VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

quinta-feira, 3 de dezembro de 2015

OJE 2016: Prioridade Alokasaun, Dezegualidade Rejional ho Responsabilidade Politika

OJE 2016: PRIORIDADE ALOKASAUN, DEZEGUALIDADE REJIONAL HO RESPONSABILIDADE POLITIKA

Husi Estanislau S. Saldanha.

Estanislau S. Saldanha
Previzaun orsamentu Jeral Estadu (OJE) Timor-Leste nian iha tinan 2016 nebee agora dadaun sei deskuti hela iha Parlamentu Nasional (PN) plus-minus hamutuk US$1.6 bilaun (US$1,6 miliar), husi nee kuaze 14% ba ZEEMS nebee retornu sosial ho ekonomia la iha ka kiik. "Karik 30%-40% (karik hanesan notisia espaila iha medial sosial katak mega projetu Suai Supply Base (SSB) ho kustu nebee zumbo no kansela husi Tribunal das Contas) ba tan projetu tasi" maka 44-54% osan ba fakar deit ba projetu sira nebee retornu la iha ka iha mos kiik. Iha parte seluk rezerva minarai ho folin minarai tuun makas nebee halo rendimentu estadu mos tuun makas.

Bainhira rendimentu estadu tuun rasionalmente despeza estadu mos ajusta tuun hodi asegura sustentabilidade dezenvolvimentu nasional. Nunee mos buka investa makas iha area prioridade nebee bele aumenta produtividade, kompetividade, diversifika rendimentu hodi lori Timor-Leste ses husi dependensia ba minarai no importasaun. Maibe realidade orsamentu ba edukasaun, saude, agrikultura, infrastrutura baziku ho turizmu kiik, seitor sira nebee sai baze ba produtividade, kompetividade ho sustentabilidade dezenvolvimentu nasional. Osan barak liu mout iha subsidiu non produtivu, kustu rekurenti ho mega projetu nebee ho intensaun populis no hamosu “power sharing”, maibe produtividade ho multiplier effect kiik.

Alokasaun orsamentu nebee la konaba prioridade ho la fair bele hamosu dezegualidade regional (entre munisipiu) tanba munisipiu 12 seluk hetan alokasaun osan kiik, no oecusse boot tebes. Iha parte seluk hare husi kontribuisaun munisipiu sira ba rendimentu estadu mak munisipiu sira hanesan Covalima, Manufahi, Manatuto, Viqueque ho Lautem kontribui boot tebes liu husi osan minarai iha tasi mane, maibe alokasaun osan ba munisipiu sira nee kiik. Nee ladun fair, munisipiu sira nee kiak iha nian riku leten. Laos nee deit, bainhira kapasidade Oecusse kiik iha termu rekursu umanu, rekursu natural, services, jestaun ho partisipasaun povu nian, maka injensaun osan ida boot, ho dezenvolvimentu aforsadu iha Oecusse nee sai monumentu ida ba povu Oecusse, sira admira, maibe sira la nikmati, no sai “penonton” iha sira nian rai laran, too ikus monumentu nee sai malahuk tanba kapasidade iha operasaun ho manutensaun sei menus. 

Nee hanesan loos tipikal nasaun seluk nebee riku minarai, maibe povu sira hela besik minarai kiak rabat rai. Tanba osan minarai ba hotu fatin seluk no goza husi elite politik ho nian kroni sira. Konaba nee Eis Governador Irian Jaya (Papua), Bernabas Sueba, dala ida hatoo nunee: Irian Jaya riku, maibe kiak iha nian riku leten. Tanba estadu Indonesia foti riku Irian Jaya hodi dezenvolve fatin seluk hanesan Jakarta ho Java, maibe Irian Jaya kiak nafatin. Dezegualidade alokasaun orsamentu no fahe “paun estadu” la hanesan bele hamosu “kecemburuan sosial” no sensu injustisa nebee bele implika ba konflitu sosial no hamosu hanoin separatizmu.

Esperiensia nasaun barak riku minarai ho rekursu natural seluk mosu konflitu tanba governu faila hamosu fairness redistribui ho uza rendimentu minarai, no komunidade hela besik kampu minarai kiak rabat rai.Tanba nee, iha nasaun balu sira harii endownment fund ba komunidade hodi finansia programa sira nebee mai husi komunidade nebee hela besik kampu minarai hodi hadia sira nian moris. Iha mos nasaun balu aloka 15-20% rendimentu minarai ba munisipiu/provinsia nebee iha minarai, diluar orsamentu mai husi OJE.

Iha Timor-Leste, osan minarai mout hotu iha Dili ho Oecusse, minisipiu seluk simu ka sente (merasa) deit. Governu presiza re-estrutura hanoin hodi tetu no asegura fairness ho egualidade iha alokasaun OJE. Kontinua aloka osan la fair no ba mega projetu nebee la iha retornu signfikativu ba tempu mai bele ameasa sustentabilidade dezenvolvimentu nasional no hamosu konflitu nebee kustu bele karu ba Timor-Leste.

Buat seluk nebee "aneh" iha alokasaun osan mak nee “Timor-Leste la iha aviaun maibe ZEEMS iha Aviaun, ka Prezidenti da Republika la iha aviaun, maibe Prezidenti ZEEMS iha aviaun”. Dili hanesan odamatan Timor-Leste ba mundu, maibe portu ho aeroportu internasional la hadia, maibe governu ba halo portu ho aeroportu internasional iha Oecusse nebee aviaun ho roo la tama ka tama dala ida ka rua deit iha semana ida. Kareta iha Oecusse oituan maibe konstrusaun estrada boot ho kualidade no 1. Lia husu maka nee sa ida mak iha Oecusse (hanesan natural resources ho services) hodi sai comparative and competitive advantages hodi manan fatin/rai/munisipiu/nasaun seluk hodi dada investimentu, multiplika fundu ho hamosu retornu viavel ho sustentavel hodi asegura sustentabilidade dezenvolvimentu nasional? Tanba too agora sedauk iha resposta diak ho presivu konaba mega projetu nee mak publiku dehan ZEEMS nee soe osan boot, iha "kebohongan publiku" no bele hamout Timor-Leste. Hare husu nee belun Roberto Aleixo da Cruz hatoo iha Grupu Forum Haksesuk (28 Novembru 2015: oras 7.55 PM) katak fundador estadu presiza hetan kontrola husi povu atu uza osan didiak ba bem estar komum, se lae sira bele sai “furador estadu”.

Hare husi responsabilidade partidu politiku sira ba sira nian konstituente liu-liu sira nian promesa sira iha periodu kampanye, lider sira haluha fatin sira nebee kontribui kadeira ba sira hodi ukun. Hanesan Fretilin iha votus barak tebes hetan husi Viqueque, Baucau, Lautem ho Covalima maibe agora minisipiu sira nee la hetan atensaun no hare liu ba Oecusse. Nunee mos partidu seluk. Iha nasaun demokratiku nebee komunga politika etis-humanistis ho politika-responsabilidade, lider ho partidu politiku sira esforsa makas responsabiliza sira nian promesa ba sira nian konstituente ho povu. Nunee politika nain sira buka servisu makas hodi hadia povu nian moris, laos lider politika ho nian kroni sira nian moris uluk. Iha Timor-Leste, lider politika sira, balu uza karisma privadu, ho seluk uza partidu politiku istoriku hodi halo promesa barak ba povu, no la kumpri tanba aproveita povu nian ignoransia, apatis, nostalgia ho fatalizmu.

Esperiensia iha mundu hatudu Iha sosiedade nebee komunidade fanatizmu-irasional, eskeptiszmu no fatalistiku tanba "imaturidade politika" ba politika hodi ignora isu publiku, desizaun publiku ho hahalok figura publiku bele hamosu lider ditadura, koruptu no destroi bem estar komum, hamosu dezegualidade sosial, harahun dignidade ho kompetetividade nasaun. Timor-Leste la bele monu ba fenomena ho esperiensia aat nasaun sira hanesan nee nebee barak liu iha Asia ho Afrika.

Lia ikus, Timor-Leste hakarak nasaun nee metin no ukun an duni laos deit iha politika, maibe iha area hotu, maka agora kedas governu investa makas iha edukasaun, saude, agrikultura, infrastrutura baziku ho turizmu iha tempu nebee Timor-Leste sei iha rendimentu minarai maski rekursu nee mos hahu menus. "Fundador estadu" barak mak agora kaer estadu presiza hamosu prioridade klaru, hatun ego, uza rekursu tomak nebee iha ho rona ema barak hodi servisu ba bem estar komum nunee sira bele husik hela eransa diak ba jerasaun foun hanesan Lee Kuan Yew no Mahatir Muhammad halo iha Singapura ho Malaysia respetivamente. Nunee “fundador estadu” sai duni nudar fundador estadu hetan respetu masimu tinan ba tinan nafatin. Se halo sala, fundador sira bele sai “furador estadu” hanesan hatoo husi belun Roberto Aleixo da Crux no sira lakon kredibilidade nudar aman estadu.***

Sem comentários:

Enviar um comentário

Nota: só um membro deste blogue pode publicar um comentário.