Planu Re-estruturasaun Governu: Entre Fenómenu JOKOWI no Nepotizmu Partidáriu

Dr. Abel Pires da Silva, PhD*

Tinan kotuk demokrasia Indonezia tama iha faze interesante no importante ida iha ne’ebe povu Indonezia hili ona Joko Widodo (Jokowi) sai nu’udar ema númeru 1 iha nasaun bo’ot ida ne’e. Povu Indonezia ne’ebé mak keleur tebes ona hein líder foun atu lori mudansa fundamentál mai sira nia nasaun konsege hili duni figura foun ne’ebe mak lahanesan ho líder sira uluk iha istoria Indonezia nian. Jokowi la’os Jenerál iha forsa defeza Indonezia nian, no mos laiha relasaun familia ho eroi bo’ot ruma iha Indonezia. Nia mos laiha relasaun ho familia riku ruma iha Indonezia. Simplesmente, Jokowi ema bai-bain ne’ebe mak hetan konfiansa husi povu Indonezia tanba deit nia serbisu ba povu dezde iha sidade Solo nu’udar Walikota (Prezidenti Cámara Munisipiu) to’o sai Governadór iha Jakarta.

Jokowi hetan konfiansa husi povu tanbá nia dedikasaun ba povu. Dezde iha Solo kedas, nia foka enerjia tomak atu hadi’ak povu nia moris, to’o nia saláriu rasik mos nia lafoti tanba halo kedas doasaun ba ema seluk ne’ebé presiza liu. Ohin loron sai nu’udar Prezidenti mos, Jokowi hanorin nia oan sira atu hamri’ik ho sira nia ain rasik, la goza fasilidade estadu hodi halo riku sira nia an.

Liu tiha eleisaun Prezidensiál, Jokowi komesa hili nia membru governu tuir prosesu ida ne’ebe seluk tebes; Jokowi husu partisipasaun husi públiku atu nomeia naran kandidatu membru governu, Jokowi mos involve instituisaun importante sira hanesan Komisi Pemberantasan Korupsi (KPK) no Komisi Nasional Hak Asasi Manusia (KOMNASHAM) iha prosesu selesaun hodi ta’es sai kandidatu hirak ne’ebe mak involve iha kazu korupsaun ka krime violasaun direitu humanu. Rezultadu husi prosesu selesaun rigorozu ne’e mak hetan kandidatu independenti barak ne’ebe iha kompetensia no do’ok husi kazu korupsaun ka abuzu poder. Prosesu ida ne’e mos konsege taka-dalan ba elite partidu balun ne’ebe maske serbisu maka’as suporta Jokowi durante prosesu eleisaun, maibe labele hetan fatin iha estrutura foun Governu Indonezia tanba komete krime korupsaun ka krime abuzu poder sira seluk. Ida ne’e hatudu momos katak Jokowi brani kontra interese partidu pulítiku sira ne’ebe hakarak deit tau sira nia elite maske elite hirak ne’e involve kazu barak hanesan korupsaun.

Ohin loron, Timor-Leste mos tama iha situasaun ne’ebe mak maizumenus hanesan ho Indonezia; povu Timor iha espetativa boot ba Governu atu lori mudansa mai povu nia moris, mudansa ida ne’ebe mak só bele deit fornese husi líder sira hanesan Jokowi: líder ne’ebe mak hakarak deit atu serbi ba povu nia di’ak no hado’ok an husi korupsaun no krime sira seluk. Líder sira ne’ebé mak prontu ba deklara sira nia riku-soin iha Komisaun Anti Korupsaun ANTES simu pose husi Prezidenti da Repúblika. 

Ita gasta ona osan Billiaun ba Billiaun Dollar Amérikanu; maske iha progresu barak liu-liu iha parte siguransa nian durante tinan 10 resin ita ukun an, maibe progresu dezenvolvimentu sedauk la’o tuir ita hotu nia mehi. Nesesidade baziku sira hanesan bé-mos sei menus tebes, eletrisidade maske kobertura diak tebes ona, maibe infelizmente kualidade sei presiza hadi’ak liu tan, fasilidade públiku seluk hanesan transporte públiku no telekomunikasaun mos sei rungu-ranga hela, no kazu korupsaun mos sei buras ba nafatin.

Iha situasaun hanesan ne’e, fenómenu Jokowi hanorin hela lisaun importante mai ita. Iha planu re-estruturasaun governu ba dala ida ne’e, Primeiru Ministru Xanana Gusmao bele involve mos públiku no instituisaun hirak hanesan Komisaun Anti Korupsaun (KAK) no Sosiedade sivíl atu komesa ta’es kandidatu membru governu foun. Pasu ida ne’e importante hodi bele hili membru governu ne’ebé mak la’os deit iha kapasidade mai be mós iha integridade pesoál atu tau interese povu nian aas liu fali interese pesoál, grupu ka partidu. Liu-hosi pasu ida ne’e mos, públiku sei bele investe fiar liu tan ba kada membru governu foun no to’o ikus bele hetan suporta másimu husi públiku.

Iha formasaun Governu dezde ukun rasik an iha 2002, membru governu sira hili bazeia deit ba mekanizmu partidáriu, no tanba prosesu selesaun ida ne’e taka metin tebes ba públiku, entaun kandidatu membru governu nian depende tebes ba sira nia relasaun ho elite partidu sira, no to’o ikus hamosu nepotizmu no favoritizmu iha partidu nia laran iha prosesu selesaun líder nasionál Timor-Leste. Nepotizmu partidáriu ne’e kontribui mos ba kondisaun ne’ebé Timor-Leste seidauk konsege hamosu líder nasionál alternativu hodi troka líder 1975 sira, no tanba ida ne’e mak, to’o ohin loron ita sei dudu nafatin líder 75 sira ba oin, maske sira infrenta ona limitasaun naturál hanesan idade no saúde.  

*Militante RENETIL, foti Doctor of Philosophy (PhD) iha the Australian National University (ANU), Canberra – Australia. Espesialista iha área Teknolojia Informasaun no Komunikasaun (ICT) hodi suporta prosesu dezenvolvimentu país sub-dezenvolvidu sira.

Kontatu email: abel.dasilva@anu.edu.au