Bainhira futebol sai hanesan buat ida ne’ebe importante liu

    * Nelson Bernardo Quintao


Kinta kalan (12/6), iha oras telejornal TVTL, S.E. Sekretáriu Estadu Komunikasaun Sosial hetan previléjiu koalia iha sesaun “Espesial Entrevista”, iha oráriu nobre televizaun nian ne’e. Tamba sa hau dehan sesaun “Espesial Entrevista”, tamba aleinde laiha entrevista (directa/live) barak mak TVTL halo durante telejornal, asuntu barak ne’ebé importante liu fali futeból mos, TVTL lafoti atu sai hanesan asuntu importante ida, ne’ebé merese hetan tempu espesial iha telejornal.

Iha kalan ne’eba, S.E. Sekretáriu Estadu Komunikasaun Sosial, koalia ho ispíritu ida hanesan ahi han rai (semangat berapi-api), hanesan los foin konkista tiha buat boot ida. Karik ba nia, konsege fo sai abertura Kopa Mundial no jogos sira iha kampeonatu ne’e, hanesan susesu ida ne’ebé boot. Vitória boot ida. La hatene loos, karik ida ne’e mak prioridade boot liu hosi ninia mandatu hanesan Sekretáriu Estadu.  Tan ne’e, merese hetan destake iha telejornal, liu hosi “Entrevista Espesial” ba nia. Karik ida ne’e mak sai prioridade liu ba nia, tan ne’e mak nia presiza tun diretamente, hodi interven iha servisu TVTL nian.

Hanesan sidadaun ida, hau sente revoltadu, bainhira hare Sekretariu Estadu ida ne’ebe preokupa liu ho buat sira hanesan futeból duke buat sira ne’ebé esensial liu, hanesan oinsa hala’o jornalismu ida ne’ebé sériu, ho rigor no ho kualidade. Hau sente revoltadu tamba hosi tinan ba tinan ita nia Televizaun Publika sai hanesan meios ida atu halo beik ema iha massa (pembodohan massa), liu hosi kontíudus sira ne’ebé halo tuir ema ida-ida nia hakarak, sein tratamentu ida ho rigor, no la iha interese atu eduka no fo informasaun loloos ba públiku.  S.E. Sekretariu Estadu nunka halo tok intervensaun ida ho ispíritu ida ahi han rai ne’e, mas Sua Exenlénsia preokupa liu fali buat seluk ne’ebé nein seker sai hanesan area ida ne’ebé Sua Exelénsia nia Sekretariadu nia responsabilidade, hanesan futebol.

Entaun saida mak hau hakarak husu liu hosi hakerek badak ida ne’e?  S.E. Sekretariu Estadu. Durante ne’e hau hare iha TVTL sira hakerek liafuan “Aviso” ne’e (sei iha tan liafuan barak tan) ho oin tolu: “Aviso”; “Avisu” no “ Avizu”.  Hau hakarak husu ba TVTL, liu hosi ita boot Sua Exelénsia, entre liafuan tolu iha leten ne’e, ida ne’ebe mak los?  Nutísia rodapé ne’ebé sai durante telejornal, tansa mak kontíudu sira ne’e, sai de’it kona-ba desportu? Tansa mak nutísia hosi area seluk la sai? Tansa mak lahakerek nútisia sira kona-ba saida mak akontese iha Distritu, Sub-distritu, Suku , Aldeia ka asuntu hosi area sira seluk, iha Timor laran? Tansa mak rodapé ne’e hakerek loos deit kona-ba futeból. Tansa mak entrevista sira ne’ebé  halo ho lian seluk hanesan inglês ka Bahasa Indonesia,  ne’ebé sai notísia iha telejornal nian, laiha tradusaun ka subtitle iha tétun? Tansa mak iha notísia iha telejornal se ministeriu ida, grupu ka organizasaun balu,  mak halo nia atividades, nia mak sai datoluk, dahaat, até domina tiha de’it  fali telejornal. Tansa mak tétun ne’ebé uza iha ita nia media sira oioin loos ne’e? Sua Exelénsia, Tétun ne’ebé ita nia oan, ita nia alin sira aprende iha eskola, la hanesan ho tétun barak ne’ebé hakerek iha ita nia media barak. Ida ne’e ita hatene ka lae?

Tansa mak S.E. Sekretariu Estadu la tau matan ba buat sira hanesan ne’e? Tansa mak S.E. Sekretariu Estadu lakoalia ho ispíritu ida ahi han rai ne’e, atu hadia buat sira ne’ebé to’o agora ne’e àt ba bebeik. To’o bainhira tan, mak ita tenki gasta bebeik osan hodi fo formasaun no halo semináriu barbarak, sein hetan benefísiu ida hanesan ho osan ne’ebé ita gasta tinan-tinan, ba halo buat sira ne’e?

S.E. Sekretáriu Estadu, se ita bele halo intervensaun atu TVTL bele transmiti Kampeonatu Mundial iha Brazil, tansa mak ita la bele halo netik intervensaun ruma atu ita nia unika Televizaun Publika ne’e, bele halo jornalismu ida ne’ebé ho rigor no ho responsabilidade.

karik sebele fo hanoin oan ruma,  Sua Exelénsia, tuir atan hau nia hare, iha TVTL no media barak ne’ebé eziste iha ita rain, sira nia problema lolos mak iha Jestaun.  Ita lahatene, halo oinsa atu kontrola kontiudu hosi notísia sira ne’ebé mak ita produs. Ita lahatene oinsa atu jere notísia ida, sai ho rigor.  Tan saida? Tamba maioria hosi ita nia media sira laiha  “News Style guide (ezemplu: BBC)/ News code of Ethics and Pratices ”,  ka ho português bolu, Livro de Estilo.  

Livro de Estilo aleinde hanesan normas “uma laran” media ida nian, nia objetivu prinsipal mak atu promove uniformizasaun gráfika no ortografia hosi publikasaun, media ida nian.

Livro de Estilo bele indika ba jornalista sira, atitudes saida mak nia presiza foti iha situasaun ida konkreta iha nia asaun sira. Purezemplu: Se iha media A, iha sira nia livro de Estilo, liafuan “aviso” ne’e hakerek  “AVISO” (remata ho “so”), entaun iha publikasaun hotu media A nian ne’e, jornalista sira tenki hakarek “aviso” hanesan hakerek iha Livro de estilo nia laran.

Nune’e mos iha parte grafísmu (graphic), tenki mantein nafatin istílu ne’ebé, purezemplu, Jornais ka estasaun tv ida adopta ona, Ker iha forma, kores ka iha movimentasaun gráfika sira (ezemplu iha Tv). La’os iha programa, ho naran hanesan (iha tv), domingu ida mosu ho grafismu ida, domingu seluk mai, mosu ho grafismu seluk fali. La konsistente. 

Portantu, Livro de Istilo ne’e hanesan solusaun koreta, entre solusaun sira seluk, ne’ebé fo hanoin, hatudu dalan ba jornalista sira, oinsa, purezemplu, atu hakerek ema nia títulu akadémiku, naran ema nia funsaun, númerais, siglas, akrónimus, abreviaturas, no selu-seluk tan, ho loloos, diak no konsistente.  “Aspetu material hosi jornal ka tv (grafísmu/graphic), refleta maneira hanoin hosi nia kriadór. Se la konsistente, leitores ka telespetadores mos sei hanoin, jornal ka tv ne’e mos hanesan”  (Frank Ahegrens).

Ho koalia kona-ba Livro de Estilo, hanesan temi iha letan, atan hau hakarak sujere de’it, karik bainhira fó lisensa atu hari’i emprensa media ida, Livro de Estilo, bele sai mos hanesan rekezitu importante, ne’ebé futuru empreza media sira tenki iha. Ida ne’e la’os atu difikulta ka atu kontrola fali media, mas pelu kontrariu, serve hanesan meiu ida ne’ebé bele garante no asegura kualidade informasaun hosi media sira, liu-liu atu asegura sidadaun hotu-hotu nia direitu atu hetan informasaun ida ne’ebé loloos  (kredível) kona-ba lala’ok nasaun no mundu nian.  Ho nune´e, sidadaun hotu, bele hatene kona-ba realidade atual no bazeia ba informasaun sira ne’ebé loloos ne’e, bele ajuda sidadaun sira, foti desizaun, hodi hala’o sira nia moris hanesan sidadaun nasaun no mundu nian, ne’ebé kadavez mais dezenvolvidu i kompetitivu.

Atu ramata, hakerek badak ida ne’e lamai ho intensaun atu dehan àt, muito menos, hanesan atake pesóal, ba Sua Exelénsia Sekretariu Estadu Komunikasaun Sosial, mas ida ne’e  meramente, opiniaun pesóal, hosi sidadaun komun ida, ne’ebé mai, bazeia ba hanoin ida katak, se karik nasaun ne’e lala’o ba oin, ita nia pasividade hanesan sidadaun mos kontribui ba buat ne’e.  Portantu, ida ne’e ba diak ita hotu-hotu nia media iha Timor Leste!

*Autor Hela Becora, Dili, artigu ne'e responsabilidade exklusivu autor nian, kontaktu email: nbquintao@gmail.com!