VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
DALIA iha "quarteto" LIAN NIA NONOK  
   

segunda-feira, 23 de abril de 2018

Deklarasaun no Apelu Associação dos Antigos Prisioneiros Políticos - ASSEPPOL


DEKLARASAUN NO APELU
ASSOCIAÇÃO DOS ANTIGOS PRISIONEIROS POLÍTICOS
(ASSEPPOL)

Tinan 15 hafoin Restaurasaun Independensia Nasional, Povo Timor-Leste hasoru eventu polítiku lubuk ida ne’ebe dezafia povo nia maturidade polítika, ukun nain nia kapasidade lideransa no gestaun Estado nia interesse.

Kada tinan lima, liu husi eleisoens hahú 2002, sai oportunidade la’os deit ba husu povo nia konfiansa politika atu ukun maibe’e mos, dezafia líder sira nia vontade no kapasidade atu traduz povo nia konfiansa ba konsolidasaun soberania Estadu no hadia povo nia moris.

Iha eleisaun parlamentar tinan 2017, povo atribui konfiansa ba partidu polítiku lima hodi forma asentu parlamentar iha Parlamentu Nasional, hafoin halo komunikasaun polítika hodi forma Governu VII. Infelizmente mosu impase polítiku no fo’o biban ba Presidente da República konvoka eleisaun antesipada.

Eleisaun Antesipada nudar eksperiénsia foun iha moris demokrasia iha Timor-Leste. Dala ida tan, povo hakarak husu ita atu hanoin klean no luan liu konaba poder polítiku, sentido Estado, kontinuidade lideransa no gestaun Estado hodi hetan kbi’it atu konsolida soberania Estado no prepara servidor Estado ho integridade no profesionalismo.

Associação dos Ex-Prisioneiros Políticos de Timor-Leste (ASSEPOL) preokupa ho situasaun polítika, klima lideransa ne’ebe evolui dadauk iha Timor-Leste, no preokupa mos ho prosesu tranzisaun gerasional lideransa estadu nian.

Líder perece, Estado permanece. Assepol observa katak, hahú 2017 mai, karik tamba natureza humana, konjuntura sósio-polítiku hahú husu dinámika iha transferénsia lideransa entre gerasoens.

Eziji ba futuro lideransa atu hatudo kbi’it no boa vontade hodi asegura transferénsia gerasional la’o seguru, estruturado, organizado no pasífiku hodi garante kontinuidade ba funsionamentu no konsolidasaun Estado de Direito Democratico ne’ebe, nia soberania no poder politiku rezide iha Povu.

ASSEPOL rekonhese katak durante tinan sanulu resin lima, ukun nain sira hatudo, susesivamente, progresu lubuk ida iha konstrusaun Estado no desenvolvimentu nasional. ASSEPOL mos aponta katak sei iha dezafius lubuk ida ita hasoru dadauk no barak sei tuir mai.

Estado, liu husi líder hamutuk ho sidadaun tenki iha kapasidade nafatin atu hami’is desafius hirak ne’e no garante dezenvolvimentu ba povo hotu nia moris diak.

ASSEPOL hakarak afirma katak RDTL ho nia intereses no soberania sai buat ida deit (uno), ne’e katak pertense ba timor oan hotu no indivisivel, ne’e katak la pertense ba ida nem bele fahe, no tenki sai responsabilidade sidadaun RDTL hotu-hotu nian, la hare’e ba nia rasa, grupo saida deit, religiaun ka konviksaun politika.

ASSEPOL akompanha ho atensaun ba fenomenu foun ne’ebe mosu iha prosesu eleisaun antesipada, bainhira partido historiku no aliansa husi partidos halo aproximasaun aktivo ba grupos determinados.

ASSEPOL hakarak enkoraja partidos politikus no Aliansa partidarias, bainhira hetan fiar kaer ukun karik, atu envolve ema hotu-hotu iha prosesu konstrusaun Estadu no desenvolvimentu nasional no assegura katak labele hela grupo balun margenalizado durante prosesu nia laran.

ASSEPOL hakarak haksolok ho nia membrus lubuk ida ne’ebe kaer mos knar importante iha partidu politiku oin-oin, iha instituisaun Estado, iha instituisaun non-governamental ka iha instituisaun empresarial, hodi fo’o kontinuidade ba obra bo’ot ne’ebe falta atu kompleta, maka liberta povo husi obskurantismo, husi kiak no mukit no husi atrazu. Nune’e:

• ASSEPOL hakarak manifesta orgulho no honra bo’ot ba eks dadur maluk politiku sira ne’e hotu, iha partido polítiku ne’ebe deit, sai líderes ka kuadros responsáveis, militantes ka simpatizantes deit;

• Ho esperansa tomak, ASSEPOL hakarak tau fiar ba maluk antigus prizioneirus politikus sira atu tane nafatin valores ne’ebe sai razaun ba sakrifísio hotu-hotu nian;

• Husu ba membros hotu-hotu atu kontribue ba kria ambiente pasifiku, demokratiku, no respeita malun durante kampanha politika to’o votasaun iha eleisaun antesipada ne’e.

• Husu ba membros sira atu ezerse didiak ita nia responsabilidade politika nudar sidadaun ho konsiensia no sentido Estadu;

• Husu ba membros sira ne’ebe kaer knar iha partidu politiku ka iha instituisaun Estado, atu asegura nafatin sentidu Estadu hodi tau interese Estado a’as liu interese seluk.

Assepol husu mos:

• Ba lider Partidos politicos hotu-hotu ho organizasaun afiliados sira atu kontrola no uza linguagem ne’ebe edukativu no informativo durante kampanhe;

• Ba partidos politikos sira, liu husi plataforma oin-oin, koligasaun, aliansa, frente ka movimentu atu asegura prosesu kampanha no eleisaun ida pasifiku, demokratiku, respeita malun nafatin no kumpore normas no prosedimentu iha prosesu tomak;

• Ba eleitores hotu atu ezerse didiak ita nia responsabilidade politika hodi ba vota ho konsiensia tuir ida-idak nia opsaun politika;

• Ba orgaun eleitoral, hanesan CNE ho STAE, ba instituisaun ne’ebe garante seguransa no estabilidade, hanesan PNTL no F-FDTL atu servisu ho profesionalismo, imparsialidade no integridade durante prosesu elisaun tomak;

• Ba lideres Partido Politico hotu-hotu, organizasaun afiliados sira no povo tomak atu hatudo aten berani no maturidade politika hodi simu resultado eleisaun ne’ebe tuir mai, hatudo respeito malun no halo komunikasaun politika ba malun nafatin hodi garante funsionamentu normal orgaun soberania hotu-hotu iha Timor-Leste.

Estado hanesan produto politiku kolektivu husi povo tomak ne’ebe, soberania no poder politiku radika iha povo.

Viva Timor-Leste
Viva Buibere no Maubere
A luta continua!
Dili, 11 de Abril de 2018,-

Subscrevemo-nos respeitosamente,

1. Jacinto das Neves A. Alves
2. Julio Alfaro
3. Virgilio da Silva Guerres
4. Juvencio de Jesus Martins
5. Gregorio Saldanha (Moris)
6. Germano A.J. Silva
7. Marito Mota
8. Aleixo da S. Gama (Cobra)
9. Constancio Pinto
10. Antonio Aitahan Matak
11. Carlos dos Santos Lemos
12. Meno Monteiro
13. Filomeno Ferreira
14. Francisco Kalsona
15. Jose Luis de Oliveira
16. Martinho R Pereira
17. Vasco da Gama Criado
18. Jose Antonio de Jesus das Neves “Samala-Rua”


ASSOCIAÇÃO DOS ANTIGOS PRISIONEIROS POLÍTICOS (ASSEPPOL) - Rua Balide, ex-Edifiçio Comarca/ CAVR, Dili, Timor-Leste Telefone; +67077698888, +67077236666

Sem comentários:

Enviar um comentário

Nota: só um membro deste blogue pode publicar um comentário.