Veteranos nudar facilitador ba desenvolvimentu laos impede fali desenvolvimentu

Foto Especial google!

Dili. Rehabilitasaun Estrada Ermera – Fatubessi hetan tulun husi BIE no implementa husi Banku Dezenvolvimentu Asiatiku (ADB) no rehabilitasaun dalan husi Aipelu-Bazartete hetan tulun husi Banku Investimentu Europeiu (BIE). Serimonia lansamento ba pakote 2 ne'e halao ona iha loron 11.10.2018, iha Aipelu, Municipiu Liquiça.

Tuir deklarasaun representante ADB iha Timor-Leste iha serimonia ne'e,  Diretor ADB TLRM, Paolo Spantigati, "partisipa iha seremonia lansamentu primeira pedra ba Projetu Reabilitasaun Ligasaun Estrada distritál ho kilómetru 44: seksaun Ermera – Fatubessi (11.8km), no seksaun Aipelo – Bazartete (13,5km) iha Munisípiu Ermera no Liquica. Diretor ADB TLRM iha ninia diskursu hateten katak ligasaun estrada ne’ebé hadi’a daudauk ne’e sei hadi’a liután tempu viajen nian no ligasaun ba klínika, eskola no servisu importante sira seluk. Bainhira finaliza, estrada distritu ne’e sei liga komunidade sira, no ajuda agrikultór lokál, no liu-liu produtór kafé sira, atu bele fa’an sira-nia produtu agríkola ba merkadu (in media ADB Timor-Leste, 11.10.2018)".

Iha veteranus ne'ebe mobiliza jovens sira hodi inpede projetu rehabilitasaun husi Ermera-Fatubesi ho total 11 km, liu husi konferensia la simu, adjudikasaun direta ba estrada Ermera-Fatubessi no la simu projetu refere implementa husi ADB (in TVTL, 12/10/2018).

Hatan ba inpedimentu ba rehabilitasaun ne'e, tuir mai akompana deklarasaun husi MOP, Arq. Salvador Eugénio Soares dos Reis Pires, "Ha’u Husu ba populasaun sira, ba ita-nia aman veteranu sira atu koopera, atu fasilíta no kontribui para projetu ne’e la’o ba oin, atu nune’e lori dezenvolvimentu ba populasaun, nune’e mós ba sira hotu, ba ita-nia oan sira aban-bainrua nian,” Sr. Ministru Obras Públikas, hatete lia hirak ne’e ba jornalista TVTL iha edifísiu MOP, relasiona ho impedimentu ne’ebé hala’o husi populasaun no veteranu sira iha munisípiu Ermera sobre rehabilitasaun estrada Ermera ba Fatubessi ne’ebé sei konstrui husi kompañia Internasionál SHANGHI Construction.

“Lansamentu fatuk dahuluk ba projetu ne’e husi Ermera ba Fatubessi ho nia distánsia Kilometru 11 ho orsamentu millaun 4.2. Ida-ne’e tulun de’it husi ita-nia parseiru dezenvolvimentu Uniaun Europeia ba povu Timor-Leste. Ha’u hanoin ita-nia populasaun ka ita-nia aman veteranu sira tenke kopera no husik projetu ne’e la’o, projetu ne’e iha objetivu para fó tulun ba ita-nia povu, liuliu ba agrikultór sira iha Ermera, atu nune’e sira-nia sasán, sira-nia animál, sira-nia kafé bele asesu ba merkadu lalais no fasilíta dezenvolvimentu ekonómiku sosiál ba komunidade rasik. Aliende ne’e, Governasaun ida-ne’e mós iha polítika katak buat hotu tenke tuir regras no regras husi tulun ne’ebé Uniaun Europeia fó mai ita ne’e, sira iha previzaun katak buat hotu tenke tuir regra prosesu aprovizionamentu hanesan tenderizasaun, no komañia ne’ebé mak liu prosesu tenderizasaun no kualifikadu duni mak tenke halo projetu ne’e, tanba ne’e ha’u husu ba ita-nia aman veteranu sira, ita-nia populasaun sira iha área ne’eba, membru PNTL (Polísia Nasionál Timor-Leste) sira iha ne’eba fornese netik seguransa ba ita-nia kompañia para nune’e bele hahú servisu no kompleta projetu ne’ebé di’ak ba populasaun sira,” Sr. Ministru husu.

Tuir observador ekonomika Francisco da Silva haktuir katak, "estrada nudar infraestrutura bazika importante  ba desenvolvimentu ekonomika no social".

Hatutan Francisco da Silva, "rehabilitasaun estrada Ermera-Fatubessi, importante cirkulasaun merkadoria ne'ebe mak liga ba produtos café ne'ebe konsidere nudar  produtus ne'ebe representa Timor-Leste iha merkadu Internacional, café husi Ermera liliu husi Fatubessi", defende ekonomista Francisco da Silva.

"Veteranos nudar  facilitador ba desenvolvimentu laos impede fali desenvolvimentu, wainhira impede desenvolvimentu lakon ona valor ukun rasik an nian. Veteranos buka hakruk ba Lei no procedimentu sira konaba desenvolvimentu nian, liliu regras aprovisionamentu", arguementa Francisco da Silva. (media sira: tvtl e adb)