VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

domingo, 3 de janeiro de 2016

Hatan ba belun Amo Martinho Gusmão POLEMIKA CONCEITU – FUNDADOR DO ESTADU

José Maria Guterres*

José Maria Guterres
Konseitu debate kona ba Fundador do Estadu Timor-Leste, interresante no relevante atu akademikus, politikus no intelectuais Timorenses fo mos opinioins, atu nune bele hetan klareza ida logika kona ba “epistemologia” nebe relasiona ho natureza no scope konhesimentu kona ba liafuan Fundador do Estadu, atu evita interpretasaun oi-oin iha futuru ba gerasaun foun sira.

Hakerek nain nia konhesimentu totalmente “mamuk“ iha area Filosofika kompara ho DR. Martinho Gusmao, Timor oan nebe highly ”expert”, parese hetan “cumlaude“ iha nia estudus akademikus iha Italia, sentru de excelencia kona ba ciencia filosofica.

Dr. Martinho Gusmao:

Tanba iha kuriosidade atu aprende, nune mos ohin loron Timor-Leste iha ona asesu ba informasaun liu husi Professor “Google”, hau nia premissa kona ba Fundador do Estadu baseia ba area filosofia nian nebe iha relasaun ho epistimologia nebe iha koneksaun ho: truth, belief, perception and theories of justification.

Fundamenta mos ho racionalismo – enfase ba razaun hanesan fontes konhesimentu kombina ho Empericismo – baseia ba observasaun liu husi evidencias, liu-liu jornadas historikas husi biban bei ala sira nian, resiste ona hasoru okupasaun illegal potensia kolonial Portugues. Evidensias husi narasaun historikas barak Timor oan hotu hatene, balu dokumentadu hanesan “revolta Manufahi ho 1912”.

Research question: se maka fundador Estadu Timor Leste?

Saudoso Nicolau Lobato ho Xanana Gusmao tuir versaun Dr. Martino Gusmao nian? Mai ita haksesuk ho metodologias filosoficas.

  1. Tuir kriteriu racionalismo, nebe baseia ba razaun nudar fundamentu, Nicolau ho Xanana la tama iha kategoria Fundador Estadu Timor Leste, tuir teoria klasika ka kontemporanea.

  2. Kriteriu emperismo nebe baseia ba observasaun, ba faktus no evidensias hatudu no transmite mai ita hotu nia memorias katak “konsiensia” patriotika ka nasionalista la hahu iha era dekada 1975 to 1999 husi biban Nicolau Lobato to Xanana Gusmao nian.

Nune se los maka prenche kriterius atu hetan predikadu hanesan Fundador do Estadu Timor Leste? Povo-Timor Leste hahu husi gerasaun bei alas sira to gerasaun nebe partisipa iha Referendum 30/08/1999 pro Independensia.

Papel historiku Nicolau Lobato ho Xanana Gusmao atu enkaixa iha nebe?

Lider bot rua: Saudoso Nicolau Lobato ho Xanana enkuadra hanesan “mata dalan” ka figuras “sentrais” ho ekipa tomak, kuadros civis no militares ba prosesu libertasaun da Patria ba fundasaun do Estadu. Nune fundasaun do Estadu produto “kollegial no inklusivu” laos puramente “exclusivu.”

Nicolau Lobato hanesan mos fundador FRETILIN ao mesmo tempu sai mos fundador Estadu RDTL no Xanana Gusmao mak “hatutan no hakotu “ideias antepassadus atu Timor-Leste sai “terra livre no Povo livre” husi jogu kolonialista.

Sira nain rua demonstra sira nian kapacidade atu: consciencializa, organiza, mobiliza Resistencia Armada atu konkretiza duni Independensia Nacional ho reconhecimetu internacional iha 20 de Maio 2002 hanesan país independente e soberanu iha mundo rai klaran.

Tan sa maka husi parte APODETI no UDT hahu husi: Joao Martins, Abel Belo, Guilherme Gonsalves, Abilio Osorio no Mario Carrascalao no sst oferece mos resistencia hasoru administrasaun Indonesia? Kauzas principais maka saida?

Entre barak, probabilidades hirak nebe kondisiona maka tuir mai ne:
  • Expektativas dirigentes APODETI no UDT la satisfaz husi governu Central Jakarta liu tiha tinan hira post integrasaun.

  • Evidensias iha kampu batalha hatudu katak kolosal exercito Indonesia “inkapaz” derrota FALINTIL iha tempo badak.

  • Fator “under stimate” kapasidade Resistencia FRETILIN hasoru “gigante” exercito Indonesia, gradualmente transforma consiensia lideres pro-integrasaun katak lideransa FRETILIN iha duni kapasidade organiza Resistencia Armada, maske la iha kondisoens material funu minimu nem ajudas externas.

  • Ho Resistencia Armada prolongoda, aumenta ho “desgostus” administrasaun Indonesia, motiva “nasionalismu” ba lideres integrasionistas (APODETI ho UDT) hodi halo viragem politika.

  • Nune papel Mario Carrascalao hanesan governador (1981-1991) kontribui no fo sai kauza luta armada ba fora internacional, alem de haruka Timor oan barak ba universidades iha Indonesia no buat sst positivos kona ba alkatraun ba estradas iha Timor-Leste no produsaun alimentar.

  • Nune mos hanesan Abilio Osorio, iha biban hanesan Kan Wil PU haruka FRETILIN oan sira ba eskola iha Java atu hetan formasaun teknika iha areas oi-oin. Hanesan governador Abilio mos kontribui makas ba desenvolvimento fisiku no humanu TL.

Nune partisipasaun ativa no passiva pro-integrasionistas sira ba fundasaun Estadu kulmina ho sira nia votus hotu maka resultado Referendum, ala pro-Indpendencia hetan 87%, nune politikamente, Indonesia hetan “derrota” lori konduz ba Administrasaun Transitoria UNTAET to 20/05/2002 hodi restaura Indpendencia.

Foti skors ba meritu Fundasaun Estado, membrus CCF no estruturas politikas militar FRETILIN (interior no diaspora) FALINTIL ho Clandestina okupa iha primeira feleiras. Mario Carrascalao no Abilio Osorio okupa fileiras de suporte.

Tuir historia filosofia, ema ida ka rua la iha kbit atu funda Estadu ida. Povo ho nia lideres sira maka funda Estadu. Klaro iha kazu balu lori tempo badak balu lori tempo naruk. Registus iha Historia ita hotu hatene katak Independencia “konkista ho ran no ho vitimas barak”.

Iha perkurso historiku husi 1975 -2002 destaka figuras historikas:
  1. 1975- final 1976: dual Xavier do Amaral ho Nicolau Lobato lideres FRETILIN
  2. 1977-1979: dual Nicolau ho Carvarino (Maulear) exerce funsaun lideransa FRETILIN
  3. 1981 -1999 : Pakote Xanana, Mau-Huno, Mau-Hodo, Konis, Taur, Lere, Lu’olo, ect.
Ilustrasaun kronologika no sekuensial, projeta papel vital personagens dirigentes xaves, luta armada iha tempus diferentes, transmite mai ita hotu katak, “lider ida mate ka kaptura, ida seluk troka kedas sem demora” nune sustantabilitade ba luta la depende ba figura ida, maibe depende ba instituisaun.

Dr. Martinho Gusmao nia “refutasaun”/penolakan hasoru Dr. Mari nia “slogan” nebe deklara katak Dr. Mari Alkatiri mak funda ida ne, funda ida neba no sst... ne’e Dr. Martinho Gusmao nia problema. Maibe rekonhecemntu husi povo Timor-Leste katak “Dr. Mari Alkatiri um dos fundadores do partido FRETILIN e da nasaun RDTL, ne’e faktus. Laiha ema ida mak bele nega realidade politika ida ne’e.

Maibe “personafika” lider nain rua deit husi 1975-2002 maka hanesan “arkitetus” ba fundasaun Estado Timor-Leste, la tau enfase luta “bei alas” sira, no la destaka figuras sira seluk nebe depois kapturasaun Xanana, (Novembru, 1992) asume chefia da luta to momentu “konsulta Popular” (30 Augustu 1999), teoria filosofika no aproximasaun halo transformasaun nebe Dr. Martinho Gusmao koloka “la justu” (totally not fair).

Historia tuir Cicero:” la os kait deit ba memorias ka rekordasaun pasadu restritu. Mais liu ida ne’e fo “iluminasaun” geral husi buat kik to buat bot”.

Konklusaun:

1. Pontu de vista ka opinions ba asuntu Fundasaun de Estadu nebe’e mosu laiha distansia signifikantes.

2. Presiza halo debate ida saudavel atu enrikece peskizas nebe’e klean kona ba Historia de fundasaun Estado do Timor-Leste.

*Opiniaun ne'e publika mos ona iha Media Nasional edisaun ohin nian - STL Hakerek nain nudar Alumnu husi Universidade Katolika Atma Jaya, Jakarta!

Sem comentários:

Enviar um comentário

Nota: só um membro deste blogue pode publicar um comentário.