Komunikadu Imprensa Aliansa Maioria Parlamentar CNRT, PLP no CHUNTO

KOMUNIKADU IMPRENSA 

ALIANSA MAIORIA PARLAMENTAR

Dili, 24 Otubru 2017

Foto CNRT media center

Iha loron 16 to 19 fulan Outubro 2017, Parlamentu Nasional apresia apresentasaun Programa VII Governu Konstitusional.

Hafoin diskute durante loron hat nia laran, Bankada Opozisaun ne’ebé hamahan aan Aliansa Maioria Parlamentar (AMP) aprezenta mosaun de rejeisaun ba programa VII Governo.

Aktu konstitusional ida nee halao tuir artigo 109 C-RDTL.

Aktu ida ne ezerse ho koidadu no responsabilidade as, tau interese estado no nasaun nian hodi haklaken knar lolos tuir C-RDTL define iha artigu primeiru.

Tuir artigu 109º C-RDTL, apresiasaun Programa Governu nee kompetensia esklusiva Parlamentu Nasional nian, tanba nee maka deputadus sira iha dever ho kompetensia hodi halo apresiasaun molok atu fo votus de confiansa ou votus de rejeisaun ba programa.

Husi biban ida nee, ami iha obrigasaun atu informa ba povu tomak razaun sira hanesan tuir mai nee:

1. Nudar representante maioria populasaun Timorense, Bankadas Aliansa Maioria Parlamentar iha dever no kompetensia tomak atu apresia no rejeita programa VII Governo Konstitusional;
   
   
2. Bankada Opozisaun afirma katak formulasaun Programa Governu nian falha atu kumpri rekezitus hirak ne’ebé hatur iha artigu 108.º Konstituisaun RDTL konaba substánsia ka konteúdu hosi dokumentu ne’e rasik. Artigu 108º nee koalia klaru kona materia saida deit maka presiza inkorpora iha programa ne’ebé governu lori mai Parlamentu Nasional hanesan (a) Prinsipius Politikus, (b) Objetivus, (c) Medidas no (d) Tarefas atu fasilita fiskalizasaun, monitorizasaun no implementasaun programa hirak nee;
   
   
3. Bankada sira Aliansa Maioria Parlamentar hare katak dokumentus ne’ebé aprezenta hosi governu, hanesan: dokumentu narativu ho aprezentasaun iha Power Point la-han malu;
   
   
4. Iha debate Programa Governu ne’ebé aprezenta hosi VII Governu Konstitusional, Deputadus hosi Bankada AMP hato’o pergunta espesifiku ba Governu maibe sua Excelensia Senhor Primeiru Ministru em vez de responde perguntas ne’ebé koloka, uza fali tempu hodi hato diskursu politiku, okasionalmente ataka Deputadu Bankada Opozisaun no halo fali hanesan kampanha Eleitoral uza transmisaun direta ho kanais media nasionais.

Alem de rasaun sira iha leten Bankada sira Aliansa Maioria Parlamentar hatoo mosaun rejeisaun ho razaun politika hanesan tuir mai ne’e:

a) VII Governu ida ne’e, la harii ho Maioria Parlamentar;

b) Governu minoritariu sei buka atu hetan apoiu tutuir dalan durante nia governasaun ne’ebé bele hamossu klima insustentabilidade;

c) Atu prevene impozisaun hosi governu minoria ba maioria iha lalaok politika ita nia rain Timor-Leste iha futuru;

d) Atu reafirma papel opozisaun iha pais demokratiku nudar alternativa ba programa no mos ba governsasaun;

e) Atu evita hamosu governu ida ne’ebé la forte, frajil no la estavel ne’ebé bele hamosu inserteza boot ne’ebé la garante atu fo fiar ba konfiansa merkadu, investimentu estrangeiru, publiku no privadu, no dezenvolvimetu ekonomia em jeral.

Ho ida ne Bankada sira Aliansa Maioria Parlamentar konklui katak:

1. VII Governu ne laiha apoiu polítiku minimu necessariu iha Parlamentu Nasional no laiha kondisaun atu foti medidas xave hodi halao dezenvolvimentu. Bainhira governo ida fraku implika kustu politiku, social no ekonomia ne’ebé aas tebes ba estado;
   
2. Bainhira governu ida la iha apoiu politiku sufisiente iha Parlamentu Nasional maka sei hamosu kompromisu politiku barak hodi sustenta governu ne’e nia subrevivensia durante tinan 5. Ida nee sei prejudika tebes dezenvolvimentu ba povu;
   
3. Governo ida ne’ebé laiha apoio maioria iha parlamentu sei laiha serteza no bele monu bainhira deit no sei prejudika dezenvolvimentu nasional.

Nunee ami Bancada Aliansa Maioria Parlamentar hakarak hatoo ba entidades hotu-hotu no mos Povu Doben Timor-Leste konaba rejeisaun Programa Governu nian laos tanba ami la apoia dezemvolvimentu (asesu be mos ne’ebé diak ba komunidade sira, asesu edukasaun ne’ebé diak, asesu ne’ebé diak ba saúde, asesu ne’ebé diak iha empregu ba ema hotu, asesu estrada ba ema hotu, asesu eletrisidade ba ema hotu, paz no estabilidade ba Timor-Leste no kombate korupsaun) maibe mosaun de rejeisaun nee tanba ami hare katak governu ida nee laiha kondisaun atu bele garante dezenvolvimentu no moris diak povo doben Timor-Leste.

Ikus liu ami hotu hakarak apresia no agradese wa’in: 

1. Ba militantes no simpatizantes Partidu KHUNTO, PLP no CNRT, ne’ebé durante halao debate ba Programa Governu nian, fo apoio no fiar nafatin ba ami deputadus sira no mos hatudu komportamentu ida ho forma sívika no responsável;
   
2. Ba Povu Doben Timor-Leste tomak ne’ebé akompaña debate ba Programa Governu nian ho forma ida pasífiku no kalma, atentu no hatudu sira nia bom sensu. Ita boot sira hatudu duni ita boot sira nia maturidade politika hodi la monu ba iha provokasoens oin-oin hodi estraga ita nian rai. Dala ida tan ami hatoo parabens ba Povu Doben Timor Leste tomak. Imi hanorin ami oinsa bele komporta ami nia aan hanesan politiku ne’ebé edukadu no siviku;
   
3. Ba PNTL no F-FDTL ne’ebé durante debate programa governu too nia konkluzaun asegura ka garante seguransa no ordem públika iha Dili no territoriu tomak;
   
4. Ba Dioseze Dili, Baucau no Maliana, Konfesoens Reliziozas sira seluk, ba Veteranus sira, Organizasoens Resistensia nian, organizasaun defeza direitu feto nian, organizasaun juventude sira, estudante sira, ba professor sira, ba funsionariu publiku tomak, ba defeza direitu defisiente no ba organizasaun sosiedadi sivil, ne’ebé durante debate ba Programa Governu nian hatudu komportamentu diak hodi kontribui ba paz ho ordem públika. 

Nunee, ami hotu apresia ba Povu Doben Timor-oan tomak kontinua mantein nafatin kalma no halao ida-ida nia aktividade loron-loron nian. Husu atu akompanya nafatin prosesu konstitusional ne’e, kaer metin sivismu, no valores demokrasia nian. Prosesu demokratiku-konstitusional iha Parlamentu Nasional lao hela tuir regras ne’ebé hatuur iha Konstituisaun RDTL.

Obrigado barak.

Hodi naran Deputadus Bankada Parlamentares 

CNRT, PLP no KHUNTO

Ba informasaun detailu, kontaktu:

1. Manuel Mesquita Pereira (CNRT) 78101793

2. Paizinho Tilman (PLP) 77230283

3. Julio (KHUNTO) 77236804