Dia Mundial ba Liberdade Imprensa

Parabens ba loron Liberdade Imprensa no aprecia ba servisu Media Timor-Leste nian 

Loron 3 fulan Maio,mundu tomak komemora loron ida ne’e hanesan loron mundial ba Liberdade Imprensa ka World Press Freedom Day.

Iha biban ida ne’e, atu kongratula ba media iha Mundo tomak tamba sira nia kontribuisaun ba transformasaun sociedade iha mundu. Iha mudansas no transformasauns sosiais no politika barak iha mundu,kontribuisaun media nian importante. Tamba vokasaun,visaun no misaun media nian maka luta ba sociedade ne’ebe justo no digno, prinsipius demokratikus maka nudar valores ne’ebe maka Media sira tane ás, nudar mata dalan ba sira hodi halao knar lor-loron.

Hare hikas ba ita nia historia Timor-Leste nia funu ba ukun rasik an, kontribuisaun media nia importante teb-tebes.

Molok atu koalia ba ida ne’e,hare fila fali, estratejia inimigu ka potensia invasor nian iha tinan 24, maka, ”isolamentu Timor-Leste ba Mundo”. Ho ida ne’e, iha tinan barak maka Indonesia konsegue bloquia informasaun husi Timor-Leste ba Mundo. Wainhira ami estudantes nain sanulu, hau ho companheiros sira ne’ebe hamutuk iha Bali, hanoin hamutuk hodi harii RENETIL (Resistencia Nacional dos Estudantes de Timor-Leste) iha tinan 1988, hodi adopta estratejia no linhas jerais no ida nebe maka koresponde ba knar media nian maka:”oinsa desbloquia informasaun no denuncia situasaun real Timor-Leste bam undo”.

 Hahu husi ne’eba ami husi RENETIL desenvolve atividades no asaun lubung ida ne’ebe maka hodi alkansa ba estratejia ne’ebe maka trasa ona, ”desbloquia informasaun e denuncia violasaun direitus umanus iha Timor-Leste”.

Asaun lubung ida maka halo hanesan:estudantes sira hakerek karta ba lideres mundiais sira, organiza estudantes sira ba halo manifestasaun, hau hamutuk grupos estudantes sira ba husu Asilo Politika iha Embaixada Vatikano no Japaun iha fulan Junho tinan 1989, molok Papa Joao Paulo II hit an mai Timor-Leste iha fulan Outubro tinan 1989, ami mos haruka karta ida ba Papa Joao Paulo II entrega liu husi Amo Bispo Belo hodi apoio surat ne’ebe maka Amo Belo haruka iha biban ne’eba ba Sekretariu Jeral ONU nia Sr. Peres de Goulard, konaba “referendum nudar dalan ba resolve problema konflitus Timor-Leste”.

Organiza manifestasaun wainhira mosu Massakre S.Cruz iha tinan 1991, Dili, estudantes sira tun ba demo iha Jakarta, iha loron 19 fulan Novembru tinan 1991, konsekuensia husi asaun hau mos autoridades Indonesia kaer no julga hetan kadeia tinan 9 no kumpir tinan 7.

Koordena no koopera ho Frenti Diplomatiku no Frenti Klandestina, hodi hatama Jornalista Robert Dom mai Timor-Leste hodi ba entrevista ho Komandante Supremo Falentil nian, maun Bot Kay Rala Xanana Gusmao, iha Bunaria, Ainaro, Setembru tinan 1990.

Organiza asaun ba hasoru festa APEC iha tinan 1994,wainhira Presidente Clinton ho lideres mundiais lubung ida mai tuir APEC Summet iha Bogor, Indonesia, fulan Novembru tinan 1994. Asaun sira ne’e lao ho misaun no objetivu ida deit,atu denunai situasuan real iha Timor-Leste no sempre servisu hamutuk ho Media ka imprensa, Indonesia no Mundial. Husi asaun sira ne’e, ninia impaktus bot ba Internasionalizasaun funu Timor-Leste nian.

Ho esperiencia badak ne’ebe maka temi iha leten, atu dehan deit katak,media ninia kontribuisaun ba Internasionalisaun ba Funu no Situasaun Timor-Leste nian. Ho loron ida ohin, atu dehan tan dala ida ba Media sira, jornalistas, klibur Media nian, komitmentu Estadu ida ne’e ba Liberdade Imprensa tamba Imprensa ka Media hola parte ba historia konstrusaun Estadu Nasaun RDTL no kontinua desempenha papel ida ne’e iha procesu konsolidasaun ba Demokrasia no Desenvolvimentu.

Madia nia papel iha iha proceso Internacionalizasaun funu Timor-Leste nian. Buka atu cita autor balun ne’ebe hakerek  teoria konaba Ajendamentu publiku no mediatiku,  tuir Walter Lippman, autor ne´ebe maka hakerek konaba teoria  agendamento, iha ninia kapitulu livru ho titulu, ”The World outside and the pictures in our head”. Lippman argumenta katak, ”média mak prinsipal ligasaun hosi akontesimentus iha mundo no imajens konaba akontesimentus ne´e rasik”.

Cita hanoin matenek nain sira koalia ba papel media nian atu, artikula deit ho procesu funu Timor-Leste, papel média nian importancia ba internasionalizasaun no diplomacia Funu Timor-Leste nian iha Foruns Internasionais. Iha akontesimentus historika bot balun mak kobertura média kontribui ba Internazionalisasaun no facilita Diplomacia .

Massakre S. Cruz, 12.11.1991, no atribuisaun Premio Nobel ba Paz, ba ita nia Laureados nain rua, D. Ximenes Belo no Dr. José Ramos Horta no cerimonia ba atribuisaun Premeio Nobel da Paz, hetan impaktus bot ba internasionalizasaun ba Questao de Timor-Leste no facilita Diplomacia iha rai liur, Kadeias TV bot nian hanesan CNN fó programa direto ka live konaba cerimonia.

Ho akontesimentus rua ne´e,ninia impaktus bot ba internasionalzasaun no influensia ajenda mediatika no publika. Obriga Estados balun, hare fila fali sira nia posisaun no mobilizasaun opiniaun publika mundial ne´ebe sensivel ba  kausa Timor-Leste. Ne´e tamba kontribuisaun Média no korajens servisu jornalismu ne´ebe amante ba kausa mak: Liberdade no Demokrasia.

Procesu transformasaun barak iha mundu, kontribuisaun média nian importante tebes, hanesan procesu demokratizasaun iha rai  barak, maibe hare liu esperiensia ita nia povo irmao Indonesia. Procesu Demokratizasaun iha Indonesia mos média nia papel importante, akompana besik ba procesu hahu iha tinan 1990 to´o fin rejime, papel media importante. Hahu hosi SK Mempen, Fulan Abril 1994, hodi Bredel  Majalah Tempo, Majalah Editor no tabloid  Detik, mosu klibur Jornalista sira bé naran AJI (Aliansi Jornalis Independen) hodi defende ba demokrasia, liberdade ba imprensa no liberdade ba ható hanoin.

Nudar politiku no lider,hanesan lian menon ne’ebe maka hato ona iha workshop ne’ebe organiza husi Sekretaria Estadu Konseilu Ministru (SEKM) konaba: ”Profisionalisaun ba profisionais komunikasaun social”, iha hau nia diskursu defende katak, ” iha loron 20 fulan Fevereiru 2012, ható lia menon,” Governu liu husi Ministeriu ka Sekretaria Estadu ne’ebe tutela ba komunikasaun atu tau matan ba situasaun Media nian”. Mos nudar cidadaun ne’ebe lor-loron consume produtos ne’ebe media sira fornece liu husi noticiasi, husu atu Futuru Parlamento no Futuru Governu tau matan ba media no jornalistas, liliu acelera konaba Lei ba Komunikasaun Social Timor-Leste nian!

Parabens ba Media no Jornalista sira tomak!

Viva Liberdade da Imprensa!

Viva Demokrasia!

Dili, 03.05.2012

Fernando La Sama de Araujo

Presidente Parlamento Nasional Timor Leste 

*Artigu ne’e hatun iha Suara Timor LoroSae (STL), edisaun Sexta-feira (04/05/2012), paj.11!