La-Sama: Mestri Boot Ba Dignidade "Imi Haree Malu Didiak Ba Hodi Dezenvolve Ita Nia Rain"

http://forum-haksesuk.blogspot.com

Mensajem ikus ne’ebé Saudozu Ferenando “La-Sama” de Araújo husik hela ba timoroan tomak, nu’udar inspirasaun ida ne’ebé inspira ita hotu atu moris banati. Liafuan simples mai hosi lideransa simples hanesan La-Sama bele lori ita ba moris simples iha moris luxu nia laran. Ema hotu hanoin, ho selebrasaun “Aifunan Midar” ka loron 14 [02 Juñu-20 Juñu 2015] ba La-Sama nia mate, mensajem hirak ne’e lakon mohu ona. Maibé, ispiritualmente mensajem ne’e sei moris iha ema hotu-hotu nia neon liu-liu ba timoroan sira ne’ebé hadomi rai lulik Timor-Leste ne’e ninia futuru.

La-Sama maka mestri boot ba lisaun “dignidade” nian. Hori tempu luta, La-Sama la’os luta ba ninia dignidade rasik maibé luta ba Timor-Leste ninia dignidade. Luta hotu-hotu nia dikin maka foti Timor-Leste ninia dignidade. Tanba dignidade, La-Sama lakohi ema sama ninia dignidade no Timor-Leste ninia dignidade. Buat hotu bele lakon maibé La-Sama lakohi ema sama hanehan Timor-Leste ninia dignidade. Atu sama ka la-sama, La-Sama hatudu ba mundu katak La-Sama ema ida la-sama nia ulun. La-Sama nia ulun nakonu ho matenek atu dezenvolve Timor-Leste sai nasaun ne’ebé soberanu ho dignidade be ás hanesan nasaun hirak seluk.

La-Sama sai mestri boot ba dignidade la’os tanba nia hasai kursu espesial ba dignidade iha universidade boot iha rai boot. Maibé, La-Sama hetan titulu ida ne’e liu-hosi ninia luta ba libertasaun nasional no ninia dediksaun sai lider hodi priense ukun rasik-án hodi tau ás dignidade iha buat seluk nia leten. Ho dignidade, la’o ho dignidade, ukun ho dignidade, maka wainhira La-Sama hiit-án ba mundu seluk (mate), ninia kohe laran (konta bankaria) ida halibur de’it osan $10,00 no iha kohe ida seluk osan $300,00.

La imajina maibé ida ne’e maka realidade. Iha realidade moris nian, La-Sama tau ás tebes dignidade iha ninia moris. Ba La-Sama, moris ne’e hanesan mestri moris nian ne’ebé hanorin nia atu onestu. Onestidade ne’e nia hutudu iha ninia knaar loro-loron nu’udar ukun na’in. Ezemplu, wainhira kaer kargu nu’udar Vise Primeiru Ministru, La-Sama koko atu empresta ninia kolega ida servisu iha Banku nia osan atu trata ninia moras iha rai boot. Ninia kolega ne’e hatete, estadu iha osan para atu trata ita boot nia moras. Maibé, La-Sama hatan “ita labele garante ka tane-liman ba estadu nia osan maibé ita mós tenki iha osan atu trata ita nia moras [moris] rasik.”

Timoroan hotu-hotu, ukun na’in sira hotu tenki leno-an ba La-Sama ninia hahalok ne’e. La-Sama hanesan lalenok ba ita hotu. Ho dignidade nu’udar timoroan, La-Sama lakohi uza povu nia kosar been [osan] maibé hakarak uza ninia kosar been rasik. Uku-na’in hotu-hotu tau sira dignidadade hanesan La-Sama hatudu dadaun ne’e, Timor-Leste sei la nakonu ho ema koruptor no traidor barak.

La-Sama hanorin ukun na’in sira seluk atu labele sai traidor no lebele sai koruptor hodi han povu nia kosar been (osan) ho saugate. Maske mate tiha ona maibé saudozu La-Sama sai modelu diak ba onestidade no sai mestri boot ba dignidade ne’ebé ema hotu tenki moris banati. La-Sama ema la-sama duni ninia dignidade. La-Sama lakohi ema seluk sama Timor-Leste ninia dignidade ho asaun Korupsaun, Kolusaun, no Nepotizmu be buras. La-Sama sadik ukun na’in sira atu moris simples no moris ho dignu [dignidade]. Tanba ne’e, antes atu mate, ho dignidade, La-Sama tatoli ba timoroan “Imi haree malu didiak ba hodi dezenvolve ita nia rain.” Adeus La-Sama!

Cancio Cassimata

Diretor & Xefi Redasaun Jornal Matadalan

Publika iha Matadalan edisaun 24-30 de Junho de 2015, pajina 16!