MM NIAN MATE: TANBA SA, IMPLIKASAUN NO SA IDA MAK PRESIZA HALO BA OIN?

MM NIAN MATE: TANBA SA, IMPLIKASAUN NO SA IDA MAK PRESIZA HALO BA OIN?

Husi Estanislau S. Saldanha, Dosenti no Peskizador

Dosenti no Peskizador
DIT

Prezidenti Konselhu Revulusionariu Maubere (KRM), Sr. Paulino “Mauk Moruk” Gama (alias MM) mate ona iha area Venilale iha 8 Agustu 2015 depois konfrontu ho forsa estadu (F-FDTL ho PNTL). Tuir informasaun nebee espaila iha media sosial, iha memento konfrontu, MM ho nian elementu labarak no sira lori deit pistola. Forsa ho polisia nebee barak tebes ho armamentu modernu serka ona MM nian subar fatin. Nunee MM sira la iha posibilidade atu halo kombate makas hasoru polisia ho forsa. Karik nunee bele iha posibilidade husu MM ho nian elementu sira hodi rende ona. Karik MM ho nian membru sira lakohi rende, forsa estadu bele serku deit too semana ida, hein aihan ho bee la iha, naturalmente sira bele rende ou mate mesak. Nunee mos sekarik halo kontra tiru hasoru MM, entaun polisia/forsa iha ekipamentu (kilat ho teleskop ka kilat sniper nian) hodi tiru ain ka fatin seluk nebee la hamate MM. Nunee bele lori MM ho nian elementu sira mai iha Dili hodi hasoru justisa.

Loos duni MM viola lei no involve aktu violentu balu, maibe forsa ho polisia nian knaar atu kaer ho lori MM ho nian grupu hodi hatan iha tribunal tuir aktu nebee sira halo. Maibe tuir info, MM hetan tiru iha matan ho isin. Nee signifika katak tiru atu hamate, laos tiru atu kaer hodi lori ba justisa. Timor-Leste la iha pena morte tuir Konstituisaun RDTL no kodigu penal. Hare nee, komandu ho ema sira kaer lei presiza halo avaliasaun detailu ho komprehensivu konaba standard operation procedure (SOP) kombante nian ka konaba tiru malu nian (rule of engagement) atu hare posibilidade violasaun direitu umanu ba kazu nee no evita iha kazu hanesan iha tempu mai. Se ita bele kaer ema ida tanba sa mak presiza tiru mate?

Estadu liu husi PM Rui Araujo hateten katak governu la nega MM nian kontribuisaun ba funu ukun an. Nian uluk nudar komadante komando sapeo mean Falintil, lakon familia barak oho husi inimigu tanba nian determinasaun ba ukun an, estadu tenki rekuinese no la bele nega duni. Tanba agora iha mos veteranu barak, nebee uluk funu makas, maibe ikus mai tun no rende ho kilat, no dada inimigu ba oho FALINTIL maluk sira, agora sira veteranu nafatin. Nunee mos agora ema barak uluk la luta makas (kompara ho MM), ka balu kontra tan, no sai boot, hetan priveleziu, pensaun vitalisia ho goza fasilidade estadu oioin ho modal hakruk ho foti liman deit.

Ita rekuinese MM involve aktu violentu balu hanesan agresaun ba Prezidenti PN iha Baguia, violensia ba polisia iha Laga, ho Venilale no nian lori kilat, nee kontra duni lei, no estadu iha obrigasaun atu rezolve no asegura hakmatek ba povu no sai fondase ba halao dezenvolvimentu nasional hodi muda povu nian moris ba diak. Maske nunee, sekarik ita kompara aktu MM nian iha konteks nivel destrusaun ho implikasaun seguransa, sosial ho ekonomia la boot no masivu liu krizi 2006. Tanba nee, iha futurolog ho numerolog ida, naran AR Rama Cristo, Timor oan, iha nian FB hatoo MM nee kontra estadu ga kontra ukun na’in? Pergunta ida nee fundamental tebes atu Timor oan hotu bele responde ho halo reflesaun sekarik liga ho seguensia eventu kritiku barak nebee Timor-Leste ultrapasa depois ukun an.

Krizi 2006 halo ema mate barak (inklui mos ofisial ho soldadu F-FDTL ho PNTL), lakon riku soin, refujiadu masivu iha nebee-nebee (massive internal displaced people), depois ukun an, maibe "autor direitu ho intelektual" la iha ida julga tuir lei no tama prizaun ho mate aforsadu. Nunee mos atentadu hasoru Prezidenti RDTL Dr Jose Ramos Horta iha Metiout ho PM Kay Rala Xanana Gusmao iha Balibar maibe la iha ema ida kaer, julga no hetan pena morte aforsadu (la tuir lei).

Hare nee, MM nebee uluk mos luta makas, lakon familia barak, nian lo'los dezerva liu atu kaptura no lori ba justisa. MM la dezerva atu hetan kartus iha ulun ho isin, sekarik kompara ho krizi 2006, nebee autor direita ho intelektual barak eskapa sein hetan julgamentu ho "pena morte" aforsadu (la tuir lei) tuir lei.

MM mate ho traziku hare husi mate isin no situasaun bainhira nian mate, maibe isu sira nebee nian foti ba nian luta seriu tebes iha nasaun doben nee. Isu sira nee mak hanesan injustisa ho dezegualidade social nebee nian fonte mak korupsaun ho inefsiensia, dezempregu boot husi joven sira nebee rezulta husi injustisa iha merkadu servisu, abuzu poder, ema la meritu ka inkapasidade tuur iha governu, korupsaun legal (pensaun vitalisia), lei kroat ba ema kiik, no “tumpul” ba ema boot sira, intervensaun ukun nain ba tribunal, degradasaun identidade nasional, moral ho fiar, invazaun husi ema liur iha politika ho ekonomia, lider nasional sira barak lakon integridade personal ho politika hodi halo promesa falsu, poligamia, perselingkuhan ho demoralizasaun, kiak estrutural, ho isu sira seluk, nebee hanesan isu aktual, estrategiku no krusial, nebee sei dada atensaun joven sira ho klase mediu sira. Tanba nee, governu ho estadu tenki tau prioridade, halo planu diak atu gradualmente rezolve kedas ho meius pasifiku (laos ho kilat). Tanba isu sira nee hanesan "bom waktu" nebee bele hamosu fali MM ho Major Alfredo Reinaldo seluk no bele arebenta iha tempu sira mai.

MM fila ona ba maromak nian kadunan santu, maibe hau fiar nian mate nee sei fanun ukun nain sira hodi halo reflesaun seriu hodi atende joven ho povu diak liu. Governu ho estadu tenki halo planu diak no uza osan estadu diak hodi hadia povu nian moris, laos hadia ukun nain ho nian aleadus sira nian bolsu ho moris. Mos governu presiza resolve problema ho meius pasifiku, dialogu, ho dezenvolvimentu, laos ho kilat tanba esperiensia barak ona iha mundu hatudu “kilat” sei la rezolve no hametin estabilidade ida diak no permanenti, mezmu iha ditadura “fiu kotu ida”.

Governu mos buka servisu ho sosiedade sivil, instituisaun edukativu ho igreija atu promove paz, dame ho dezenvolvimentu via konsensiliazsaun ho civic education nebee diak, holistiku ho persistenti. Tuir autor nian hanoin, Civic education tenki hahu no prioritiza uluk ba ukun nain ho lider politiku nasional sira hodi oinsa hetan ukun, hatene ukun, no serbii povu. Nunee sira hatene dalang diak ho demokratiku tuir lei, normas ho etika atu hetan ukun, osan ho popularidade, sein liu husi hakiak konflitu ho kustu ran, isin, moris ho halerik povu nian ho sira nian oponenti sira.

Estadu tenki halakon ka redus pensaun vitalisia, kombate korupsaun ho inefisiensia, no halo planu diak ba povu, ukun nain tenki iha integridade moral, respeita lei, no tane aas ho proteze vida-umana (maske diferensa hanoin, ras, lian, fiar ho opsaun politika), no iha espiritu servidor ba hodi halo dezenvolvimentu ba bem estar komum iha nasaun direitu-demokratiku nian laran tuir Konstituisaun RDTL.

MM mate ona, ema balu hamnasa, festa tanba bele hetan tiket diak ba ukun ka kaer metin ukun, balu seluk insulta ho tolok. Maibe ema barak mos triste, tanis no halerik. Hare husi nian luta iha inisiu invazaun, nian lakon vida joven, terus, lakon nian feen ho oan ho membru familia seluk nebee inimigu oho hanesan animal soe la iha rate, hanesan mos saudozu ho aswain sira seluk. Agora MM mos mate iha kilat musan povu nian nebee nian mos uluk mehi ho funu atu iha povu ida, estadu ida ho kilat mesak nudar nasaun ida hodi proteze estadu ho povu via dalang umana ho dignu. Traziku liu tebes MM mate iha nian belun-maluk sira nebee sira terus hamutuk, mehi hamutuk ho subar hamutuk ho kesi esperansa hamutuk no sira hotu lakon familia nian liman. Lo'los belun-maluk sira nee buka kaer moris MM no entrega ba justisa tanba iha posibilidade nee. Nunee MM hatuir justisa no hein maromak bolu nian tuir dalang umana, laos dalang kartus belun-maluk, povu ho estadu nebee nian uluk mehi hodi harii lesuk.

Hare husi nee, MM dezerva hetan respeitu, hetan minutu ida silensiu no hetan atensaun husi estadu. MM defende isu sira nebee aktual, krusial ho estrategiku ba povu ho estadu nian interese, maske ho dalang sala. Maske nunee, nian sala la todan liu aktu violensia iha krizi 2006 nebee masivu no doko makas nasaun nian kredibilidade, nunee nian la dezerva atu mate ho kartus husi nian belun-maluk. Estadu presiza tau matan, minimu ba funeral ho nian oan sira.

Adeus ho deskansa iha paz. Iha maromak nian kadunan santu, Saudozu tenki hamutuk ho aswain ho saudozu sira seluk tau matan ho defende povu ho nasaun doben ida nee hodi moris diak, paz, ho dignu. Mos hamutuk atu taka dalang ba ema sira nebee hamrok ho uza ran, ema nian moris, halerik ho terus hodi hetan ukun, osan ho popularidade. MM nian isin bele mate, maibe hanoin diak atu luta ba injustisa, dezegualidade sosial, kombate korupsaun ho inefisiensia atu lori nasaun hakmatek no povu moris diak no dignu sei la mate.****