TINAN ATUS LIMA: Kapítulu 39 – Instaurasaun rejime replikanu iha Portugal no nia impaktu iha Timor

500 ANOS – TINAN ATUS LIMA  Emar Timor Ho Malae Mutin Hasoru Malu  

Dom Carlos Filipe Ximenes Belo

Kapítulu 39 – Instaurasaun rejime replikanu iha Portugal no nia impaktu iha Timor

Hahú tinan 1140 to’o 1910, iha Portugal, sistema governu nebé iha mak Monarquia. Iha monarquia bainhira liurai ida mate, nia oan mak sa’e fali. Iha regime republikanu se mak ukun mak prezidente republika, ne’ebé povu mak hili. Iha tinan 1910, liurai neébe uku Portugal, mak Dom Manuel II. Nia aman Dom Carlos, ema republikanu sira mak oho, hamutuk ho príncipe dom Filipe. Iha loron 5 fulan outubro, tinan 1910, organizasaun ne’ebé halibur ema republikanu, karbonáriu, no masóniku, halo revolusaun no hatun tiha liurai Dom Manuel., hodi taka dalan ba regime monarkiku no loke dalan ba regime republikanu.

Iha loron 8 fulan ne’e, ministro da Justiça Afonso Costa haruka aplika leis desde marquês de Pombal nia tempu atu explusa Ordens Religiosas; rejime foun, iha buat barabarak nia let, estabelese separasaun Estado/Igreja. Buat ida tan mak sira halo: duni sai Companhia de Jesus hosi Portugal no ninia kolonia sira. Iha 1910, iha Timor, governador ne’ebe Monarquia hili mak naran Alfredo Cardoso Soveral Martins. Tanba regime foun, nia husik Timor no fila ba Lisboa. Rejime repblikanu fo aprovasaun atu foi Filomeno da Câmara Melo Cabral hanesan governador foun iha Timor. Emboot ida ne’e mak sei halu funu hasoru Dom Baoventura, liurai Manufaih, iha tinan 1912.

Iha Timor, Governu hala’o serimónia ida atu hato’o ba populasaun katak iha regime foun, naran REPÚBLICA no Presidente da República; serimónia ne’e halo iha loron 30 fulan outubro tinan 1910. Nuné sira mos toka bandeira: halot bandeira Monarquia nian (mutin no azul ou biru), no uza fali bandeira matak no mean (verde e vermelha ou verde-rubra); Medida ida aat liu, mak haruka sai hosi Kolónia Timor padres Jesuitas no Irmãs Canossianas.

Amo lulik jesuíta sira tama Timor iha tinan 1899; sira kaer Koléjiu Soibada. Madre Kanosiana sira tama Timor iha 1879; sira serbisu ba edukasuan labarik feto nian iha Dili, Bidau, Manatuto no Soibada. Tanba deit orden hosi Lisboa, Governu iha Timor, ho dekretu 31 de dezembro 1910, husu padre no madre sira atu sai hosi Timor. Ho dekretu ne’eba, governu hadau uma (edificio) ne’ebé padre no madre sira serbisu ba; maibé sira mos la hatene katak uma sira ne’eba la pertense ba Ordem Companhia de Jesus no la pertense ba kongregasaun kanosiana, maibé, propriedade dioseze nian, ne’ebé amo Bispo entrega ba padre Jesuitas no Irmãs Canossianas atu hala’o knar edukasaun foin sa’e timor.

Iha loron 1 fulan fevereiro 1911, irmã kanosiana na’in sanulu resin ida (11) sa’e ro-ahi hodi liu ba Honkong. Amo lulik jesuíta sira sai hosi Soibada iha loron 9 fulan dezembro 1910. Amo lulik sira ne’e; padre Manuel Fernandes Ferreira, padre José Atalaia, irmaun leigo António Amaral no irmaun leigo António Claudino. Padre Sebastião, tinan ne’e iha tiha ona Hongkong.

Tanba expulsaun eskola no koléjiu sira taka: Iha 1910, situasaun Kolejiu no eskola nian hanesan tuir mai ne’e:

1) Colégio Nuno Álvares Pereira, iha Soibada, ho labarik mane internu hamutuk na’in 76; 

2) Colégio da Imaculada Conceição, ba labarik feto sira: aluna na’in 60. 

3) Iha Dili: Colégio de São Jose ou de Beneficência, ba labarik feto sira; iha aluna interna na’in 76, no esterna, na’in 31;

4) Eskola ba labarik feto sira iha Bidau: aluna na’in 30. 

5) Eskola ba labarik feto iha Manatuto: aluna na’in 165.

Atu mantein Soibada, padre José Neves, superior Vicariato do Norte (Lahane) husu padre secular João Lopes atu tau matan ba kolejiu no mantein nafatin atividade sira.

Kona ba labarik feto sira, iha Soibada, menina barak haruka fila ba uma, no balu fahe ba família katólika sira. Iha Manatuto no Dili la iha atividade.

Ho orden espulsaun ne’e, Misaun no familia sira terus barak.

Iha 1923 deit mak Madre kanosiana sira fila ba Timor. Amo lulik jesuíta tem ke hein to’o 1958, bainhira Dom Jaime Garcia Goulart konvida sira atu kaer Seminário Menor, iha Dare.

Dom Carlos Filipe Ximenes Belo
Premio Nobel Paz 1996