VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20180215

AMP atu koalia programa saida iha EA, tanba mai husi diverjensia CNRT ho programa kontinuador no PLP aposta ba mudansas

Foto Espesial (google)
Dili. Eleisaun Antesipada (EA) sei halao iha loron 12 fulan Maio tinan 2018,tuir komunikadu oficial husi Palacio Presidente da Republica, Bairo Pite Dili, loron 7 fulan Fevereiru tinan 2018. Partidu hotu-hotu hahu halo akordu no pre-akordu. Partidu FRETILIN ho PD iha ona pre-akordu,tanba Programa VII Governu Constitusional mak kesi metin partidu rua ne´e. Enquantu partidu tolu ne´ebe mak integra AMP (Aliança Mudansa ba Progresu) CNRT, PLP no KHUNTO. AMP atu koalia programa saida iha Eleisaun Antesipada (EA), iha ELPAR 2017 iha diverjensia iha programa CNRT ne´ebe kontinuador no PLP ne´ebe hakarak mudansas. Tuir Forum Haksesuk sei halo entrevista ho Francisco da Silva, observador politika no mos dosente UNPAZ, iha kampus UNPAZ,Wasindu,Dili, Timor-Leste, Quinta-feira ne´e (15/02/2018).

Forum Haksesuk (FH): Iha Eleisaun Antesipada (EA) Aliansa Mudansa ba Progresu (AMP) atu ba fan saida ba eleitoradu sira?

Francisco da Silva (FdS): Hanesan hau dehan ona iha biban liu ba wainhira estabelese AMP iha Hotel Novo Turismo, loron Quinta-feira (01/02/2018), hau haktuir ona katak hare husi programa eleitoral fulan julho tinan 2017. Partidu CNRT ho PLP difisil atu halo konsiliasaun husi parte rua. Tanba partidu CNRT ninia programa eleitoral ne´e kontinuasaun deit husi programa Governu nian iha tinan sanulu (10) nia laran no ninia matriz mak PEDN 2011/30.  CNRT mak atu kontinua deit saida mak halo ona no kontinua atu halao ba oin.

PLP mai apresenta programa alternativa ho slogan: «Riku no soin fahe hanesan»  no «Rekursus fahe hanesan». Mai ho diskursu kontra ZEESM no projetu tasi mane. PLP iha ninia programa osan tau edukasaun, saude, estradas,bé mos, no seluk tan. Programa PLP nian reflete iha kampane, kontra aeroporto internasional Oecusse no Suai, até dehan tan,«aeroporto Suai manu lin mak semo». Iha Parlamento Nacional Ex-PR Taur Matan Ruak (TMR) atual presidente PLP haktuir, `´ Timor-Leste fahe ba rua, Oecusse Maun Mari no Timor-Leste maun Xanana (PN, 25/02/2016)´´.  

FH: Diskursu Ex-PR TMR iha PN, loron 25.02.2016, halo komparasaun ka analojia familia Xanana-Alkatiri ho familia Soeharto (Ditadura ne´ebe ukun Indonesia iha tinan 32 nia laran). Diskursu mosu pro no kontra. Kontra liliu mai husi CNRT no lori atu halo distituisaun ba PR iha biban ne´eba. Deputado sira ne´ebe kritiku ba PR ninia diskursu Natalino dos santos (ex-Presidente bankada CNRT) no Aderito Hugo (ex-Vice Presidente PN). Agora maun Xanana ho CNRT hamutuk  fali ho TMR no PLP. Tanba deit poder politika tenki tolan buat hotu?

FdS: Diskursu PR momentu ne´eba reflete ba realidade neébe mak hasoru, persepsaun publika katak, `` projetu sira iha Timor-Leste laran tomak hetan prevelijiu liu mak familia Xanana nian. Projetu sira iha ZEESM nian  familia Mari mak hetan prevelejiu liu´´. Diskursu ne´e iha tempo ne´eba la fasil ba Xanana-Mari tolan ida ne´e.Kompara ema seluk ba, ho fali Soeharto ne´e mak:«Sakitnya di Sini». Maibe diskursu Ex-PR TMR nian iha Parlamento Nacional (PN) ne´e tanba iha presidensia TMR nian halo visita ba Sukus sira, hare ho matan no sente rasik moris povu sira nian,saida mak povu ninia necesidade basika mak bé mos, estrada, uma, asesu ba edukasaun, ba saude... husi sorin ida. Sorin seluk, nudar PR simu kesar sira husi sidadaun sira katak ekonomia Timor-Leste nian iha grupu ona ida mak hetan prevelejiu liu.

Nudar Presidente Republika labele halo buat ida maibe  tenki Governu mak bele halo no halao. TMR mos mai buka distanis ho Xanana ho CNRT, tanba identifika tinan sanulu buat hotu la lao.

Programa PLP nian mai atu responde ba necesidade povu nian no desenvolvimentu nebe mak ekilibradu. Kontra ZEESM no Tasi Mane, tanba estraga osan deit. Harii Aeroporto internasional iha Suai ho Oecusse, maibe la perioridade ba aeroporto iha Dili.

Tradus iha lina programatika PLP nian mak: Riku soin fahe hanesan, rekursu fahe hanesan. Gasta milaun ba projetu Tasi Mane no ZEESM, diak liu tau ba Estrada, bé mos, edukasaun, saude no agrikultura.  

FH: Oinsa mak AMP bele elabora Programa ba Governo baseia ba programa eleitoral 2017?

FdS: Em termus prinsipiu laos fasil, konsilia porgama eleitoral Partidus sira ne´ebe mak ho orientasaun ba desenvolvimentu la hanesan. CNRT mai ho programa kontinuasaun ba buat ne´ebe iha, fotu Planu Estratejiku Desenvolvimentu nudar ninia materia kampane.

Enquanto PLP mai konstroe modelu desenvolvimentu ho slogan riku soin fahe hanesan no rekursus fahe hanesan, kontra mega projetus sira. Exersisiu bót ba partidu rua hodi konsilia programa partidu 2: CNRT no PLP nian.

FH : Wainhira lansa AMP iha Hotel Novo Turismo, loron quinta-feira (01/02/2018), `` Porta Voz AMP nudar Presidente PLP TMR no sekjen CNRT Kalbuady Lay lakohi fó resposta, sente inkomoda kestiona konaba ida ne´e´´.

FdS: Komprende perfeitamente iha atu serimonia ne´e, aselera hodi apresenta alternativa. Fiar katak iha biban badak nia laran, AMP sei apresenta Programa ba EA, maske laos fasil tau hamutuk Programa eleitoral partidu rua nian, hare ba programa Eleitoral 2017. CNRT ho programa kontinuador. PLP mai ho programa muda no desenu modelu foun ba desenvolvimentu.

FH: Tanba poder, CNRT ho PLP bele iha entendimentu ruma ba EA no forma Governu. Mas hasoru dilema antagonika iha programa, ida kontinuador no seluk mudansas?

FdS: se hare husi angulu politika bele deit, buat hotu posivel. Maibe hare prinsipiu nudar valor  mak guia politika no tradus liu programa, ne´e exerciciu ne´ebe laos fasil. Problema poder mak manda laos ona prinsipiu no valores. Tanba ne´e hare husi perspetiva valores, iha duni diverjensia ne´ebe labele substima, mas ho opsaun pragmatika bele resolve.

FH: Se partido harii mak la baseia ona ba valores ne´e buat ida karik kuda fini iha fatuk leten?

FdS: Partido politika ohin loron la iha ona (ausência) ba valores, sira hili dalan pragmatiku.Neduni partidu CNRT ho PLP bele hakuak malu dehan ba povu, vota ami nia programa lori moris diak ba imi. Mas la fasil mos, FRETILIN ho PD ba dehan kontrariu fali,oinsa mak CNRT ho PLP hakarak moris diak ba povu, sira rasik kontra Programa Governo.

Eleitores oras ne´e hatene ona distingui, saida mak diak no saida mak ladun diak, hili lider no partidu nebe mak serio ba ukun no desenvolve ho partidu no lideres sira be buka mak poder deit.

FH: Se nune, sa programa no diskursu mak AMP sei lori ba fan iha EA?

FdS: Presidente PLP nudar porta voz AMP sei la halao diskursu ne´ebe ataka hotu mak Governu halo durante tinan sanulu hanesan kampane ba ELPAR 2017. Buka tolan mos buat balun, karik lian kroat hasoru ZEESM maibe tenki tolan mos  wainhira koalia konaba Tasi Mane.

Husi parte Xanana direta ka indiretamente sei uja Fronteira Maritima hanesan kartuz hodi tiru Mari Alkatiri ho Ramos Horta, tanba sira mak ba pendura soberania nasional ka Fronteira Maritima ho Australia ba tinan 50.

Maibe hamrik iha palku leten hamutuk ho TMR maibe konaba Fronteira Maritima, tanba iha diskursu iha Parlamento Nacional (PN) nudar Presidente Republica (PR), 25.02.2016, TMR akusa maun bót Xanana nudar PR, maun Mari nudar PM no maun Ramos Horta nudar MNEC,sira mka kompromete ho Australia hodi entrega Fronteira Maritima ba Australia.

Iha palku leten, TMR sei la koalia programa «riku soin fahe hanesan» tanba bele halo maun bót Xanana tersingung, tanba riku soin mos pertense ba grupu Soeharto.
Konaba programa rasik, CNRT sei koalia konaba Planu Estratejiku Desenvolvimentu Nasional (PEDN 2011/30) hanesan patrimoniu CNRT nian. Maibe TMR kala tolan mos perioridade konaba mega projetu sira ne´ebe mak komtempla nudar matriz ba PEDN 2011/30! 




Sem comentários:

Enviar um comentário

Nota: só um membro deste blogue pode publicar um comentário.