Jose Ramos Horta hamutuk ho PD hamosu terceira Via Forsas Politika

Iha loron 21 FulanMarsu tinan 2012, konferensia imprensa hosi kandidatus Jose Ramos Horta (JRH) noFernando La Sama de Araujo (FLA), iha Hotel Timor, Dili. Hosi kandidatus nain rua ne’ebe pasa ba kampane segunda volta, Francisco Guterres Lu’olo ne’ebe hetan apoio hosi partidu Fretilin no kandidatu Taur Matan Ruak (TMR) ne’ebe hetan apoio hosi partidu CNRT, hotu-hotu hein no haruka ninia emar ba akompana konferensia imprensa ne’e. Espetativa ba media no kandidatus nain rua ne’ebe pasa ba segunda volta, mai ho hanoin katak kandidatus JRH no FLA atu deklara sira nia apoio ba kandidatu ne’ebe los.

Maibe kontiudu central hosi konferensia imprensa ne’e mak: kandidatus nain rua ninia resultadus tau hamutuk hetan ho percentajen 35%. Agradece ba povus ne’ebe maka fo suporta no fiar liu hosi votus. Atu hatutan fiar povu nian ne’ebe ho total 35%, kandidatus nain rua ne’e sei lao hamutuk iha eleisaun Parlamentares iha fulan Junho mai ne’e. Iha deklarasaun konjunta hakerek nune’e: ’Nudar lideres politiku, Jose Ramos Horta no Fernando Lasama de Araujo, deklara hahu ohin ba oin, sei servisu hamutuk hodi prepara ba eleisaun Parlamentares 2012 no forma V Governo Konstitusional’.

Tuir noticias hosi Telejornal Radio Televisao Portuguesa (RTP) edisaun Jornal da Tarde Quarta-Feira (21/03/2012) katak, ’’kandidatus JRH no FLA,hamosu terceira via politika hodi partisipa iha eleisaun Presidensial segunda volta no mos prepara ba eleisaun Parlamentares iha fulan Junho 2012 (Telejornal RTP, 21/03/2012)’’ . Hamosu konfegurasaun foun iha kontestu politika Timor-Leste nian,iha tinan sanulu ita nia restaurasaun Independencia RDTL, konfigurasaun politika nasional domina hosi blokus rua, Fretilin no Mari Alkatiri hosi sorin ida.

Sorin seluk Kay Rala Xanana Gusmao no ikus mai harii partidu CNRT. Politika nasional muzika melodia toka hosi autores hanesan no atores segundares seluk dansa no hananu tuir ritmu muzika.

Mosu terceira via politika, ne’ebe konsekuensia direta hosi procesu eleisuan Presidensial, hamosu forsa politika ida, ne’ebe tau hamutuk resultadus votus hosi kandidatus JRH no FLA, ho total 35% ne’ebe bele representa forsas politika ne’ebe signifikadus tebes iha eleisaun Parlamentares no ninia konsekuensia ba forma V Governu Konstitusional.

Realidade mak ne’e, 20.05.2012, Timor-Leste tenki iha duni Presidente Republika ida, movimentu terceira via ninia inklinasaun ba kandidatus ne’ebe,ita bele halo ona previsaun se mak atu sai Presidente ba periudu 2012-2017. Mas terceira via forsas politika, bele iha ona instrumentu atu halo negociasaun ho qualquer forsas mai hosi primeira via lidera hosi partidu Fretilin no Mari Alkatiri, segunda via lidera hosi CNRT no Kay Rala Xanana Gusmao!

*Editorial Forum Haksesuk! Dili, 21.03.2012!