VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

sábado, 3 de janeiro de 2015

REFLEXAUN TINAN 2014 ROHAN

HAU NIAN REFLEXÃO - Tétum

Iha hau nian reflexaun ba tinan 2014, Xanana Gusmão eleitu hanesan figura ba tinan 2014 ninian.

Há’u hili nia hanesan figura ba tinan 2014 ho razaun tolu:

Razaun ida : saida mak ema seluk hanoin kona ba saida mak Xanana Gusmão hanoin;
Razaun rua : saida mak ema seluk la hanoin kona ba saida mak Xanana Gusmão halo;
Razaun tolu : saida mak ema seluk hatene kona ba saida mak Xanana Gusmão la hatene.

Se mak la kuinese Xanana Gusmão, pelu menus iha Timor ema hotu kuinese desde tempu okupasaun Indonésia, labarik foin moris sira ho ema sira moras demensia mak la kuinese se mak Xanana Gusmão.

Iha anos ‘80 naran Xanana Gusmão sei iha nakukun laran, jovens barak iha sidade ka iha vila laran, ate estudantes, akademikus no intelektuais barak sinti naran Xanana Gusmão hanesan mitu ida. Ida nee mak autor rasik sinti iha tempu neba, tanba karakteristika funu guerrilha hanesan nee duni.

Xanana Gusmão sai idola ema barak nian, liu-liu rezistentes sira, iha rai laran ka iha tasi balu, nia sai hanesan aman ba guerrilheirus sira, ba organizasoins klandestinas sira, ba frente diplomatica Xanana Gusmão nian ordem sai hanesan guiaun ba ninian representante iha rai liur hodi halo politika no mos Xanana Gusmão sai hanesan hali hun boot ba povu Timor tomak.

Nudar lider maximu rezistensia, ninian imajem kuda fanatismu iha jovens sira nian fuan no iha sosiedade nian laran. Hahu anos entre ‘80 no’90 naran Xanana Gusmão too rai rohan mundu tomak, naran nee sai famozu liu tan bainhira inimigu kaer no dadur iha prizaun iha inimigu nian rai.

Prizaun ba Xanana Gusmão sai hanesan abrigu nebee fo liu seguransa ba nia halo jogu politiku, militar no diplomatika, tanba prizaun oferese liu seguransa ba nia atu halo jogu “high level” hasoru inimigu. Prizaun halo ninian baionete sai kro’at liu tan hodi hedi inimigu ba didin lolon. Prizaun mos hakbesik Xanana Gusmão ba mundu tomak...

Rai Timor sorte boot hetan ukun an no sai nudar nasaun RDTL tanba Xanana Gusmão nian moris, ho Xanana Gusmão nian moris mak realiza herois matebian sira nian mehi.

Signifika katak, karik iha 1992 inimigu hasa’e deit Xanana Gusmão nian mate isin husi rai kuak nebee nia subar ba, Matebian sira nebee mate tanba ukun an ida nee, ruin naklekar namkari husi tasi feto too tasi mane, husi Tutuala too ba rai ketan, karik sira nian mehi atu ukun an bele hasoru susar nebee todan tebes atu realiza.

Rezistensia bele hetan dificuldades nebee boot iha terrenu atu reorganiza hodi hetan forsa hodi kontinua luta nian “pós” Xanana Gusmão.

Karik inimigu bele kanta vitoria, problema Timor-Leste hasai husi ajenda ONU nian, integrasi tidak boleh diganggu-gugat oleh siapapun, funu tinan 17 iha Timor-Timur tercatat dalam Sejarah Perjuangan Bangsa Indonesia dan tidak ada istilah reformasi di Negara Kesatuan Republik Indonesia. Razaun ida atu rejime ditador Soeharto ejiste nafatin no forte liu tan.

Tanba Xanana Gusmão sai hanesan referensia rezistensia luta povu Timor nian nebee hetan pezu iha mundu, naran nebee mos hetan pezu makaas ba diplomacia nebee Portugal halao nudar potensia administrante Timor nian. Naran ida nebee mos manan ona opiniaun publika iha mundu internasional no ema boot sira iha nasaun barak fiar ba ema ida ho naran Xanana Gusmão.

Iha tempu ukun an, Xanana Gusmão sai 1º Presidente Republica, sai presidente ho meritu no merece duni sai 1º Presidente RDTL pós guerra, tanba Xanana Gusmão diriji funu too loron 30 fulan Agosto tinan 1999, loron referendu ba ukun rasik an.

Durante iha Presidencia Xanana Gusmão ladun satisfeitu ho papel nebee nia halao tanba sinti an sistema kesi metin nian liman-ain. Hakarak halo buat barak maibe labele, hakarak kaer ho nian liman rasik sistema administrasaun hodi implementa hanoin ba rai no povu nebee nia iha maibe sistema la fo dalan. Nunee ho pasiensia Xanana Gusmão hein hodi hanoin oin sa nia rasik kaer ukun tuir ninian prinsipiu, tuir ninian hanoin atu harii infraestruturas, dezenvolve administrasaun, dezenvolve ekonomia no hasai ninian emar sira husi mukit no kiak.

Tanba nee, iha 2007 Xanana Gusmão husik hela vaga kandidatura ba sira seluk hodi la rekandidata no forma partido CNRT hodi konkorre eleisoins lejislativas hodi forma Governo – Aliansa Maioria Parlamentar.

Atuoflagelação Xanana Gusmão nian hahu iha biban nebee Prezidente Republica Dr. José Ramos Horta indigita Xanana Gusmão, lider partido mais votado nebee hetan votus maioria iha Parlamento Nacional forma IV Governo Constitucional no Xanana Gusmão sai nudar Primeiro-Ministro.

Autoflagelação, tanba Xanana Gusmão hatene no konsiente katak mesmu nia hakat risku nebee boot ba ninian imajem nudar aman ba rezistensia, ulun boot ba nasaun enquantu Prezidente Republica no lider karismatiku, maibe nia fo an tan ba sakrifisiu, laos tanba hakarak kargu, laos tanba hakarak manan osan no sai riku, laos tanba hakarak sai famozu liu tan. Nian naran boot ona iha mundu, kargu nia la presiza ona, atu hetan osan nia la presiza okupa kargu estado nian, ninian imajem ho hanoin nebee iha nia bele hetan osan no riku.

Maibe buat hirak nee hotu so ema seluk mak hanoin kona ba saida mak Xanana Gusmão hanoin. Ema barak dun Xanana Gusmão faan Timor, naok teen, korruptor, aman ba KKN, tolok nia, hotar nia kalan loron, insulta nia, dehan nia beik teen, bulak etc.etc.etc…

Ema barak sai nain ba matenek kona ba Xanana Gusmão nian hanoin, ema barak hatene demais konta Xanana Gusmão nian aat ate Xanana Gusmão rasik la hatene saida mak ema seluk hatene kona ninian hanoin rasik.

Iha tempu difisil iha ema uitoan mak iha korajen defende Xanana Gusmão iha biban nebee ema barak kontra Xanana Gusmão nia politika no desizoins balun, ema barak nega Xanana Gusmão nian sakrifisiu durante tinan barak, barak deseja asisti lalais ninian funeral maibe Maromak, Rai Lulik ho Matebian sira karik rona no fiar liu Xanana Gusmão, halo nia sai forte no kbiit liu tan.

Situasaun pior liu tan bainhira iha 2012 mosu Bloku Koligasaun forma V Governo Constitucional  forma husi CNRT, PD ho FM. Xanana Gusmão hanesan fali satanaz hasoru ema sala laek sira lori Jesus Cristo nian cruz…

Xanana Gusmão karik hakarak kargu no riku, la presiza lakon tempu halo funu, lakon familia, lakon nian maluk barak nian vida iha funu-maluk nian liman, fo an ba terus too 1999. Se Xanana Gusmão hakarak Funu iha Timor kontra okupasaun Indonesia remata iha enkontru LARIGUTU, no Xanana Gusmão bele sai jeneral fitun hat no bele sai prezidente autonomia espesial Timor-Timur seumur hidup…impossível? Lae !

Lae, Xanana Gusmão LAOS ema aat, nia laos beik teen, nia laos naok teen, nia laos karruptor, nia laos bulak hanesan ema barak hanoin, Xanana Gusmão la buka riku, nia la kanteen ba kargu, laos kriminozu…

Xanana Gusmão hakarak realiza ninian mehi durante tinan barak nian laran iha ai-laran too nia sai husi prizaun Cipinang. Tanba nee mak nia hakarak fo an ba rai no povu ida nee, hakarak oferese nian an tomak, enkuantu nia sei bele hodi kontribui ba povu ho rai Timor nian diak !

Nudar ema kriatura Maromak nian, Xanana Gusmão mos la ses husi sala, nia mos iha ninian frakeza maibe ninian Domin ba nian rain no povu Maubere boot liu sasan hotu. Tanba nee mak, nia oferese ninian isin lolon, oferese ninian hanoin no matenek nebee iha, hodi Xanana Gusmão haktuir nian mehi iha Plano Estrategico do Desnevolvimento Nacional – PEDN sai hanesan mata dalan ba Desenvolvimento Nacional iha medio no longo prazu, nudar referensia ho valor boot tebe-tebes ba jerasaun tuir mai.

Reflexaun ida nee unika i exkluzivamente sentimentu pessoal, la iha intensaun atu halo kanek sentimentu ema ruma nian no  nudar ema sala nain la ses husi sala, nunee, hanoin hirak iha leten rezerva espasu ba sala mos.

Obrigado wa’in no desejos Bom Ano de 2015 nakohu ho Dame no Domin, Felicidades no Prosperidades ba Povo Doben Timor-Leste nian !!!
Lisboa, 31 de Dezembro de 2014.

Sidadaun

Victor Tavares

Sem comentários:

Enviar um comentário

Nota: só um membro deste blogue pode publicar um comentário.