VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

sexta-feira, 15 de junho de 2012

Corrupção Eleitoral (3a): “Financiamento de partidos políticos” la hanesan ho “Financiamento da Campanha Eleitoral”


Martinho G. da Silva Gusmão

Corrupção Eleitoral (3a): 
Financiamento de partidos políticos” 
la hanesan ho “Financiamento da Campanha Eleitoral

 Artigo sira nebé ha’u hakerek kona ba “corrupção eleitoral” hamosu comentário oi-oin. Balun haksolok, tan hetan netik naroman oitun. Balun laran moras no hirus, tan sukit fali sira. Maibe, nu’udar knar ida, lei hateten katak CNE hato’o duni “... esclarecimento objectivo ...”! Iha epistemologia (parte filosofia nian nebé ko’alia kona ba ita ema nia conhecimento baibain nian to’o fali cientifico nian), liafuan “objectividade” bele hamosu discussão barak no luan tebes. Ne’e duni, ha’u la tama iha neba. Maibe, atu habadak lia, objectividade la’os atu hateten de’it ema seluk nia “negativo” mak los ka labele sukit ita nia an (instituição, ka dirigente) rasik mak di’ak; ka, wainhira ema seluk ko’alia kona ba “Ha’u” ne’e la objectivo ona, kona ba “Ema-seluk” de’it mak objectivo.
Iha discussão kona ba “corrupção eleitoral”, ha’u hakarak hatudu de’it katak ita nia lei eleitoral seidauk hatur didi’ak kona ba financiamento. Ne’e duni, dala ruma ema (inclui, CNE) halo comentário mai fali husi financiamento do partido político (Lei 3/2004 no Lei 6/2008). Iha LEPN artigo 31o ka LEPR artigo 30o mosu duni liafuan “financiamento” maibe tama iha titulo kona ba campanha eleitoral. Husi ne’e ita haré kedas katak “financiamento de partidos políticos” la hanesan ho “financiamento da campanha eleitoral”. Tuir ha’u nia hanoin, confusão dala barak mosu tan ita kahor tiha assunto 2 nebe tuir lolos iha duni ligação, maibe iha mos sira nia característica rasik.

FINANCIAMENTE DE PARTIDOS POLITICOS

Kona ba lawa-mento ida ne’e dehan katak, “Conjunto dos recursos econômicos de que os partidos políticos dispõem para a prossecuçãos dos seus objectivos”, katak, rikusoy no lawa (osan) ka kbiit econômico tomak nebé partido político sira iha ka hetan ka halibur hamutuk atu bele hala’o sira nia objectivo (cf., CNE, Dicionário de Legislação Eleitoral, Lisboa: 1995, p. 158). Tuir Lei 3/2004 dehan katak, objectivo atu hari’i partido político ida mak hanesan tuir mai:

a)                  Tane metin interesse tomak nacional nian! Conceito “interesse nacional” ne’e luan tebes, no hala’o iha tempo naruk nia laran;
b)                  Fo liman rohan atu ema hotu-hotu (ka cidadão tomak) bele hala’o sira nia participação politica liu husi “eleições” ka dalan democrática sira seluk;
c)                  Hatur (definir) programa husi governo no administração atu nune’e manan karik eleição ruma, nia iha ona kbit atu bele kaer ukun;
d)                  Participa iha atividade husi órgão sira Estado nian, ka, iha fatin ida-idak nian;
e)                  Hala’o educação cívica no haklaken doutrinação politica ba cidadão tomak;
f)                   Haksesuk malu kona ba nação nia moris no moris internacional nian no oinsa mak hatur partido nia hanoin kona ba moris hirak ne’e;
g)                  Fo liman rohan ba desenvolvimento husi instituição politica tomak.

Husi ne’e mos lei ko’alia katak partido político iha objectivo ida tan atu hala’o no hametin “aspirações” (mehi no hakarak) husi ninia membro rasik no cidadão tomak iha moris social nian.
Haré ba objectivo nebé luan no barak tebes, partido político ida-idak hakarak ka lakohi, tem que buka osan ka hetan osan atu hala’o buat hirak ne’e hotu. La iha partido político ida nebé hakarak hala’o ninia politica hein deit atu hala’o eleição. Eleição ne’e hanesan sikun ida. la’os tomak. Nune’e, Lei 3/2004 hatur ona katak, osan hirak ne’e bele hetan husi [1] “receitas próprias” (hanesan “quota” husi partido nia ema rasik; “angariação”; osan mai husi “produto” partido nian; “empréstimos” – husu osan ka halo tusan hodi partido nia naran) no [2] “financiamento privado” – hanesan “donativos” (sumbangan) husi ema ida-idak (pessoas singulares) no produto mai husi riku-soy partido nian.
Iha contexto “donativos” (sumbangan) ne’e nia laran mak mosu liafuan “financiamentos proibidos” (osan nebé labele simu ka bandu). Lei 3/2004 bandu atu partido político sira simu osan husi: “empresas publicas”; “sociedade” (companhia) nebé hala’o ho osan barak (capital exclusivo) husi Estado nia modal; empresa sira concessionárias (kerja sama) ho Estado atu hala’o serviço publico (exemplo Timor Telcom); ema sira nebé hala’o knar ba ema tomak ka ba religião nian; associação oi-oin professional no sindical; fundação sira; Governo ka ema husi rai liur (estrangeiras).
Lei 6/2008 ko’alia ona kona ba regime jurídico do financiamento dos partidos políticos. Lei ida ne’e hakarak defini deit kona ba “... regime jurídico do financiamento e apresentação das contas dos partidos políticos com representação parlamentar” (artigo 1o). Ninia âmbito mak ida ne’e. Osan nebé tinan-tinan Estado fo ba partido sira nebé tur iha PN ne’e ninia espírito mak hakarak atu “ ... ajude a criar condições mínimas para o funcionamento regular dos partidos políticos que já mostraram à boca das urnas que detêm alguma representatividade popular, numa altura em que o pais dispõe de alguma capacidade financeira que anteriormente não detinha” (preâmbulo). Ho liafuan badak, Lei 3/2004 ninia objectivo mak atu fo tulun ba partido político nebé hetan ona fiar husi povo liu husi eleição no manan cadeira iha parlamento. Tulun ida ne’e Estado fo, atu partido hirak ne’e bele halao sira nia knar loron ba loron ... tinan ba tinan. Osan sira ne’e mai husi Estado no fo tuir CNE atu hato’o ba partido político sira – dala ida tan – tinan ba tinan wainhira sei tur iha PN.

“FINANCIAMENTO” DA CAMPANHA ELEITORAL

            Husi biban seluk, kona ba campanha eleitoral, partido sira mos buka duni ninia financiamento. Kona ba financiamento ba campanha eleitoral dehan katak, “Conjunto dos recursos econômicos adstritos à realização das campanhas eleitorais”, (cf., CNE, Dicionário de Legislação Eleitoral: 155), katak, rikusoy ka kbiit econômico tomak nebé partido político sira hetan ka halibur hamutuk atu hasai ka gasta ba de’it campanha eleitorais.
Wainhira simu tiha Presidente CNE no Comissário sira seluk, Sekjer CNRT dehan katak “Presidente CNE dehan ona katak noite de angariação la contra lei”. Liafuan hirak ne’e la objectivo. Basá, Presidente CNE dehan duni katak partido CNRT “transparente” ona, iha mos convite ba ema hotu hanesan mos ba media barak. Ne’e duni, CNE hatene katak CNRT transparente ona, no ida ne’e fo sasin duni kona ba lei. Partido sira seluk mak “clandestina” hela. Maibe, ida ne’e la significa katak CNRT hakruk ona ba organização contabilistica ruma tuir lei. Sekjer CNRT rasik mos dehan duni, osan sira ne’e hanesan promessas. To’o agora balun fo ona; balun seidauk. Ne’e duni osan tama sai hira, se mak fo, oinsa mak fo ... la iha ema ida mak hatene. Presidente CNE nia liafuan mak ne’e “.... osan hirak ne’e mai husi nebé? Mai husi se?” Ho liafuan badak – ita nia regulamentação ka “regra do jogo” sei balar hela (= membingungkan).
            LEPN/ LEPR rasik dehan, “O financiamento das candidaturas rege-se por legislação especifica e, com as devidas adaptações, pelas normas aplicáveis da lei sobre partidos políticos”. Husi formula ikus, ida ne’e hatudu katak, LEPN/ LEPR hateke hikas mos ba LPP (3/2004). Maibe, oinsa ho Lei 6/2008 kona ba regime financiamento ba partido político sira ho assento parlamentar? LEPN/ LEPR la halo referencia ba lei ida ne’e.
            Tuir ha’u nia opinião, financiamento ba candidaturas – ka, ema sira nebé tuir dalan legal hakarak atu hetan knar político liu husi eleição (nudar PR ka Deputado iha PN) – “... rege-se por legislação especifica ...”, ne’e katak PN halo uluk lai lei kona ba “financiamento da campanha eleitoral”, ka Governo halo decreto lei atu hetan no gasta osan sira ne’e iha campanha eleitoral nia laran. Ita nia fracasso (kelemahan) mak to’o ohin loron ita hanoin katak, financiamento ba campanha eleitoral ne’e mai husi subvenção publica deit. Nune’e, CNE hanesan fali makelar nebé halo proposta orçamento ba Governo atu aprova iha PN hodi fo ba partido hotu-hotu. Wainhira Governo seidauk fo, partido sira hamutuk ho CNE hahu halerik no tane liman ba Governo. Dala ruma, Governo no PN (AMP no OMP hanesan de’it) hatudu fali “laran todan” no “oin sin” fali. Hahalok nebe la jeito liu iha eleição democrática nia laran.

“JUSTICE AS FAIRNESS”

            Iha principio internacional dehan “free and fair election” (= eleição nebé livre no justo). Atu ko’alia kona ba “free” (freedom), Timor Leste bele foti hirus-matan no gaba an oituan hodi dehan katak, ita “livre” atu hala’o eleição. Partido barak. Candidato barak. Ema hotu-hotu iha direito atu ba vota, maibe ida-idak hetan liberdade atu halo abstenção (ka, la ba vota), ka, hanaran mos “dever cívico”. Partido mais votado bele sai oposição. Partido sira nebé manan eleição bele halo aliança maioria atu kaer governo. Segurança no defesa la’o diak, maski we-merak oituan bele hamosu conflito violento.
            Maibe, kona ba “fair” (justo), ida ne’e lia bele sai oinseluk ona. Kona ba “financiamento”, DR. Zoelva Hamdan (Hakim MK Indonésia), hatudu ba ninia experiência iha indonésia (no confirma husi Austrália), katak, partido boot sira iha liu recurso (econômico no poder) atu bele hetan osan barak liu. Partido ki’ik-oan sira sei hetan lutu-matan barak atu taka sira nia dalan hodi hetan osan. Ida ne’e mak halakon justiça eleitoral, ka, dalan seluk nebé lori ba corrupção eleitoral.
            Filosofo político John Rawls hakerek opus magum ida ho titulo A Theory of Justice (1971) hodi hato’o tese ida: justice as fairness (ka, “a justiça como equidade”). Justiça la’os “igualdade” (sameness), maibe “equidade” (fairness).
            Ho liafuan “igualdade” bele halakon tiha justiça nia sentido, tan ita ema nia posição iha sociedade ida la hanesan. Iha caso eleição, ita haré kedas katak iha partido boot no iha partido ki’ik. Oinsa mak halo tratamento ho igualdade ba ema hotu? Tuir Rawls, ho “igualdade” (sameness), ita bele fo hanesan ka halo hanesan ba ema hotu (ka grupo hotu-hotu). Governo AMP foti decisão katak sei fo osan $ 20,000 ba partido ida-idak, no $35,000 ba coligação partidária sira. Ho osan hirak ne’e, partido ki’ik sira bele bok-an diak ona tan hasoru massa oituan de’it (balun TVTL hasai ema 10–20 nebé hamrik iha ai okos rona dirigente partido halo campanha). Maibe, partido bo’ot sira sei susar tebes atu hala’o actividade ho sira nia massa barak (husi 10.000 to’o 100.000 mai hamutuk dala ida). Haré husi ida ne’e, todan tebes atu aplica ita nia hanoin kona ba “igualdade”: partido bo’ot no partido ki’ik baku hanesan!
            Nune’e, Rawls hatudu kona ba “equidade” (fairness): bo’ot hetan bo’ot nian, ki’ik fo tuir ki’ik nian. Hare husi sikun ida ne’e, ita bele compreende tan sa mak CNRT halo angariação (hanesan mos partido FRETILIN, PD, PSD no seluk tan). Maibe, labele fo nara-naran de’it. Nia hatudu sasukat ida nebé hanaran “principles of justice”:

1)                  Principle of liberty – katak, ema ida-idak hetan duni direito nebé adequado kona ba liberdade, nebé hanesan ho ema seluk! Ho liafuan seluk, ema hotu livre hanesan.
2)                  Principle of equality – katak, wainhira mosu karik desigualdade ruma iha social no economia nia laran, sei halo tetuk tuir:

a)                  loke dalan ka fatin ba ema hotu atu bele hetan di’ak (reasonable expected): la bele fo fatin sala ba ema nebé la los;
b)                  fo tulun ba ema nebé fraco atu bele hetan mos buat diak.

Dala ida tan, ita husu de’it “regra do jogo” (= rule of game) nebe claro. Iha principio kona ba financimanto ba campanha eleitoral nian dehan duni “The legal framework should ensure that all political parties and candidates are equitably treated by legal provisions governing campaign finances and expeditures”. Katak, halo duni mata-dalan legal nian atu assegura tramento nebe iha equidade hodi bele sai nu’udar sasukat kona ba financiamento campanha nian no sira nia despesa. Ne’e duni, fo ba partido ida-idak osan $20,000 no coligação partidária ida-idak hetan $35,000 bele dehan nu’udar “equality”, maibe la’os “equitably”.

*) Hakerek nain, Comissário CNE representante husi Igreja Católica; coordenador sub-comissão EDUCAÇÃO ELEITORAL (estudos, pesquisa & publicações).

Sem comentários:

Enviar um comentário

Nota: só um membro deste blogue pode publicar um comentário.