Intervensaun Vise-Primeiru Ministru iha Abertura Reuniaun dahuluk kona-ba Asaun Konjunta ba Edukasaun iha Timor-Leste -ACETL

Intervensaun Vise-Primeiru Ministru 

iha Abertura Reuniaun dahuluk kona-ba 

Asaun Konjunta ba Edukasaun iha Timor-Leste -ACETL 

Exelénsia Sr. Prezidente Repúblika ho Sra. Primeira Dama,

Exelénsia Sr. Prezidente Parlamentu,

Reverendísimus Amo Bispu Díli, Baucau no Maliana,

Prezidente Komisaun F Parlamentu Nasionál,

Distintus Deputados sira,

Kolega Ministru, Vise-Ministru no Sekretáriu Estadu sira,

Magnífiku Reitór sira-ne’ebé marka prezensa iha ne’e,

Sr. Prezidente Komisaun Funsaun Públika,

Sr. Komisáriu Komisaun Antikorrupsaun,

Sr. Provedór dus-Direitus Umanus no Justisa,

Sr. Inspetór Jerál du-Estadu,

Sr. Membru sira hosi Korpu Diplomátiku nian,

Sr. Reprezentante sira hosi Organizmu Kooperasaun bilaterál no multilaterál nian,

Reprezentante husi Komunidade Protestante no Munsulmana nian,

Sr. Prezidente Sindikatu Profesór nian,

Señóras/res Diretór sira no funsionáriu Ministériu Edukasaun nian,

Señóras/res Diretór sira hosi Eskola Bázika no Sekundária nian,

Distintus konvidadus sira,

Ohin Ministériu Edukasaun hahú hala’o Diálogu ba dala-uluk kona-ba “fahe esperiénsia atu hadia kualidade edukasaun no mos estabelese “Grupu Asaun Konjunta ba Edukasaun” atu hakbiit ema hotu nia responsabilidade hodi senti katak edukasaun hanesan asuntu ida ema hotu nian.

Iha Planu Estratéjiku Nasionál fo-sai mos kona-ba ita-nia vizaun ba edukasaun maka “Ema hotu nia oan iha direitu atu bá eskola no simu edukasaun ho kualidade, ne’ebé hetan koñesimentu ho kualifikasaun sira-ne’ebé bele permite sira moris saudavel no produtiva hodi bele partisipa ativamente ba kontribuisan prosesu dezenvolvimentu nasionál”.

Inisiativa sorumutu ida-ne’e, marka tan pasu ida ne’ebé importante ba ita-nia istória kona-ba reforma iha setór Edukasaun, no bele hadia setór edukasaun sai diak liutan iha futuru.

Dezenvolvimentu iha Setór Edukasaun sai hanesan xave importante ba dezenvolvimentu rekursus umanus, liuliu ba futura jerasaun foun nian no mos bele garante sustentabilidade ita-nia dezenvolvimentu iha área oioin.

Señora no Señór sira hotu mak hau respeita,

Ita-nia setór edukasaun sei enfrenta dezafiu barak ne’ebé presiza ita hotu nia tulun no esforsu hodi hadia kualidade setór ne’e. Dezafiu sira-ne’ebé ita enfrenta mak hanesan:

• Kualidade hanorin ne’ebé seidauk diak;
• kurríkulu ne’ebé seidauk implementa ho diak liu-liu iha nível ensinu baziku no sekundariu. Iha nível ensinu superior seidauk iha kurikulu ida padronizadu no espesifiku ba ita-nia País;
• labarik sira-ne’ebé “drop out” no repete eskola ho persentajem ne’ebé aas tebes , hanesan ezemplu, kuaze %50 husi alunu sira-ne’ebé remata sira-nia ensinu báziku labele kontinua ba ensinu sekundáriu;
• Kondisaun fízika eskola nian ne’ebé ladún diak no la-favorese ba hala’o prosesu ensinu aprendizajen;
• Falta fasilidades hanesan biblioteka, laboratóriu no livrus hodi suporta prosesu aprendijazen;
• Susar atu hetan transporte ba labarik sira-ne’ebé hela do’ok husi eskola, liuliu ba sira-ne’ebé hela iha área rurál;
• Suporta inan-aman sira liu husi “Associação dos Pais” ne’ebé sei mukit tebes;
• Jestaun eskola ne’ebé seidauk diak atu jere konsesoens públikas no merenda eskolár ba nutrisaun labarik sira nian ne’ebe di’ak.
• kestaun rekursus umanus iha parte profesór sira ne’ebé seidauk halekar iha distritu tomak no presiza kontinua fó formasaun ba profesór sira; Formasaun professor sira la’os atu responde deit ba fraku dominiu língua portuguesa maibe kapasita mos sira iha kompetensia seluk hanesan kompetensia pedagójika, kompetensia téknika sientífika e kompetensia etika professional. La’os ne’e de’it, iha mos nesessidade atu adapta ita nia korpu dosente sira ba mudansas sosiais, kulturais n teknolojika ne’ebe ita bele prevê/hare iha planu rejional no internasional. Konyesimentu sientifiku no pedagójiku ne’ebe dinamiku, ohin loron koloka professores ba dilema ida ke boot: ou sira aktualiza, habelar no “diversifika” sira nia konyesimentu dahuluk, ou sira sei katuas ho sira ne’e rasik.

Ho dezafiu sira seluk ne’ebé kompleksu liu ba Governu, liuliu ba Ministériu Edukasaun maka oinsá atu buka dalan hodi rezolve problema sira ne’ebé ita enfrenta;

Ho inisiativa husi Ministériu Edukasaun nian ne’e, ha’u hakarak husu ema hotu nia partisipasaun másimu no integradu hodi reforsa setór edukasaun, nune’e atu bele haree kona-ba kestaun sira-ne’e, no tu’ur hamutuk hodi tau hamutuk hanoin atu bele hadia kualidade edukasaun ne’ebé ke diak ba ita-nia oan sira-nia futuru, no mos ema hotu nia oan bele iha direitu atu hetan asesu ba edukasaun ne’ebé ho kualidade.

Señora no Señór sira,

Governu sei halo planu hodi ezekuta orsamentu ho didi’ak maibé, depende ba hanoin husi ita hotu nian hodi bele hamosu planu ida-ne’ebé integradu no akomodativu. Ho nune’e ha’u hein katak durante sesaun aprezentasaun kona-ba “esperiénsia no prátika diak” husi reprezentante eskola sira ne’ebé hetan valór aas sei sai hanesan matadalan ba eskola sira seluk atu banati tuir esperiénsia hirak ne’e.

Estabelesimentu Grupu Asaun Konjunta sai hanesan dinámika foun ba Kintu (V) Governu Konstitusionál iha lideransa Ministro Edukasaun hamutuk ho nian vice nain tolu, atu husu ita bot sira nia partisipasaun tomak, hahu husi Organizasaun Sosiadade Sivil, Igreija, Konfisoens Religiozas sira seluk, parseiru doadores no organizasaun Naun Govermentais sira atu bele tau matan ba seitor ida ne’e.

Atu termina, hau hakarak hato’o lia fuan murak nebe hau foti husi lia fuan ingles hanesan tuir mai ne’e: “When we dream Alone it is just a dream, but when we dream together it is down of the reality” katak: Se ita mehi mesak mehi ne’e sei sai mehi deit, maibe waihira ita mehi hamutuk, mak mehi ne’e sei sai realidade”, tamba ne’e hau hakarak mai ita mehi hamutuk no hanoin hamutuk atu bele hadian kualidade ita nia edukasaun atu bele sai forti liu iha futuru liu husi Lisoens aprendizajem no konsensus ho kompromisu liu husi Grupo Asaun Konjunta.

Obrigado wain