Sobre Conoco Philips, Tansa PGR La Defende Governu?

Opini ho Editorial

STL - www.suara-timor-lorosae.com

Populasaun Timor Leste, inklui komunidade internasional sente estranha, haree pozisaun politika Prokuradoria Geral da Republika (PGR) Timor Leste relasiona ho exigensia Kompania Conoco Philips nebee hakarak lori governu Timor Leste ba tribunal. Exigensia Conoco Philips relasiona ho desizaun politika governu ba explorasaun mina iha Tasi Timor (area Timor Gap). Kompania internasional nee sente iha buat balu mak la justu ba projectu explorasaun Timor Gap. Kompania nee hato’o ona ninia keixa ba PGR hodi hasoru governu Timor Leste, ita sente estranha, PGR laos atu defende maibe kontinua haruka ba tribunal. Agora governu hein hela bainhira loos tribunal internasional atu bolu hodi hatan no responsabiliza buat nebee Conoco Philips akuza.

Hatan akuzasaun Conoco Philips, PM Xanana Gusmão ho lian maka’as hatan, governu prontu ona atu ba hatan iha tribunal. Atu hasoru Conoco Philips, katak PM Xanana Gusmao, governu halo ona kontratu advogadu husi Amerika. “Hau hakarak hateten deit katak, husu took ba iha Prokurador Jeral, tanba fo-foun iha kazu 5 nebee ConocoPhillips tau iha tribunal, ohin loron kazu sai too ona kazu hamutuk 28. Hau maka sei ba responde nudar governu. Sira ba tiha ona iha neba maka hau sei ba responde,” hateten PM Xanana liu husi konferensia imprensa iha Aeroportu Dili, bainhira fila hikas husi Nova Iorke, Kinta (4/10).

Pergunta ba ita maka nee. Tansa mak PGR hatudu pozisaun ketak ba kazu nee...!!!. Seolah-olah, PGR laos PGR Timor Leste maibe PGR nasaun seluk mak iha Timor Leste. Ita sente estranha tebes. Premeiru-ves akontese iha mundu. Seidauk akontese iha nasaun seluk, so Timor Leste mak praktika ida nee. Nudar orgaun soberania, apa pun alasannya, PGR tenkiser defende governu Timor Leste, tamba desizaun politika nebee governu determina ba projectu mina Timor, laos tamba interesaun pesoal, parpol, ka grupu, maibe interesaun povu tomak nian. Nudar orgaun soberania, nudar Timor Oan, tuir lolos tenki kaer metin ba prinsipiu refere. Maske nunee ita sei labele dehan, PGR nia pozisaun sala ona. PGR presiza esplika didiak ba publiku tansa ninia pozisaun la defende governu Timor Leste? Ninia razaun saida?.

Ita hein PGR sei esplika para labele hamosu konfuzaun ba pais tomak. Lee husi pozisaun PGR ba kazu boot nee, hamosu diskonfiadu ba publiku katak, pozisaun PGR ba kazu nee, hanesan subar “funu interesaun politika” entre lider nasional. Ita lakohi dehan sese tamba buat nee ema matenek nia politika. Maibe hakarak hato’o deit esperasaun katak, labele lori todan ba povu no futuru nasaun. See nunee, “See deit maka sama povu nia ran uitoan sei la oho, maibe dudu sees tiha,” hateten PM Xanana Gusmao. **