Viajem PR ba Indonesia provoka polemika no kritika ba GPR

Dili. Forum Haksesuk (FH). Viajem Presidente Republika (PR) ba Indonesia iha loron 13 fulan Novembru tinan 2011, provoka polemika, tamba tuir Deputado Antonino Bianco, husi bankada Fretilin, katak, ”PR labele inpoen fali ninia hakarak ba orgaun Parlamento Nasional (PN), ita, envez de koncentra ba OJE ne’ebe interese nasional” nian.

Husi Hugo Costa, CNRT, dehan ”la merece PR halo tratamentu hanesan ba PN, hanesan ninia boneka, tratamentu ida ne’e la merece iha nasaun demokratiku, so bele iha tratamentu hanesan ba orgaun soberania nasaun ne’ebe iha biban existe iha kolonializasaun”.

Gertrudes Moniz, husi PD, ”husu atu Gabinete PR (GPR) fiksa ajenda OJE2012, labele toba mehi halo planu. Husu ba GPR halo planu no jestaun ne’ebe diak”. Pedro Costa, husi nia parte defende katak ”PR ninia poder uni pessoal, kompetensia ba orgaun sira seluk, neduni la sala ita aprova ita ninia PR ninia viajen”. Tenik Pedro, “tuir lolos GPR halo ajenda ida ke antecipada hodi hato ba PN, hafoin meja ajenda ba debate”. L7, husi UNDERTIM, mos defende katak ”interese ba nasaun no povu ida ne’e, saida maka PR halo buat ruma, relasaun entre ita ho Indonesia, louva teb-tebes ba xefi Estadu ninia servisu, husik nia viajen no la bele impede ninia viajem”. Francisco Araujo, ASDT, hakatak ”tuir lolos resolusaun mai antes debate OJE2012, kala viajen ne’e importante diak no OJE2012 mos importante”. Francisco Araújo mos ”husu atu PR2012 foun atu trata PN hanesan mos orgaun soberania seluk, buka hadia administrasaun GPR”. Josefa Pereira, husi Fretilin, dehan ”problema maka ne’e, interupsaun ba diskusaun OJE2012, la bele interompe ho asuntus sel-seluk, husi GPR mos iha konesimentu konaba ajenda ba debate OJE2012”. Manuel Tilman iha nia intervensaun fo hanoin, katak, ”kompetensia rasik tuir K-RDTL, PR tenki komprende konaba OJE2012, PR buka apar ho debate OJE2012 ne’ebe bot”. Osorio Florindo, Fretilin, mos hateten, ”PR ba tuir KTT ASEAN, nia hatene ajenda PN nian konaba plenariu especial, halo ajenda husi GPR tenki planu antes”. Osorio kestiona, ”karik PR ba halo ajenda seluk karik, ba angariar fundu ba kampane PR2012 karik”? Husi Romeo Moises, CNRT, husu para ”labele dada tan diskusaun tamba labele impede fali ajenda principal, tamba ita buka koncentra ba OJE2012”.

PN autoriza PR viajem ba Indonesia, ho votus favor (34), kontra (0) no Abstensaun (16). Tuir Konstituisaun RDTL, wainhira viajem PR ba liur karik tenki husu autorizasaun husi PN!