VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

segunda-feira, 3 de setembro de 2012

RELASAUN DIREITUS UMANUS HO DEMOKRASIA NO DEZENVOLVIMENTU


Emilio F. Quintas

Antes hakerek nain atu koalia kona-ba relasaun entre direitus umanus hó demokrasia no dezenvolvimentu,  ita  presiza iha komprensaun oituan ka nato’on  kona-ba sentidu baziku hósi  konseitu tolu ne’e. Direitus  Umanus ne’e katak direitu ne’ebé nu’udar humanu iha, tanba humanu hanesan kriatura hósi aman maromak ne’ebé ninia pozisaun a’as liu kompara hó kriatura seluk iha mundu. Tanba direitus umanus ne’e iha no belit ba kada umanu ida-idak, no  direitus umanus ne’e ninia karakteristika universal, ne’e katak komporta ka fale iha ne’ebé deit no ba se deit labele elimina. Tanba direitu ne’e, humanu presija atu proteze nia an, nune’e mós sai hanesan baze moral ba humanu atu halo relasaun ka komunikasaun entre humanu iha mundu. Hanesan mós buat ne’ebé  matenek nain hó naran “ Jack Donnelly” hakerek katak (Funsaun Prinsipal Direitus Umanus mak atu hadia Relasaun Sosial).

Matenek nain ida hósi Inglatera hó ninia livru “Two Treatises of Government “  dehan katak humanu iha kondisaun natural iha  nanis ona liberdade no igualdade ne’ebé perfeitu ka kompletu. Tanba kada humanu iha nanis direitu natural maka  hanesan direitu liberdade no direitu igualdade ne’ebé regula iha direitu natural par atu iha protesaun ba vida individu iha mundu. Saida maka regula iha konseitu direitus umanus, tuir dokumentus internasional ne’ebé  konesidu “ The Universal of Human Rights ou Deklarasaun Universal Direitus Umanus (DUDU). Deklarasaun ne’e  simu iha  Assembleia Geral Uno iha tinan 1948, ne’e hó 30 artigus ne’ebé kontein direitu oin-oin, ne’ebé ita  bele kategoriza ba direitu pesoal, direitu legal, direitu sivíl, direitu sub-sistensi, direitu ekonomia, direitu social no direitu ultura.

Direitu pesoal ne’e katak, garantia minimu ne’ebé presiza iha atu ba nesesidade fiziku umanu hanesan direitu moris (art. 3 DUDU), protesaun hósi diskriminasaun bazeia ba seksu, ko’or, rasa, rilizaun no lingua ka ideolojia politika. ( art. 2 DUDU), Proibisaun ba eskradivaun (art. 4 DUDU).  Protesaun  kontra asaun violensia hanesan turtura no punisaun ne’ebé haraik dignidade umanu no asaun ne’ebé la umanu. (art.5 DUDU), Igualdade iha lei nia oin. ( art. 6 no 7 DUDU), Ema hótu-hótu iha  direitu ba nasionalidade ida, no laiha ema ida béle hasai arbiru deit ninia nasionalidade no iha direitu atu muda ninia nasionalidade (art. 15 DUDU).

Direitu legal ne’e katak, protesaun ba ema ruma ne’ebé iha ligasaun hó sistema lei iha nasaun ida. Iha direitu legal ne’e, inklui labele halo kapturasaun no detensaun arbiru ba ema, sem iha mandatu hósi juiz tribunal. (art.9 DUDU), iha julgamentu ne’ebé justo (art.10 DUDU), tenke konsidera ema seidauk iha sala, bainhira seidauk iha  evidensia ne’ebé bele prova katak nia sala. Direitu politiku mak hanesan direitus ne’ebé presiza atu haforsa sidadaun hótu nian partisipasaun iha kontrolu ba estadu. Mak hanesan direitu atu involeve direita  iha prosesu governasaun ka liu hósi  ninia reprezentasaun, direitu ba oportunidade ne’ebé hanesan atu hetan atendimentu publiku iha ninia nasaun, ne’e katak vontade hósi povu hanesan fundamentu baziku ba poder governasaun liu hósi  eleisaun geral ne’ebé mo’os no hala’o regular hó sekreta no livre (art.21 DUDU). Direitus subsistensi katak tenke iha garantia nato’on ba rekursus para suporta vida minimu, mak hanesan direitu atu hetan alimentasaun no atendimentu saude (art.25 DUDU). Direitu ekonomia inklui direitus seguransa social (art. 22 DUDU), Direitu atu hetan servisu, forma sindikatu, iha direitu atu hetan salariu ne’ebé ekilibru hó ninia servisu, salariu ne’ebé justu no dignu ba vida no familia, no mós seguransa social seluk (art.23 DUDU), direitu atu deskansa no kontente ka haksolok, inklui restisaun ba oras servisu no iha direitu ba lisensa no iha subsidiu ba ferias (art. 24 DUDU). Direitu social inklui direitu ba vida privadu ( art. 12 DUDU), direitu ba kazamentu no forma familia no iha direitu ba edukasaun (art. 16, 27 DUDU).

 Sé  hare’e hósi liafuan etimologikamente saida maka demokrasia real  ne’e klaru tebes ne’ebé mai hósi palavra gresia “ Demós “ katak povu no “ krotos “ katak poder. Hó nune’e demokrasia ne’e katak poder hósi povu. Maibé atu realiza demokrasia ka soberania povu ne’e iha pratika politika iha govrnasaun loron-loron, espesialmente liga ba relasaun iha kontestu ekonomia, social no kultura iha estadu ida, to’o agora sei sai asuntu importante ne’ebé ema politiku  no peritu politikus sira debate, tanba implementasaun demokrasia iha estadu idaidak sei lala’o hanesan. Alende ne’e, tanba sa maka defenisaun demokrasia ne’e defisil atu formula detalha, tanba demokrasia ninia karakteristika ne’e dinamiko tebes. Dinamiku tanba iha interpretasaun ne’ebé diferente entre ema matenek nain sira, tanba ne’e maka to’o agora mós sei iha nafatin debates entre nasaun dezenvolvidu sira hó nasaun subdezenvolvidu iha kontestu implementasaun demokrasia ne’e ba vida ekonomia, social  no kultura.

Bazeia ba diferensias hirak ne’ebé sita iha leten, oinsa mós  sosiedade Timor Leste  presija formula ninia vizaun kona-ba demokrasia. Iha ne’e hakerek nain konkorda liu hó ideias hósi Robert A. Dahl,  hanesan prosedura minimu, ne’ebé tenke iha no implementa hó efetivu mak hanesan kondisaun tuir mai ne’e;

v  Liberdade atu hari’i organizasaun no partisipa iha partidu politiku
v  Liberdade ba espresaun
v  Direitu ba votu
v  Direitu atu eleitu ba kargu publiku
v  Direitu atu asesu no hetan informasaun
v  Eleisaun ne’ebé la’o justo no dignu
v  Iha ezistensia instituisaun ne’ebé indepedente hódi halo kontrolu ba rezultadu elisaun
v  Lideransa politiku iha direitu atu halo kompetisaun no hetan votus hósi povu

            Kuandu komponente hósi walu ne’e iha nasaun ida ninia sistema, maka foin konsidera demokrasia bele la’o hó diak, maibé iha realidade estadu barak iha mundu ladu’un fo importansia ba kondisaun walu ne’e. Liga ba  kondisaun real iha estadu timor leste ninia sistema ne’ebé konsagra iha Konstituisaun Republika, tuir hakerek nain nia  pontudevista, ne’e implementa tia ona. Ita bele hare’e kondisaun hirak ne’e liu hósi ita nian  sistema multipartidaria, ne’ebé estadu fo liberdade ba kada ema atu halo kompetisaun liu hósi eleisaun geral ne’ebé la’o periodiku, no iha partisipasaun masimu hósi ema tomak.

 Relasaun  demokrasia no  direitus umanus, ne’e fundamental ba buát rua ne'e hanesan entre baze normativu filozófiku hó sistema podér, signifika katak,baze filozófiku determina oínsá pozisaun direitu no obrigasaun humanu iha mundu,kultura no Estadu. Bazeia ba baze filozófiku ne'ebé tane aás sistema podér (soberania) iha Estadu nia laran: teoria soberania povu, soberania estadu,soberania lei ,demokrasia ne'e hanesan sistema ka instrumentu ida ne'ebé atu pratika baze filozófia ne'ebé rekuinese pozisaun humanu hanesan pessoa juridika, sujeitu kultura, no sujeitu morál iha estadu, tenke  tane hó konstitusional. Hakerek nain tenta atu esplika bazeia husi pontudivista normativu konstitusional, tanba Estadu Timor Leste nu'udar Estadu de  Direitu Demokratiku, ne'ebé rekuinese katak direitus umanus hó konteidu  valór baziku no universal, defende no tutur ka tene  valór direitus umanus bazeia ba normas Internasional (Konstituisaun RDTL artigu 9). Hó ida ne'e Estadu liu husi orgaun Governu tenke implementa volóres direitus umanus iha nian programas ne'ebé hó dalan demokratiku. Maibé depende mós ba  konxiénsia no komprensaun normativu husi sosiedade Timor Leste, tanba mundu modernu agora hótu-hótu tané aás direitus umanus no demokrasia.

            Maibé realmente iha Timor Leste buát hirak ne'e seidauk bele akontese iha moris sosiedade timor leste nian, tanba sosiedade timor leste barak sei infrenta opresaun, hó dominasaun hósi klase elite politiku iha nasaun ne'e. Fenomenu hirak ne'e sosiedade timor bele akompanha lorloron iha media eletronika  no jornal ,liu-liu ba deklarasaun hósi elite politiku sira ne'ebé hatete katak tanba sira mak Estadu Timor Leste iha. Fenomenu ne'e hatudu no defaktu hanesan manipulasaun ka rekayasa politiku ba sosiedade, no violasaun boót hasoru ita nian Konstituisaun ne'ebé adopta sistema Estadu de Direitu. Ne'e hatudu ba publiku katak, ita nian elite politiku mesak ema arogante no kanten ba podér (haus akan kekuasaan). Elite politiku sira haluhan katak bainhira koalia kona-bá Estadu iha sistema Republikanu presiza komponente hótu-hótu nia kontribuisaun.

            Opiniaun ne'e hó objetivu atu esprime no klasifika óinsa relasaun konxiensia valór direitus umanus atu implementa iha sistema podér Estadu Timor Leste, signifika katak sosiedade Timor Leste tenke komprende no hakaás-án nia konxiensia rasik nu'udar potensia atu haláo kontrolu ba laláok Estadu ne'ebé implemennta valór normativu ne'ebé konsagra iha Konstituisaun RDTL. Konxiensia hanesan ne'e fó komprensaun no konviksaun óinsa direitus umanus nia relasaun, espesialmente iha sistema estadu. Hó buat ne’e mak  foin konsidera  gorvernasaun ida ne’ebé demokratiku. Tanba sistema demokrasia kria ambiente respeita ba liberdade sivíl politiku, mesmu laiha relasaun direita entre demokrasia hó tipu direitus umanus seluk, mak hanesan direitu ekonomia no social. Maibé hó liberdade sivíl no politiku ne’e, halo sidadaun ativa no direitamente atu halo kontrolu ba governasaun, atu hó atensaun ba direitu ekonomia no social ne’e.

            Simplesmente bele dehan katak dezenvolvimentu ne’e konseitu ida para atu esplika kona-ba mudansas moris umanu no sosiedade. Ne’e signifika katak, dezenvolvimentu laos  aumenta ba bem-estar ekonomia deit  maibé hó social hótu, ne’e katak laos material deit maibé hó mós  spiritual, ezemplu espiritu hósi  konstituisaun RDTL ne’e katak “ Dezenvolvimentu Umanu Total “. Maske nune’e, indikador barak ne’ebé uza hodi esplika kona-ba susesu dezenvolvimentu ne’e maka ekonomia, maka hanesan numeru kresimentu ekonomia aumentu no rendimentu populasaun iha nasaun refere.

             Kestaun kona-ba relasaun dezenvolvimentu ho demokrasia no direitus umanus ne’e, hori uluk kedan sai topiku debate entre matenek nain sira iha mundu. Liu-liu iha dekade 1960 ate 1970 nia laran, iha momentu ideia konstrusaun/dezenvolvimentu intrudus ba iha estadu sub-dezenvolvidu iha mundu. Iha momentu  ne’e mós espesialista politikus sira hetan infulensa tanba deit paradigma modernizasaun ba dezenvolvimentu, bazikamente matenek nain sira konkorda katak demokrasia labele implementa 100 pur sentu iha estadu foun ne’ebe sei hari’i ninia konstrusaun estadu ka dezenvolvimentu, tanba razaun politika ka ekonomia. Bazeia ba buat hirak ne’e, espesialista politiku no espesialista ekonomia sira hatete ho razaun katak, dezenvolvimentu ekonomia presiza estabilidade ne’ebé seguru. Tanba iha parte seluk, demokrasia ne’e fo liberdade ba ema hotu-hotu atu halo kompetizasaun hodi ukun, maibe  dala ruma mós bele  halo fali  situasaun sai runguranga, tanba instituisan ne’ebé estadu foun ne’e estabelese sei fragil atu halo kontrolu hó diak. Ho kompetizasaun no ezijensia bele mós hamosu instabilidade no fo impaktu  ba dezenvolvimentu ekonomia. Tanba ne’e  tuir hakerek nain nia hare’e ba  kontestu real timor leste, ne’ebe sei iha potensia bo’ot atu konflitu bele  mosu, tanba iha problemas  barak mak sei  eziste no ita koko falun metin ho sistema ne’ebe ohin loron ita nia estadu adapta, mesmu ita nian laran ladu’un fo fatin. Ho fenomenu hirak ne’e  ita presija iha formula foun atu fo importansia ba dezenvolvimentu nasional, ne’e katak ita presija iha asaun konkreta hodi dezenvolve estadu ne’e. Para ema tomak ne’ebé uluk sakrifika nia an ba ukun rasik rasik an, bele hetan benefisiu hosi prosesu dezenvolvimentu nasional ne’e.  Tanba realidade ne’ebé la’o daudaun ne’e, hatudu katak rezultadu hosi ukun rasik an ne’e, grupu  mediu deit maka aproveita hodi goja sira nia vida moris.


                                                                                                         Emilio F. Quintas
                                                                                                         Dosente Fakuldade Direitu
                                                                                                         Universidade Dili         

Sem comentários:

Enviar um comentário

Nota: só um membro deste blogue pode publicar um comentário.