MUAMBA

MUAMBA

Husi Estanislau S. Saldanha

Staf Dosenti ho Peskizador iha Center for Applied Research and Policy Studies (CARPS), Dili Institute of Technology (DIT), Timor Leste.

Muamba laos rai nia naran, ka teoria ruma ka prezidenti nasaun ruma ka premiadu nobel ruma. Maibe Muamba hanesan jogador futebal ida nebee joga iha Klubu Futebal, Bolton Wanderes, membru English Premiere League. Muamba nia naran kompletu mak Fabrice Ndala Muamba nebee moris iha Zaire (Kongo), 6 Abril 1988. Nia mos membru ekipa Sub-21 Inglatera nian. Antes nee, Muamba mos joga iha klubu Arsenal ho Birmingham City (Wikipedia).

Iha Domingu madrugada (18 Marsu 2012), Muamba ho nia klubu joga hasoru klubu Tottenham Hotspur, klubu Inglatera seluk, iha Tasa FA. Jogu lao diak, ho kompetetivu, no hetan suporta makas husi supporter klubu ida-idak nian. Iha minutu 40 primeira parte, Muamba derepenti deit monu iha kampu laran (la iha benturan ho jogador seluk), la hamrik no la kualia. Nia kondisaun kritiku loos, no lori kedas ba hospital. Nia kolega sira hakfodak, mediku tim rua buka ho kbiit tomak hodi fo primeiru sukoru hodi salva Muamba nia moris. Too artigu nee hakerek hotu Muamba nia kondisaun sei kritiku hela no oras nee halao hela tratamentu iha ICU, London Chest Hospital.

Bainhira Muamba iha kondisaun kritiku, ofisial ho FA desidi hodi hapara jogu hodi hatudu sentidu respeitu ho solidaridade ba Muamba. Mediku, jogador ho supporter husi klubu rua nee nonok hotu, la espera, no reza makas hodi Muamba didiak la’lais. Importante liu supporter sira la protesta bainhira komisaun organizadora deside hodi hapara jogu, maske sira selu karu, lakon tempu ho energia hodi hare jogu nee.

Lisaun sa ida mak ita bele aprende husi kazu Muamba? Tanba saa sira simu hodi hapara jogu? Tanba ema nia moris, ka vida nee aas ka folin liu sasan hot-hotu. Realidade hatudu kompetisaun jogu entre Bolton ho Totenham lao makas, kompetetivu ho skor hatudu 1-1. Maibe iha klaran sira hapara, tanba vida ema nian. Nunee, ema nia moris, la iha minoria ho maioria, no la iha metan ho mutin, la iha lorosae ho loromonu, la iha liu rai ho “atan”, ho la iha fronteira. Maibe ema hotu iha folin hanesan nebee merese hetan respeitu aas ho “tratamentu VIP”. Ema mak sai sentru kompetisaun, no kompetitor sira tenki respeita tomak ema nia vida, maske ema nee mai husi klubu/grupu/partidu seluk.

Iha kazu Muamba, Kyle Walker, defender Tottenham, hatoo:” la interese se mak o suporta, la interese o laos fans futebal, la interese o laos ema religius. Mai reza ba Frabrice Muamba. Ka Andy Carroll, Jogador Liverpool hatoo: Tasa FA la folin buat ida, futebal la folin buat ida, agora Fabrice Muamba mak buat hotu-hotu (Skysports, 18 Marsu 2012). Nunee mos jogador Andrea Pirlo husi Juventus, Italia, dedika tim nia manan 5-0 ho Parma ba Muamba (Factbox, Yahoo, 18 Marsu 2012). Bainhira kazu hanesan nee akontese, maka komunidade futebolista sira sei sai hamutuk ida deit (Robie Savage iha BBC, 18 Marsu 2012). Iha kazu seluk, Eric Abidal, Defender Barcelona nian, nebee moras no tama hospital atu halo transplantasaun hati, Jose Mourinho, Treinador, Real Madrid, hatoo: ba Abidal hau hatoo ami nia simpatia ba nian. Iha kazu hanesan nee, la iha Real ka Barca, la iha koor, so iha jogador foin sa’e nebee nia moris fantastiku (Kompas, 18 Marsu 2012). Nunee hatudu katak maske sira iha kompetisaun, rivalidade, dala ruma tebe malu iha kampu laran, maibe konaba ema nia vida, sira hotu hamutuk hodi tane aas, la bele iha fronteira, koor no violensia.

Iha naroman nee, Timor Leste foin hahotu kompetisaun prezidensial ka Eleisaun Presidensial 2012 hodi hetan “tasa”, sai Prezidenti RDTL. Tasa seidauk simu, tanba prosesu avaliasaun rezultadu sei halao hela husi Juri (CNE/STAE). Iha kompetisaun nee, kandidatu ida-idak iha klubu (partidu ho grupu kampanye) ho supporter (membru ho simpatizante). Kandidatu sira hasai osan makas hodi selu honor, publisidade, transporte, aihan, ho seluk tan ba sira nia aan, organizador, supporter ho simpatizante balu. Nunee mos sira nia simpatizante sira hasai osan, energia ho tempu hodi ba vota ho asisti eleisaun presidensial nee. Situasaun nee kuaze hanesan mos kompetisaun futebal iha kontestu organiza, publika ho despeza. Nunee sira la bele tau aas osan ho interese politika partidariu iha povu nia moris leten.

Maske rezultadu kompetisaun foin hahu hatoo, maibe nee sei dok husi kompletu. Iha kondisaun hanesan nee, jogador (Kapres sira) sira ho nia sponsor sira balu hahu toba la dukur, tensi, no stressful. Sira nian tensaun bele sae makas liu tan, bainhira arpitu (CNE/STAE) prosesa rezultadu neineik ho hatoo rezultadu kleur liu, tanba la pasiensia hein. Hanoin ho espetativas aas, maibe rezultadu seidauk sai ka rezultadu inisiu sai la tuir espetativa inisiu. Iha nee, jogador, organizador ho supporter sira, dala ruma, bele hahu dun malu ho fo sala ba malu ka ema seluk. Ka expresa sira nian tensaun iha forma violensia nebee bele destroi buat barak nebee investa ona. Liu-liu vida hakmatek ho dame hodi sai fondase ba dezenvolvimentu hodi hasai ema husi moris mukit ho kiak.

Iha situasaun tensaun ho stressful nee, ita espera kadidatu ho nia partidu politiku/grupu sponsor, supporter ho nia simpatizante sira tenki rasional nafatin, fuan bot ho ulung malirin hodi hein ho simu rezultadu kompetisaun nee. Karik rezultadu kompetisaun nee hatudu Kapres ida mak manan, mak Kapres seluk tenki simu. Nunee la presiza halo protesta oioin ho halo violensia hasoru arpitu, kapres seluk ho nia supporter ho simpatizante sira.

Importante mos Kapres, tim ho nia simpatizante sira tomak tenki iha sensibilidade ho tane aas vida ema nian. Konaba ema nia vida, ema hotu tenki dehan: la iha Fretilin, CNRT, PD, PSD, PR ho seluk. La iha Kapres A, B ho C. So iha deit vida ema nia importante, hothotu tenki buka salva ho dignfika. La bele iha ema ida lakon nia vida tanba deit kompetisaun eleisaun prezidensial. Kapres sira hotu tenki deklara katak sira valoriza ema nia vida nee (mate, moris ho kanek). Tanbe nee mak problema fundamental iha nasaun ida. Kuandu ema ida mak kanek, moras ho mate, kapres sira hotu tenki senti solider, maske ema nee mai husi grupu seluk. Timor Leste nee populasaun oituan, sira moris mukit, moris terus ho halerik iha tempu naruk ona. Nunee kapres sira tenki hamutuk hodi lori dame, domin ho moris diak ba timor oan hotu.

Too ona tempu ita kaer liman, ho fuan ho laran tomak, maske iha diferensa, hodi tane aas ema nia moris. Nunee kandidatu ida mak manan, ida nee hanesan responsabilidade politika, moral ho etika hodi hakoak ema hotu no serbii povu didiak ba dalang diak ho progresu. Mos kapres nebee mak lakon tenki simu nee ho laran ho fuan boot hodi la halao asaun violensia. Nunee ita tane aas nafatin ema nia vida, direitu fundamental ema ho-hotu hodi moris. Rai lulik nee la bele tan ona hela iha nakukun laran, no povu terus nain nee la bele tan ona halerik, lakon nia vida ho sasan tanba prosesu politika nebee hola hun husi imaturidade politika ho egoismu lider sira nian. Kapres sira hotu presiza asegura katak prosesu politika nebee lao dadaun iha eleisaun prezidensial 2012 nee tenki dok husi violensia. Say no to violence. Ita hein.***