REZIME KAREIRA HO PROMOSAUN STAF AKADEMIKU IHA INSTITUISAUN ENSINU SUPERIOR IHA TIMOR-LESTE

REZIME KAREIRA HO PROMOSAUN STAF AKADEMIKU IHA INSTITUISAUN ENSINU SUPERIOR IHA TIMOR-LESTE

Husi Estanislau S. Saldanha, Staf Akademiku DIT.

Dekretu Lei Rejime Kareira ho Promosaun staf akademiku ensinu superior Timor Leste iha ona. Dekretu lei nee sei sai mos mata dalang ba instituisaun ensinu superior privadu sira. Dekretu lei nee regula konaba kategoria, promosaun ho nivel salarial staf akademiku. Maibe dekretu lei nee la kualia konaba aspeitu operasional konaba oinsa ho kriteria (KUM) ho komisaun nebee sei avalia staf akademiku hodi klasifika sira iha kategoria hirak nebee dekretu lei nee hatoo hanesan:

1. Professor Katedratiku (Full Professor)

2. Professor Asosiadu (Associate Professor)

3. Professor Auxiliar (Junior Professor)

4. Mestre (Lecturer)

5. Mestre Junior (Junior Lecturer)

6. Asistente (Assistant)

Nunee tenki defini KUM ka kreditu kumulativu husi kategoria staf akademiku ida. KUM nee sei determina husi grau akademiku, kuantidade ho kualidade hanorin, peskiza, publikasaun (livru, artigu iha jurnal sientifiku, jurnal popular, proceedings), seminar, workshop. Ida-idak iha nia point (KUM). Husi nee, KUM nebee boot sei mai husi grau akademiku (PhD), publikasaun livru nebee uza internasionalmente, ho artigu nebee publika iha jurnal sientifiku internasional iha nia area rasik. Atividade akademiku seluk mos hetan KUM maibe hetan pontu kiik. Tanba nee, presiza defini lo'los kriteria hodi sai sasukat hodi halo promosaun. Nunee mak bele asegura prosesu nee kredibel, meritu, transparenti ho akuntavel. Bainhira kriteria hodi KUM klaru, staf akademiku bele halo avaliasaun ba nia aan rasik (self-assessment) hodi hatene nia hetan ona KUM hira, no too nivel kategoria nebee ona, antes Komisaun Professorial ida halo evaluasaun ba nian.

Atu halo promosaun kareira akademiku iha Ensinu Superior, Timor Leste presiza harii Komisaun Expertu (Professorial) ida hodi avalia KUM ho kategoriza staf akademiku sira. Nunee bele evita fator gosta ho la gosta (like and dislike) ho mos konflitu interese. Bainhira la iha komisaun independenti, Reitor bele foti aan nudar Professor Katedratiku, karik nia priense ona kriteriu minimu nudar PhD ida. Maibe iha parte seluk, nia la iha publikasaun sientifiku. Nunee mos ema la kuinese nian nudar profesor iha area espesifiku ida. Degradasaun kualidade ensinu superior ida mosu bainhira rekrutamentu ho promosaun staf akademiku la tuir dalang ho meritu akademiku.

KUM ho Komisaun Independenti nee tenki Ministeriu Edukasaun ho instituisaun ensinu superior sira tenki tuur hamutuk hodi harii no defini nia kriteria. Depois KUM ho Komisaun nee sei aplika ho halo servisu uniforma iha instituisaun ensinu superior hotu iha Timor-Leste. Nunee ita bele uniforma mos metodu rekrutamentu, promosaun ho kualidade staf akademiku instituisaun ensinu superior iha TL.

Instituisaun ensinu superior ida-idak la bele halo mesak ninian KUM ka kreditu kumulativu, tanba kagoria professorial tenki hetan rekuinesimentu husi governu, nunee staf akademiku nee bele transfere ba universidade seluk mos ninian kategoria akademiku nee bele akreditadu. Nunee mos staf akademiku nee transfere ba universidade sira iha rai liur.

Maske nunee iha faze tranzisaun, instituisaun ensinu superior sira bele harii mesak komisaun ida nebee kompostu husi professor katedratiku husi universidade rekuinesidu husi Australia, Europa, Indonesia, Malaysia ou rai seluk hodi halo avaliasaun ba promosaun staf akademiku tuir rezime kareira nebee promulga ona. Nunee ita hahu dadaun implementa lei rezime kareira ho promosaun hanesan belun sira husi staf akademiku UNTL ezizi atu halao. Sein professor internasiomal husi universidade rekuinesidu, instituisaun ensinu superior sira iha Timor-Leste la bele halo avaliasaun hodi halo promosaun, liu-liu ba sira nebee atu ba professor katedratiku, asosiadu ho auxiliar. Tanba Timor-Leste seidauk iha Professor Katedratiku nebee akreditadu husi governu no instituisaun akademiku akreditadu rai liur.

Se lae, ita kualia kualidade ensinu superior Timor Leste iha nivel rekuinesimentu internasional, maibe performa akademiku staf akademiku la too nivel nee. Tanba ita uza sasukat nebee kiik, no promosaun nee mos bazeia deit ba fator gosta ho la gosta, konflitu interese, nunee ita sakrifika deit kualidade ensinu superior Timor Leste. Tanba nee, instituisaun ensinu superior iha Timor-Leste nebee eduka futuru lider nebee diak, lori ema atu sai mata dalang, masin ho naroman ba sosiedade ida ba progresu via kreatividade ho inovasaun siensia ho teknolojia, tenki mos honestu, meritu, transparenti ho akuntavel iha nia prosesu promosaun staf akademiku.*