VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

segunda-feira, 11 de janeiro de 2016

Dala ida tan “Fundador do Estado”: Hanoin Hamutuk ho José Maria Guterres no Filipe Rodrigues (1)

Dala ida tan “Fundador do Estado”:
Hanoin Hamutuk ho José Maria Guterres no Filipe Rodrigues (1)
Martinho G. da Silva Gusmão
Docente iha Filosofia Política no Ética
ISFIT, Dili

José Maria Guterres no Filipe Rodrigues nia artigo, hamutuk ho Jacob do Reis Calar no Estanislau Saldanha nia posting iha FB, halo conceito konaba FUNDADOR DO ESTADO sai impressionante liu. Iha ema lubuk ida mak koko atu tama iha critica no debate fo naroman oituan. Seluk nebe hakarak insulto de’it ha’u, quase la iha ideia atu defende ka rejeita Nicolau Lobato no Kay Rala Xanana Gusmão ninia estatuto nu’udar fundador do estado. Maibe, sira mos la iha ideia atu defende Dr. Mari Alkatiri.

Filosofia hahu ho “maravilha” (rasa heran) wainhira ema hare natureza no factum moris nian. Ha’u hahu “maravilha” tebes, wainhira rona Dr. Mari Alkatiri dehan, “Ha’u mak fundador do estado, ha’u mak fundador da FRETILIN, ha’u mak fundador das FALINTIL”. La iha problema pessoal ho Dr. Alkatiri. Filosofia la lori sentimento pessoal, maibe argumento racional. Honestamente, nu’udar académico foinsae ida, ha’u agradece tan Dr. Alkatiri mak “soe-lia” uluk hodi estimula ha’u nia exploração intelectual. La iha liu hanoin atu hahi Kay Rala Xanana Gusmão hodi hetan projecto (ne’e “ideia péssima”), maibe hare ninia “singularidade” no “mérito” iha historia. Ho rasa heran ne’e mak ha’u acusa-an atu hatur ideia katak ESTADO Timor Leste la’os “factum” de’it, maibe “facientes”. Hanesan maluk Filipe Rodrigues dehan, “funda fasil, difisil defende ninia existensia”, ita na’in rua hakat hamutuk ona atu hare konaba “facientes”. Belun José Maria Guterres koko atu ko’alia konaba metodologia empírica hodi hatudu processo histórico, atu to’o iha “factum” konaba fundador do estado. Ha’u hanoin intervenção husi Jacob dos Reis Calar iha ha’u nia facebook mos hatudu katak fundador do estado ne’e “factum”. Iha tan Estanislau Saldanha nia hanoin mos “factum” wainhira dada husi luta Dom Boaventura (1912) ho ninia periodização tuir mai.

Dala ida tan, ha’u nia perspectiva iha filosofia hermenêutica. Iha zona ida ne’e ha’u joga CONCEITO konaba fundador do estado. La’os ema. La’os historia an sich de’it! Tan ne’e, ha’u koko hare conceito fundador do estado (ema) wainhira nia “facientes” (halo hela buat ruma) atu to’o iha “factum” (historia) ne’e kona malu ka lae! Hau kaer Nicolau R. Lobato nia liafuan atu defini “facientes” nune’e: “... o povo de timor está reconstruindo com o seu próprio suor, com o seu próprio sangue uma pátria revolucionaria democrática ... um povo que surge no sistema desumano colonial, um povo que renasce das cinzas do esquecimento, um povo que retoma a consciência de si mesmo ...”! Liu husi “Theories of State Formation” (cf., Gianfranco Poggi, 2006), ita bele hare katak Nicolau Lobato koko atu “depersonalized” luta atu tane metin Timor Leste, la’os husi ninia “Ha’u” (físico individual) maibe “formalized” ninia mehi hodi sai norma no valor ida – “inconfundível consciência nacional”. Husi ne’e nia kore tiha FRETILIN nia kuda-talin partidarismo hodi “integrated” iha pluralismo foun ida hodi solenidade tomak declara katak “a FRETILIN identifica-se com o POVO, a FRETILIN tornou-se POVO ... porque realmente a FRETILIN é o POVO que luta”. Ho liafuan badak, FRETILIN la fo página histórica ba ema ida ka rua atu adora sira nia-an rasik. Povo!

TIMOR LESTE hahu iha 28 de Novembro de 1975. Loron ida ne’e mak ita nia “raison d’être” (timores nia moris) no “raison d’état” (estado ninia moris)! Iha loron ne’e Francisco Xavier do Amaral no Nicolau R. Lobato halo “proclamação unilateral” hodi loke pagina NAÇÃO ida no ESTADO ida! Kala factum ida hari’i ne’e fasil. Maibe, atu defende Estado ida ne’e ha’u koko aborda (1) teoria clássica “founding fathers” dala ida tan; tuir mai (2) ha’u hola to’ok Max Weber ninia perspectiva “militarismo” hodi hari’i estado; no ikus liu (3) ha’u lori to’ok Karl Marx nia hanoin atu atu hare to’ok oinsa mak “soe-lia” konaba fundador do estado ne’e atu falun de’it “depth hermeneutic” iha ita nia politica ohin loron!

Teoria Clássica: The manegerial Perspective

Hanesan ha’u dehan ona, katak conceito “fundador do estado” ne’e hanesan fotocópia husi Estados Unidos America (EUA) nia historia. Ninia original mak “founding fathers” ne’e. Sai confusão wainhira ita koko sukat no suku roupa founding fathers iha EUA lori mai fo hatais fali fundador do estado iha Timor Leste. La hetan boy! Maibe, ita bele tesi tiha no suku tuir fali ita nia historia. Bele de’it.

Matenek na’in Joseph Stayner (historiador EUA) hakerek konaba “On the Medieval Origins of the Modern State”, 1970. Iha neba nia ko’alia katak Estados Unidos América nia husar histórico mai husi “mother land” Europa. Rai sira iha Europa hahu hari’i ESTADO MODERNO iha 1100 to’o 1600 ba leten. Iha otas neba, mosu ona fini “principio da separação dos poderes” liu-liu “poder temporal” (Imperador) no “poder espiritual” (Papa/ Cardeal/ Bispo); haketak ona “Civitas Dei” (Maromak nia povo) no “civitas terrena” (povo rai klaran). Ho liafuan badak, “the first state in the West was that which was established in the church by the papacy in the late of eleventh and twelfth century” (Poggi: 96). Tan ne’e, hare husi sira nia “mother land”, The New England Puritan Fathers koko atu hari’i America foun ida. Sira ne’e mak iha 1783 hanaran Founding Fathers, tan halibur Estado sira iha Unidade ida nia laran.

Tan sa mak mosu “separação dos poderes” ne’e? Tuir Alain Renaut (cf., Histoire de la philosophie politique, vol. II – Naissance de la modernité, 1999) katak estado moderno hahu husi Igreja laran ho ninia teocracia pontifical (Amo Papa mak kaer ukun lalehan no rai nian); nune’e nia mak hatutan ba liu-rai sira atu kaer ukun iha rai ne’e. Igreja hametin ninia ukun ne’e liu husi teologia política ida katak – Maromak mak hari’i Ninia Reino iha rai ne’e liu husi Igreja (Papa) ho ninia liman-ain Liu-rai sira. Nune’e mosu liafuan “Deus e Pátria”. Ninia consequência, Igreja ho Estado halo “promiscuidade política” (perselingkuhan politik) nebe ohin loron ita hanaran KKN. Nune’e, “... political units in the process of becoming states are not seen in the first place as conquering entities, but as the growing states of dominant dynasties, assisted chiefly by managers intent, day-in-day-out, upon tending and increasing the dynasty’s possessions” (cf. Poggi: 98). Katak, iha tempo uluk ema hari’i estado la’os liu husi dalan “conquista” (penaklukan) fatin/ rai. Estado ne’e hanesan “dynasty” ida nebe domina sira seluk liu husi “manegers” ninia kakutak, matenek no kosar-wen rasik. Nune’e, Estado ne’e família ida nia rikusoi, tan “Ha’u mak hari’i Estado”.

Iha ne’e, conceito “fundador do estado” ne’e haka’it ona ho “chiefly by managers intent” (tuir manejer nia hanoin ka hakarak) ho ninia “top down aspect of process”. Liafuan nebe famosu liu mak wainhira Imperador Louis XIV dehan “L’etat c’est moi” (Estado mak Ha’u) – tan “Ha’u mak hari’i Estado”. Liu husi revolução 1789, mentalidade monarquia absoluta “hau mak hari’i estado” ne’e lakon kedas! Ne’e duni, wainhira Dr. Alkatiri dehan “Ha’u mak fundador do Estado”, halo ita bele imagina katak Estado RDTL ne’e moris husi “dynasty” ida: Alkatiri. Ninia resultado,“(we) are looking for the appearance of political units persisting in time and fixed in space, the development of permanent, impersonal institutions, agreement on the need for an authority which can give final judgments, and acceptance of the idea that this authority should receive the basic loyalty of its subjects” (Stayner// Poggi: 86). Hanesan fali ita nia politica ne’e mosu iha otas ida no fatin ida atu hakruk ba ema ida ka rua ninia decisão final. Maibe, ema seluk tenki hatudu ninia “loyalty” la’os tan fiar, maibe tauk lakon projecto.

Interessante katak, intimidade Igreja no Politica ne’e mosu nafatin iha processo hari’i Estado Timor Leste. Iha 1992, Benedict Anderson hakerek, (1) “... natives were aware of themselves … They were now conscious of being subjected to a single development project, and of having in common, in the minds of their rulers, their ineradicable ‘nativeness’...”. Tuir mai, Anderson hatutan (2) “… at the same time a popular Catholicism has emerged as an expression of a common suffering … This Catholic commonality in some sense substitutes for the kind of nationalism … Moreover, the decision of the Catholic hierarchy in East Timor to use Tetun, not Indonesian, as the language of the Church, has had profoundly nationalizing effects”. Husi ne’e mak nia fiar katak “I think the result has been a deep inability to imagine East Timor as Indonesia”. Tan sa mak Indonesia? Tan Indonesia ne’e Estado nebe sukat ho “Islamismo”. Timor Leste la’os Indonesia, tan haketak ho identidade “catolicismo”. Ne’e duni, hare husi “top down”, Igreja Católica mak hahu loke “inconfundível consciência nacional” (liafuan husi Nicolau Lobato), la’os liu husi conquista institucional no territorial, maibe liu husi “personagem eminente” sira nebe moris husi escola no educação católica.

Se Ben Anderson nia teoria los, então ESTADO Timor Leste la’os dynasty ida nia kosar-wen, maibe ho Nicolau Lobato nia liafuan dehan “Timor Leste é realmente dos timores”. Tan sa mak nia temi “timores” no la’os “timorense”? Ne’e halo tan pesquisa naruk ida. Halo nusa ba mos tuir moda política EUA nian, ita seidauk bele defini se mak fundador do estado. Sa tan la iha “Acta dos Fundadores”. Maibe, proclamação unipessoal katak “HA’U” mak FUNDADOR DO ESTADO ne’e ahistoris no la inteligente.

Los duni, Mari Alkatiri dehan Igreja tenki hases-an husi Estado nia moris. Atu nune’e nia sai “consciência critica da nação” (Papa Francisco), ka, “inconfundível consciência nacional” (Nicolau Lobato).


Sem comentários:

Enviar um comentário

Nota: só um membro deste blogue pode publicar um comentário.