Klarifikasaun Historia 12 Novembru'91

Husi )* Filipe Rodrigues Pereira 

Historia konaba Aksaun Pasivu, 12 Novembru’91 nebe’e irmao Egas haktuir iha Forum Haksesuk (FH) nudar sinal diak ba’a ita tomak, liuliu ba jerasaun foun nasaun doben Timor-Leste. Hein katak sei iha ema seluk nebe’e mak bele konta tan aksaun seluk durante okupasaun Indonesia nian hodi hariku istoria rezistensia nian. 

Relasiona ho buat nebe’e mak irmao Egas haktuir, hau hakarak halo’os (meluruskan) deit konaba Microfon Mean nebe’e uza iha Igreja Motael antes de hahu demonstrasaun. Microfon Mean ne’e hau mak ka’er, buti halo lian hodi lori sai husi igreja mai portaun no sai mai estrada leur hodi dirige demonstrasaun, la’os irmao Valente-Bidau hanesan irmao Egas haktuir. Karik los, tuir planu irmao Valente mak sei ka’er Microfon ne’e, maibe iha praktika/terenu hau rasik mak ka’er no halo lian hodi lori Microfon Mean ne’e sai mai portaun igreja Motael. Wainhira hau ka’er Microfon Mean ne’e sai husi igreja Motael, hau baku matan hare irmao Egas tu’ur hela iha eskada iha odamatan bo’ot igreja nian. Microfon Mean ne’e hau simu husi irmao Valente wainhira padre Ricardo sei halo hela misa iha parte odamatan kraik, igreja motael nian, tamba durante misa ami tu’ur iha parte ne’e. 

Hau la fo’o sala ba irmao Egas tamba dalaruma hare sala ema, tamba tempu neba’a jovens barak mak iha pelataran igreja Motael nian. Microfon Mean ne’e hau ka’er no lori antes misa remata no to’o antes de rotunda Mercado Lama. Espera katak, irmao Egas bele hadia ka halo’os kestaun ne’e, no antes hadia bele reafirma ho kolegas sira seluk, inklui halo reafirmasaun ba irmao Valente, atu nune’e ita bele konta los no konta diak liu tan kada aksaun rezistensia nian durante tempu okupasaun Indonesia. Antes de tudu Obrigadu wa’in ba irmao Egas. 

Dili, 29 Agostu 2012 

)* Filipe Rodrigues Pereira 

Sobrevivente Masakre Santa Cruz 

Chefe Divizaun Politika Komite 12 de Novembru