Solidaridade Juventude Timor-Leste ba Jovem Aktivista Angolano

Solidaridade Juventude Timor-Leste ba Jovem Aktivista Angolano

Aktivista Angolano Luaty Beirao

Ohin, loron importante ba juventude Timor-Leste, loron ohin ne’e mak loron ida atu hanoin hikas luta juventude hotu-hotu nian, iha Timor-Leste no mos iha rai seluk. Ohin, iha fatin ida ne’e, tinan 24 liuba, juventude rihun ida resin expresa sira nia dedikasaun hodi luta hasoru violasaun dereitus humanus, luta hasoru injustisa social, luta hasoru ukun ne’ebe nakonu hatauk, hamate no haterus ema barak. Ita hotu louva valor murak sira ne’ebe lideres lutador ukun rasik an sira husik hela ba ita hotu. 

Ohin mos loron inportante hodi afirma hikas ita hotu ninia kontinuasaun ba luta hasoru violasaun direitus humanus, injustisa social, no hahalok anti-demokrasia iha rai laran no mos iha rai liur.

Ohin iha selebrasaun loron nasional juventude ba dala-24 ne’e, Juventude Timor-Leste, hakarak espresa nia solidaridade ho ativisita Luaty Beirao ho ninia kolega sira iha Angola. Iha 20 Junu 2015, Luaty Beirão ho ninia kolega 14 hetan kaer hosi autoridade seguransa Angola ninian tanba halibur malu, halo diskusaun, lee livro kona ba demokrasia no hato’o hanoin kritiku ba politika governu nian. Konsekuensia husi sira nia atividade ne’e mak sira nia detensaun to’o ohin loron. Too oras ne’e dadaun seidauk hetan liberdade. Situasaun hanesan mak akontese iha Timor-Leste durante tempu okupasaun nian. 

Juventude Timor-Leste hakarak denunsia hahalok Governo Angola nian ne’e. Tanba hahalok ne’e kontra Princípios Orientadores iha Estatuto da Comunidade dos Paises da Lingua Portuguese (CPLP) nian ne’ebe temi kona ba: Fo importansia liu ba dame, demokrasia, estadu do dereitu, dereitus humanus no justisa social (Primado da Paz, da Democracia, do Estado de Direito, dos Direitos Humanos e da Justiça Social (Artigo 5. 1. alinea e). Juventude Timor-Leste kondena hahalok Governo Angolano nian ne’ebe hatudu momos ninia sintidu anti demokrasia, no viola dereitus humanus.

Juvenude Timor-Leste liu husi komemorasaun Massakre Santa Cruz ba dala-24 ne’e husu atu Governo Angolano imediatamente liberta ativisita Luaty Beirão ho ninia kolega sira husi fatin detensaun nian. Kaer no detem sidadaun sira nebe espresa sira nia hanoin kritiku hasoru governante, la’os pratika demokrasia nebe haktuir iha Principios Orientadores nebe hakerek iha Estatuto CPLP nian. Estado de Direito labele sai prizaun ba ema nia hanoin no ema nia espresaun. 

Aktu libertasaun ba ativisita sira ne’e sei hatudu Governo Angolano ninia komitmentu hodi halo tuir prinsipius orientadora hosi CPLP ninian, no mos hatudu Governo Angolano ninia solidaridade ba joven hotu-hotu iha nasaun irmaos CPLP ninian.

Liberdade ba Luaty Beirão ho nia kolega sira!

Viva Liberdade!

Viva Demokrasia!

Viva Juventude CPLP!

Viva Juventude Timor-Leste!

A Luta Continua!