VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

sexta-feira, 14 de junho de 2013

VPM Fernando La Sama de Araujo Saude Diak, Ema Balun Soe Isu Katak Kondisaun Saude Pior

VPM Fernando Lasama Araujo
Dili, Forum Haksesuk (FH). Vice Primeiro Ministro (VPM) Fernando La Sama de Araujo ninia Saúde diak tuir relatoriu husi Medikus sira iha Hospital Mount Elizabeth, Singapura. Informasaun ne’e ható husi Xefi Gabinete VPM Fernando La Sama de Araujo nian liu husi SMS ne’ebe FH mos hetan asessu. Tuir mai cita sms ne’ebe ható husi Marcelino Magno, ”Semana liu ba Doutor sira hosi Mount Elizabeth, hasai be hosi VPM La Sama nia pulmao. Ne’ebe nia dada is diak los ona. No agora hela iha Hotel. Segunda mai ba fali Hospital hodi halo fali operasaun troka klep fuan nian ho tissue ka orgaun ne’ebe hanesan ho kondisaun isin nian. Maibe ne’e, tuir mediku sira, nia risku ladun boot. VPM nia kondisaun atual diak hela no lao ba mai hela”. Informasaun ne’e simu husi no. telefone +670-77230092 (rooming), tuku: 17:16 HTL!.

Ema balun hanoin aát hodi soe isu katak kondisaun Saúde ladiak, hodi espaila iha Timor-Leste laran tomak katak kondisaun Saúde Vice PM Fernando La Sama de Araujo iha estadiun ne’ebe pior liu ona. Romores ne’e halo preokupasaun bot ba sira ne’ebe hanoin no laran diak ba La Sama nudar lider ida, detentor ba kargu estadu no mos ativista ida ne’ebe kontribui no participa ba funu ba Ukun Rasik An, hahu husi harii RENETIL (Resistencia Nacional dos Estudantes de Timor-Leste ) iha tinan 1988 no ikus envolve iha asaun ka demonstrasaun barak mak dirije direta no indiretamente husi La Sama kontra okupasuan Indonesia iha tempo okupasaun. La Sama mos simu kastigu husi Tribunal Indonesia tanba kondena nia ho tinan 7 iha kadeia Cipinang.

Tuir informasaun ne’ebe mak FH rekoila husi estudantes sira iha UNTL no UNPAZ konaba rumores ka isu konaba VPM La Sama ninia saude katak: ”iha ema balun la gosta La Sama, fabrika isu ka rumores tanba la gosta La Sama ninia presensa no kargu ne’ebe hetan”, defende Casimiro Lopez, estudante Faculdade Ekonomia UNTL ba FH iha Dili. Hatutan Casimiro Lopez, ”La Sama ninia kareira politika sae, nia mai husi okos ka povu nian oan, neduni ema barak ne’ebe iha ambisaun klaru la gosta hodi fabrika informasaun falsu ho intensaun aát”. Jacinta Fernandes, estudante Fakuldade Direito husi UNPAZ, katak,” iha grupos balun ne’ebe buka atu trava La Sama ninia karier no kompete secara sehat iha palku demokrasia labele, neduni buka soe isu no rumores”. Hatutan Jacinta Fernandes, ”Isu no rumores intensaun ladiak no aát, ema sira nebe fabrika ne’e ita klasifika laran aát no metan”.

Luciano das Dores, Estudante Fakuldade Agrikultura UNTL haktuir katak, ”iha grupos balun mak oras ne’e interpreta ba era post-Lideransa katuas sira nian hanesan Xanana, Alkatiri, Ramos Horta cs, nia preokupasuan mak ne’e, lider husi jerasaun foun ne’ebe mak sae neneik maibe despempena funsaun nudar entidade estadu nian ida mos mak La Sama”. Hatutan Luciano das Dores,” natural los, grupos sira hanesan ne’e, buka sobu no hamos dalan hodi atinji ba objetivu ida ne’ebe trasa ona, tanba sira konsidera La Sama nudar potensial lider husi jerasaun foun ne’ebe mai husi povu nia oan”.

Tuir antigos colegas Fernando La Sama de Araujo nian iha eskola SMP no SMA 1 Dili, ne’ebe lakohi hateten naran, katak, ”uluk ami SMA 1 Dili, Nia (La Sama) ema ne’ebe tama eskola buka tur iha kotuk tanba tauk mestre ka profesores sira bolu ba oin”. Argumenta La Sama nia colega SMA 1 Dili, Becora ne’e katak, ”La Sama produtus husi procesu ne’e rasik mak lori nia ba sai nudar lideransa, ninia eskola mak procesu luta, lideransa ba organizasaun estudantes nian bot hanesan Renetil, organiza asaun oi-oin kontra okupasaun estranjeiru no ikus selu ho tama ba kadeia Cipinang, Jakarta, Indonesia”.

Fernando La Sama de Araujo, nudar fundador ba organizasaun RENETIL, fundador no Prezidente Partido Democratico (PD). Okupa kargus publiku ka estadu hanesan Prezidente Parlamento Nacional (2007-2012), Vice Primeiro Ministro iha V Governo Constitucional.

FHDili

Sem comentários:

Enviar um comentário

Nota: só um membro deste blogue pode publicar um comentário.