Deklarasaun husi Deputado PD, João Adriano, iha OGE 2015

"Ohin loron ema barak lamenta kona-ba kualidade serbisu nebe presta husi funsionariu publiku sira. Faktor ida husi faktor barak nebe kontribui ba kualidade prestasaun serbisu diak servidor estado sira nian ida mak prosperidade servidor sira ne’e nian rasik. Ohin loron ita hasoru inflasaun baixa. Inflasaun ida ne’e afekta mos ba poder de kompra funsionariu sira nian. Sasan nia folin sa’e maibe la iha mudansa ruma ba salariu funsionariu sira nian.

Desde 2008 to’o ohin loron la iha alterasaun ruma ba tabela remunerasaun ba funsionariu publiku sira nian. La iha aumento ba salariu, halu funsionariu publiku sira lakon 40% poder de kompra husi sira nia salariu. Agora kabe ba governu oinsa mak atu hasae salariu funsionariu publiku sira nian tuir nivel vensimentu sira nebe la hanesan nebe iha.

Hau hakarak fo hanoin hikas mos katak iha diskusaun OGE 2014 governo promote ona atu halu diagnostiku ka estudu ida konaba situasaun Funsaun Publiku nian no possibilidade ba aumento salario funsionarius publikus sira nian.

Hau hakarak hetan esplikasaun:

1.     Oinsa rezultadu husi diagnostiku ka estudo ne’e? Estudo ne’e konklui tiha ona ka seidauk?

2.      Bainhira los mak atu aumenta salariu ba funsionariu publiku sira hodi hasa’e hikas sira nia poder de kompra no hadia kualidade serbisu funsionariu publiku sira nian?"