Asalta Poder no Golpe Politika; Diskursus Erradu no Burradu

Asalta Poder no Golpe Politika; Diskursus Erradu no Burradu

Por: Quintiliano Belo

"Hau mak....!!!" @fh

Depois tiha seremonia tomada de posse soleniamente ba membrus parlamentu nasional husi partidu sira ne’ebe hetan asentu parlamentar iha loron 05 fulan setembro 2017 liu ba, tuir kedas ho período ba formasaun governu konformi konstituisaun hateten ho modalidade ne’ebe partidu manan nain eskoilha. Infelizmente depois tiha Nai Presidente da Republika pronunsia formasaun governu foun, afinal governu foun ne’ebe Nai PR nomeia laiha forza politika natoon atu asegura estabilidade ninia governativa. No fim halo ema barak ho antuziasmu interpreta no lee konstituisaun ho interpretasaun oi-oin no ikus mai BINGUNG rasik deit. 

Tanba ne’e, hodi hamenus no halakon sentimentu BINGUNG iha sosiedade nia le’et, partidu laos parte husi koligasaun hatudu asaun konkretu demokratikamente liu husi forma aliança maioria iha parlamentu nasional ka AMP konformi konstituisaun RDTL defini. Asaun ne’e mos nudar konsentrasaun politika atu haforza demokrasia iha Timor-Leste forti no asegura konstituisaun RDTL. Konsienti mos,  katak governasaun minoria sei sai sasidik bot no sei sai presedente ne’ebe ladiak ba futuru (demokrasia sei la funsiona ou sei lakon iha futuru). Governasaun minoria sei susar atu hetan konfiansa maioria iha nia programa politika no orsamentu geral estadu nian (prinsipius demokrasia minoria-maioria sei lakon ou promove kompromisiu  laos demokratiku). Governasaun minoria mos sei hamenus konfiansa husi investimentu pribadu ka estranjeiru, konfiansa merkadu no konfiansa husi konsimudores sira ba volatilidade ekonomia nasional. 

Lolos la prezisa ona atu dada ba mai ho rajaun oi-oin, tamba povu ka eleitor rasik halo ona sira nia mensagem ho klaru iha eleisaun 22 de jullu liu ba, katak lakoi partidu politiku ida mesak hetan maioria absoluta no lakoi partidu ida mesak ukun ho poder omnipotenti. Povu hakarak forma governu ne’ebe iha legitimidade politika tuir rekezitu iha artigus sira K-RDTL haruka no bazea ba prinsipius demokratiku nudar estadu direitu demokratika ne’ebe hahu funda iha 1975 ho naran Republika demokratika de Timor-Leste. 

Ho rajaun refere maka ho lalais kedas partidu ne’ebe laos parte husi koligasaun iha direitu demokratiku aprezenta plataforma politika nudar pratika normal konstituisional no hateten ho firmi ba Nai Presidenti da Republika, katak partido opozisaun alemde sai Aliansa maioria parlamentar (AMP), Prontu lori povu Timor-Leste tuir prinsipius fundamentais konstituisaun RDTL iha artigus 1 too 15 hanesan valores demokratikus, moris diak povu nian, respeitu ba direitos humanos. AMP mos prontu infrenta situasaun hotu-hotu no la obriga Nai Presidenti da Republika atu viola fali konstituisaun no prontu hamutuk ho Nai Presidenti Republika ho firmi atu respeitu ba leis no regras konstitusionais nebe vigora iha Timor-Leste. 

Tamba ne’e diskursu sira hanesan halo asaltu poder no halo Golpe politika, nudar maineira politika hodi dezvia no halakon prosesu demokratizasaun sosiedade iha baze sem hanoin nia implikasaun positiva no negativa. Alemde ne’e mos diskursu refere nudar diskursu erradu no burradu. Erradu tamba ajendamentu asalta poder satan halo golpe politika iha natureza demokrasia ne’ebe hahu forti dadaun iha pais demokratiku hanesan Timor-Leste la merese atu ezisti. Burradu tanba kahur buat hotu-hotu hodi sakrifika fali konstituisaun ba intereses ne’ebe hakarak deit legitima-an ho argumentu sira ne’ebe lolos lamerese atu sai argumentu.

Entaun, termu asalta poder lolos mak saida? Termu asalta poder lolos maka aproveita tempu hodi ignora aktu demokrasia, halo violasaun ba konstituisaun no hakarak buat hotu maske konstituisaun rasik ladifini. Termu Golpe lolos mak saida? Termu golpe lolos maka pratika utiliza arogansia poder tomak hodi halo asaltu ba instituisaun publika sira laos ho maneira demokrasia, ignora konstituisaun no regras tomak estadu nian hodi kontrola absulta lalaok estadu konformi gostu. 

See nune’e pratika AMP nian iha parlamentu nasional lolos maka saida? AMP nia pratika lolos maka promove kultura demokrasia ida ne’ebe lolos no momos hodi tane ass objetivu estadu nian tuir prinsipius fundamentais konstituisaun RDTL iha artigus 1 too 15 hanesan Dom CFX.Belo hateten, katak bainhira ita ko’alia kona ba Demokrasia, demokrasia rejime ida ne’ebé respeita ema (pessoa), ema nia direitu fundamental no ema nia liberdade. Tanba ne’e, demokrasia organiza nia aan atu bele sai demokrasia “participada e pluralista”, dehan katak nakloke ba ema hotu hotu nia partisipasaun  maske ho idolojia oin oin ou idolojia diferente ho ema seluk. 

Referensia ne’e hateten mai ita nudar sidadaun, katak situasaun ida agora  nia alvu lolos maka ignora demokrasia pluralista no pior liu tan laiha sentimentu prontidaun atu asumi titlu foun ne’ebe hanaran “ESTATOCRASIA E PARTIDOCRACIA”, hanensan Dom CFX.Belo hateten, la iha demokrasia lolós, bainhira la iha “possibilidade efectiva de pluralismo político”, dehan katak tem ke iha partidu oin oin ho opsaun politika oin oin. Tanba prinsipiu ida ne’e, ita la bele simu “partido único”, ka partidu ida deit iha rai laran. Tanba partidu úniku ka ida deit ninia natureza, dala barak, sai anti-demokrátiku, no anti-natural. Iha demokrasia hanesan ne’e, labele iha “estatocracia”, katak poder Estadu nian maka’as liu no domina buat hotu, nune’e Estado mak manda, estado mak hatene, estado mak kontrola ema nia moris; labele iha mos “partidocracia”, dehan katak partidu ida mak domina buat hotu hotu, nia mak sai tiha norma ka regra, nia mak determina ema nia destinu.

Timor-Leste ne’ebe ho sistema multipartidarismu ho idolojia oin-oin iha direitu demokratiku atu sai alternativu hodi salva guarda konstituisaun RDTL ass liu buat hotu-hotu. Obdese ba konstituisaun RDTL laos, katak YES SIR ba ema ida, asegurador ba ema seluk no insedensia tamba interese, maibe obdese ba konstituisaun RDTL maka,  tane ass konstituisaun RDTL liu fali buat hotu-hotu sem reserva. Tamba ne’e hanesan sidadaun, mai ita hotu hamutuk nafatin reafirma kultura demokrasia no tane ass konstituisaun RDTL hodi rekunese nafatin esperitu heroiku fundador sira nian ne’ebe deklara tiha ona iha tinan 1975, Timor-Leste laos Republika anti demokrasia maibe Timor-Leste maka Republika Demokratika de Timor-Leste.  

Ikus liu, nudar sidadaun aproveita mos husu ba politiku sira atu; Para ona sakrifika konstituisaun RDTL, Para ona obriga ema seluk hodi viola konstituisaun RDTL no Mai hotu-hotu hakruk no tane ass konstituisaun RDTL sem reserva nufim fila Timor-Leste sai Nasaun Forte, Riku no Seguru. 

Abracos