Embaixador Joaquim Fonseca Partilha Momentum Istoriku 20 de Maio Ho Timoroan Sira Iha Oxford

"20 de Maio fo-hanoin ba ita oinsa luta ne’e lori ita mai to’o iha ne’e, reconquista ita nia liberdade" - Joaquim "Russo" Fonseca

Embaixador Joaquim Fonseca no
Pres KO Acacio Marquez

Oxford, Forum Haksesuk (FH) - 20 de Maio, loron Restaurasaun Independensia Timor-Leste ba dala 17 komemoradu iha sabdu liuba, 18 Maiu 2019, iha Oxford, Inglatera. Anfitrion ba eventu, Komisaun Organizadora (KO) ho Assosiasaun Desportiva Timorense (ADT) oferese ba timoroan sira torneio futebol, espetaculo cultural no baile de danca.

Komisaun Organizadora ho tulun husi contribuinte sira organiza ho kbi’it wain festa convivio hodi haksolok hamutuk hanoin ba loron importante 20 Maiu nian. Oxford simu convidados no grupo futebol husi sidade sira iha Inglatera, incluindo sira husi Norte Irlanda, reprezentadu husi grupo futebol FC Foin Sae Timor NI no FC Assuwain NI.

Iha sesaun dader, festa hahu ho aktividade desportiva iha kampu futebol Oxford Brookes University Sport nian. Equipa ba jogu nebe fahe ba grupo 8 no 11 regista hamutuk  sanulu rasin ne’en (16). Jogu ne’e hahu ho intervensaun husi embaixador Timor-Leste nian iha Reinu Unido, Joaquim Fonseca no prezidente Komisaun Orgnaizadora, Acacio Marquez. Iha okziaun ne’e, Fonseca sublinha importansia loron 20 de Maio hodi hanoin hikas oinsa luta ne’e lori ita mai to’o iha ne’e, reconquista ita nia liberdade. Ba torneio, embaixador husu atu garante “jogo bonito” no vitoria ba ita hotu. Iha tempo hanesan, prezidente komisaun, Marquez, uluk nanai, expressa nia laran ksolok ba publico presente, equipa tecnica no jogador sira. Chefe komisaun mos husu atu hatudu “jogo furak” ho disiplina, matenek no maturidade, no hein katak torneio iha ambitu selebrasaun 20 de Maio ne’e hametin liu-tan ita nia domin ba Timor-Leste, uniaun no amizade nudar timoroan emigrante iha Reino Unido. 

Iha sesaun Tebe-Bola  nian, jogu termina ho vitoria iha Grupo 11 ba FC FORTUNA, no destaque ba FC FOIN SAE TIMOR husi Norte Irlanda, la'os deit defende titulo conquistado iha tinan kotuk 2018 maibe tamba consagra vitoria consecutiva - manan dala-tolu tutuir malu. Ba imprensa sira, treinador prinsipal FC FST NI, Helio Alin hatudu nia sentimentu haksolok tamba konsege defende titulo ho superioridade no conquista dala ida tan, ho titulo “tricampeão”, iha torneio 20 de Maio ne’e. Missão cumprida, Alin ho nia team lori fila taxa ba Norte Irlanda. Tamba molok hahu jogu, treinador promete ba FH dehan “ami mai atu defende ami nia titulo no konsagra “tricampeão”, e a missão foi categoricamente cumprida. 

Festival 20 de Maio iha Oxford kontinua ho sesaun solene iha salaun Cheney School, Cheney Ln.  Iha fatin ne’e, convidados sira iha oportunidade atu “goja” kalan furak ne’e, ne’ebe nakonu ho muzika, espetaculo cultural no dahur – dansa timoroan nian. Furak iha acto serimonial, ambiente nakonu ho “espiritu patriotismu” no ho emosaun forte liu-tan wainhira rona knanuk Hino Nasional "Pátria". Kalan meaningful ho istoria 20 de Maio nian hodi hanoin hikas ba loron memoravel 20 de Maio ho nia valores sira. Hino hi’it ita nia moral no tane-as ita nia orgulho nudar timoroan no na’ian ba loron eroiku no istoriku sira. 

Afinal, ita Proklama Independensia iha 28 Novembru 1975 no Restaura hikas iha 20 de Maio 2002. Tinan 17 liu-ba ita celebra, ohin ita comemora, nune’e nafatin tinan ba tinan no hatutan husi jerasaun ba jerasaun. Viva Timor-Leste! (AKF/FH)