VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE
DALIA iha "quarteto" LIAN NIA NONOK  
   

quarta-feira, 6 de dezembro de 2017

Resolve Krisi Politika, nudar Prenda Natal husi Xanana-Mari ba Sarani no Povu Timor-Leste

Xanana-Mari, promove Paz iha Uma Fukun Parlamento Nacional (08.02.2013)
Tuir mai Forum Haksesuk (FH) dada lia ho analista politika João Viegas (JV) konaba perspetiva politika wainhira hamosu Aliança Maioria Parlamentar (AMP) nudar alternativa ba forma VIII Governo Constitucional.

FH: Tanba saida mak ita nia afirmasaun katak: AMP iha tinan 2007 la hanesan AMP iha tinan 2017?

JV: La hanesan tanba iha tinan 2007, Partido Fretilin mak manan duni eleisaun ho minoria simples maibe la konsegue forma governo tanba komunikasaun momentu neéba la konsegue dada partido seluk halo koligasaun. Sorin seluk, situasaun momentu ne´eba Timor-Leste infrenta krise bót tanba ne'e mak mosu AMP (Aliança Maioria Parlamentar) hodi suporta forma IV Governo Constitucional.

FH: Tanba saida mak Partidu FRETILIN hamosu konceitu tolu (3): Aliança, Inclusaun no Insidencia Parlamentar?

JV: Ne´e hanoin diak husi Lideransa Partido Fretilin nudar manan nain ba Eleisaun Parlamentar (ELPAR) 22 de Julho tinan 2017, sorin ida. Sorin seluk, Fretilin hakarak envolve hotu partido sira iha asentu parlamentar, tanba ne´e mak hahu koligasaun ho PLP no KHUNTO, insidensia Parlamentar ho CNRT no inclusaun ho PD.

Maibe iha dalan klaran ona  mak PLP mos dada ain sai, hela deit PD ho KHUNTO asina nota entendimentu ho FRETILIN, iha loron 4 fulan Setembru tinan 2017 iha Hotel Novo Turismo, konaba «komposisaun iha Meja Parlamento Nacional». 

FH: PLP ho KHUNTO  hahu tama iha koligasaun maibe derepente sai husi Koligasaun?

JV: PLP sai uluk, konforme afirmasaun publiku husi porta Voz no Vice Presidente PLP Fidelis Maguelhães no Presidente PLP rasik, la kosegue tó konsensu ruma konaba prinsipiu koligasaun entre PLP ho FRETILIN. Divergencia hahu husi «monopoli» ba orgaun soberania husi Partido FRETILIN. Presidente Republica husi FRETILIN, Presidente Parlamento husi FRETILIN no PM mos husi FRETILIN.

La iha mos entendimentu tanba programa eleitoral PLP ho FRETILIN, mos PLP ho CNRT. Proposta PLP, apresenta modelu alternativu ida ba bipolarizasaun do poder ka hegemonia do poder husi CNRT ho FRETILIN. Hare ba moto «la iha diskriminasaun ba riku no soin», riku soin fahe hanesan. Programa deit PLP divergencia fundamental deit ho FRETILIN.

FH: Se dehan divergencia ho CNRT, hare husi programa eleitoral. Oinsa mak PLP ho CNRT bele hamutuk hari plataforma AMP?

JV: Problema buka hare husi lidun hotu,labele parte ida deit. Presidente PLP ho Presidente CNRT nia relasaun ladun diak ho diskursu antigo Presidente Republica Taur Matan Ruak (TMR) iha Parlamento Nacional (PN) loron 25 fulan Fevereiro tinan 2016, konsidere «Xanana ho Mari Alkatiri» nudar «Soeharto» Timor nian. Humilasaun iha publika ne´ebe mak ba qualquer ema moris ladun simu.

Wainhira PLP nia ambisaun hakarak lori Taur Matan Ruak (TMR) ba sai Primeiro Ministro (PM) ho apoio husi maun Xanana. Xanana hatan, «apoio ba Presidente Republica, ikus mai bolu hau Soeharto.Se hau apoio tan ba PM, bolu tan hau saida?», ne´e mak ironia Xanana nian iha biban ne'eba.

Maibe Tanto Xanana ho Taur Matan Ruak, mos nudar maun no alin iha funu, sira nain rua nia belun nudar maun alin tanba prosesu no tanba luta ba ukun rasik an. Iha cimeira Singapore, entre Lider AMP nain 3 (Xanana, Ruak no Naimori), "problema hau (Xanana) ho hau nia alin (TMR) ne´e problema kiik, problema bót mak problema Nasaun nian (GMNTV, 21/11/2017)".

FH: Tanba saida mak hariii AMP ne´e tarde hodi apresenta nudar alternative ba Governo?

JV:   Natureza AMP ne´e politika, se tuir lolos harii iha inicio kedan. Forma ona Governo mak foin luv-lavu harii AMP hodi apresenta alternativa. Iha ne´e hatudu katak próprio AMP la preparadu no la hare tempo.

FH: Tanba saida mak dehan AMP la preparadu no la hare ba tempo?

JV: AMP la preparadu tanba, hare husi iniciu kedan tanto CNRT, PLP no KHUNTO «La Konsisten».

CNRT liu husi konferensia iha loron 04.08.2017, afirma katak: «sei ba iha oposisaun, sei la hola parte iha Governo no sei la bolu partido seluk forma governo».

PLP mos hahu kedan, hafoin hetane resultadu ELPAR 22.07.2017,  mai ho diskursu « hili dalan Oposisaun ne´ebe dinamika no edukativu».

KHUNTO Rasik, iniciu kedan  tama halo parte ba Koligasaun, hahu kedan FRETILIN nia konvite formal ba koligasaun hodi bolu deit PLP ho KHUNTO (12/08/2017). Depois FRETILIN, PD no KHUNTO asinatura nota entendimento konaba hili meja ba Parlamento Nacional (04/09/2017)).

Iha dia 05 Setembro tinan 2017, FRETILIN, PD ho KHUNTO fó votus ba eleitu ba Aniceto Guterres ba Presidente Meja Parlamento Nacional.

Relasaun pesoal Xanana ho Taur mos, komunikasaun quase tinan ida ho laran la iha, provoka husi krise «rekondusaun Maijor General Lere Anan Timur ba CEMGFA F-FDTL iha Dezembro tinan 2015. Divergencia ne´e dait ba veta OGE 2016 no diskursu ba Estado iha Parlamento Nacional iha loron 25 de Fevereiro tinan 2016 hodi hamosu analojia «Soeharto de Timor».

Afirmasaun dehan katak AMP la preparadu tanba fakta sira iha ne´e. No la preparadu ba tempo, tanba sira rasik la hare ba tempo.

FH: Se nune AMP mos koligasaun ida temporario no la duru mos. Se hare husi fakta sira hotu hahu prosesu komunikasaun Politika husi fulan Julho mai tó harii AMP rasik. Iha dalan klaran bele monu?

JV: Politika «la iha amigo permanente», iha mak interese, interese grupo, pesoal no partido. Ohin bele hamutuk, aban bele fahe malu, wainhira interese mak kesi malu, laos prinsipiu mak kesi koligasaun. Divergencia entre CNRT ho PLP iha linhas programa eleitoral, ne´e koligasaun interese no laos prinsipiu. Se hare husi koligasaun prinsipiu ne´e hare husi programa eleitoral. Realidade CNRT ho PLP nia programa la hanesan. Wainhira interese la atinji, sira sei fahe malu fali.

FH: Se nune, oinsa hare ba koligasaun FRETILIN ho PD hodi forma VII Governo Constitucional?

JV: Iha ne´e mak diferensa mak ne, koligasaun de prinsipiu no mos interese. Interese mak lori partido rua asina acordo entendimento iha Novo Turismo (04/09/2017) konaba «Meja Parlamento» entre partido 3 (FRETILIN, PD no KHUNTO) no acordo entre FRETILIN ho PD (13/09/2017) hodi apresenta PM ba Presidente da Republica no forma VII Governo Constitucional.

Maibe acordo koligasaun FRETILIN ho PD mos kesi ho principio, ninia materializasaun liu husi elaborasaun ba Programa VII Governo Constitucional ne´ebe ninia matriz representa husi pilares 3: Plano Estrategica do Desenvolvimento Nacional (2011/30), kontinuasaun husi Programa VI Governo Constitucional no programa eleitoral partido rua nian nudar kompromisu wainhira apresenta ba povu iha ELPAR 22.07.2017.

FH: Hare husi divergencia entre Koligasaun ho AMP. Sei iha esperansa ba acordo ruma molok tinan 2017 nia rohan, entre Mari Alkatiri ho Xanana?

JV: Karik ne´e mak ita hotu nia espetativa, maibe lakohi mos koloka espetativa ás konaba ida ne´e. Diak liu realista deit, politika bele muda iha minutu ida ka rua nia laran. Ita hotu la espera ke, Xanana-Mari mesra los tinan rua resin nia laran, derepende fahe malu. Ita mos la espera, Taur Matan Ruak trata Xanana no ikus mai hakuak malu no hamutuk. Neduni, situasaun bele muda. Hein katak maun bót sira bele prepara dadaun prenda Natal ba Povo Sarani Timor-Leste atu tama ba epoka festejos natalicias ne´e.

FH: Se Mari-Xanana la iha prenda ba povo no Sarani Timor-Leste iha loron bót Natal. Dalan  ba Eleisaun Antecipada (EA) nakloke hela?

JV: Sim, ne´e dalan ida mak EA, dalan seluk mos AMP hakarak Presidente da Republica entrega ba AMP mak forma VIII Governo Constitucional.

Hau nudar observador politika, hahu inicio kedan dehan ona "AMP ida uluk la hanesan ho AMP ida agora", akompana didiak analisa sira iha deklarasaun no afirmasaun iha leten katak dalan ba AMP ida forma husi CNRT, PLP no KHUNTO la iha fatin.

Ikus liu mak hotu-hotu preparadu ba EA, mas iha ninia konsekuensia em termo sociais no ekonomika, ne´e prejudika liu mak povu.

Maibe dalan mak  ida ne´e, "ukun entrega deit ho ukun hetan fiar husi povu liu husi eleisaun la hanesan". Nudar politiku tenki «respeitu ba povu nia votus».

FH

Sem comentários:

Enviar um comentário

Nota: só um membro deste blogue pode publicar um comentário.