Deklarasaun husi Deputada Olinda Morais, Bancada Parlamentar PD Nian

Olinda Morasi, PD

"Verenaru sira libertasaun nasional hetan priviléjiu boot ida husi Estadu. Lá'os deit hetan sertifikadu nebe nudar rekunhesimentu ba sira nia papel iha luta libertasaun maibe hetan mos subsidiu fula-fulan, liuliu sira nebe tama iha kategoria dedikasaun eksklusivu. Tinan-tinan guvernu tau osan hamutuk tokon , foti husi rekursu petroliferu nebe limitadu hodi selu veterano sira. Priviléjiu ne'e estende to'o mos iha projetu sira infraestrutura nian, nebe iha parte ida diak, maibe iha parte seluk hamosu mos insatisfasaun sosial ba sidadaun sira nebe hamutuk rihun, nebe barak ka uituan tuir mos kontribui ba luta libertasaun Timor-Leste nian, nebe ohin loron sei moris iha kiak nia laran.

Tuir Livru 4 OGE/2014 nian, osan nebe tau ba transferensia pessoal ba veteranu sira hamutuk tokon $79. Husi osan ne'e, ohin loron, Estadu gasta ona tokon $56. Iha tinan 2013, osan nebe alokadu no gasta ba veteranu sira hamutuk tokon $73, no ba tinan 2015 Governu aloka osan hamutuk tokon $130.5, aumentu duplu kompra ho orsamentu tinan kotuk nian. Laiha explikasaun ruma iha dokumentu orsamental kona ba aumentu ida ne'e. Hau hakarak husu Guvernu kona ba aumentu ida ne'e. Hau hakarak husu Guvernu atu explika buat hirak tuir mai ne'e:

1- Tansa mak mosu aumentu ba transferênsia pessoal ba veteranu sira ba OGE/2015 ne'e sa'e dala rua boot liu OGE/2013 ho 2014 nian?

2 - Ita hotu hatene subsidiu nebe tau ba veteranu sira mai husi respeitas rekursu petrolíferu nian. Ita hotu mos hatene katak rekursu petrolíferu ne'e to'o loron ida sei hotu. Bainhara rekursu petrolíferu ne'e hotu ona, guvernu ba foti osan iha nebe hodi garante sustentabilidade moris veteranu sira nian?

Atu ultrapasa problema hirak ne'e no garante sustentabilidade orsamentu Estadu nian hodi garante nafatin moris veteranu sira nian, hau husu Governu atu hahuu ona prosesu halo revizaun ba lei pensaun veteranu sira. Tenki hahuu halo estudus oinsa dezenvolve osan nebe veteranu sira simu, hanesan liu husi kooperativas ka kreditu sira.

Tenke jere osan veteranu sira nian iha forma seluk, labele ida-diak simu no gasta kedas. Buka dezenvolve liu husi kooperativas ka Banku ruma, depois husi ne'e mak sira manan. Ne'e mos hanesan dalan ida hodi fo empregu ba veteranu sira rasik. Tamba se la jere ho didiak no loron ruma osan laiha ona hodi fo empregu ba veteranu sira rasik. Tamba karik lá jere ho didiak no loron ruma osan laiha ona hodi aloka ba veteranu sira mak sei hamosu fali problema sosial nebe susar atu rezolve".