo … INTELEKTUAL FALSU mak nee duni.
3) Se la agoenta, hau nia estudante filosofia ida iha ISFIT Fatumeta hakerek monografia konaba FALIBILISM THEORY (Karl R. Popper). Nia hatene explica saida no oinsa nudar INTELKTUAL ida, ema nee bele hamosu FALIBILISMO iha teoria hotu-hotu nia laran. Wainhira matenek na’in ida bele hatudu TEORIA ruma nebe FALSU, significa nia hamosu ideia foun ka halo INOVAÇÃO. Ne’e duni, INTELEKTUAL hotu-hotu iha capacidade atu bele hare buat nebe FALSU, no hatudu dalan ba buat nebe LOS.
4) Maibe, ID-FALSU labele sai INTELEKTUAL, tan nia rasik FALSU. Sa tan materia nebe nia ko’alia ne’e laos FALSU, tan Padre Martinho nee concreto, isin-klamar, naran no hela fatin … ASLI hotu. La FALSU …, tan Martinho Gusmão iha duni “Courage” iha “grace under pressure”. ID-FALSU ne’e nivel mate-klamar, bele mos VIRUS CORONA … nebe mosu lakon mosu lakon, la hare hetan maibe halo ema bingung fali. So que COVID19 ne’e halo tauk ema, virus falsu ne’e mak tau fali la hatudu oin iha public.
Maibe, pronto … ohin loron ita nia DEMOCRACIA sai ona IDIOCRACIA, nune’e ID-FALSU mak maninga sae. So que, ID-FALSU labele sai INTELEKTUAL diak ida, tan nia la hatene no la iha capacidade atu bele kaer teoria “FALSU”, hodi lori ba dalan LOS. ID-FALSU bele deit too iha nivel ANTI-INTELECTUALISMO, no nia bele de’it moris nudar “CENDEKIAWAN ABDI DALEM” (istilah Presidente Abdulrahman Wahid ka Gus Dur) – katak, matenek na’in sira nebe hare hela no hare mos los “realidade” nebe todan no susar (por exemplo COVID19), maibe taka matan no taka neon atu ko’alia sai lolos. INTELEKTUAL FALSU ka CENDEKIAWAN ABDI DALEM ne’e sira nebe sai “assessor” (penghias; penghibur) ba Ministro ida atu ko’alia ulun tun ainsae …! Oh, tan sa mak iha Assessor 20 atu fo hanoin lisuk ba Ministro 1; maibe sira la bele kedas ajuda Doutor/ Medico 1 nebe tenki agoent pasiente 20 …??? Oinsa mak bele explica, wainhira “Assessor” bara-barak bele fo matenek ba PM-Interino Viabilizado, de repente de’it COVID19 sae husi 1 ba kedas 18 ne’e? Depois, besik ona PM-Viabilizado fila husi ferias tama kantor, COVID19 halai lakon lubuk ida no hela 12 de’it iha loron baluk nia laran? DESONESTU mak ne’e … DESGRAÇADO …
Ba ID-FALSU sira … Nicolau Lobato nia liafuan karik dehan imi sira ne’e TRAIDOR ka reaccionário sira. Nia dehan nune’e, “Reaccionários são os oportunistas que procuram entrar no jogo sem se comprometerem, são os que tentam mover outros para o barulho, para a luta política e se põem detrás dos bastidores a observar a cena, a ver para que lado verga a balança e, depois do trabalho feito, se reclamam ruidosamente o direito de também dividir o bolo” – Reacionario sira ne’e mesak OPORTUNISTA sira nebe buka tama iha jogo nia laran maibe lalika halo kolen’aan, sira nee koko atu dudu ema seluk hodi halo barulho, ba luta politica no sira rasik subar iha didin kotuk hodi hateke tuir lalaok sira, hare atu halis los ba nebe, depois sasan lao los hotu tiha mak, nia tama mai RAKALELE atu fahe lisuk bolu”.
Formatu PDF: https://forum-haksesuk.webs.com/IDIOCRACY-WA.pdf
https://www.facebook.com/gusmao8998/posts/1877489542399172
Sem comentários:
Enviar um comentário
Nota: só um membro deste blogue pode publicar um comentário.