Prezidente Republika, Taur Matan Ruak, PROMULGA Orsamentu Jeral Estadu ba Tinan 2016

PRESIDÊNCIA DA REPUBLICA

KOMUNIKADU IMPRENSA

SUA EXELÉNSIA, PREZIDENTE REPÚBLIKA DEMOKRÁTIKA TIMOR-LESTE, TAUR MATAN RUAK, PROMULGA TIHAONA ORSAMENTU JERÁL ESTADU BA TINAN 2016

Sua Exelénsia, Prezidente Repúblika, Taur Matan Ruak, ohin promulga ona Orsamentu Jerál Estadu ba tinan 2016, ne’ebé mak Parlamentu Nasionál konfirma. Tuir artigu 88, númeru 2 hosi Konstituisaun, Prezidente Repúblika tenke promulga diploma ne’ebé mak Parlamentu Nasionál konfirma iha loron ualu nia laran, hahú hosi loron simu diploma ne’ebé refere. Desizaun promulgasaun ida ne’e loke dalan atu hahú ezekuta ona orsamentu ne’ebé refere, maibé razaun hirak ne’ebé mak iha inísiu hamosu veto polítiku ba Orsamentu Jerál Estadu ne’e mantein nafatin, ne’ebé relasionadu ho definisaun prioridade sira kona-ba safisfasaun nesesidade bázika sira populasaun nian. Prezidente Repúblika fó hanoin ona antes kona-ba nesesidade atu tau atensaun ba setór sira hanesan saúde, edukasaun, agrikultura, aumenta investimentu ba fornesimentu bee moos no ba saneamentu báziku. Prezidente Repúblika mós husu tiha ona atensaun ba nesesidade atu garante dezenvolvimentu iha Rai laran ne’ebé mak bele kontinua nafatin ba loron oin mai, aumenta osan ne’ebé mak la’ós mai hosi mina no hamenus gastu ne’ebé mak sai hosi osan mina nian.

Promulgasaun Orsamentu Jerál Estadu ba tinan 2016 ne’e la signifika katak Prezidente Repúblika la hala’o podér kontrolu selseluk Prezidente Repúblika nian ne’ebé mak temi iha Konstituisaun laran, hanesan kona-ba kontrolu ba ezekusaun Orsamentu Jerál Estadu ne’ebé refere.

Sua Exelénsia, Prezidente Repúblika fó valór no tane aas tebes maneira séria no demokrátika ne’ebé mak Parlamentu Nasionál hatudu tiha ona iha momentu tetu proposta sira hosi Prezidente Repúblika atu halo alterasaun ba Orsamentu Jerál Estadu no louva tebetebes laran-hakmatek ne’ebé mak mosu durante debate. Ikus liu, Sua Exelénsia Prezidente Repúblika rekoñese katak ita hothotu tenke hamutuk tanba ita uitoan de’it atu hasoru dezafiu lubuk sira ne’ebé mak ita hasoru. Prezidente Repúblika durante ne’e orienta ninia ezersísiu podér sira ne’ebé previstu iha Konstituisaun hodi tane interese aas liu Nasaun nian. Ne’e duni, Prezidente Repúblika, Taur Matan Ruak, sei kontinua tau matan nafatin ba ezekusaun Orsamentu Jerál Estadu ida ne’e, hola parte iha prosesu atu harii Rai ida ne’ebé forte no justu ba ema hothotu.

Palásiu Prezidensiál Nicolau Lobato, loron 14 fulan-janeiru tinan 2016