Vizita PM ba RTK

RTK «hakbokar Timor Lorosa’e nia murak mean tuir anin»

Sua Excelência Reverendíssima

Senhor Primeiro Ministro

da República Democrática de Timor Leste

Kay Rala Xanana Gusmão

Ho neon haktadak ho honra no fuan naresin ho ksolok, ami hatoo bem vindo ba Sua Excelência iha Rádio Timor Kmanek ka RTK! Anin herin tasi nian haksudik malu ho anin dadurus foho nian iha laletek Maloa, fatin nebe RTK hatur-an ba nudar rádio emissora ida nebe pertence ba  Igreja Católica Diocese Dili. RTK hakiak ho orientasaun «non profit» ka «sem fins lucrativos». Harí legalmente iha 3 de Março de 1994, RTK tane aas valores democráticos no culturais nebe universalmente aceites, hodi tau ba neon katak  valores hirak nee sai nudar «murak-mean» sira nebe determina oin sa cidadão ida compreende saida mak diak, furak, kapaz no iha folin hodi luta ba. Filosofia ida nee reflecte iha RTK nia lema: «hakbokar Timor Lorosa’e nia murak mean tuir anin».

RTK halao tranmissão lor-loron durante oras 16 nia laran, hosi tuku 6 dadersan too tuku 10 kalan, hodi uza ao mesmo tempo frequência oin rua: AM no FM. Frequência ida-idak iha ninia transmissor rasik ho capacidade de saída 5,000 volts ba AM no 1,000 volts ba FM. Factor técnico ida nee permite RTK atu iha audiência barak no iha coberuta luan.   Maibe tamba configuração foho nebe domina iha ita nia rain, halo com que RTK nia missão atu «fó forma ba modelo sociedade ida nebe orientado ba valores no princípios comuns nudar consagra iha Constituição RDTL nian no iha doutrina social Igreja nian», la consegue atu realiza tomak, tuir pastoral nebe hafalun Igreja nia mehi.

RTK nia serviço público consiste iha areas lima: informação, educação cívica, formação religiosa, promoção cultural no divertimento musical. Maski haktabir ho atributo «católico», maibe religião la hetan porção boot iha RTK nia estrutura programas sira. Pelo contrário, RTK fó ênfase liu-liu ba educação cívica. Ba nee, lor-loron nacional feto nian iha 4 de Novembro de 2010, atribui «Prémio de Reconhecimento»  ba RTK.

Excelência,

Iha tempo ocupação Indonésia, iha deit radio emissora tolu: RRI, Estado Indonésio nian; Rádio Loro Sae, militar TNI sira nian; no RTK, Igreja Católica nian. Tuir pesquisa da audiência nebe Internews, NGO Americano ida, halo iha 1998, RTK hetan primeiro classificado em termos de audiência no qualidade de programas. Iha 1999, molok halao Referendum, UNAMET  usa deit RTK, durtante fulan haat, atu dissemina ideias, planos no programas konaba Referendo. Iha linha ida nee, RTK fó mos tempo no espaço, durante fulan rua, ba CNRT  atu halo campanha ba independência. Iha tempo nebá, Sr. Agio Pereira no Sra. Milena Pires maka actua nudar coordenador no executor ba redacção no tranmissão programas CNRT nian iha RTK

Iha início tinan 2000, radio emissora única nebe halo transmissão iha Timor  Leste maka RTK. Iha tempo neba UNTAET  maka rehabilita antenna no transmissor  da frequência AM hodi uza ba interesse publico nacional. Ami hatene katak, durante tempo ukun-rasik-an mossu estação radio particular oi-oin no radio comunidade bar-barak. Ami hatene mos katak Radio Timor Leste nudar instituição emissora Estado nian, ikus nee bele loke nia liras, em termos de cobertura nebe abrange Timor tomak, tamba uza facilidade satélite. Factor ida nee, sai nudar progresso boot ida ba Rádio Timor Leste, maibe retrocesso ba RTK, tamba ami la iha kbiit atu compete iha aspecto técnico no financeiro. Maski nunee, tuir pesquisa de audiência nebe halao hosi Hirondell Institution  hamutuk ho National Media Survey, hodi publica nia resultado final iha Maio 2007, coloca RTK nudar segundo classificado, hanessan rádio emissora mais ouvida, depois da RTL.

Maibe, Senhor Primeira Ministro, ami hakfodak no laran taridu uitoan tamba, iha tempo ikus nee, mossu radio emissora ida nebe uza deit frequência FM, maibe bele cobre Timor tomak. Tuir  teoria, radio FM ida nia cobertura tenke limitada, maibe, milagre bele acontese iha Timor. Realidade ida nee, só bele explica katak estação radio nebe ami halo alusão ba nee, uza facilidade satélite hanessan moós RTL nian.

Tamba nee, hodi sadere-an ba papél historico no contribuição RTK nian, tanto iha luta ba independência como iha processo harí ita nia nação doben Timor, ami hakarak hatoo ami nia pedidu ba Sua Excelência Senhor Primeiro Ministro, atu tau matan mai ami hodi fó mos oportunidade ba RTK atu hetan facilidade uza canal satélite ida iha ninia transmissão.

Ami rona mos katak jornal STL no organização media sira seluk, tinan tinan, simu  apoio financeiro hosi Governo. Iha leet ida nee, ami hakaran loke laran ba Ita Bot Senhor Primeiro katak RTK moris ho ajuda financeira hosi organização católica rua, ida hosi Canada no ida seluk hosi Irlandia. Maibe organização rua nee, sei hapára parceria ho RTK iha 2013 oin mai, tamba deit crise económica global nebe afecta mos Nação rua nee.  

Factor nee sai nudar ameaça boot ida ba RTK nia existência iha futuro. Tamba nee, iha leet nee, ho haraik-an, hau hakarak tuku Ita Boot nia odamatan fuan nian atu hussu tulun, hodi disponibiliza verba oak ruma ba RTK, atu salva nia hosi bancarrota hanessan nia experimenta tiha ona iha 2003.

Ami reza ba Nai Maromak atu haraik saúde, sabedoria no prudência ba Sua Excelência atu heán roh Governo nian, laó ba oin nafatin too remata mandato.  Ami mos harohan ba Nai Maromak bele buat tomak atu iha eleição parlamentar nebe sei mai, Ita Boot sai nudar figura notável maus preferida iha ema wain sira nia consciência hodi hili Ita Boot atu simu tan mandato foun ida nudar Primeiro Ministro, maski, ba nee, sei hassoru laloran tasi boot no anin fuik makaas.

Ikus mai, molok Sua Excelência lalin-an tama ba Estúdio hodi halao entrevista ho RTK na reporter nain rua, hau hussu Ita Boot nia disponibilidade atu hatoo netik lia-menon ruma mai ami.

Ba Sua Excelência Senhor Primeiro Ministro nia lalin-an mai too iha nee hodi visita RTK atu halaó entrevista , ami hatoo obrigado wain.

Dili, 01 de Maio 2012.

Loron Trabalhadores sira nian.

Padre DR. Domingos Sequeira

RTK Superviso