VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

sexta-feira, 8 de janeiro de 2016

TINAN ATUS LIMA: Kapítulu 41 – Funu Manufahi (1911-1912) - Parte daruak

500 ANOS – TINAN ATUS LIMA  Emar Timor Ho Malae Mutin Hasoru Malu  
Dom Carlos Filipe Ximenes Belo

Kapítulu 41Funu Manufahi (1911-1912) - Parte daruak

Iha tinan 1911 no 1912, laós reinu Manufahi deit mak funu hasoru malae portugés. Iha tempu ne’ebá akontese mos revolta iha reinu seluk. Iha ona Outubru 1911, bainhira liurai sira ba Dili atu selebra implantasaun regime foun iha Portugal (República), liurai balu kombina ona atu halo revolta. Iha Manufahi, Dom Boaventura kesi lia ho liurai sira hosi Atabae, Atsabe, Cailaco, Deribate, Ermera, Matata, Punilala, Suai, Leimean. Bubuçuço, Alas, Turiscai, Lequidoe, Raimean, Suai, no Ková, atu labele selu imposto Sira, o labele troka bandeira Monarquia (mutin no biur/azul) nian ba bandeira Repúlica nian (matak no mean).

Iha fulan Janeiru 1912, knua balu revolta kontra autoridade portugés, hanesan Manucate, Lequidoe, Hatobessi, Fatuboro, Babulu, Tumau, Loo-Po, Leolima no Aituto. Hosi Hatolia, liurai D. António revolta hasoru komando militar; Iha Umboe (Ermera), komandante militar Hatolia António Almeida Valente domina revolta ida iha ne’ebá, hodi oho ema na’n 66. Maibé, alem de Manufhai, revolta boot rua mak mosu iha Ambeno no Quelicai.

1) Revolta iha Ambeno-Oe-Cusse: Revolta ne’e Dom João da Cruz Ornai (hahú ukun iha 1896) mak halo. Loron ida, comandante militar bolu nia ba kota Oe-Cusse, tanba problema ida; iha ema barak nia oin, komandante portugés hirus no siak Liurai Dom João da Cruz. Tanba autoridade hamoe no hatun liurai nia dignidade nia libur xefi seluk hodi tau lia ba sira atu revolta kontra comandante. Iha kesi-lia ne’e, liurai sira kombina atu labele haruka morador ka forsa ho malae ba funu hasoru Manufahi atu; sira mos kesi lia atu oho tiha sarjentu portugés na’in rua. Nune’e iha iha loron 22 fulan Marsu 1912, sira oho duni sarjentu Manuel Carlos Rodrigues no sarjentu João Bernardino. Liurai ho xefi “revoltosos” sira mos iha planu atu ataka kota Oe-Cusse, hodi halo komandante militar tenente Jorge Figueiredo, liurai Oe-Cusse, Dom Hugo da Cosa, ema xina balu no ema lubun, halai ho ró, ba subar iha “benteng” ka tranqueira Batugadé.

Atu domina revolta ne’e, iha loron 26, fulan Marsu tinan 1912, governu haruka ro-ahi “Pátria” lori forsa ba Oe-Cusse: sarjentu na’in 3, soldados hosi Moçambique na’in 40, morador hosi Baucau, ema na’in 31. Iha Batugadé, sira tula mos Komandante militar, liurai Dom Hugo, ema xina no morador na’in 25. Bainhira ro-ahi atu tama portu Pante Makasar aswa’in ambenu na’in 500 ka 1000 iha tasi ibun tiru hasoru. Hosi ro, malae halo bombardeamentu ba rai ho granada. Forsa sira hosi ro-ahi “Patria” tun duni ba rai maran hodi tiru no duni “revoltosos” sira. Liu tiha loron tolu mak governu rekupera fali kota Oe-Cusse. Haree ba nia emar sira lakon ona funu, liurai Dom João Ornai halai tama Timor olandés, hodi ba subar iha knua ida naran Lelogama. Maibé, iha tinan 1913 deit, mak malae okupa totalmente reinu Oe-Cusse.

2) Revolta iha Quelicai: Malae muitin hakerek “Revolta de Quelicai”, maibé revolta ne’e mosu iha suku rua: Bolehá, ne’ebé pertense ba Laga, no Lawateri ne’ebé uluk pertense ba Quelicai. Motivu saída? Xefi suku rua hosi ne’ebá lakohi selu imposto. Sira dehan katak povu la iha osan atu selu impostu.

Iha loron 29 Juñu “revoltosos” na’in 400 ba ataka malae nutin nia plantasaun besik kota Baucau. Tuir dalan, hahú hosi Tequinamata to’o Seiçal, sira tesi kotu iha arame ka fiu telefone nian.

Atu domina asuwa’in hosi rai ne’ebá, iha loron 7 fulan Jullu 1912, governu haruka tropa hosi Baucau, Fatumaca, Vemasse, Venilale no Laga, hamutuk ho sira nia liurai Carlos Ximenes hosi Quelicai, António Guterres hosi Venilalale no Domingos de Sousa hosi Laga atu ba funu hasoru povu Boleha no Lawateri.

Nune’e mos Governu mobiliza ro-ahi “Dilly” ho mariñeiru no soldadu portugés: mariñeiru na’in 12; morador timor oan: 342. Ikus mai, governu mos haruka tan morador ne’ebe ba funu iha Manufahi, ba funu iha Quelicai.

Iha fulan Jullu forsa governu nian tama iha zona Quelicai antigu, hodi okupa knua sira, hanesan Okussine, Modoresse, Faco-Lolo, Dana-Tena, Duabere no Onoro. Neineik, tropa governu ho morador sira hosi Baucau, Venilale no Vemasse tama Lawateri no Bolehá, no sa’e foho Betu-Lari no Ira-Osso. Asw’ain sira halai ba subar iha fatuk kuak laran, no funu hasoru ho diman, rama-oan, no kilat-fatuk. Maibé, tanba kurang hahán no bee, ema barak rende. Iha loron 18 to’o 23 fulan Jullu, mane-aswain na’in 128 mak rende, hamutuk ho ema feto sira no labarik barak. Konsekuensia funu Quleicai: Hosi governu nian tropa, ema ida mak mate, no ema na’in 15 mak kanek; hosi “revoltosos”, ema nain 21 mak kanek, no mane naín 324 mak dadur. Xefi revoltosos ne’ebé dadur: Loi-Lari, major segunda-linha, Reci-Ma, tenente-koronel no xefi-suku Bolehá; xefi na’in rua hosi Lawateri, xefi na’in rua hosi Larigua.

Além de ida ne’e, tropa governu nian sunu mohu knua sira, no hadau tiha karau, kuda no bibi. Funu remata tiha, povu Quelicai no Laga hetan susar barak kona ba hahan.

Dom Carlos Filipe Ximenes Belo
Premiu Nobel Paz 1996

Sem comentários:

Enviar um comentário

Nota: só um membro deste blogue pode publicar um comentário.