Hstoria Badak Ida hosi Loriku Oan Lian Laek: Sasin ida Kona ba Masakre 12 de Novembru 1991

Hstoria Badak Ida hosi Loriku Oan Lian Laek: 

Sasin ida Kona ba Masakre 12 de Novembru 1991 

Hau nian Verdadeira Rekordasaun kona-ba Enventu sira iha 1991

Hosi: Egas Alves “Fai Tara”

 Hau nian naran original Egas Alves, e naran funu nian “Fai Tara”. Molok hahu historia ki’ik ida ne'e, ba dala uluk,  ho hakraik an tebes, hau hakarak sublinha katak, hau la mai atu hateten se maka hau, ou la mai reklama katak hau mos heroi ida, ou hau mos halo netik buat ruma ona iha luta ne'e. Ne'e lae e la sei iha hau nian vida atu hanoin prmove hau nian kontribuisaun iha luta clandestina laran.

Hau hakerek historia ki’ik ida ne'e tamba companheiros barak husu hau, atu hakerek kona-ba saida maka hau halo uituan iha funu laran, liliu hau nia companheiro Saky, husu hau atu hakerek  hisotria ki’ik ne'e hodi hakompleta perkursu RENETIL nian durante iha periodo Rezistensia nian.  Historia oan ne’e bele serve ba buat ruma hodi haree oinsa envolvimentu membru sira RENETIL nian iha preparasaun ba simu Delegasaun Parlamentar Portuguesa (DPP) ho manifestasaun nebe halo iha dia 12 de Novembro de 1991.

Diak liu, hau hakarak konta historia oan ne’e, hahu ho musica “Ohin dia 12 de Novembro, nebe hau  kompoen iha hau nia subar laran, depois de Massacre Santa-Cruz iha dia 12 de Novemebru 1991. 

Ohin dia 12 de Novembro

Loron matan nakfera, Ohin dia doze de Novembro

Timor Oan Hakilar nia susar, ba Mundo rai klaran,

Loron matan nakfera, ho ran ho isin ami buka

Dalan naroman ba ami nia rain, ukun rasik ami nia rain

                                    Ref:     Ho ran ami hakerek, ho isin ami kuda

                                    2x        Ba ami alin sira, Inang Feton sira

                                                 Historia Timor Loro Sae...

Inang Aman ho tanis, la’o buka ami nia isin

Namkari lemo Rai Timor nia laran, Ba se los maka imi husu

Ho matan imi rega, Ai-funang kari ami rate laek

Ami isin lakon husi imi nia sorin, Temi netik ami nia naran....

                                   

                                                      Composed by: Egas Alves (Fai TARA).

                                                                                 Dezembro 1991

Bele rona fali husi Kantor: Elvis Ximenes

http://www.youtube.com/watch?v=N_GhG7GWyvc

Musica ne’e ami halo gravasaun iha Jalan Pulau Seribu, iha tinan 1992, quando hau fila fali ona ba Bali iha fulan Outubro de 1992. Hau rasik maka hananu e acompanha husi Companheiro João Gama  e hau ho guitarra. Nune mos Companeiro Anito Matos, Aquelinho Soriano e Jose Pompeia ho maluk seluk tan nebe hela iha Jalan Pulau Seribu; sira mos iha kalan ne'e iha neba hotu. Hotu tiha gravasaun, hau rasik haruka ba Cipinang, ba Companheiro La’Sama. Tuir mai, hau haruka mos musica ne’e ninian letras ba Companehrio Xanana Gusmão atu haruka sai ba rai liur. Ohin loron, musica ne'e, hau rona iha ona mos RTTL.

Historia ki’ik ne'e komesa husi Junho 1991, iha epoka ferias naruk nian, iha nebe Mahasiswa sira barak fila ba Dili, Timor-Leste. Ha'u mos halo parte estudantes sira ne'ebé fila ba Timor. 

Iha Bali, hau estuda iha Engenheria Civil, komesa iha 1987. Nune hau mos sai militante RENETIL nian hafoin organizasaun ne’e moris.

Iha Bali, ha'u la simu instrusaun atu halo serbisu espesifiku ruma iha Timor. To'o tiha Dili ona, companheiros sira seluk mós to'o tuir, inkluindu Si'ak, Vise Sekretariu Geral RENETIL nian, ne'ebé husu ami hotu atu serbisu hamutuk CE/FC.

Komesa hosi ne’e hau la’o ho Companheiro Gregorio Saldanha, ami quaze loron-loron ba iha Companheiro Jose Manuel (Nakfilak) nia Maun Agostinho nia fatin, iha Lahane. Iha neba ami hetan malu ho Companheiro Constancio Pinto, ho Companheiros sira seluk tan. Hau bele hatete katak, durante periodo badak ida, companheiro Agostinho (Matebian ona) nia fatin, quaze loron-loron jovens sira nakonu iha neba, e surpreza bot ba hau maka hotu-hotu han iha neba, mesmo ke supermi ou modo koto ho etu maran.

Iha dunik Matebian Agostinho nian fatin, iha Lahane maka ami kolia kona ba visita Delegasaun Parlamentar Portuguesa nian nebe CE/FC komesa prepara ona.  Durante tempo nebe hau iha Dili, encontros CE/FC nian barak maka hau hamutuk ho Companheiro Siak, Vise Sekretariu-Jeral RENETIL nian participa hodi represeta RENETIL iha enkontru sira CE/FC nian.  Nune, reuniaun barak mos ami halo iha hau nian uma iha Santa-Cruz.

Reuniaun preparasaun ba simu visita DPP nian intensivo liu tan halo iha fulan Agosto ho Setembro  nia laran. Iha periodo ida ne'e mos, Companheiro La’Sama ba husi Bali ba Dili, e hela ho hau iha hau nia fatin, iha Santa-Cruz. Nia hela iha neba durante semana ida nia laran hodi halo encontros ho membros CE/FC sira nian. Encontros halo dunik iha hau nia uma iha Santa-Cruz. Hau bele hatete katak fatin hau nia iha Santa-Cruz quaze sai tiha hanesan base ida ba CE/FE hodi halo servisu. Husi hau nia fatin companheiro La’Sama ba ho Companheiro Terus atu ba hasoru malu ho Maun Bot Xanana Gusmão. Enkontru ne'e realiza ka lae, La’Sama rasik la hatete ba hau ate nia fila ba Bali.

Depois de Companheiro La’Sama fila ba Bali, hau sei hela nafatin iha Dili. Ikus mai, ami rona hosi Diresaun RENETIL nian iha Bali e hosi radio katak DPP kansela ninian vizita tamba Indonesia la aceita jornalista Jill Jollife halo parte iha comitiva DPP nian. Hosi ne’e situasaun iha Dili sai manas liu ona tamba Inteligencia Indonesia sira nian mos intensifika sira nia campanha hasoru rede clandestina.

 Situasaun iha Dili sai manas liu tan quando Saudoso Irmaun Sebastião tiru mate iha Igreija Motael. Iha dia 4 de Novembro, Companheiro Constancio Pinto komesa halai ba subar ona, nune mos Companheiro Gregorio Saldanha, so hela maka Companheiro Juvencio de Jesus, Jacinto Alves, Companheiro Mito no Companheiro  Lemos.  Companheiro Branco la dun movimenta, nebe la dun sai ba fatin seluk.  Durante hau iha Dili, hau so ba companheiro Branco nia fatin dala ida deit quando CE/FC halo encontro ida ho estudantes sira husi Kupang, encontro ho Matebian dr. Fernando  Bonaparte nia alin.

Situasaun iha Dili sai manas liu tan ho operasaun Ninjas sira nian iha fatin-fatin. Hau rasik mos kalan la toba iha uma laran, maibe tur sai deit iha liur to’o madruga maka foin tama ba uma laran toba uituan.

Iha Dili, militante RENETIL sira nebe sempre hetan malu maka Companheiro Siak, Benjamin Martins,  Julio Caeiro, Miguel “Metan” Ximenes ho sira balun tan. Companheiros sira nebe sempre la’o hamutuk ho RENETIL maka Companheiro Anacleto Ribeiro ho Joao Carvalho. Nune hau husu ba Irmao Anacleto Ribeiro ho Irmao Joao Carvalho hodi mai ajuda pinta poster Xanana nian, Bandeira UN, e halo Spanduk sira seluk, hodi prepara ba simu Delegasaun Parlamentar Portuguesa nian.

Quando ami rona lolos ona katak vizita DPP nian la mai los ona, ami barak maka senti desmoralizado tamba buat hotu-hotu prepara tiha ona.  Hau hanoin atu fila fali ona ba Bali, maibe, hau simu telefone husi Companheiro La’Sama, haruka hato’o ba CE/FC kona ba visita staff UN nian ida, Special Rapporteur, Peter Kooijman, atu visita Dili. Iha kontaktu hosi telefone ne’e, Companheiro La’Sama husu ba hau atu kordena ho haree hamutuk tok ho CE/FC hodi halo asaun ruma durante vizita Peter Kooijman nian.

Hau hato’o informasaun vizita staff UN nian ne’e ba Companheiro Constancio Pinto, ho companheiro Juvenio de Jesus quando sira mai iha hau nian fatin. Companheiro Constancio Pinto mai to’o hau nia fatin hodi hasoru malu ho nia kaben, Irman Gabriela Lopes Pinto, e nia husu hau atu buka hatene tok hamutuk ho Bispo Belo iha agenda enkontru ruma ho Special Rapporteur ne'e ka lae.

Iha dia 10 de Novembro 1991, iha deder entre tuku 09-10 dadeer, Companheiro Juvencio de Jesus, ba to’o hau nia uma iha Santa-Cruz, hodi husu hau se iha programa ruma atu halo manifestasaun hodi simu Special Rapporteur ne'e ka lae? Ami nain rua kolia kona ba possibilidades hotu e la hola desizaun ruma. Iha tempu ne’e, hau nian noiva Filomena (Mena) Guterres, agora hau nian kaben, nia mos iha uma hotu, e nia tuur rona hau ho compnanheiro Juvencio koalia kona ba sasan sira ne’e. Mena mos membro RENETIL hotu, nia simu juramento iha Surabaya ho sasin sira maka companheiro Saky, Inacio Leite,  ho Julio Abel, Padre Filomeno Jacob nia alin.

Depois de ami kolia hotu companheiro Juvencio sai ho nia motor fila ba nia fatin. Liu tiha horas ida nune, mosu fali iha hau nian fatin, Companheiro ida conhecido por “OeCussi”, Companheiro Constancio Pinto maka haruka nia ba hetan malu ho hau iha hau nian uma. Nia hato’o notas ki’ik rua ou tolu, hau la lembra lolos ona, e ida derije ba hau. Iha nota ne'e husu hau atu haree tok possibilidade organiza Manifestasaun hamutuk ho CE/FC nia elementos nebe maka hau bele hetan.

Nune, hau buka tuir kedas companheiro Gregorio Saldanha, nebe mos iha nota ida ba nia. Hau husu tuir ba ami nian vizinho atu bolu Companheiro Afonso Maria e Gregorio Saldanha mai hau nia fatin iha kalan. Depois hau mos tun ba to’o iha Irmaun Jacob Fernandes (matebian ona), conhecido por Kepala Desa Santa-Cruz, nian uma. Iha neba hau hetan mos ho Companheiro e Irmao Jacinto Alves. Hau fo hatete ba sira nain rua atu mai to’o iha hau nia fatin iha tuku 08:00 kalan. Nune, companheiro sira Gregorio Saldanha, Afonso Maria, Jacob Fernandes, Jacinto Alves, kalan ne’e sira mosu iha hau nian fatin e ami hakat liu ba halo reuniaun iha hau nia Avo Mãe (Isabel Alves) nia uma nebe iha kedas hau nia uma sorin. Ami tur hamutuk hodi haree kona ba saida maka Companheiro Constancio Pinto, Sekretariu CE/FC nian husu liu hosi nian carta.

Ami tuur hamutuk, estuda e tetu possibilidade ba halo manifestasaun ida. Koalia e descuti barak, e ami decide katak bele halo manifestasaun hodi aproveita Jornalista nain hira iha Dili, e nune mos aproveita vizita Special Rapporteur UN nian nebe vizita mai Timor hodi bele internasionaliza problema Timor-Loro-Sa’e nian.  Ami haree sei la acontece buat ida ka militar sira sei tiru. Nune ami komesa ho halo plano ba manifestasaun e fahe serbisu ba malu. Companheiro Gregorio Saldanha maka sei lidera manifestasaun, e ajuda hosi Companheiro Afonso Maria. Companheiro Jacinto Alves maka hola konta ba Seguransa, nia buka atu mobiliza Grupu Silat SH nian nebe sempre halo treinu kalan-kalan iha ninian Kintal laran. Hau hola konta ba Komunikasaun hodi halo ligasaun ba Bali, Australia ho Portugal hodi informa tuituir dezenvolvimentu ho situasaun durante manifestasaun la’o. Companheiro e irmaun Jacob Fernandes maka sei ajuda hau iha Komunikasaun.

Tuir plano nebe ami desidi hamutuk hanesan tuir mai:

1. Manisfestasaun sei sai husi Igreija Motael, ba Santa-Cruz, tun ba Licidere e sei ba ramata iha Hotel Mahakota Dili nian oin.

2. Iha manifestasaun ne'e massa sei la’o iha klaran, e grupos artes marciais SH sei la’o iha dalan ninin hodi fo seguransa ba manifestante sira.

3. Companheira e irman Caterina ho Companheiro e Irmaun Valentim (Bidau) maka sei kaer microfone. Irman Caterina maka sei reza tersu e Irmaun Valentim maka sei hakilar “Vivas” ho lian fuan nebe haruka mai husi Companheiro Terus, iha intervalo de  kada misterio.

Hosi dia 10 de Novembro kalan, ami servisu deit nune kalan to’o loron hodi halo preparasaun ba manifestasaun. Husi hau nia fatin ami muda tiha fali ba Irmaun João Paulo nia uma iha Audian. Ho nune nucleos rede clandestina sira nian iha Dili laran tomak komesa tama sai iha fatin nebe ami iha ba hodi husu instrusoens.

Irmaun Sebastião Gomes nia familia haruka nia familia balu mai to’o iha hau nian fatin hodi husu orietasoens oin sa maka sira atu lori ai-funang ba Igreija e liu ba rate. Hau rasik maka esplika ba sira oin sa la’o e hatete katak ai-funang maka sei la’o iha oin liu, depois manifestantes sira tuir hosi kotuk.

Ami konsege dunik organiza sasan hotu ate dadeersan dia 12 madrugada, foin ba toba uituan. Depois tuku 5:00 deder deit hader fali ona hodi bolu malu ba tuir missa iha Motael. Antes ba Igreija hau ho hau nia noiva ba to’o Colmera hodi foti tan spanduk nebe hau nian cunhada Alzira Guterres suku. Husi Colmera ami nain rua la’o tun ba Igreija e nune haree jovens sira mos tun ba hotu. Entre Jovens sira ne'ebe tun husi Bis laran e hau conhece maka Irmao Donques Neves (agora iha Irlandia) nebe hatais hela nia farda escola SMA nian. E ami la’o tun ba besik Igreija, ami hetan mos Irmao Agostinho (Jose Manuel nia Maun) tur hela iha baki hamutuk ho Nuno Santos (Nuno Alturas).

Iha Igreija quando Padre Ricardo (actual Bispo de Dili) halo hela missa, hau ho Companheiro Gregorio ho Irmaun Valentim sei tur iha baki Igreija Motael nian, husi parte direita, ami koalia nafatin kona ba plano ne'e. Iha Motael, irmaun Valentim entrega mocrofone ba irmaun Felipe Rodrigues Pereira maka kaer. Assim que missa ramata, nia bok microfone hodi halo lian hanesan sirene, hodi fo sinal hahu ho manifestasaun. Nune maka Jovens sira komesa hakilar ona iha estrada. Tamba ema barak tebes ami organizadores sira lakon controle e nune ami tuir deit ona movimentu massa manifestasaun nian nebe iha. Manifestante sira komesa la’o ho halai, e hau ho hau nian noiva halai to’o iha Ponte Kaiz nia oin, ami mos sai hosi massa manifestante sira nian leet hodi kaer Taxi ba uluk Santa-Cruz. Iha neba hau dere ba Bali atu fo hatene manifestasaun hahu tiha ona, maibe la tama. Hau dere fali ba Senhor Antonio Barbosa (Dona Mena Lin nia Kaben) hodi fo hatene nia hodi dere ba Australia atu informa kona ba manifestasaun nebe la’o daudaun ona.

Tuir mai hau halai ba to’o Irmaun Jocob Fernandes nian uma hodi husu nia ba foti maquina Video atu ami lori ba fali rate Santa-Cruz hodi filma manifestasaun ne’e. Husi hau nian Uma ba rate Santa-Cruz kala 400-500 metros nune.  Quando irmaun Jacob Fernandes mai ho maquina e ami mos la’o sae ba fali rate atu hasai filme, antes to’o iha rate oin, ami rona kilat tarutu no tiru razada. Nune hau ho hau nia noiva halai fila fali e Irmaun Jacob Fernandes mos halai ho nia motor fila. To’o iha uma, hau halai liu kedas ba hau nia Primo Atono (Agora hela iha Sydney) nia uma, hodi impresta nia telefone hodi dere ba Bali. Maibe dere ba Bali la tama, dere ba Australia mos la tama, hau koko fali ba Portugal. Ba Portugal telefone consegue tama, Dr. Jose Ramos Horta, eis Presidente RDTL nian maka simu rasik. Wainhira hau sei ko’alia hela ho Dr. Ramos Horta hodi informa ba nia kona ba militar sira tiru iha rate ne'e, jovens barak mós halai tama tan mai iha uma laran nebe hau kolia telefone ba, balu ho ran hela. Hau husik tiha telefone, hau halai ba haree fali jovens balu nebe hetan kanek sira ne'e...ajuda sira hamos ran sira nebe iha sira nian isin.

 Hafoin tiru ne’e, hau haree situasaun apertadu liu ona, no hau mos bele sai alvo ba militar ho polisia sira Indonesia nian, hau husu hau nian primo Atono, nudar kondutor Kareta Tula Mate (Funeral) nian iha Dili, nia lori Kareta Tula Mate nian ne’e hodi tula e lori sai hau ho hau nia noiva husi Santa-Cruz, antes de Militar sira halo cerca ami. Atono tula hau ba to’o iha Bairro Central, depois hau nian cunhado Manulito Leong simu fali hau e tula hau ba subar. Nune hau mos ba subar ona iha fatin ida iha Colmera. Iha neba hau subar to’o dia 1 de Janeiro 1992 maka Manulito Leong tula fali hau ba uma Santa-Cruz, maibe ba visita deit tamba, familia sira hatete katak Intelligencia suspeita los ona hau. Hau fila fali ba subar fatin, subar to’o fulan Marsu 1992 maka hau foin la’o sai, tamba ami simu informasaun katak elementu SGI sira halo rotasaun ona, foun maka agora iha fali Dili.

Husi hospital hau nia alin Antonio Alves (Tonito) nebe hetan kanek hotu iha rate laran, e nia mos iha Hospital hamutuk ho Companheiro Gregorio. Nia haruka bilhette ida mai hau hatete katak, Gregorio husu ba hau atu hala’o nafatin servisu tamba nia sei taka hau nia naran em qualquer inquerito sira nebe seguransa Indonesia sira nian sei halo ba nia. Ho nune hau komesa halo fali servisu hodi estabelese fali contacto ho Bali e haruka nafatin informasaun sai ba rai liur kona ba trajedia Santa-Cruz ho situasaun sira depois de massakre ne’e, nune mos hau kontinua servisu nafatin hamutuk ho Companheiros sira seluk iha Frente Clandestina nian. Liu husi Tio Henrique Belmiro (Tio banin) hau simu nafatin instrusoens no informasoens husi Comando Superior da Luta nian hodi halo serbisu sira iha klandestina nian.

Iha ona fulan Outubru, kuaze tinan ida hosi masakre Santa-Cruz foin hau fila ba Bali. Iha Bali nebe nudar baze RENETIL nian mos desmantelado tiha ona ho prizaun La’Sama ho membru RENETIL sira seluk nian. Companheiros sira iha Bali balu fo hatene ba hau lalika halo movimentasaun lai tamba ita la hatene se maka se tamba iha momento neba, iha Bali mos mosu deskonfiansa ba malu.

Situasaun seidauk hakmatek lolos no funumaluk bele kaer hau iha sa momentu deit tamba hau  inkluindu membru RENETIL ida hosi membru RENETIL barak nebe envolve diretu iha organiza manifestasaun iha 12 de Novembro 1991 iha Dili. E nune maka to’o iha hanoin ida katak, diak liu halo tiha gravasaun ba hau nian musica antes de buat aat ruma acontece mos ba hau. E nune musica "Ohin dia ohin dia 12 de Novembro" consegue grava dunik.

HAU JURA BA MATEBIAN SIRA KATAK NE'E HAU NIAN VERDADEIRA SASIN DA’ET HO HISTORIA MANIFESTASAUN 12 DE NOVEMBRO DE 1991 NIAN. 

Loron: 20 fulan Agostu tinan 2012

Poesia oan ne'e hau halo iha Darwin.

Wednesday, May 31, 1995 - 10:00

By Egas Alves

Today in my city the sky is cloudy

Turn off the view of the sunrise

Today in my city... The people is awaken to sound of the roosters

Without knowing what is the melancholy that will happen to their sons and daughters who are living there

Today in my city......mothers kneeling and crying

"God, where is my son" ? "God help me...help me....show me the way to find my son"

My God.... my God ...my Saviour

Only blood that I found plummeted on the ground of the Santa Cruz’s  graveyard without the corpse of my son..

Today in my city ......

With blood and body the young Timorese search the way to their freedom

With the blood and body.... the young Timorese writing to their brothers & sisters,

A new page of the story of Timor-Leste.

Today in my city... Mothers crying .....dropped their tears to watering the flowers that scatter on the gravestone of Santa Cruz Cemetery

Their bodies have disappeared from our side

But their Names have imprinted in the wholeheartedly of  the Timorese People

Today ...12 November 1991,  Dili East Timor


Nota 1: Irmaun e Companheiro Carlos Saky ohin dader fo hatene hau iha 1991, nia la ba Dili. Nia ba Dili iha fulan Julho 1990, maibe historia nebe hau konta hamutuk ho irmaun Saky iha Dili los hela, tinan maka sala. Ha'u husu deskulpa tamba lapso kona ba tinan. Para labele kahur historia rua ne, hau dada tiha historia nebe hamutuk ho irmaun Saky hosi sasin iha leten. 

Nota 1: Ba irmaun Felipe Rodrigues Pereira, obrigado ba irmaun nian informasaun. Honestamente, irmaun Valentim la dehan ba hau iha Motael nia entrega microfone ba irmaun. Tamba nia la dehan ba  hau e hau mos la haree nia entrega ba irmaun,  hau hanoin nian maka kaer nafatin tuir desizaun nebe ami hola hamutuk. Baseia ba ida ne'e hau hanoin keta nian mak kaer nafatin, maibe ho irmaun nia esplikasaun agora, buat hotu klaru ona e, hau halo loos ona.

Ho esplikasaun ida ne'e hau hanoin klaru ona ba lapso nebe mosu iha hakerek foufoun. 

Obrigado wa'in. 

Egas Alves