Kestaun Justiça mak sei kontribui ba provoka rutura iha koligasaun AMP

Dili. Dada lia ho jurista Venceslau Aleixo Tilman (VAT) konaba procesu justiça ne'ebe bele sai hanesan obstakulus no atrasa formasaun VIII Governo Constitucional. Tanba kandidatu balun nia prosesu iha hela tribunal ka fase investigasaun iha Ministeriu Publiku (MP) mos iha Komisaun Anti Korupsaun (KAK). Divergensia entre Presidente AMP Xanana Gusmao ho Porta voz Taur Matan Ruak (TMR). Xanana hili opsaun pragmatiku ba ninia ema konfiansa no okupa estrutura partidu. Husi Parte Porta voz AMP, TMR hakarak sira nebe hola parte Governo tenki mos, la iha problema ho justiça, mos la iha prosesu justiça nia laran.

Tuir jurista husi UNIPAZ VAT ba Forum Haksesuk iha ninia halao knar fatin,  kampus Fatumeta,Dili, Sexta-feira ne'e (08/06/2018) katak, "husi lideransa partido ne´ebe mak lidera koligasaun, CNRT hakarak aposta ninia ema konfiansa no estrutura partido nian. Parte porta voz AMP nudar Presidente PLP hakarak Governo ne'ebe mak mos no promove transparensia no boa governasaun".

Tenik tan VAT, "diverjenisia ne'e reflete ba kestaun rua, pragmatismo, husi sorin ida. Sorin seluk, kestaun kumprimentu regras no lei".

 Hatutan VAT, "husi parte partido CNRT nebe hetan kadeira 21 mak defende posisaun politika pragmatika no PLP ne'ebe minoria mak defende justiça no transparensia, ba oin  bele provoka rotura iha koligasaun rasik".