VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

terça-feira, 13 de dezembro de 2011

Ho Feto Nia Lideransa Lori Ita ba Paz no Estabilidade

Conferência da Mulher

Eleições 2012 e a Participação da Mulher

Hakbi’t Lideransa no Partisipasaun iha Eleisaun 2012

‘Delta Nova’ Díli, 5-6 Dezembro 2011

Tema: “Ho Feto Nia Lideransa Lori Ita ba Paz no Estabilidade”

Tema ida nebé hili ba konferênsia loron rua hahú ohin to’o aban, tema importante ida dunik. Tamba ne’e, hahú ona diskusaun didi’ak, koalia hodi fó resultadu di’ak ba ita nia Nasaun. Pasu bo’ot ida - hakat bo’ot ida.

Tamba ne’e hau ható parabéns ba organizadores. Parabéns mos tamba produz ona esboço ‘Planu Estratégiku’ atu hakbi’it lideransa no partisipasaun feto, la’ós de’it iha eleisaun tinan oin mai, 2012, maibé liu, ba mós futuru.

Capacidade ba koalia iha público no iha halíbur eh reuniões no kampanha, formasaun polítika kontínua, no formasaun atu hasae kapasidade lideransa, identifika ona iha esboço ‘Planu Estratégico’, núdar áreas nebé precisa hasae feto nia kbi’it.

Limitasaun orsamentu kondisiona feto nia kandidatura; partidu polítikus seidauk halo sosializasaun alterasaun lei eleitoral wainhira hasae quota feto nian iha lista kandidatura eleisaun lejislativa ninian, hosi quota 25 por cento ba liu por cento 33.0.

Menus prezensa fêto nian iha estrutura lideransa, maske kapacidade potensial fêto nian atu kontribui iha estrutura lideransa, iha hela.

Iha área rural fêto tur iha estrutura maibe núdar formalismu ida de’it.

Transporte mós súsar.

Sistema patriarkal produz okupasaun doméstika mak ‘feto enfrenta’ barak liu.

Fêto lafiar a’an katak nia mós bele kandidata a’an.

Laíha mekanizmu transparênsia no laíha prosesu demokrátiku hodi define membru Partido Polítiku ba konkore iha eleisaun parlamentar. Laíha atensaun husi PPs ba feto.

Konsiensia fêto nian kona-ba importânsia envolvimentu iha polítika.

Súsar atu identifika fêto sira nebé iha kapasidade potensial.

Feto polítika seidauk iha unidade.

Tamba esforsu identifka frakezas hirak ne’e, hau ható mós parabéns, tamba hatudu dedikasaun organizasaun no partisipante sira nian, atu identifika lolós sá-sá de’it maka sei sai, hanesan lutu bo’ot, trava avansu fêto nian, iha polítika nasional.

Fatores balu ita bele bolu estruturais; seluk bele bolu kondições mínimas; seluk fali ita bele bolu polítika Poder ninian.

Ohin loron histórico ida. Iha 1975, loron ohin, loron lima fulan Dezembro nian, mak Presidente Gerar Ford no Henry Kissinger semo to Jakarta, dehan ba matebian Presidente Suharto, autoriza plano invasaun no ocupação Timor-Leste ninian, nebé halo iha 7 Dezembro, bainrua. Iha assalto kapital nian, mak ema barak mate. Ita nia hanoin ba ita nia heróis tomak.

Iha mós loron 7 fulan Dezembru mak saudosu Borja da Costa, ne’ebé hakerek poemas revolusionários barak hodi baku ita nia re’en-tôs, hade ita, hodi entende, tamba Sá, tan Sá.

Identifika causa hanesan Polítika Poder ninian, bele loke dalan ba ita husu “tan sá?” eh, hanesan saudosu Borja da Costa nia husu iha nia poema consciencializasaun nian: “Kolé Lele Mai” - hasae consiencializasaun polítika ba ita hotu, hodi ohin loron, ita mos bele partisipa iha polítika nasional – “Sá sá, sá hanalo, se, se, se lós, se? - Kole lê lê mai” – fó estímulo di’ak ida ba ita hotu, atu halo refleksaun ohin-loron, tamba ne’e mós interesse nasional.

“Tan sá maka fêto polítika sira seidauk iha unidade?”

“Tan sa maka laíha atensaun hosi partidu polítikus ba fêto?”

“Tan sá mak laíha mekanismu transparênsia no laíha prosesu demokrátiku iha PPs nia laran, atu tau iha lista kandidatura?”

“Tan sá fêto menus; feto lá fi’ar a’an atu kandidata?”

“Tan sá sistema patriarkal?”

“Tan sá feto situasaun kondenada ba servisu todan uma nian ka (hanesan hakerek iha esboço Plano Estratégico) bebán kerjá?”

“Tan sá kapasidade intervensaun polítika fêto nian sei menus hela de’it?”

“Tan sá?”. Ho ‘tan Sá?’ hirak ne’e, maka poeta nasionalista, saudoso Borja da Costa, apela ba ita, tinan 37 kotuk, atu ita uza ita nia matenek, ho espíritu krítiku, husu nafatin: Sá sá, sá hanalo, se, se, se los, se, kole lê lê mai...

Hau haré katak, apelo ida ne’e reflete ona iha Esbosu Planu Estratégiku.Atu hakbi’it lideransa no partisipasaun fêto nian, iha eleisaun 2012 - no mos liu, ba futuru, tenke iha debate maka’as – labele formalismu de’it.

Resposta klean liu tan presiza haklekar “Tan sá?” hirak nebé hatama iha Plano Estratégico final, hodi solusaun di’ak, lolós no momós, bele hetan iha loron rua – ohin no aban – c’konferênsia importante ba nia ita nia Nasaun no Estado.

Hanoin de’it ba eleisaun legislativa 2012, ita be husu, oin sá tan? Oin sá los? Maka ita bele hasae liu-tan Fêto nian kbi’it?

Dauluk, ita labele haluha katak iha eleisaun 2012, eleitorado bo’ot liu uluk. Total votantes eligíveis sei liu 620 000 (seiscentos e vinte mil – rihun atus ne’en ruanulo resin). Husi total ida ne’e, feto deit sei to’o 300 000 (rihun âtus tolu), katak 46 por cento.

Oin sá-tan Lideransa Fêto nian, bele mobiliza votantes fêto, rihun âtus tolu, atu hâkat ba vota. Liliu, oin sá-tan, ita bele asegura fêto sira nia votos labele sai votos nulus, labele contribui ba votos nulus. Ne’e maka prioridade estratégica importante ida bá conferência nia discussão, atu hetan solusaun diak.

Solusaun ida maka, halo campanhas edukasaun cívica iha escolas. Liliu iha escolas ensino superior ninan, nebé iha tinan kotuk, 2010, iha 18, 553 estudantes, maibe fêto deit 7,653 - katak 41 por cento. Ne’e mesak otas votantes ona. To’o 2012, hau fíar percentagem fêto nian iha ensino superior sei âs liu-tan.

Hanoin mos katak populasaun nasional liu 1, 066, 409, (milhaun ida, rihun nennulo resin nen, atus hat resin sia) ho fêto deit 522, 210 (rihun atus lima ruanulo resin rua, atus rua sanulo), 48.97 por cento (por cento hatnulo resin ualo, ponto sianulo resin hitu).

Ita haré dados husi census tinan kotuk, 2010, ninian, hatudo katak distritos Vikeke, Díli, Liquiça, Ermera, Bobonaro, Covalima, iha 40 – 60 por cento populasaun (populasaun por cento hatnulo to nennulo) maka moris ho menos 88 sentavus (centavos ualnulo resin ualo) por dia, loron ida-ida.

Hatudo mos katak distritos Aileu, Manatuto no Ainaro, iha 60 -80 por cento populasaun maka moris ho menus 88 sentavus por dia. Ita atu celebra 100 anos revolta Manufahi 1912 nian, maibe distrito Manufahi mukit liu hot-hotu iha ita nia rain, ho 80 – 100 por cento populasaun moris ho menus 88 sentavus loron ida-ida. Distritos Baucau ho Lautém deit maka diak liu, ho populasaun lató por cento ruanulo (20 por cento) maka moris ho menus 88 sentavus loron ida-ida.

Iha Esbosu Plano Estratégiko, atu hasae kbi’it feto nian ba eleisaun 2012, identifika mos súsar transporte no financiamento, distância husi uma ba centrus votasaun, envolvimento fêto sira nian iha polítika; hirak ne’e hanesan súsar eh constrangimentos nebé tenki hakat liu, hodi hasae fêto nia kbi’it ba partisipasaun eleisaun legislativa 2012.

Tamba realidade ida ne’e hotu, implementasaun estratégia tenki selectiva; katak foca iha áreas nebé, maske ho tempo badak no orsamentu no rekursus seluseluk tan limitados, acções hirak nebé adopta husi conferência ida ne’e, núdar karik núdar ‘Plano de Acção’, diak de’it, wainhira considera súsar no realidade.

Tamba ita hakarak produz resultado, katak atu hasae dunik kbi’it fêto nian ba eleisaun legislativa 2012, ‘Plano de Acção’ tenki a) diak dunik, no b) implementa tuir dalan matenek.

Hau mos fiar; katak dalan nebé atu lori ita ba Paz no Estabilidade, bele diak de’it, wainhira fêto Timoroan iha kbi’it atu fo lideransa.

Tamba ne’e, molok hotu, ita nia refleksaun ba (maxim) ka liafuan nebé dehan katak:

A woman is the full circle. Within her is the power to create, nurture and transform.

“Fêto maka círculo completo. Tamba iha Fêto maka ita hetan poder criador; iha Fêto maka ita hetan mos poder atu hakiak; iha mos Fêto maka ita hetan poder atu transforma.”

Fêto Timoroan wainhira hetan sucesso habúras dunik ‘círculo completo’ ida ne’e, ‘círculo completo’ ida nebé nia deit maka iha, “Nia Lideransa Lori Ita ba Paz no Estabilidade” sei iha kbi’it.

Kbi’it atu hamoris, hakiak no transforma…

Reflecte tuir esboço plano estratégico, ne’e katak tenki:

· Transforma status quo;

· Transforma situasaun patriarkal sociedade ninian nebé hakiak luto bo’ot ba fêto nia capacitação política;

· Transforma mentalidade política iha PPs nia le’et, nebé sai mos luto bo’ot ba desenvolvimento lideransa fêto nian;

· Transforma condicionalismos oi-oin nebé ladiak ba hamoris condições mínimas nebé precisa dunik, hodi fêto nia participação política labele simbólica deit; katak, karik iha ona quantidade, oin Sá maka has’e no habúras qualidade;

· Transformasaun hirak ne’e hotu atu produz efeito eh impacto hirak nebé bele transforma ambiente hot-hotu ladiak, katak barreiras, atu hasae fêto nia kbi’it iha arena política nacional.

Ho hanoin hirak ne’e maka atan-oan hau, ható ba Conferência Nasional “Hakbi’it Lideransa Fêto no Partisipasaun iha Eleisaun 2012”.

Ho votos ba serviço ohin to aban nian, hetan sucessos tomak.

Obrigado!

*Agio Pereira
5 de Dezembro 2011

Sem comentários:

Enviar um comentário

Nota: só um membro deste blogue pode publicar um comentário.