Votação tuir Unidade Geográfica: Tuir Nafatin Lei ka Muda Lei Mak Di’ak Liu?

Votação tuir Unidade Geográfica: Tuir Nafatin Lei ka Muda Lei Mak Di’ak Liu?

Martinho G. da Silva Gusmão

 Iha eleição ba primeira ronda ba PR nian, taxa de participação iha votação tun liu ba 78% resin. Iha 2007, ninia percentagem hamutuk 81%. Tun oituan deit. Maibe, na’i-ulun político sira, liu-liu hirak  nebé haknar an nu’udar Deputado iha PN hahu haklalak katak lei mak la los, Governo mak la organiza diak, CNE/ STAE mak halo lei sala. Hanesan pecado original karik, sala ida ne’e mai husi hun kona da’et ba ema hotu. Menus Deputado sira mak (sente an) la sala! Liu-liu todan ne’e tau ba LEPR artigo 40^o kona ba votação tuir “unidade geográfica”. Katak, ema ida-idak sei ba vota tuir suco nebé hakerek iha cartão eleitoral.

Atu bele hadi’ak fali situação ida ne’e, Deputado sira iha PN halo ona projecto lei ida, atu halo alteração ba LEPN. Ita sei hanoin, iha tempo uluk Deputado sira husi FRETILIN muda lei iha dalan klaran ema hotu haklalak. Too PR Xanana Gusmão husu parecer “inconstitucionalidade” ba TR. Lakon tiha. Tuir mai, PR eleito Dr. Ramos Horta dehan, Deputado sira troca lei hanesan ba tur iha restorante hodi troca menu tuir gosto. Agora, Deputado sira husi AMP no FRETILIN hakarak atu muda tan lei. Ita hanesan halo ona tradição foun – muda lei tun sae wainhira haré situação la favorece.

Hanesan ita hatene, direito atu halo lei, muda lei ka troca lei ne’e haka’it duni ba kbiit no knar PN nian. Basá, PN mak iha knar legislador nian. Povo hili ona sira atu hatutan lia hodi halo lei. La iha ema ida mak teri netik sira nia dalan. Maibe, nu’udar órgão ida nebé sei implementa lei CNE mos bele hatoo ninia hanoin (maski Deputado sira lakohi rona, sa tan halo tuir). Tuir hakerek-nain nia hanoin, LEPR/ LEPN kona ba votação tuir “unidade geográfica” ne’e hanesan sistema ida nebé diak liu no fácil liu. Maibe, ita bele hadi’ak buat ruma iha laran. Hakerek-nain sei esclarece tuir mai:

Votação Tuir Unidade Geográfica: Vantagem

Tuir experiência, ita bele hatudu ona katak votação tuir unidade geográfica ne’e dalan di’ak liu atu organiza processo eleição ida. Ida ne’e la’os buat foun ida ba povo Timor Leste. Uluk iha eleição ba Assembléia Constituinte (2001), aplica ona votação tuir unidade geográfica. Sistema ida ne’e mak aplica hikas iha eleição ba liderança comunitária (2009). Ne’e duni la’os buat foun ida ba Timor oan sira. Tan sa mak sistema ida ne’e di’ak liu atu ita aplica? Ninia razão hanesan tuir mai:

a)      Haré ba gestão no distribuição material no boletim de voto. STAE bele sukat ona oinsa mak bele lori sasan sira ba fatin/ centro votação. Liu-liu material sensitivo, i.e., boletim de voto. Baibain, iha fatin ida STAE bele fahe boletim de voto tuir “lista dos votantes” iha suco ida no previsto ona ho 10% atu aumenta iha suco ida nia laran. Ida ne’e bele facilita liu serviço STAE nian, inclui supervisão husi CNE.

·         Se vota iha fatin nebé deit, circulação barak liu nune’e controla ba boletim de voto sei difici liu. Nune’e mos, possibilidade atu ema bele halo vota dala rua tolu sei aas liu.

·         Hanesan iha eleição 2007, wainhira boletim de voto hotu iha fatin ida, STAE tem que atende lalais kedas. Problema mosu, wainhira ita la hatene lolos no lalais boletim de voto hotu iha nebé los! Mak mosu boletim de voto hotu iha Lautem no Oecusse, oinsa mak STAE no CNE aranja transporte lalais? Iha tempo nebé UNMIT prepara helicóptero ho boletim de voto iha kedas avião laran. Hotu dala ida, ita bele bolu kedas no avião semo kedas ba neba. Implica, ita prepara osan barak atu lori deit boletim de voto kaixa oan ida.

b)      Haré husi segurança nian – votação tuir unidade geográfica bele reduz violência, tan ema ida-idak fila ba sira nia knua sira sei hatene malu liu, tau matan ba malu no “familiar” liu. Nune’e, serviço segurança sei baseia liu ba policia comunitária atu controla. Ema mos la bou hamutuk iha fatin ida atu hamosu crime.

·         Se vota iha fatin  nebé deit, circulação ba “autor” sira mos lais liu no fácil liu. Sira bele “identifica” fatin nebé “fácil” ba sira atu halo ação crime ka violência. Nune’e, agente segurança nia mobilidade tem que maka’as atu halo atuação ba crime publico no crime eleitoral.

c)      Haré husi participação, ema ida-idak sente katak ninia knua ka suco fo contribuição ba eleição pacifica.

d)      Processo atu halo formação hanesan atu halo educação dos votantes no informação dos votantes bele fácil liu. Iha ne’e cooperação husi chefe de suco sira boot liu.

Taxa de participação tun?

Wainhira ita tuir debate iha PN no comentário iha media, Deputado sira iha PN ka na’i-ulun político sira laran taridu haré ba taxa de participação nebé tun teb-tebes. Sira fo sala ba artigo kona ba votação tuir “unidade geográfica” nu’udar causa própria. Maibe, ita mos bele hateten katak, Deputado sira hananu knanuk fals hela. Afina seidauk diak. Tuir hakerek na’in nia hanoin, taxa de participação tun tan mosu fenomena nebé hanaran “abstencionismo” nu’udar dinâmica husi democracia rasik. Saida mak abstencionismo ne’e? Conceito ida ne’e hakarak atu dehan katak, ema ida lakohi duni hili fatin ida. Wainhira ema ida haré  katak buat rua atu hili ne’e di’ak hotu, ka, la di’ak hotu nia hakotu lia atu la hili naran ida.

Liafuan «Abstenção» mai husi «abster». Ninia abut mak foti husi Latim «abstinere» (abs + tenere). Prefixo «abs» katak ‘husi’, ‘mai’ no verbo «tenere» katak ‘hatur dook’, ‘hases tiha’. Wainhira ita dehan «abster-se» (reflessivo), hatudu katak ita hakarak duni atu lakohi halo buat ida, hases tiha ita nia an atu labele halo buat ida.

Iha política nia laran, abstenção (abstensionismo) sai hanesan hahalok ida atu lakohi hili parte ida (candidato ida ka partido ida). Hahalok ida ne’e hatudu forma ida husi «participação passiva», maibe la’os atu hasai ema ida husi moris hamutuk iha sosiedade ida (exclusão social). Tuir lolos, Deputado sira iha PN hatene liu liafuan ida ne’e. Wainhira Presidente PN husu atu halo “vota a favor” (simu) ka “vota contra” (la simu), deputado/a sira foti cartão kinur – hatudu katak sira hili “dalan klaran” (participação passiva); sira halo “abstenção”. Maski sira iha ona facilidade hotu, maibe dala ruma sira la mosu iha Uma-Fukun atu halo votação. Taxa de participação iha Uma Fukun tun ka lae? Tan sa mak Deputado sira hahu haksesuk malu iha PN, wainhira povo mos halo abstenção? Tuir lolos, ida ne’e normal iha lalaok democracia nian. Maibe, dala barak liu ita haré katak Deputado sira ko’alia tan sira tem que koalia, maski dala ruma la hatene saida mak sira ko’alia hela.

Oinsa mak abstenção bele mosu iha eleição ida nia laran (= abstenção eleitoral)? Uluk nanain (1), Lei-Inan hatur ona katak votação ne’e hanesan “dever civico” (art 47^o n. 2). Ne’e duni, ema ida ba vota mos diak la ba vota mos la iha problema. Maski nune’e, recenseamento eleitoral ne’e “obrigatório” (art 65^o n. 2). Buat hirak ne’e hotu hatur ona iha ita nia Lei-Inan. Ninia resultado, maski ema barak mak ba halo recenseamento eleitoral, maibe la’os hotu-hotu hakarak ba vota.

Tuir mai (2), bele mosu característica oi-oin iha abstenção eleitoral nia laran. Ita bele identifica sira hanesan:

a)      Abstenção passivo ka abstenção sociológico, wainhira ema hela do’ok husi centro de votação/ estação de voto, ferik/ katuas no alejado sira nebé la’o labele no la iha ema ida mak bele tulun sira hodi too iha fatin vota nian. Iha primeira ronda, mosu udan no anin maka’as halo ema lakon acesso ba centro tan dalan kotu ka ai-hun boot tohar hodi taka dalan. Ne’e duni, abstenção ida ne’e mosu tan situação real iha área rurais ka iha fatin nebé deit. Deputado balun, liu-liu husi oposição lakohi simu argumento ida ne’e wainhira Governo/STAE ka CNE hatoo sira nia razão.

b)      Abstenção activo ka ideológico mosu wainhira iha grupo balun nebé lakohi duni tuir eleicao tan principio político. Ida ne’e hatudu liu ba CPD-RDTL ho ninia membro tomak. Sira la simu “restauração da independência”, defende liu proclamação unilateral maibe iha tempo hanesan rejeita partido FRETILIN. Nune’e, sira lakohi halo recenseamento eleitoral (la halo cartão eleitoral). Maibe, iha biban seluk, abstenção ida ne’e bele mosu wainhira povo lakohi duni hili candidato sira ne’e. Liu-liu, iha eleição daruak ba PR nian, taxa de participação tun liu tan. Ida ne’e bele mosu tan votante lakohi duni atu hili – ka iha Indonésia dehan “golput” – tan sira nia laran la monu ba candidato 2 nebé iha.

c)      Abstenção técnica mosu wainhira ema hetan tiha cartão eleitoral maibe muda sira nia hela fatin. Iha tempo STAE/ CNE halo actualização base de dados (ABD), ema hirak ne’e la ba iha STAE nia fatin atu troca sira nia cartão. Nune’e, wainhira lei eleitoral hatur kona ba votação tuir unidade geografia, sira nia naran la tama iha caderno eleitoral nia laran. Se mak sala?

·         Eleitor sira mak sala duni, tan lakohi loke tilun no matan atu rona no haré informação husi STAE hodi hadia’k cartão eleitoral. To’o loron votação ona mak sira haklalak kona ba “direito”, maibe taka matan ba “dever” atu halo sira nia documento.

·         Eleitor sira iha Díli mak hamosu problema barak liu. Liu-liu estudante sira (iha Universidade ka secundaria) nebé la hatene liu informação kona ba processo ABD. Afinal, iha Díli ne’e buat hotu (facilidade tomak) la falta. Ikus mai, sira mosu iha TVTL ka radio ka media comunicação halo declaração atu boicotte eleição. Afinal, hahalok sira hanesan ne’e tama ona iha categoria crime eleitoral (=Propaganda eleitoral ilícita; Código Penal art 233^o) maibe, ita triste tan “mahasiswa” (UNITAL) rasik la compreende buat hirak ne’e. Katak, hatene ema seluk iha direito ba vota, maibe sira impede ne’e tama dadur laran ka fo multa.

·         Deputado no partido político sira mos “involve” iha laran, tan sira rasik la serviço atu halo “educação cívica” ba militante no população. Iha lei kona ba partido político (Lei no. 3/ 2004 – art 2^o n. 1 § e) nian, sira iha knar ida atu halo “educação cívica” maibe la halo. Partido político sira hanoin de’it atu oinsa mak tuir eleicao, maibe sira la iha “gestão” kona ba oinsa mak assegura taxa de participação. Afinal, partido político no candidato sira mak interessado liu. La’os STAE no CNE.

·         Governo (hanesan mos Presidente da Republica) halo “lisan aat” ida hodi foti solução péssima (jalan keluar sangat buruk) wainhira prepara transporte ba estudante ka ema sira iha Díli atu fila ba sira nia suco/ knua atu vota. Ne’e moras aat ida – ka mimu ema baruk ten sira hodi democracia nia naran. Afinal, iha knua/ suco sira ema ferik no katuas sira bele la’o too sira nia fatin atu vota, maibe Governo nunca hanoin kona ba transporte.

Ikus liu (3), tendência atu troka lei iha dalan klaran hanesan tiha ona “moda foun” iha ita democracia. Ka, lisan aat? Buat hirak ne’e mosu tan, “investimento de confiança” ba órgão da administração eleitoral. Lala’ok eleicao nian tuir dalan ona la la’o diak tebes. Investimento ne’e la’os deit orçamento, maibe mos técnico no político. Orçamento bele suficiente ona, tan bele sustenta lalaok instituição nian. Técnico la dun la’o di’ak tan programa atu hala’o educação dos votantes (CNE) no informação dos votantes (STAE) mak seidauk efectivo. Sa tan tempo atu hala’o programa ne’e oituan deit ho orçamento naton. Ida ne’e mosu tan aprovação no promulgação ba lei eleitoral mos neneik; definição ba estrutra no funcionamento órgão eleitoral mos la claro liu. Político seidauk la’o diak, tan partido político sira la halo sira nia papel atu hala’o educação cívica. Nune’e, sala la’os STAE no CNE, la’os lei eleitoral maibe componente barak mak kahur malu.

Hau sugere – dalan di’ak liu mak halo di’ak deit sistema base de dados no hadi’ak cartão eleitoral. Ida ne’e sei mosu iha loron 1 – 31 Maio 2012. Ema hotu, liu-liu iha Díli tem que hadi’ak sira nia cartão eleitoral tuir sira nia hela fatin. Dalan ida ne’e fasil liu no kman liu. Troca ka muda lei sei halo susar deit no hatudu katak ita nia democracia ne’e hanesan tama festa sai festa folin rabisadu.

               

*) Hakerek nain, Comissário CNE representante husi Igreja Católica; coordenador sub-comissão EDUCAÇÃO ELEITORAL (estudos, pesquisa & publicações).