Per memoriam ad spe: tinan 20 Referendum

Per memoriam ad spe: tinan 20 Referendum

Husi Afmend Sarmento

Per memoriam ad spe: ne'e maka lema husi Centro Nacional Chega! (CNC) ne'ebé prezerva istória hosi luta povu nian: konserva memória "moruk" no "midar", triste no ksolok, terus no tanis, matan-been no kosar-been, memória di'ak no aat, dodok no dois hosi memória koletiva ne'ebé povu ne'e koko rasik iha sira-nia vida kuotidiana.

Filósofu polítiku, Norberto Bobbio, hakerek iha livru: O Futuro da Democracia^[1], bolu obstákulu ba demokrasia ho formas hanesan “promessas não cumpridas”. Nune’e, iha “promessas não cumpridas” daneen, ko’alia kona-ba “educação para a cidadania”, retoma fila-fali buat ne’ebé eskritor antigu sira bolu: “activae civitatis”, iha latim orijinál: sidadaun ativu, direitu sidadaun nian, nune’e, edukasaun ba demokrasia ne’e mosu duni iha ezersísiu prátika ba demokrásia.

Saída maka sidadaun ativa? Sidadaun ativa mak ema ne’ebé partisipa ativa iha esfera públika, no iha relasaun ho ema seluk, ho interese diverjente no diversus, maibé, sempre iha prinsípiu báziku hanesan respeitu mútuo, relasiona ho diferensa no superasaun ba dezigualdade sosiál, iha kapasidade ba diálogu, sempre buka konsensu ba interese ne’ebé privilejia ema barak, iha nia sentidu klean liu ita bele dehan luta ba interese komum. Nune’e, luta ba interese komum ida-ne’e ninia baze fundamental mai husi konxiénsializasaun no hatene halo ezersísiu introspektivu ba factum historicum iha pasadu atu bele sai hanesan “mata-dalan” ba konstrusaun futuru ida di’ak liu iha progresu dezenvolvimentu nasaun ninian.

Per Memoriam: Ezersísiu introspektivu ba factum historicum.

Tan sorte ka tan ironia ba destinu, Maromak kria paraísu lafaek ida-ne’e ho nia furak no beleza ne’ebé atrai ema barak ninia atensaun, liliu riku-soin ida-ne’ebé hanaran petróleu. La’os petróleu de’it maibé ai-kameli ninia morin halo komersiante estranjeiru sira tenki hakuur tasi hodi mai to’o iha Timor hodi hala’o negósiu. Haktuir ba sasin husi Tomé Pires: “ema malaiu kontratu-na’in sira dehan katak Nai Maromak halo rai Timur ba ai-kameli, Banda ba noz moscada no Molucas ba cravo-da-Índia,; sasan sira ne’e, ita lahetan iha fatin seluk”. Tan ai-kameli nia morin tama to’o Europa, halo malae portugéz sira hakuur tasi ho intensaun atu deskobre “mundu foun” sira, inklui illa Timor lorosa’e liuhusi entrada iha Lifau iha 1515, hodi hahú fó marka ba rai Timor ho lema: “terra de santa cruz”.

Ita hotu hatene katak kolonialista portugeza sira adopta polítika M3, signifika: militár, misionáriu no mersenáriu. Militar sira mai atu ukun, mersenáriu sira mai atu sosa ai-kameli no bani-been. Misionáriu sira mai atu haklaken Maromak nia Reinu no eduka reinu indíjena sira. Ho prezensa portugeza sira iha Timor hodi hatuur ninia pozisaun nu’udar kolonia ultramariñu husi Estadu Portugés nian. Iha periudu ida-ne’e, povu sira hasoru sofrimentu no terus oi-oin hosi kolonizasaun portugeza sira durante tinan 450 nia laran. Esperiénsia “moruk” sira-ne’e halo povu revolta hasoru kolonialista sira, hahú hosi Funu Manufahe iha tinan  1910 to’o 1912, ne’ebé lidera husi Dom Boaventura hodi ezije direitu nu’udar povu no na’in ba rai-lulik ida-ne’e. Movimentu insureisaun ida-ne’e, halo povu barak maka terus liu tan iha kolonialista sira-nia ukun. Hafoin, Dom Boaventura ninia mate, laiha tan Timor oan sira seluk ne’ebé brani hodi revolta hasoru kolonialista sira.

Ita mós labele pesimista hodi hatete katak kolonialista sira halo buat hot-hotu mesak negativu de’it, maibé ita mós hasa’e louvor no fó onra ba entrada kristianismu iha illa Timor, liliu misionáriu portugés sira-ne’ebé dezembarka iha Rai Lifau hodi fó marka ba istória Timor ho identidade kulturál ida rasik hanesan aspetu fundador no diferensiador iha rejiaun sudeste asiátiku. Husi ne’e ita mós bele observa obra boot ne’ebé misionáriu sira realiza hanesan harii koléjiu Soibada no Semináriu Dare ne’ebé prodús intelektual Timor oan sira. Husi koléjiu Soibada no Seminário Dare^[2] ne’ebé sai hanesan seleiru/lahan ba formasaun rekursus umanus ba futuru lideransa Timor nian.  Nune’e, fatin rua refere lori iluminismu ka aufklarung^[3] mai rai Timor. Husi Soibada no Dare mosu mai figura intelektual timores sira hanesan: Nicolau dos Reis Lobato, Francisco Xavier do Amaral, Abílio de Araújo, José Alexandre Kayrala Xanana Gusmão, José Manuel Ramos Horta, ne’ebé iha dékada 60 no 70, hahú kontra kolonialista sira liuhusi opiniaun públika^[4] ka poema sira.

Situasaun iha Portugal mosu krize boot liuhusi kudeta militer ne’ebé hanaran “a revolução dos cravos^[5]”, iha loron 25 abril 1974, hodi hamonu ditadór António Salazar husi tronu ukun nian. Nune’e, fó biban ba provínsia ultramariñu sira hodi bele deside sira-nia destinu rasik, tan ne’e, iha Mozambike liuhusi Frelimo proklama tiha sira-nia independénsia no Angola mós iha altura ne’eba proklama sira-nia ukun rasik-an liuhusi Movimento MPLA.

Ho mudansa polítika ditatorial ba demokrasia emerjente iha Portugal, loke mós espasu ba matenek-na’in timor oan sira hodi forma partidu polítiku. Nune’e, iha loron 11 maio 1974, primeiru partidu polítiku harii iha Timor ho naran União Democrática de Timor-Leste (UDT), ne’ebé lidera husi Francisco Lopes da Cruz ho Mario Viegas Carrascalão, ho vizaun katak Timor tenki halo federasaun ba Portugal hodi prepara neneik ba autodeterminasaun^[6]. Husi sorin seluk, harii mós partidu daruak ho naran Associação Democrática de Timor-Leste (ASDT), iha loron 20 maiu 1974, ho figura sira hanesan Nicolau dos Reis Lobato, Francisco Xavier do Amaral, José Ramos Horta no sira seluk tan, hafoin iha setembro, ho influénsia husi Frelimo, transforma tiha ASDT ba Fretilin (Frente Revolucionária de Timor-Leste Independente), ho vizaun ezije ba Portugal independénsia imediata ba Timor. La’os ne’e de’it, mosu mós partidu sira seluk hanesan APODETI ho nia lideransa Arnaldo dos Reis Amaral ne’ebé hakarak lori Timor ba integrasaun ho Indonézia. Nune’e mós, ho KOTA no Trabalhista.

Iha inísiu fundasaun partidu sira-ne’e eziste relasaun armonia entre sira, liliu UDT no Fretilin^[7]. Maibé, liu tiha tempu balun de’it, iha 11 agostu 1975, UDT halo golpe hasoru Fretilin, ema barak ne’ebé adere ba Fretilin mate iha UDT sira-nia liman, iha sentidu kontráriu, wainhira Fretilin hala’o kontra golpe no oho mós ema barak husi UDT.

Timor monu ba caos^[8], situasaun dramátika ida-ne’e halo Timor oan sira fahe malu. Apodeti no UDT hamutuk ba asina “Deklarasi Balibo” hamutuk ho Indonézia hodi halo invazaun mai teritóriu Timor. Antes halo invazaun, iha fulan outubro, tropa Indonézia sira oho uluk ona jornalista australianu na’in-5 iha Balibo.

Ho situasaun dilemátika ida-ne’e, Comite Central da Fretilin hatene hela propaganda polítika no akuzasaun ideolójika ne’ebé favorese ba okupasaun militár indonézia. Nune’e, funu sei mosu no labele evita, tan ne’e, hanesan forma ida atu fó xamada atensaun ba ONU kona-ba prinsípiu Direitu Fundamental ba autodeterminasaun ba kolonia sira iha rai Áfrika no Ázia, obriga CCF tenki Proklama tiha ninia Independénsia Unilateral, iha loron 28 Novembro 1975^[9], ho naran República Democrática de Timor-Leste, liuhusi Prezidente dahuluk RDTL, Francisco Xavier do Amaral no Primeiru-Ministru maka Nicolau dos Reis Lobato.

Hafoin liu tiha loron balun de’it, iha loron 7 dezembru 1975, tropas Indonézias sira hahú invade mai Timor, hafoin enkontru istóriku ne’ebé halo entre Ministru Negósiu Estranjeiru Estados Unidos Amérika ho Prezidente Soeharto iha Indonézia. Nune’e, Estados Unidos Amérika maka sai hanesan fornesedór material funu nian ba Indonézia hodi halo invazaun mai Timor-Leste.

Wainhira tropas indonézios sira domina ona sidade Díli, forsas resisténsias ka mílisias Fretilin nian hahú muda sai ba Aileu. Iha prosesu luta ida-ne’e, iha Fretilin nia uma-laran rasik mós mosu frasaun ka intrigas hodi fahe fundador Fretilin sira ba ida-idak nia grupo no ideolojia^[10]. Laeziste liafuan “unidade nasionál” iha disionáriu polítika founding fathers sira nian. Faktu hatudu ba sofrimentu ne’ebé Primeiru Prezidente RDTL, Francisco Xavier do Amaral, hasoru wainhira membru CCF sira rasik maka kastigu no tortura sira nia lideransa másimu, tanba diferensa iha pensamentu polítiku hodi luta hasoru invazór sira.

Esperansa ba Ukun Rasik-an mihis ba dadaun, wainhira governu Soeharto konsagra iha Lei númeru 7/76 iha loron 17 jullu 1976, hodi aneksa ba integrasaun antigu kolónia portugés Timor hanesan 27.ª provínsia iha Estado Unitáriu Indonézia. Nune’e mós, ho operasaun “Cerco e Aniquilação” harahun tiha “base de apoio” iha tinan 1978.  Hetok a’at liu tan, Prezidente daruak RDTL, Nicolau dos Reis Lobato, mate iha batalla husi tropa Indonézia sira, iha loron 31 dezembru 1978.

Ho Nicolau Lobato nia mate^[11], forsa resisténsia ka mílisia Fretilin sira dezmoralizadu, lakon esperansa katak Timor sei bele liberta-an husi invazór ka kolonialista sira. Maske, seidauk asume papel importante nu’udar Komandante, maibé, Xanana hahú reorganiza funu^[12], liliu haforsa kontaktu entre frente armada no hahú lansa luta foun liuhusi kontaktu ho populasaun sira hodi forma frente klandestina.

Nune’e, iha “primeiru Konferénsia Nasionál”, iha loron 3 marsu 1981, ho lian ida Asuwain Falintil sira fó fiar tomak ba Kayrala Xanana Gusmão, atu asume lideransa másimu ba luta:

“a liderança de Xanana assumiu três papeis distintos. Foi nomeado comissário politico nacional do corpo político, comandante supremo das FALINTIL e o Presidente do Conselho de Resistência Revolucionário Nacional (CRRN)^[13]”.

Grasa ba Na’i Maromak iha Leten aas ba! Tan sei haraik ba rai Timor, oan mane ida-ne’ebé hatene hader husi ahukdesan funu nian, hodi inkarna iha nia-an modus vivendi, valores no hahalok gloriosa ne’ebé nia kompañeiru iha Semináriu hatudu tiha ona: “renascer das cinzas do esquecimento”. Ho fini musan ka semente kristaun nian, inkarna iha nia lala’ok moris Padre Igreja sira nia liafuan: “o sangue dos mártires é a semente do cristianismo”, nune’e mós, raan ne’ebé nakfakar husi mártires inosentes sira iha foho lolon no fatuk-kuak sira sei sai hanesan fini ida hodi luta ba autodeterminasaun, ne’ebé inkarna nia espíritu luta nian: “pátria ou morte”, “resistir é vencer”, tuir lala’ok ninia kompañeiru luta nian: “a última bala é a minha vitória” no “a nossa vitória é apenas uma questão de tempo”.

Semente kristaun ne’ebé Xanana iha, fó kbiit ba nia atu halo mudansa estratéjiku ida ba luta. Nia hatene no senti katak iha kompañeiru ne’ebé uluk hamutuk iha Semináriu sei ajuda no fó suporta ba nia luta ida-ne’e. Figura ne’ebé dahuluk liu ba nia pensamentu polítiku maka Dom Martinho Lopes da Costa, bispu diosese Díli. Sei grava iha ita hotu nia memória, enkontru istóriku entre Dom Martinho Lopes no Xanana Gusmão iha Mehara - Lospalos. Enkontru ida-ne’e, lori mudansa boot tebes ba Igreja Katólika atu partisipa di’ak liu tan iha prosesu luta ba Ukun Rasik-an^[14], hodi tau iha lema juventude Katólika: pro eclessia et patria. Ho partisipasaun ativa husi Igreja Katólika iha prosesu ba autodeterminasaun motiva liu tan Asuwain Falintil sira atu reziste hasoru okupasaun ilegal husi Indonézia iha rai Timor.

Iha ámbitu internasionál, faktu istóriku ida-ne’ebé akontese iha 1982, iha Asembleia Jerál ONU, liuhusi Rezolusaun númeru 37/30 ne’ebé fó posibilidade atu Portugal no Indonézia, liuhusi ONU atu rezolve kauza Timor, hodi fó posibilidade di’ak liu ba Timor atu bele luta ba autodeterminasaun. Maibé, iha votasaun votus 50 favor ba aneksasaun, votus 46 kontra no abstensaun 50^[15]. Diferensa votus ha’at ne’e sei fó posibilidade boot ba kauza Timor atu bele diskuti iha Asembleia Jerál Nasoens Unidas. Nune’e, de factu Timor pertense ba Indonézia, maibé de jure, ONU rekoñese Timor nu’udar poténsia administrativa provínsia ultramariñu portugés nian.

Nu’udar líder vizionáriu no Komandante Supremu observa katak nia Aswain sira hasoru difikuldade hodi halo mobilizasaun no kontaktu ho populasaun, Xanana inísia prosesu “cessar fogo ka kontak damai^[16]”, hanesan meius ida atu fó tempu ba sira atu reorganiza funu hasoru invazór. Nune’e, ho tulun husi fileira UDT, Mario Viegas Carrascalão, realiza duni enkontru istóriku entre Xanana Gusmão ho Komandante Gatot, iha Laline - Larigutu.

Iha períudu 86-89, nu’udar líder karismátiku no vizionáriu, Kayrala Xanana Gusmão, nia mehi ba unidade nasionál, hahú hatudu-an, wainhira iha loron 24 marsu 1986, ofisializa iha Lisboa Convergência Nacional Timorense (CNT) ^[17] entre UDT no Fretilin, husi ne’e Xanana hatudu intensaun atu despartidariza tiha Falintil husi partidu Fretilin, nune’e, Falintil sai nu’udar liman kroat povu nian. No, iha tempu ne’ebé hanesan Xanana anúnsia ninia demisaun husi Fretilin^[18]. Nune’e, iha tinan 1988, Xanana estabelese CNRM^[19], muda tiha liafuan “revolusionáriu” ba “Maubere”, nu’udar sumbriña ida hodi halibur ema hotu atu luta ba Ukun Rasik-an. Interesante tebes ita observa mós katak iha tempu hanesan José Ramos Horta mós deklara rezigna-an husi Fretilin^[20].

Husi ne’e, istória Timor nia luta ba Ukun-an hahú, neneik maibé bebeik, hadeer-an husi ahukdesan funu nian, ho prezensa husi Sua Santidade Amu Papa, João Paulo II^[21], iha Tasi-tolu, Timor-Leste. Nia mai nu’udar bibi-atan atu halibur ninia bibi sira. Nia mai lori mensajen pás no esperansa. Enkoraja Timor oan sira atu sai “sal da terra” no “luz do mundo”, iha moris lor-loron ne’ebé nakonu ho caos, ne’ebé komete husi invazór sira hodi larespeita sakralidade husi moris ne’e rasik. Momentu istóriku ida-ne’e, sai nu’udar esperiénsia ida ba Santu Padre atu bele denúnsia hahalok brutalidade husi invazór^[22] sira iha nia intervensaun sira tuir mai kona-ba “causa de Timor”.

Atu observa mós katak iha dekada ida ne’e, estudantes universitárius sira iha Indonézia harii organizasaun RENETIL^[23], ho nia figura Fernando Lasama de Araújo, ho objetivo prinsipál atu halo “indoneziasaun no internasionalizasaun kauza timorense” liuhusi atividade “guerilha urbana” ho filosofia koñesida: “antes sem título do que sem Pátria”. Ou organizasaun estudantil seluk hanesan OJECTIL ne’ebé kuiñesidu ho lema: “estudar lutando e lutar estudando”.

Hafoin liu tiha tinan rua husi vizita Sua Santidade João Paulo II, mosu akontesimentu drástiku, ne’ebé halakon juventude barak nia vida: Masakre Santa Cruz. Ho filmajen ne’ebé Max Stahl fó sai ba mundo internasionál^[24] soke povu barak ninia sensibilidade no fó dalan ba grupo soliedariedade oi-oin hodi luta ba Timor ninia kauza: “era preciso pagar o preço do sangue pela sua revelação aos olhos do mundo”^[25]. Husi trajedia Santa Kruz fanu ema hotu ninia konxiénsia no sensibilidade atu luta ba autodeterminasaun Timor nian.

Iha loron 20 novembro 1992, tuku ha’at loro-kraik, wainhira tropa Indonézia sira kaptura Xanana Gusmão iha Lahane, kauza konstranjimentu katak Timor lakon duni ninia independénsia. Maibé, kapturasaun no prizaun ne’ebé Xanana enfrenta hanesan meius ida atu loke odamatan kauza Timor nian ba mundo internasionál. Faktu hatudu hanesan nasaun barak husu ba Indonézia atu bele liberta tiha Xanana^[26]. La’os de’it ida ne’e, iha Cipinang rasik loke dalan ba Xanana atu bele kontaktu direta ho movimentu estudantil ne’ebé luta atu hatuur Indonézia nu’udar nasaun demokrátiku^[27]. Xanana aproveita Cipinang hanesan fatin “tahanan politik” atu bele aumenta vizibilidade Xanana nian ba mundu internasionál. To’o ema konfigura Xanana hanesan líder istóriku África do Sul, Nelson Mandela, iha Sudezte Aziátiku^[28].

Nune’e, iha períudu 92 to’o 99, Juventude Loriku Aswain sira ativa tebes iha movimentu rede klandestina hodi organiza manifestasaun oi-oin hasoru governu invazór sira, la’os iha terítoriu rai-laran de’it, maibé, mós iha rai-liur, liliu iha Indonézia rasik, liuhusi movimentu estudantil hanesan Renetil, Impetu, Ojectil, Fitun, Brigada Negra, DSMPTT, nsst. Faktu istóriku hatudu mós ho Bill Klinton, ne’ebé sai Prezidente Norte Amerikanu iha 1993, ne’ebé loke dalan foun ba polítika esterna amerikanu nian kona-ba kauza Timor. Korrupsaun ne’ebé governu Soeharto komete halo nia sai vulnerável liu tan ho krítikas polítikas ne’ebé halo nia mout iha dezastre ekonómiku iha 1997^[29].

Iha frente klandestina ativa tebes liuhusi instalasaun rede klandestina kuaze iha terítoriu nasionál tomak: “a nível regional, sub regional, NUREPS no Celkom^[30]”.

Iha frente armada organizadu tebes hahú husi kedas iha dékada 79 no 80, iha prosesu reorganizasaun ba funu husi Maun-boot Xanana. Iha períudu 1993, Taur Matan Ruak, enkuantu, Xefe Estadu-Maior, reorganiza frente armada ba kada rejiaun: “A região n.˚ 1, a leste do Matebian, a n.º 2, a oeste da mesma montanha, até a linha de Vemasi a Natarbora, a n.º 3, desde a mesma linha à estrada de Díli a Same, e a n.º 4, entre esta estrada e o território de Timor Ocidental^[31]”

Iha frente diplomátika, ho esforsu boot ne’ebé Maun Ramos Horta halo, brani no ativu tebes hodi lori kauza Timor ba iha meza Asembleia Jerál ONU nian. Husi ne’e, mundu internasionál fó prémiu Nobel da Paz ba Timor oan na’in-2: José Manuel Ramos Horta e Carlos F. X. Belo, bispu Díli. Prémiu ida ne’e sai hanesan ai-tarak ida hodi sona diplomasia indonésia ninia fuan, iha eventu internasionál:

“o premio foi um impulso importante para os timorenses e um revés para os indonésios, que foram postos na defensiva por um fórum internacional com uma enorme capacidade  para influenciar a opinião pública^[32]”

Tan ne’e, asuntu kona-ba kauza Timor sai manas liu tan iha ajenda reuniaun Asembleia Jerál ONU nian, hodi fó presaun ba Indonézia kona-ba krime ne’ebé komete husi militár sira iha Timor. Nune’e mós, krise ekonomia ne’ébé afeta ba instabilidade polítika iha Jakarta, nune’e, iha loron 21 dezembro Soeharto demite husi kargu Prezidente, loke dalan ba implementa sistema demokrasia iha Indonézia, ho ambiente foun ne’ebé proporsiona husi governu Habibie nian.

Ho situasaun difísil ne’ebé Indonézia hasoru hela, fó oportunidade di’ak ba Xanana Gusmão atu formaliza nia estratejia liuhusi mudansa postura polítika, husi CRNM ba CNRT. Mudansa ida-ne’e, buka hakuak Timor oan tomak, hodi luta ho objetivu ida de’it: libertação da Pátria. Iha Peniche-Portugal, Timor oan tomak ne’ebé ho vontade di’ak, tuur hamutuk deklara ba mundo katak laiha ona, UDT ka Fretilin, ami lian ida de’it: mate ka moris ukun rasik-an^[33]. Nune’e, Unidade Nasionál suku metin iha Peniche, Timor oan sei lafahe malu tan, hamutuk ita bele liberta pátria.

Ho lideransa Prezidente RI, BJ Habibie, ne’ebé respeitu ba prinsípius fundamentais ema hotu nian ba autodeterminasaun, mak iha loron 27 janeiru 1999, nia anúnsiu ba mundo tomak kona-ba intensaun atu hala’o konsulta popular iha Timor, hodi fó liberdade ba povu atu deside rasik ninia destinu.

Tanba Timor oan lian ida de’it ona, hamriik iha sumbriña CNRT (Conselho Nacional da Resistência Timorense) nia mahon, fó posibilidade ba Sekretáriu Jerál ONU, Kofi Annan, hodi hamosu “Acordo Nova Yorke^[34]”, iha loron 5 maio 1999, ne’ebé asinadu husi Indonézia, Ali Alatas, no Portugal, husi Jorge Gama, ho supervizaun husi ONU, atu realiza konsulta popular iha Timor ne’ebé monu ba loron 30 agostu 1999.

Nune’e, liu tiha fulan ida, ofisialmente, bandeira ONU hasae iha Timor, ne’ebé halo ema barak kontente no hakilar: “Viva Xanana” no “Viva UNAMET”^[35]. Ho figura esperiente no matenek, ONU hili Ian Martin, nu’udar xefe UNAMET, hodi lidera prosesu tomak kona-ba konsulta popular iha Timor-Leste. Hahú husi rejistu ba populasaun to’o loron realizasaun ba konsulta popular. Timor oan tomak ho entuziazmu, kuaze 98,4%, ho aten brani ba tuir votasaun. Husi rezultadu votasaun, iha 30 de agosto 1999, povu Timor deside atu separa husi Indonézia ho votus a favor ba autonomia 21,5% no 78,5% hili ukun rasik-an, ne’ebé anúnsia husi Ian Martin, iha loron 4 setembro 1999.

Hafoin anúnsia tiha rezultadu, Timor dala ida tan fila ba caos, Timor oan rasik maka oho malu, sunu uma, harahun edifísiu sira governo nian, nune’e, Timor fila ba ahukdesan. Konsellu Seguransa ONU laautoriza intervénsaun wainhira lahetan konvite ofisiál husi Indonézia. Ho ameasa husi Prezidente Estadus Unidus, Clinton, mak iha loron 12 setembru 1999, Indonézia aseita atu forsa manuténsaun da pás bele tama iha Timor.

Solidariedade internasionál kontinua hakilar kona-ba krime ne’ebé akontese iha Timor, iha loron 20 setembro 1999, forsa Interfet ne’ebé komanda husi Jenerál Peter Cosgrove tama iha Timor hodi bele kria estabilidade ho pás iha rai-laran. Atu kria administrasaun provisória ida, Sekretáriu Jerál ONU, Kofi Annan, hili diplomata brazileiru, Sergio Viera de Mello, lidera UNTAET, atu mai prepara prosesu konstrusaun Estado no Nasaun Timor-Leste. UNTAET hahú forma Konsellu Konsultivu ne’ebé konstituidu ho nia membru na’in-7 husi CNRT, grupo partidu polítiku sira seluk na’in-3, igreja katólika na’in-1, Sergio Viera de Mello, no membru na’in-3 husi UNTAET^[36].

Iha agostu 2000, Xanana eleitu nu’udar prezidente iha Kongresu Nasionál CNRT^[37], maibé, mehi ida-ne’e labele realiza tan iha tempu ne’ebé hanesan Fretilin no UDT deklara-an sai husi CNRT, iha ne’e “unidade nasionál” ne’ebé suku metin iha Peniche, hahú nakfera, hodi loke dalan ba eleisaun demokrátiku iha Timor-Leste^[38]. Nune’e, iha loron 9 juñu 2001, Xanana disolve CNRT, antes hakat ba Eleisaun Asembleia Konstituinte. Husi ne’e, povu fó fiar ba partidu istóriku Fretilin inisia prosesu konstrusaun Estado no Nasaun. Husi ne’e, iha 22 marsu 2002, membru Asembleia Konstituinte sira aprova Constituição da República Democrática de Timor-Leste. No mós halo eleisaun presidénsial, iha loron 14 abril 2002, ne’ebé maioria povu Timor, 82,7% hili Kayrala Xanana Gusmão nu’udar Prezidente Repúblika.

Nune’e, iha loron 20 maio 2002, ho prezensa husi Sekretáriu Jerál Nasoens Unidas, Kofi Annan, iha Tasi-tolu, Timor-Leste, la’os proklama independénsia, maibé restaura fila-fali ninia independénsia ne’ebé Proklama tiha ona husi Prezidente Francisco Xavier no membru CCF sira,  iha 28 novembru 1975. Nune’e, Timor-Leste sai hanesan nasaun soberanu iha mundo rai-klaran hafoin restaura tiha nia independénsia, iha loron 20 maio 2002 no iha loron 27 setembro 2002, ofisialmente, Timor-Leste hatuur nia-an hanesan membru ba Organizasaun Nasoens Unidas ba 191 no hanesan nasaun ida-ne’ebé foun liu iha sékulu XXI.

Ne’e maka memória koletiva ne'ebé povu koko iha sira nia moris, hanesan fatuk ida-ne'ebé badaen sira halibur hamutuk hodi konstroi kastellu ida hanaran: Repúblika Democrática de Timor-Leste. Mai ita hamutuk fó onra no omenajen ba erói sira-ne'ebé harii kastellu ida-ne'e.

Ad spe: interiorizasaun valores resisténsias ba konstrusaun Nasaun ho esperansa.

Hafoin, hala’o tiha ezersísiu revizitasaun ba memória luta nian, ne’ebé dalaruma lori dezeju ka anseiu atu revolta ka espíritu liriku ba liberdade total, lori ita ba hanoin mós Santo Agonstinho de Hipona nia liafuan: “um presente das coisas passadas que é a memória, um presente das coisas que é a vida e um presente das coisas futuras que são expectativas”. Ho espetativa atu harii futuru ida di’ak liu ba Timor maka ita labele hateke ba memória pasadu ho remorsu maibé hanesan esperiénsia, ne’ebé iha ditadu popular dehan “a experiência é a mãe da ciência e a mestra da vida” atu bele konstrui nasaun Timor-Leste, hanesan dehan Shah Rukh Khan iha filme Dear Zindagi: “don’t let the pass blackmail your present to ruin a beautiful future”. Filosofia polítika ida-ne’e mak implementa husi Maun-boot Xanana, pós referendu hodi harii CAVR no CVA, ho objetivu atu kura tiha kanek sira-ne’ebé povu senti durante luta ba libertasaun.

Nune’e, loron 30 agostu 1999, la’os aprezenta memória trauma no triste, maibé, hanesan kondisaun sine qua non ba moris hias povu nian husi “cinzas de esquecimento do mundo  internacional” nian, iha periudu ida-ne’ebé naruk tebes hodi luta ba ezije direitu fundamental ba autodeterminasaun husi povu sira-ne’ebé deskreve iha Declaração Universal dos Direitos Humanos.

Loron 30 agostu 1999, reprezenta fin husi izolamentu povo Timor nian ba Mundu Internasionál, hodi loke dalan foun ba era globalizasaun, ho nia vantajen no desvantajen tomak, hodi abzorve tiha kultura povu Timor nian ne’ebé tranzmite hosi bei’ala sira husi jerasaun ba jerasaun,  ho valores foun no kultura foun era globalizadu nian ne’ebé domina iha povu sira-nia moris kuotidianu.

Loron 30 agostu 1999, marka mós fin husi konseitu "unidade nasionál" ne'ebé asina iha Peniche - Portugal, hodi fó dalan ba Timor oan tomak atu hamriik iha sumbriña ida de'it: CNRT nia mahon, hodi loke dalan ba "jogu demokrático" tuir regras demokrasia nian, ne'ebé atualmente labele ona suku fila-fali "unidade nasionál" ida ne'e, tan de'it partidus polítikus sira ne’ebé tane aas liu no defende liu interese pessoál no partidáriu. Ezemplu konkretu maka, hafoin asina tiha konkordansia entre Timor no Australia kona-ba delimitasaun fronteira marítima ne’ebé testemuña direita husi Sekretáriu Jerál Nasoens Unidas, Dr. António Guterres, iha loron 6 marsu 2018. Hafoin, iha ona konkordansia entre nasaun rua atu ratifika Tratadu Fronteira Marítima entre Timor no Australia, ne’ebé koinside ho selebrasaun tinan 20 konsulta popular, maibé, Timor oan sira lahatudu ninia unidade nasionál hodi defende interese lulik ne’ebé sosa ho ruin no raan husi ema ba’in ne’ebé fó-an ba mate hodi harii nasaun lulik ida-ne’e. Maske, iha diverjensia polítika maibé ita hotu “louva” no “reverência” ba luta persistente no determinante husi Maun-boot Kayrala Xanana Gusmão, ne’ebé konsege hatuur ona delimitasaun fronteira marítima ho Austrália no hahú ona diskusaun ba fronteira terestre no marítima ho Indonézia.    

Loron 30 agostu 1999, representa fin últimu husi peregrinasaun povu nian iha dezertu funu nian ba "libertação da pátria", maibé loke mós espasu ba luta foun:  "libertação do povo" husi kiak no mukit, tuir promesa luta nian: halo Timor Lorosa’e sai hanesan “uma terra boa e vasta, onde há leite e mel com fatura”(Êxodo, 3,8), ba Timor oan tomak, sein haree ba rasa, kultura ka relijiaun. Pós 30 agostu 1999, povu iha espetativa boot ba mudansa drástika iha sira nian moris ida-ne'ebé di'ak liu, ne'ebé filosófu grego sira hanaran eudaimonia no latino sira traduz: summum bonum no bonum commune, iha inglés the good life. Ema indonézia sira babain dehan gemah ripah loh jinawi. Maibé, mehi lulik ida-ne’e parese difisil tebes atu povu sira bele senti iha sira-nia moris kuotidianu. Povu seidauk senti iha sira-nia moris “susu-been no bani-been” ne’ebé promete husi founding fathers sira. Maske nune’e, Governu labele halo “milagre” hodi rezolve buat hotu, neneik maibé bebeik, povu ida-ne’e sei bele senti iha sira-nia moris promesa sira husi founding fathers atu halo Timor sai duni “Terra prometida” no “paraíso” ba Timor oan tomak, hanesan mós ho Profeta Simeão, tempu ruma founding fathers sira sei dehan: “Agora, Senhor, deixai o vosso servo ir em paz, segundo a vossa Palavra. Porque os meus olhos viram a vossa salvação que preparastes diante de todos os povos” (Luc 2:29-31).

                                               
Nune’e, iha momentu istóriku ida-ne’e la’os de’it ita atu festeja vitoria povu nian, maibé mós hanesan loron espesial ida mai ita, hodi koko atu bele halo introspeksaun ba ita ida-idak nia-an, hodi husik ba kotuk diferensa no antagonizmu sira, atu espíritu “30 agostu 99” bele halibur fila-fali Timor oan sira hodi luta no funu hasoru “kiak no mukit”, hodi lori povu ida-ne’e ba moris ne’ebé di’ak no prósperu.

Parabéns ba povu Timor oan tomak ne’ebé selebra loron 30 agostu nu’udar loron  “vitória popular”  hodi determina destinu rai lulik ida-ne’e nian.

Obrigadu ba’in ba solidariedade internasionál ne’ebé fó tulun no solidariza ba “causa timorense” iha ámbitu internasionál.

Last but not least, parabéns no obrigadu ba’in ba Maun-boot Kayrala Xanana Gusmão  ba vitoria foun: Delimitasaun Fronteira Marítima entre Timor-Leste no Austrália, nune’e mós, Timor-Leste no Indonézia.

*Opinião pessoal do cidadão remota da aldeia Cassamou, Suco Seloi Craic, Município de Aileu, Timor-Leste.

Bibliografia

BOBBIO, Norberto, O Futuro da Democracia – uma defesa das regras do jogo, 6ª edição, Ed. Paz e Terra, Rio de Janeiro, 1986.

CARRASCALÃO, Maria Ângela, TAUR MATAN RUAK Vida pela Independência, Lidel, Lisboa, 2012.

COMITÉ ORIENTADOR 25, Revista História da Resistência, Edisaun I, janeiru-juñu 2019.

JOÃO PAULO II, Angelus, in «L’Osservatore Romano», ed. Port. 18/9/99.

JOÃO PAULO II, Homilia em Tasi-tolu, 12-10-1989, in «L’Osservatore Romano», ed. Port. 22/10/1989.

PIRES, Paulo, Timor, Labirinto da Descolonização, Edições Colibri, Lisboa, 2013.

MATTOSO, José, A DIGNIDADE Konis Santana e a Resistência Timorense, Temas e Debates Editora, Lisboa, 2005.

NINER, Sara, Xanana Uma Biografia Política, Dom Quixote, Alfragide 2011.

SOARES, Dionisio da Costa Babo, Branching of the trunk: East Timor perceptions of Nationalism in Transition, Doctoral Thesis, The Australian National University, 2003.

---

[1] BOBBIO, Norberto, O Futuro da Democracia– uma defesa das regras do jogo, 6ª edição, Ed. Paz e Terra, Rio de Janeiro, 1986,30.

[2]Dare foi descrito como o “cadinho do pensamento nacionalista de Timor”. Cf. NINER, Sara, Xanana Uma Biografia Política, Dom Quixote, Alfragide 2011, 28.

[3]Termu Alemaun ne’ebé iha lian Indonézia dehan katak “masa pencerahan”

[4]Bele hare’e artigu ne’ebé hakerek husi Abílio Araújo: “Carta aberta ao Sr. Inácio Moura Barlaque – Sigilo ou Enigma?”, kontra tropa portugés ida ne’ebé minimiza feto timor oan sira nia dignidade ka poema sira ne’ebé hakerek husi Kayrala Xanana Gusmão ne’ebé tempu ne’eba nu’udar mós jornalista ida.

[5]Traduz ba lian malaio: Revolusi Bunga.

[6]“Os partidários do federalismo não admitiam a continuação da situação colonial e pretendiam uma autonomia com fortes laços com Portugal, porque o povu de Timor ainda não estava preparado, em todos os sentidos, para assumir a sua independência política. Talves, uma região autónoma com amplos poderes”. Cf. PIRES, Paulo, Timor, Labirinto da Descolonização, Edições Colibri, Lisboa, 2013, 46.

[7]“… entre o Novembro de 1974 e de Maio de 1975, havia a clara esperança de se conseguir formar um governo democrático independente, depois de criar um governo provisório encarregado de preparar as leis sobre a formação dos partidos e as leis eleitorais. Assim, foi estabelecida pela Comissão em 7 de Maio. A assinatura de uma coligação entre a Fretilin e a UDT, em 21 de Janeiro de 1975”. Cf. MATTOSO, José, A DIGNIDADE Konis Santana e a Resistência Timorense, Temas e Debates Editora, Lisboa, 2005, 43.

[8]“A guerra civil teve um efeito profundo na comunidade e em Xanana, que declarou: ‘A nossa revolução de espinhos penetrou na carne de todos os timorenses’”. Cf. NINER, Sara, op. cit., 41.

[9]“A respetiva cerimónia celebrou-se na tarde do dia 28 de Novembro de 1975, em Díli, em frente ao Palácio do Governo. A Bandeira de Timor-Leste substituiu a de Portugal. O Comité Central escolheu Xavier do Amaral para Presidente da República e Nicolau dos Reis Lobato para primeiro-ministro”. Cf. MATTOSO, José, op. cit., 54.

[10]“Este grupo ‘nacionalista – marxista’ coligou-se à volta de Mau Lear e Sahe enquanto uma facção de sociais-democratas representada pelo Presidente Xavier…”. Cf. NINER, Sara, op. cit., 44.

[11]“A morte do Comandante-Chefe das FALINTIL, Nicolau dos Reis Lobato, e dos seus companheiros, significou o fim da liderança fundadora da resistência”. Cf. CARRASCALÃO, Maria Ângela, TAUR MATAN RUAK Vida pela Independência, Lidel, Lisboa, 2012, 507.

[12]“Xanana passou todo o anos de 1979 e a maior parte de 1980 a reorganizar a guerilha, procurando animar, disciplinar, comandar os elementos dispersos por todo o território (…). Ao mesmo tempo, lançando as bases de cooperação entre a Resistência Clandestina e a Resistência Armada”. Cf. MATTOSO, José, op. cit., 88.

[13] Cf. NINER, Sara, op. cit., 93.

[14]“Foi dito naquele quarto e afirma que Lopes o aconselhou: ‘Filho, esquece o marxismo’. Lopes ajuda-lo-ia se ele unificasse a resistência e o povo em volta de um objetivo: o nacionalismo”. Cf. NINER, Sara, op. cit., 105.

[15]NINER, Sara, op. cit., 111.

[16]São três as exigências propostas por CRRN-Fretilin: (1) a retirada incondicional das tropas Indonésias; (2) a entrada de uma força manutêncão da paz das Nações Unidas; (3) realização de uma consulta livre ao povo. Cf. NINER, Sara, op. cit., 116.

[17]PIRES, Paulo, op. cit.,189-195.

[18]“Em 1986, Xanana enviou uma mensagem à comissão política da UDT em Lisboa indicando que as FALINTIL em breve estariam ‘fora do jogo político’. Xanana também data a sua demissão da Fretilin em 1986”. Cf. NINER, Sara, op. cit., 137.

[19]“Xanana usou pela primeira vez o acrónimo do Conselho Nacional da Resistência Maubere. O CRRN tinha sido substituído; a palavra ‘revolucionária’ foi excluída, abolindo esses ideias e substituindo-os por aspirações nacionalistas maubere moderna”. Cf. NINER, Sara, op. cit., 141.

[20] Cf. Horta, José Ramos, Carta Aberta – porque resignei da Direção da Fretilin, in PIRES, Paulo, op. cit.,271-281.

[21]JOÃO PAULO II, Homilia em Tasi-tolu, 12-10-1989, in «L’Osservatore Romano», ed. Port. 22/10/1989, 7.

[22]«O meu pensamento dirige-se de novo a Timor Leste, onde uma violência brutal continua e se enfurece também contra a Igreja Católica, desde há muito tempo artífice de diálogo e reconciliação (…) exprimo mais uma vez a total reprovação pelos graves abusos dos direitos humanos perpetrados naquele território, na vã tentativa de cancelar a vontade expressa pela população e as suas legítimas aspirações. Renovo o apelo a fim de que os responsáveis políticos e militares, bem como a Comunidade internacional escutem o brado dos débeis e indefesos, e vão logo em seu socorro”. JOÃO PAULO II, Angelus, in «L’Osservatore Romano», ed. Port. 18/9/99, p.1.

[23]“Resistência Nacional dos Estudantes Timorenses, moris iha loron 20 juñu 1988, funda husi estudantes bolseirus na’in 10: Lucas da Costa, Fernando La’Sama, José X. Gonҫalves, nsst”. Cf. COMITÉ ORIENTADOR 25, Revista História da Resistência, Edisaun I, janeiru-juñu 2019, 18-23.

[24]“Em Portugal, o público que viu as imagens na televisão, além de ter ficado revoltado com a violência gratuita e desenfreada dos militares emocionou-se vivamente quando ouviu as orações em português. Afinal Timor era muito próximo do que se pensava. Os telepectadores assistiam impotentes ao sofrimento injusto de irmãos abandonados há muito e já quase esquecidos”. Cf. MATTOSO, José, op. cit, 170.

[25]MATTOSO, op.cit, 167.

[26]“Secretário geral da ONU, Boutros Boutros-Ghali, e os Presidentes português e francês pediram a libertação de Xanana. Trinta e mil portugueses assinaram uma petição a exigir a libertação de todos os detidos”. Cf. NINER, Sara, op. cit, 181.

[27] “Xanana posicionou-se como o negociador central da resistência de Timor-Leste com o governo e o exército indonésios e interlocutores internacionais, essencialmente a ONU”. Cf. NINER, Sara, op. cit, 208.

[28] NINER, Sara, op. cit., 193.

[29] NINER, Sara, op. cit., 173.

[30] NINER, Sara, op. cit., 98.

[31] MATTOSO, José, op. cit., 209.

[32] NINER, Sara, op. cit., 205.

[33] “a reunião aconteceu em abril de 1998, na véspera da queda de Soeharto, em Peniche, a norte de Lisboa, com um grande apoio do governo português. A estrategia nacionalista independente conseguida com a criação do CNRM foi reforçada na convenção com a criação do CNRT, Conselho Nacional de Resistência Timorense. A palavra Maubere foi retirada do nome e substituída pela palavra Timorense, uma vez que a UDT se tinha oposto sempre ao termo ‘Maubere’ devido a sua associação à Fretilin. Para Xanana, ‘representou um refinamento do processo de união dos timorenses’. A posição de Xanana enquanto o epícentro da política timorense foi selada. Como principal moderador que tinha juntado todas as fracções no ultimo momento, Xanana garantiu o seu lugar na história e na política de Timor-Leste”. Cf. NINER, Sara, op. cit., 209-210.

[34] “o documento autorizava a entrada de uma missão das Nações Unidas em Timor (UNAMET) para administrar uma ‘consulta popular’ no dia 30 de Agosto ao povo timorense, para que aceitasse ou rejeitasse a proposta da autonomia da Indonésia”. Cf. NINER, Sara, op. cit., 229.

[35] Cf. NINER, Sara, op. cit., 230.

[36] NINER, Sara, op. cit., 254.

[37] “A resolução mais importante e unânime do Congresso foi o Pacto Unidade Nacional e a decisão da dissolução do CNRT quando fossem realizadas eleições democráticas e um governo tomasse posse”. NINER, Sara, op. cit., 255.

[38]“Doubts about the strengh of this East Timorese sense of unity began to emerge in the changing political landscape of the post-1999 period. This resulted in a new atmosphere of political division, a manifestation of public discontent toward leaders, competition for political recognition, the exchange of verbal insult among political leaders and political opponents, and an apparent breakdown of unidade nacional”. Cf. SOARES, Dionisio da Costa Babo, Branching of the trunk: East Timor perceptions of Nationalism in Transition, Thesis  of Doctoral,The Australian National University, 2003, 28.