“Gloria Dei, Homo vivens”: Natal no Nacionalitarismo (Tetu hikas mensagem Natal husi Nicolau dos Reis Lobato, Vice-Presidente FRETILIN)

“Gloria Dei, Homo vivens”: Natal no Nacionalitarismo

(Tetu hikas mensagem Natal husi Nicolau dos Reis Lobato, Vice-Presidente FRETILIN)

Martinho G. da Silva Gusmão

Docente Filosofia Politica

Liu husi facebook, hau hare cerimonia hasae bandeira CNRT, PLP no KHUNTO. Iha kotuk, hau hare spanduk ne’ebe hakerek ho liafuan: “Lalika rona rumoris oi-oin, lalika tauk! Ami sei la husik povu nee tanis dala ida tan. Servisu nafatin ba iha paz no tolerância, fiar nafatin mai ami ... mai ita salva konstituisaun RDTL”.

Liafuan hirak ne’e halo hau hanoin hikas livro ida husi sociólogo Peter L. Berger, Rumors of the Angels (1968). Tuir nia hanoin, ita nia sociedade moderna nakonu ho “rumors” (= rumoris), wainhira relativismo mak ukun iha sociedade nia laran. Ne’e katak, buat kmanek, murak no kmook iha de’it ninia folin no sentido wainhira ita hare tuir ida-idak nia kabun laran, koi ida-idak nia husar. Ho liafuan “Lalika rona rumoris oi-oin, lalika tauk!” iha de’it folin wainhira relativa ho CNRT, PLP no KHUNTO nia interesse. Oinsa ho Fretilin no PD? Partido rua ne’e kala sente de’it rumoris. Basá, saída mak partido 3 dehan ne’e hanesan bidon mamuk (iha lian ingles – “rumors” katak lian boot kaben boot). Berger hakerek, “Something that is right to one acceptable system may be wrong relative to another”. Tuir mai wainhira dehan “Ami sei la husik povo ne’e tanis dala ida tan”! Ita hare iha Parlamento Nacional nia laran – Deputado sira husi Fretilin no PD mak ko’alia to’o kakorok bubu atu dehan “povo tanis”, “povo terus”; maibe, husi bancada CNRT, PLP no KHUNTO kakorok mahar dehan “povo LA tanis”, “povo LA terus”, to’o ikus mai Xanana Gusmão (CNRT), Taur Matan Ruak (PLP) ho Naimori (KHUNTO) mak la agoenta hodi tanis no terus fali iha Singapura (povo tur iha uma tali/ du’ut la tanis; sira tur iha hotel tanis fali). Ho Berger nia liafuan karik “... if many things are right, many more remain wrong”. Ne’e duni, wainhira dehan “servisu nafatin ba iha paz no tolerância”, hau nia rentos hahu betok oituan. Hakat liu ba dehan “fiar nafatin mai ami”, hau atu desmaia de’it. Ikus liu, sira foti hirus matan atu dehan “mai ita salva konstituisaun RDTL”, hau nia matan nakloken kedas.

Laos atu hateten netik CNRT, PLP no KHUNTO hodi hatun VII Governo ka atu defende Partido Fretilin no PD. Ba hau, frase naruk nebe bloco oposição maioria parlamentar (BOMP) ka aliança maioria parlamentar (AMP), hatudu de’it “incerteza” sintaxes (bou hamutuk liafuan sira maibe la hatene atu dehan saída; “meaningless”) no “inflação” semântica (hada hamutuk liafuan sira maibe kleuk tun sae, la hatudu dalan hodi lao tuir; “senseless”)! Ne’e katak wainhira ita ko’alia mak “sujeito” malahuk ka hanesan nakukun laran, nune’e liafuan sira ne’e la hatudu “predicado” lolos – katak, la iha acto concreto – hodi nune’e wainhira ita ko’alia hotu ema la hare ita nia “objecto” lolos. To’o ikus mai, ita la hatene saída mak sira hanoin no saída mak sira dehan no ikus mai saída mak sira halo! Partido 5 ne’e: Fretilin, CNRT, PLP, PD hamutuk ho KHUNTO halo tiha PN hanesan fatin nebe nakonu ho “Rumors of the Angels”.

Politica 2017 hanesan ho situação 1974, wainhira partido 5 – ASDT/FRETILIN, UDT, APODETI hamutuk ho KOTA no Trabalhista halo “Rumors of the Angels”. Hau sei ki’ik tempo neba! Maibe, hau bele sente husi saída mak Camarada Vice Presidente Nicolau dos Reis Lobato hakerek iha ninia mensagem Natal 1974.

Maski Dr. Mari Alkatiri uluk dehan hau “tabeledor ba Nicolau Lobato”, no CNRT ho Fretilin dehan “hasai batina mak halo politica”, maibe ida ne’e la hatudu FRETILIN nia ideia, pelo menos Nicolau Lobato! Mensagem Natal 1974 ne’ebe nia hakerek, hatudu ninia karisma nu’udar “Pastor Politico” (hau foti Cardeal Joseph Ratzinger nia liafuan) ne’ebe halo duni “tarefas do educador politico” (filosofo Paul Ricoeur nia liafuan). Hau hakarak foti ninia liafuan atu ita bele halo reflexão iha Natal 2017 ne’e!

Saida mak Natal ba FRETILIN?

Husi artigo ne’ebe mosu iha 27 Dezembro 1974, Nicolau Lobato hakerek katak, “O Natal para os cristãos é um dia em que começa no mundo a Redenção, a Libertação dos homens. É o dia em que os povos de todo o mundo devem sentir-se unidos em família, vivendo e convivendo em paz, compreensão e concórdia. O Natal, portanto, é o dia da Libertação, da Unidade e da Paz”.

Buat nebe hau hatene, hatur “Redenção” (ka “Salvação”) hanesan ho “Libertação dos homens” hatudu katak Nicolau Lobato ninia fiar nu’udar sarani hakat tama tiha ona ba área cobertura iha teologia da libertação nia laran. Hau sente, durante iha Seminario Dare nia seidauk hatene konaba teologia da libertação! Iha 1970 padre Gustavo Gutierrez hakerek livro konaba “Teologia de la liberacion”; tuir mai iha 1974, padre Leonardo Boff hasai tan livro “Jesus Cristo Libertador: Ensaio cristologia critica para o nosso tempo”; nune’e mos padre Jon Sobrino hakerek artigo konaba “Solidaridad y Santidad Politica”. Livro sira ne’e sai hanesan mata-dalan maibe mos monumento hodi hamosu buat nebe estudioso sira husi Eropa no Estados Unidos hanaran “the third wave of theology” iha mundo, tan mai husi movimento intelektual iha “the third world”.

Koalia momos no lolos karik, hau sente katak Nicolau Lobato la hatene konaba livro hirak ne’e. Tan livro sira ne’e mosu iha 1970-1974, dok liu husi Timor atu tama lalais no to’o lalais iha Nicolau Lobato nia liman! Maibe, hau bele dehan katak nudar “anak emas” reitor Seminario nian padre Andreas Rábago SJ (nebe mai husi Amerika Latina), no dala ruma Seara hakerek konaba “civilizar”, “cristianizar” no “nacionalizar” liu husi Acção Católica (liu-liu artigo padre brasileiro nian, Ezequiel E. Pascoal), Nicolau Lobato kala horon kois ona oituan sabor fiar nebe mai husi “masin” no “naroman” teologia da libertação nian. Tan ne’e hau fiar katak reflexão Nicolau Lobato nian konaba Natal ne’e hatudu duni vocabulário husi teologia da libertação nian. Hatur liafuan “redenção” (“salvação”) hanesan ho “libertação” ne’e mai husi ambiente teologia da libertação.

Keta haluha, iha Setembro 1974 ... ASDT nakfilak ba FRETILIN. Estudante sira be mai husi Lisboa, hatama tan “narkoba” marxismo, comunismo, leninismo no maoismo iha Timor-Leste. Husi biban seluk, ema hanesan Xavier do Amaral no Nicolau Lobato mai husi catolicismo tradicional nebe metin ba sira nia fiar. Mensagem Natal husi camarada Nicolau dos Reis Lobato, hau sente katak artigo ne’e hatudu saída mak Santo Ireneu hakerek, “Gloria enim Dei vivens homo, vita autem hominis visio Dei” (Adversus Haereses IV. 20. 7) – katak Gloria ba Maromak leten as ba mak hatudu iha ita ema nia moris diak, no moris di’ak be ita ema hetan hatudu hikas Na’i nia FutarIlas. Ho liafuan badak, Gloria ba Maromak ne’ebe haraik “redenção” no “salvação” hanesan duni ho “libertação” mai ita.

Hau la dun hatene saída mak reacção husi Bispo no Na’ilulik sira iha otas neba hatan ba artigo ida ne’e. Fulan ida liu tiha, iha duni 25 de Janeiro de 1975, Dom José Joaquim Ribeiro no conselho presbiteral Diocese Dili nian hakerek “Carta Pastoral: Perante uma nova situação”. Furak tebes, atu tetu hamutuk saída mak Nicolau Lobato hakerek no oinsa mak haka’it, hatitu no hakawe oituan ho saída mak Amo Bispo fo sai! (Tempo no fatin mak la dun bele atu hau hakerek).

Dala barak liu ema dehan Bispo anti-FRETILIN. Maibe, la dun iha ema mak hatene saída mak Bispo hanoin no hato’o. Nia hanoin katak Igreja Catolica labele halis ba partido ida ka grupo ida. Ne’e mai husi “trauma” particularíssimo ida! Tan iha tempo uluk, mosu Revolução 1910 (Republicano) Igreja hetan terus barak iha Portugal no Timor. Governo foun hadau hotu kedas escola, hospital, no convento sira atu sai Estado nia propriedade. Iha Timor-Leste, regime Republicano sira duni sai padre jesuíta sira no madre canossiana sira husi Soibada no fatin seluk tan. Hela de’it Amo-lulik diocesana sira mak tuba rai metin hodi agoenta Igreja. Ikus liu, mosu “Lei Separação entre Estado e Igreja”. Hare ba ida ne’e, Bispo Ribeiro koko atu Igreja labele monu tama tan ho Revolução 1974 – no husu Igreja atu “netral”. Nune’e, carta pastoral ne’e husu atu povo vota tuir consciência, no hirarquia igreja nian labele halo politica. Sa tan, husi ASDT ba FRETILIN, mosu marxista ho comunista sira be haklalak lian boot kaben boot los iha Dili laran; sira sai tiha hanesan “cowboys”. Trauma “revolução” aumenta tan ho “marxismo, comunismo, leninismo, maoismo”, halo Bispo sai “oposição” ba FRETILIN.

Mosu caso oan ida: Bispo haruka sai tiha padre Eduardo Roxo SDB atu fila hikas ba Portugal. Na’ilulik salesiano iha Fatumaka ne’e “radikal” los iha Baucau no Bercoli to’o Dili. Claro, Nicolau Lobato sente triste tan lakon “belun di’ak” ida husi Igreja laran nebe bele hamaluk netik ninia politica. Uluk sei ASDT, Amo-lulik sira sei tama iha laran. Ba tiha FRETILIN ... padre sira rona tuir bispo atu “netral” de’it ona (maski, iha ai-laran sira serviço maka’as).

Hau sente tan Bispo husu Igreja no Padre sira atu sai “netral”, mak Nicolau Lobato iha mensagem Natal 1974 hakerek nune’e, “Não deve haver nesta terra neutros no processo político que ora está a decorrer. Porque não há homens apolíticos numa conjuntura como esta pois, quem não é pro e contra, que não é pela mudança é pela situação. Os que se dizem neutros estão dizendo ao fim e ao cabo, por outras palavras, que não se importam de que tudo fique na mesma como dantes. E esses são também a reacção”. Ho liafuan badak, ema hotu involve iha politica, tan ne’e Igreja labele “neutro”. Ba Nicolau Lobato se de’it mak dehan “neutro” iha politica “... são também a reacção”. Romo Y.B. Mangunwijaya hakerek radikal liu tan, “netral berarti pengkhianatan terhadap politik hati nurani” (1996) – liafuan ne’ebe nia hasai atu defende Dom Carlos F.X. Belo SDB, tan nia hetan ataque barak nu’udar “uskup berkepala dua; tidak tahu terima kasih; Uskup bermain politik”. Hau sente Deputado sira husi Partido-Fretilin barak mak la hatene Nicolau Lobato nia liafuan hirak ne’e – tan ne’e ko’alia barulho liu! Sa tan CNRT? Ida ne’e lalika dehan tan! Baralha mak la agoenta.

Ne’e duni, Nicolau Lobato hakarak insiste atu wainhira ita celebra Natal labele haluha katak Jesus Cristo ne’ebe mai lori “Redenção”, tau hela naha todan ba ita hotu nia kba’as-leten atu luta ba “Libertação”. Teologia da libertação iha Timor-Leste hahu ona husi leigo católico ida --- “Pastor Politico” no “Educador da politica” ida --- Nicolau dos Reis Lobato. Hasoru situação politica iha 2017 ne’e, hela furak atu ukun na’in sira rona husi “pastor” no “mestre” nação nian ne’e ... ho humildade no perseverança.

Natal no Nacionalitarismo

Tuir hau nia hare, husi filosofia marxista no teologia católica, Nicolau Lobato hahu ona kari fini nacionalitarismo. Nia antecipa tiha ona teoria politica liu husi praxis: experiencia nu’udar líder revolucionário ida. Hare didi’ak: nacionalitarismo besik duni, maibe la hanesan ho nacionalismo!

Saida mak nacionalitarismo! Uluk nanain, ita rona to’ok mensagem husi Nicolau Lobato, “O nosso povo precisa, reclama libertar-se porque é e sente-se oprimido. Oprimido por mil e uma enfermidades que o colonialismo criou e agravou, sofrendo a miséria da fome e doença cronicas. Oprimido pela cegueira da ignorância, do obscurantismo multissecular, pelas chagas sociais da prostituição, venalidade e corrupção de toda a ordem. Oprimido pela indiferença e egoísmo de muitos de seus próprios filhos que, não obstante a responsabilidade tamanha que sobre os seus ombros pesa, fogem mesma responsabilidade e fazem ouvidos de mercador aos gemidos do povo miserável e desdenham oferecer um dedo que seja para o levantar da lama da exploração do homem pelo homem”.

Liafuan chave ne’ebe Nicolau Lobato hakerek mak “oprimido”. Tuir matenek na’in iha filosofia politica, nacionalitarismo mosu nu’udar movimento anti-imperialismo (anti-colonialismo) ne’ebe hakarak hatur hikas marxismo (cf., Lúcio F.R. de Almeida, Nacionalitarismo, anti-imperialismo e democracia, PUC: São Paulo, 2012) hodi liberta povo husi situação oprimido. Nacionalitarismo sai hanesan ideologia ida ba “povo oprimidos” (rakyat tertindas) iha “nação oprimida” (bangsa tertindas) ida nia laran iha nível sociológico; iha cultural no politica ita hare “cidadania oprimida” (kewarganegaraan tertindas) ho “nacionalidade oprimida” (kebangsaan tertindas). Ita husu: se mak hamosu “oprimido” ne’e lerek? Capitalismo! Tan ne’e mak movimento anti-imperialista sira hakilar “abaixo capitalismo”!

Hahu década 70 mai to’o 90 molok bloco comunista soviética rahun, movimento sira be hanaran “nacionalista anti-colonialista” nakfilak-an ba liu nacionalitarista. Liu-liu iha contexto Amerika Latina, tan sira hakawe catolicismo no marxismo-comunismo hodi hasoru capitalismo. Frase ne’ebe hau foti husi Nicolau Lobato, hatudu oinsa mak nia bele kaer kopu rua nakonu: catolicismo iha liman los, marxismo iha liman karuk (bele troka malu)! Hau surpresa boot tebes, katak, ho limitação tomak ne’ebe ita nia líder ida ne’e hetan ... nia hamrik iha fatin mukit ida, maibe ninia hanoin ne’e hakat liu tiha ona tempo. Nia la’os de’it halo politica, no funda estratégia militar ida, maibe mos hatudu ninia inteligência boot ida.

Timor-Leste ohin loron iha 2017 sai ona “nação soberana” no “povo soberano”. Bele ka lae ita ko’alia hikas konaba “nação oprimidas” (nacionalidade oprimidas) no “povo oprimidos” (cidadania oprimidas)? Husi kedas wainhira Alkatiri kaer ukun, no todan liu tan wainhira Xanana ukun, ita bele hare “The Rise of Ersatz Capitalism” (Yoshihara Kunio, Oxford: 1988). Saida mak “Ersatz Capitalism”? Ne’e katak “capitalismo falso” ida ne’ebe moris iha ASEAN hala’o husi ditadura sira nia família (Soeharto iha Indonesia; Ferdinand Marcos iha Filipina; Mahatir Mohammad iha Malaysia; Hasanah Bolkiah iha Brunai). Los duni iha Timor-Leste, Taur Matan Ruak dehan Alkatiri ho Xanana ne’e hanesan Soeharto ne’ebe hariku de’it sira nia família no grupo! Sira riku la’os tan hisik kosar-wen rasik, maibe hois Estado ninia propriedade!

Ita mak hakarak loke néon no fuan, kakutak no matan ita bele sente paradoxo boot tebes iha “ersatz capitalism” --- povo nonok ninian no hakmatek iha fatin, na’iulun politico sira mak tur la metin no toba la dukur. Maski Maun Boot Xanana Gusmão sai promotor konaba g7+ la’o lemo rai atu tulun sira nu’udar “Estado frágil”. Tuir Lei-Inan RDTL, Estado mak Presidência da Republica, Parlamento Nacional, Governo no Tribunais. Gasta osan barak liu tan, Estado sai “frágil” ba bebeik de’it – hanesan “cancro” karik, estado fo han ninia an rasik no tohik ninia isin rasik. Hau dala barak hanoin, tan sa mak ita ba dasa ema nia uma laran no hamos ema nia foer, depois mak fakar tama fali iha ita nia Estado laran? Imi ba halo saída no ko’alia saída iha g7+ mak mai sobu fali ita nia Estado? Maibe, hanesan Norberto Bobbio dehan, “... bom governo perdeu muito da sua atualidade pode depender do facto de que o problema foi se deslocando do bom governo para a boa sociedade. ... já não se acredita mais que, para mudar a sociedade, basta mudar o regime politico, com era possível acreditar quando o Estado era tudo e a sociedade for do Estado era nada. Seria realmente um grave erro ...” (cf. Teoria Geral da Politica, Rio de Janeiro, 2000: 81). Maski Timor-Leste la iha “bom governo” (liu tan mak “Estado frágil”), maibe ita nia povo moris nu’udar “boa sociedade”. Dala ruma hau hetan informação konaba g7+, hau fiar katak Xanana ho ninia equipa halo confusão entre “bom governo” (Timor-Leste falta teb-tebes) no “boa sociedade” (povo Timor metin teb-tebes). Hau fiar katak, povo Timor-Leste ne’e hakmatek no moris di’ak la’os tan Estado ninia kolen, maibe sociedade ninia virtude (laran diak, hahalok kmanek). Husi I-VI Governo lalehan la tun mai rai timor de graça de’it no ema iha rai timor ne’e la sae ba lalehan isin ho klamar mos! Hatun governo ida hasae governo seluk, la significa Timor-Leste sei moris di’ak no moris hakmatek. Lae! Atu dehan lolos karik, Fretilin no PD monu karik ba mos, kala fanatismo oituan ne’ebe CNRT, PLP no KHUNTO nia emar sira mak bele fiar katak “Ami sei la husik povu nee tanis dala ida tan. Servisu nafatin ba iha paz no tolerância, fiar nafatin mai ami ... mai ita salva konstituisaun RDTL”. Husi 2002 to’o 2017, ita nia matan bele hare saída mak ba oin, saída mak ba kotuk.

Tan sa mak hau la dun fiar katak CNRT, PLP no KHUNTO sei halo buat barak? Hau tetu saída mak Nicolau dos Reis Lobato dehan nanis ona!

Ida uluk (1) hare ba povo ne’ebe “Oprimido por mil e uma enfermidades que o colonialismo criou e agravou, sofrendo a miséria da fome e doença cronicas”. Nicolau Lobato hanoin katak Timores sai “oprimido” tan hahalok tomak ne’ebe “colonialismo” halo mai ita. Ne’e to’o iha 1974. Maibe, la’os ona tempo atu ita temi nafatin “colonialismo” iha 2017. Sa tan, ita hadomi mate-an los Portugal no Indonesia ho Australia. To’o sira mai lalin mos ita nia rikusoy no kari hela rai-rahun ba mata-laran mos “hadomi mate nian kedas”! Maibe, iha “colonialismo” foun ne’ebe at liu --- hanesan Taur Matan Ruak dehan “sai atan tan tauk ko’alia lia los”. Iha antropóloga ida husi Maori, Nova Zelandia naran Linda Tuhiway Smith (cf., Decolonizing Methodologies: Research and Indigenous People, Zed Books: 2012), mak ko’alia konaba “colonizing knowledge” (chapter 3).

Hau fo exemplo atu hatene saída mak “colonizing knowledge” ne’e lerek. Iha 19 Outubro 2017, CNRT-PLP-KHUNTO vota contra proposta husi Governo (Fretilin no PD). Razão tan proposta ne’e la realista, irracional no ambicioso. Hau iha certeza, katak, debate ba proposta daruak (Janeiro 2018) ninia destino sei hanesan. Ba hau, rona tiha argumento ne’ebe oposição hato’o, tuir Linda Tuhiway karik, atu hatudu de’it sira nia “positional superiority” (foti-an as liu tan) hodi hametin sira nia “regime of truth” (hanesan uluk Comissario Dionisio Babo dehan “a verdade conclusiva”; cf., KKP/CVA). Oposição lakohi diskute programa, maibe haksesuk malu fali konaba ba “se mak bele kaer governo”. Hasoru governo minoria (Fretilin no PD), oposição (CNRT, PLP, KHUNTO) bele toka musica tuir sira nia hakarak no halo governo bidu tuir oposição nia ritmo no compasso. Hodi Linda Tuhiway nia liafuan karik, oposição sai tiha hanesan colonialista sira ne’ebe “... view of itself as the centre of legitimate knowledge, the arbitre of what counts as knowledge and the source of civilized knowledge” (p. 66). Oposição kala hanoin sira mak hatene liu povo nia moris. Ne’e tan hare ba Xanana Gusmão no Taur Matan Ruak ninia activismo politico (periode 2012-2017). Hare ba resultado eleição 2017, Maun Boot Xanana no Taur hetan de’it fiar ho cadeira 30; empata ho Fretilin no PD. Ida be halo diferença mak KHUNTO, maski “underdog”. Ne’e duni, hare no tetu Deputado sira iha Oposição nia liafuan, hau sente de’it katak sira mak “cidadania oprimida” no “nacionalidade oprimida”, grupo ida iha PN nia laran ne’ebe terus no ki’ak tan “the colonization of the mind” --- sira tauk no moe atu ko’alia husi sira nia fuan no néon. Hanesan chanel TV nian karik sira hein remote control ne’ebe halo iha Singapura. “Colonization of mind” katak, ema ne’ebe fuan tauk, laran nakdedar no ibun to’os atu ko’alia sai sira nia hanoin tuir sira nia matenek! Sira sai tiha “asuliar” (auxiliar), ka Presidente da Republica Indonesia nian, Abdulrahman Wahid (Gus Dur) dehan “politisi abdi dalem”. Liafuan “abdi dalem” katak atan sira ne’ebe servisu iha keraton Yogyakarta no Surakarta, ne’ebe wainhira Sultan liu karik sira hakneak tane liman. Realmente, mentalidade politika Soeharto nian duni (liafuan husi Taur Matan Ruak). Ho “colonization of mind”, hau la sente katak partido tolu ne’e sei bele halo buat barak. Se CNRT, PLP no KHUNTO mak tur no moris ho “colonizing of knowledge” no “colonization of mind”, sira bele halo lerek saída? Lae! Povo tenki hein ema ne’ebe mental forte no fuan kmanek atu ukun.

Ida seluk (2) hateke ba sira ne’ebe “Oprimido pela cegueira da ignorância, do obscurantismo multissecular, pelas chagas sociais da prostituição, venalidade e corrupção de toda a ordem”. Nicolau Lobato hatudu ona katak, ema oprimido wainhira moris iha “cegueira da ignorância” (kabeik matan-delek): la bele kedas loke matan atu hare realidade iha Timor, maibe ko’alia hanesan hatene buat hotu iha Timor-Leste nia laran. Nune’e ona, sei iha tan “obscurantismo multissecular” – buat hotu ne’ebe ita hanoin, ko’alia no halo ne’e sai nakukun tiha de’it. Atu sai concreto liu, wainhira VII Governo apresenta programa, PLP (Fidelis Magalhães) dehan katak Alkatiri nia ideia irrealistico, irracional no ambicioso liu (hau sente estranho tebes ho Fidelis nia liafuan: mamuk no infantil)! Maibe, Alkatiri nia resposta dehan “labarik malcriado” mos halo hakfodak de’it. Analisa husi jurista no observador sira hatudu katak ignorância no obscurantismo ne’e hanehan politico sira nia fuan no kakutak. Wainhira VII Governo apresenta OR no oinsa mak Oposição hola posição, hau atu muta de’it ona. Hau la hare hetan, se sira tur iha fulan mak ko’alia tun mai, ga hela iha Singapura no Australia ka Portugal mak mahebu tesik mai, ka nani hela iha tasi laran mak hakilar sae mai! Maibe, hare husi “political speech act” (J. Habermas), oposição ninia posição namlele liu. Sira iha de’it buat ida – cartão mean atu hatudu ba Alkatiri, no cartão verde atu hatudu ba Xanana no Taur Matan Ruak. De resto hau fiar de’it Nicolau Lobato dehan: “cegueira da ignorância” no “obscurantismo multissecular”. Kala ida ne’e mak halo katak Xanana no Taur Matan Ruak tanis fali ho resultado ida ne’e? Maibe, segredo boot liu, hanesan Nicolau Lobato dehan “corrupção de toda a ordem” --- korupsaun politika, judiciaria, sosial, economia, cultural, ideologia, psicologia tama to’o fatin sagrado sira hanesan familia no religião nia laran. Quase la iha ona imunização politika corruptivo! Ema ki’ik halo korupsaun ki’ik. Ema naton halo korupsaun naton. Ema bo’ot halo korupsaun: ko’alia netik mak labele de’it ona ... so Nicolau Lobato no funu-na’in matebian sira nia klamar matan bele naklosu sai hare korupsaun alto nível.

Se Fretilin no PD hato’o OR atu selu tusan barak husi CNRT (ne’ebe halo hamutuk ho Fretilin no PD ho FM), hau sente tan governo uluk halo duni “corrupção de toda ordem”. CNRT mak ukun fali hamutuk ho PLP no KHUNTO mos sira nia servisu mak sei ke’e ku’ak taka ku’ak. Sira bele halo saída? La halo!

Ikus liu (3) loke nafatin matan no néon ba sira be “Oprimido pela indiferença e egoísmo de muitos de seus próprios filhos que, não obstante a responsabilidade tamanha que sobre os seus ombros pesa, fogem mesma responsabilidade e fazem ouvidos de mercador aos gemidos do povo miserável e desdenham oferecer um dedo que seja para o levantar da lama da exploração do homem pelo homem”.

Mensagem Natal 1974 halo ita atu hola “exame de consciência” iha Natal 2017 ne’e, wainhira Nicolau dos Reis Lobato ko’alia momos kedas katak ita sai atan tan (a) “indiferença e egoísmo de muitos de seus próprios filhos”!  Timor oan rasik ninia hahalok taka matan taka néon no egoísmo mak halo Timor-Leste sei moris iha oprimido laran. Honestamente, hau la hare problema Constituição konaba formação VII Governo (Fretilin no PD). Jurista sira ko’alia los hotu. Deputado sira nia argumento mos los nafatin. Maibe, tan sa mak ita lakohi halo conclusão los nian? Tuir Nicolau Lobato nia liafuan karik – conflito mosu tan de’it ukun-na’in sira nia “indiferença e egoísmo”. Ida ne’e veneno ida ne’ebe estraga constituição rasik no halo povo nia fuan fera de’it! Ita lakon oportunidade boot tebes atu hametin “constitutional patriotism” tan identidade nasional, cultura politica no experiencia (latar belakang) halo ita fahe malu nafatin (cf., Habermas, Facts and Norms, 1998). Wainhira ita rona debate sira iha PN, liafuan ne’ebe mosu bebeik mak otonomista, integracionista hasoru independentista; hanesan mos uluk mosu firaku vs kaladi; ai-laran, rai-laran hasoru rai liur. Sai husi PN, ita rona ema ida rua koko atu hatama Islam (liu-liu husi comunidade islam rasik), Protestante hasoru Catolico. Hau hanoin, Ahok ho Alkatiri la hanesan; sa tan Jakarta ho Dili! Problema la’os povo hakmatek ka susar; problema la’os constitucionalidade ka inconstitucionalidade. Nicolau Lobato dehan ona, wainhira ita nia kakutak no fuan nakonu ho “indiferença e egoísmo”, buat di’ak tomak sai at hotu kedas! Gripe ne’ebe halo Estado gripa tiha mak “indiferença e egoísmo”.

Liafuan tuir mai (b) mos kroat “... fogem mesma responsabilidade e fazem ouvidos de mercador aos gemidos do povo miserável”! Debate orçamento geral iha Outubro 2017, ema bele hare momos kedas oinsa mak BOMP “fogem mesma responsabilidade” (halai husi sira nia responsabilidade). Hare husi ética filosófica nia matan, uluk nana’in ita ema bele hatudu responsabilidade wainhira ita hatene rona – la’os de’it rona “liafuan”, maibe liu-liu rona ema nia “fuan” (néon) hodi nune’e ita hare “il fatto” (o facto) no “lo stato dell’affari” (= state of affair; katak saída mak ema ida ko’alia mai duni husi saída mak mosu [cf., Karol Wojtyła, L’uomo nel campo della responsabilità, Milano: 2002]). Professor Wojtyła (Papa João Paulo II) hakerek katak, so ema ne’ebe hatene rona mak nia bele hetan liafuan foun hodi hatan ba ema seluk. Hatene rona ema nia lian ne’e hanesan virtude de caridade ida, tan hatene hadomi ema seluk no koko sente nia liafuan. Ba hau, VII Governo monu tan husi parte oposição simplemente lakohi rona. Maski minoria, maibe Fretilin no PD hato’o “vox popoli” ida. Democracia insiste atu rona povo nia lian! Hela furak no cívica (beradab), wainhira BOMP mos hato’o “vox popoli”.

Husi pensamento ética filosófica (wojtyliana), BOMP la’os ona representa “vox popoli”, maibe representa de’it CNRT, PLP no KHUNTO; ou representa Xanana nia “lian” no Taur Matan Ruak nia hakarak! Fora husi partido 3 ne’e, ema seluk “voiceless people”. Professor Wojtyła dehan tenik, katak, hatene rona ema seluk mak halo hau hatene halo ragionevolezza prattica (susar traduz ba tetun; hau duvida los atu traduz ba português) – katak, bele hato’o argumento hasoru Governo liu husi dados no factos nebe halo ema be rona ita nia liafuan hare duni katak buat ne’e tama ulun laran no hela iha fuan laran duni. Se governo dehan hadi’ak escola, oposição bele dehan “irrealistico”, tan escola iha Timor-Leste ne’e mesak kaber no matak-malirin los (tuir dados no factos). Depois mak vota contra. Maibe dehan de’it dehan “la los”, maibe la hatudu ida be los nian, ne’e katak “non risponde” (la hatan) --- Nicolau Lobato dehan “fogem mesma responsabilidade” – tan “cegueira da ignorância” no “obscurantismo multissecular” ne’e!

Wainhira halo debate Orçamento Retificativo –CNRT, PLP no KHUNTO halai husi assunto no halo Fretilin ho PD nia liafuan no hanoin sai tiha “ouvidos de mercador” – katak halo PN sai tiha hanesan ema iha bazar ne’ebe ema hotu ko’alia buat hotu no la’os ema hotu mak bele rona buat hotu-hotu husi ema hotu. Nune’e “gemidos do povo miserável” hakoi moris de’it iha “cinzas do esquecimento” (haluha tiha povo nia moris iha rai rahun laran). Iha Latin dehan “horror vacui” (tauk mesak tan iha nakukun laran, ne’e halo rumoris atu mateklamar tauk halai rona barulho), katak, partido sira liu-liu BOMP tauk atu rona sira nia consciência no moe hare ba saída mak sira halo iha tempo liu ba (liu-liu, CNRT), nune’e taka tilun no taka fuan atu rona “gemidos do povo miserável”.

Ida be hau la compreende mos tan sa Dr. Mari Alkatiri “fogem da mesma responsabilidade” (halai husi ninia responsabilidade) atu ba rasik PN (segunda vez) no lori fali carta “referendo” keliling dunia; hanesan los Xanana ne’ebe ba halo negociação taci-timor to’o la’o lakon tiha de’it no la mosu hela de’it iha Timor; Taur Matan Ruak ba tama to’os laran; Ramos Horta ninia “communicative rationality” la funciona? Jurista sira, analista sira, no partido Fretilin to’o Bispo Baucau dehan katak Eleição Antecipada mak sai hanesan solução único! Ba hau, Eleição Antecipada ne’e hanesan dalan badak liu atu “fogem da mesma responsabilidade”: povo investe tiha ona sira nia fiar ba partido sira, afinal, partido sira la hatene resolve problema politico nune’e lori hikas fali ba povo atu resolve. Bele Constituição RDTL fo dalan (legalidade), maibe filosofia ética hare ida ne’e hanesan Nicolau Lobato dehan “fogem da mesma responsabilidade”. Tetun aas nian karik dehan “Le’u ain biti ulun katak lia ida, le’u ain biti ain katak lia seluk, le’u ba le’u mai hun bua malus”. Tan sa mak iha tan Eleição Antecipada wainhira ikus mai Xanana no Alkatiri ka Taur Matan Ruak nia naran iha nafatin (?) --- maibe sira rasik labele halo buat ida atu resolve “dead lock” iha PN nia laran? Hili tiha sira na’in 3 depois lakohi ba PN, ka iha deit Singapura ka Australia (?) ka hela de’it iha to’os laran? Capek dech! Ho principio “epiekeia”, hau hanoin Eleição Antecipada ne’e péssima ideia (gagasan paling buruk).

Afinal (c) buat ne’ebe Nicolau Lobato husu mak atu matenek no ukun-na’in sira “desdenham oferecer um dedo que seja para o levantar da lama da exploração do homem pelo homem” (tau hetik liman fuan ida hodi foti netik todan be hanesan ema sira husi exploração husi ema sira). Politica iha PN no Governo labele sai fali “exploração do homem pelo homem” (liafuan ne’e Nicolau Lobato foti husi Karl Marx). Ba hau CNRT, PLP no KHUNTO halo duni “exploração do homem pelo homem”, hanesan saída mak Karl Marx tau iha ninia ulun laran (ne’e so iha tan artigo ida). Hau hanoin katak AMP ka BOMP mak ukun hodi hari VIII Governo Constitucional, sei mosu “a dictatorship of the proletariat” (Lenin). To’o ikus mai hau sente Xanana no Taur la gosta Alkatiri, no Alkatiri lakohi Xanana no Taur.

Natal: “... dia da Libertação, da Unidade e da Paz”

Saida mak solução ne’ebe Nicolau Lobato husik hela mai ita iha Natal 2017 ne’e atu ita hanoin lisuk? Hanesan nia dehan ona, “O Natal, portanto, é o dia da Libertação, da Unidade e da Paz”.

(1) Natal ne’e loron atu ita hamutuk. Partido labele sobu ita. Partido la’os veneno ne’ebe halo ita lakohi se bikan ba malu. Povo Timor ne’e sarani timores! Sarani timores ne’e povo Timor. Liafuan “unidade” ne’e hanesan mehi ida ne’ebe Nicolau Lobato haklaken bebeik iha discurso barak! Iha Natal 1974, nia hateten nune’e, “Todos aqueles que abusam o povo ou provocam de união entre nós são as tais feridas e os tais membros gangrenados. Devem ser depois, saneados, irradiados do nosso corpo social sem contemplações, sem respeitos humanos”. Ema sira nebe abusa no provoca atu haketak povo, hafera povo sira nia moris, Nicolau Lobato dehan katak “saneados” (disembuhkan; fo buat moruk ba sira atu kakutak di’ak lalais) no “irradiados” (dicabut; fukit sai tiha sira ne’ebe la serve ona) husi ita nia sociedade no politica nia laran. Labele fo fatin ba sira halo ulun moras de’it ba povo!

(2) Natal mos halo ita hanoin konaba “verdadeira liberdade” no “libertação”. Maibe, libertação ida ne’e la’os ita tane liman ka “se bikan” ba ema atu tau hahan ba laran. Liberdade ne’e ita hadau no hetan husi kosar-wen rasik, no mata-wen rasik to’o ran rasik. Iha discurso 20 de Maio de 1978, Nicolau Lobato dehan ... “O povo de Timor-Leste está reconstruindo com o seu próprio suor, com o seu próprio sangue, uma pátria revolucionaria democrática, uma terra livre para gente livre”. Iha Natal 1974, nia hakerek nune’e, “E também muito suor é preciso, muito trabalho e sacrifício sem conta nos esperam a toda a hora. Não tenhamos ilusões, é o preço da liberdade. Esforço intelectual, esforço moral, esforço físico, esforço individual, esforço colectivo, esforço monetário, tudo isso será exigido a todos nós que somos o povo de Timor-Leste e, portanto, preparemo-nos, criemos em nós o espirito de disponibilidade para não regatear os sacrifícios que nos forem exigidos. Temos de nos predispor para as grandes mudanças que vão ter lugar na nossa terra porque senão ficaremos ultrapassados pelos acontecimentos e deitaremos tudo a perder”.

(3) Ikus liu, Natal 2017 ne’e lori ita atu moris iha damen laran. Iha Natal 1974, Nicolau Lobato dehan katak “Neste assunto impõe-se ter um fino sentido de compreensão e discernimento político”. Damen ne’e la’os ita ema la iha problema, la iha violência, la iha conflito, la iha funu. Damen ne’e mosu wainhira ita iha hanoin di’ak no liu-liu halo “discernimento politico”. Hau hanoin, mensagem ikus ne’e ba los kedas Maun Boot sira Xanana Gusmão, Mari Alkatiri, Ramos Horta, hamutuk ho Abilio de Araújo, Rogerio Lobato to’o Taur Matan Ruak no Lere Anan Timor. Se Maun Boot sira ne’e mak hatene halo “discernimento politico”, Timor-Leste ne’e sei moris hakmatek no di’ak ba Timores! La’os Maun Boot sira mak dehan “ami sei la husik povo atu tanis tan”, maibe Povo mak sei dehan “imi lalika tauk, ami sei la halo susar ini” (balun dehan “tan imi nia mata-wen ne’e lafaek nian”).

Hau husu desculpa se liafuan kroat. Maibe, Wainhira Na’i Feto Maria lori Kosok Oan Jesus ba templo, Simeão dehan “surik ida sei sona borus o nia fuan” (Lukas 2, 35). Ita simu Jesus Cristo hanesan Nicolau Lobato dehan nu’udar sarani ho “gemidos do povo miserável” nia laran. Maromak rasik tun mai tama los kedas iha ita nia uma laran be sei hanesan balada han fatin iha “gemidos do povo miserável”. Atu NATAL 2017 ida ne’e halo ita celebra duni loron ba LIBERTAÇÃO, PAZ, UNIDADE. To’o TINAN FOUN 2018 karik ita sei hato’o ba malu hanesan iha Belem – “Shallom Eleiacheim (hebraico) ka Assalamu’alaikum (arabe). Gloria in excelsis Deo, et in terra pax hominibus bonae voluntatis ... Gloria ba Maromak leten aas ba, no iha rai klaran ne’e damen ba ema laran di’ak sira ...