VISAO MISAO OBJECTIVO HAKSESUK BOLA FH KKN HOME FH LPV ARTIGOS FH MUZIKA LIA MENON FH RESPONDE

20130822

Subsidiu Governu Ba Instituisaun Ensinu Superior Privadu Timor-Leste

SUBSIDIU GOVERNU BA INSTITUISAUN ENSINU SUPERIOR PRIVADU TIMOR-LESTE

* Husi Estanislau S. Saldanha, Staf Hanorin DIT

Governu hahu fo subsidiu ba instituisaun ensinu superior privadu Timor-Leste iha tinan 2011, no tinan-tinan kuantidade subsidiu nee sa’e. Tinan 2013, subsidiu governu aloka hodi kobre area boot tolu: (1). Formasaun lian Portugues ba dosenti sira. (2). Formasaun kontinuada ka kapasitasaun kualidade dosenti, ho (3). Fo bolsa estudu ba estudante sira nebee kapasidade intelektual diak, maibe husi familia kiak ekonomikamente. Infelismente la iha alokasaun osan ba formasaun Lian Tetun ho fasilidade hanorin.

Subsidiu governu ba instituisaun ensinu superior privadu diak tanba razaun boot tolu: (1). Tulun ensinu superior privadu bele hasae kualidade ensinu, formasaun, ho peskiza. (2). Rekuinese papel importante instituisaun ensinu superior privadu iha prosesu dezenvolvimentu rekursu umanu, ho halo kreatividade ho inovasaun via peskiza ho estudu oioin hodi tulun dezenvolvimentu nasional hodi muda povu nia moris ba diak. (3). Posibiliza asesu fair ba estudante sira hodi hetan edukasaun ida diak ho kualidade. Tanba universidade estatal (UNTL) iha kapasidade limitadu hodi abzorve demanda boot husi output eskola sekundariu sira nebee hakarak kontinua estudu.

Maske programa subsidiu ba instituisaun ensinu superior nee diak, maibe importante tebes ba Governu via Ministeriu Edukasaun halo kriteria ida diak, klaru ho transparenti konaba subsidiu instituisaun ensinu superior privadu sira iha Timor-Leste. Nunee bele asegura "fairness", tulun eleva kualidade, evita favoretismu, manipulasaun dadus ho korupsaun. Nunee mos subsidiu nee governu bele uza hanesan instrumentu ida hodi motiva ho kontrola instituisaun ensinu superior privadu hodi servisu diak, tane aas kualidade ho boa governasaun. Mos evita ema hodi loke instituisaun ensinu superior, kursu, simu estudante bar-barak (no sakrifika kualidade) hodi buka subsidiu osan boot husi governu nee.

Nunee kriteria subsidiu ba instituisaun ensinu superior privadu la bele hare deit husi numeru estudante, maibe hare mos husi kursu ho area prioridade nebee governu ho estadu presiza, no valor akreditasaun nebee instituisaun ensinu superior sira hetan. Ho nunee mak bele estimula ho posibiliza kompetisaun diak ho saudavel entre instituisaunensinu superior sira hodi oferese kursu ho servis nebee diak, kualidade, efetivu ho relevante tuir ezizensia Timor-Leste nian. Nunee mos posibiliza instituisaun loke kursu ho kualidade tuir demande merkadu servisu, simu estudante tuir sira nia kapasidade rekursu hanorin no evita inflasaun lisensiadu (inflasi sarjana) nebee bele hamosu "ema matenek barak dezempregu" (white collar unemployed workers), ema sarjana barak ho kuinesimentu ho abilidade kiik, la tulun produtividade servisu no la iha kompetividade iha merkadu servisu. Nunee bele sai dezastre boot ba nasaun iha loron ikus.

Governu tenki iha mekanismu diak hodi halo auditing ba numeru estudante ativu instituisaun ensinu superior privadu tuir kursu ho fatin nebee instituisaun ensinu superior nee hetan lisensa. Por exemplu institituisaun ensinu superior ida tenki hatama naran estudante ativu, fatin eskola, no resivu original estudante sira selu osan eskola iha banku. Atu nunee bele evita posibilidade manipulasaun data estudante nebee produs husi instituisaun ensinu superior tanba deit sira hakarak hetan subsidiu boot husi governu. Bainhira governu iha mekanismu diak ho rigirozu hodi audit numeru estudante laos deit evita manipulasaun data estudante, maibe bele mos optimiza uza rekursu orsamentu estadu.

Governu mos presiza halo mata dalang katak osan nee uza no jere duni husi universidade hodi promove kualidade, laos jere fali husi fundasaun ba fali atividade nebee la relevante hodi eleva kualidade ensinu superior iha Timor-Leste.*

* Husi Estanislau S. Saldanha, Staf Hanorin DIT
SUBSIDIU GOVERNU BA INSTITUISAUN ENSINU SUPERIOR PRIVADU TIMOR-LESTE

Sem comentários:

Enviar um comentário

Nota: só um membro deste blogue pode publicar um comentário.