VISAO MISAO OBJECTIVO SPORTIMOR FH KKN HOME FH LPV ARTIGOS FH MUZIKA LIA MENON FH RESPONDE

segunda-feira, 21 de novembro de 2011

Serie “Esclarecimento Eleitoral” (8) Votação Exterior: localização democracia, globalização eleição

Serie “Esclarecimento Eleitoral” (8)

Votação Exterior: localização democracia, globalização eleição

Martinho G. da Silva Gusmão

Iha blog facebook “Emerging Leaderhip in Democracy”, Jo Monteiro hakerek nune’e “la kleur tan TL selebra festa demokrasia liu husi elisaun jeral 2012 (elisaun PR no elisaun parlamentar). Hau nia pergunta mak ne'e: TL iha ona lei ida nebe sai hanesan baze legal ba sidadaun hirak nebe hela iha estranjeiru atu hotu2 iha direitu ba votasaun ou lae? tamba esperensia hatudu katak iha 2007, ami nebe mak iha Indonesia momentu neba labele fo votus tamba ita ninia atual Ministra Justisa Sra. Luciba Lobato hateten katak TL seidauk iha lei ida nebe mak autoriza sidadaun TL iha rai liu atu tuir elisaun jeral. Karik situasaun ida nee sei akontese tan iha 2012, entaun ema Timor oan barak, liu iha rai liur (indonesia, inglaterra, australia, portugal, brazil, etc) sei lakon tan sira nia direitu ba votasaun. Parlmentu nasional no CNE ninia pozisaun too iha nebe? Oinsa ita bot sira nia pontu da vista ba asuntu ne'e. Obrigado.”

Base legal: localização democracia

Iha LEPN/ LEPR artigo 37o-A/ 39o-A ho titulo “Timorenses no estrangeiro”, hatur no hatudu dalan oinsa mak atu halao eleição no votação ba Timor oan sira iha rai liur, dehan ...

1. Os cidadãos temorenses que se encontram ou residam no estrangeiro gozam da proteção do Estado”. Katak, Timor oan sira ne’ebe hela iha rai liur hetan proteção husi Estado. Numero husi artigo ida ne’e la iha significado barak kona ba eleicao. Deputado sira husi PN foti rohan ida husi Constituição RDTL artigo 22o ne’ebe hakerek “Os cidadãos timorenses que se encontrem ou residam no estrangeiro gozam da proteção do Estado ...”, no rohan seluk tuir mai dehan “... para o exercício dos direitos e estão sujeitos aos deveres não sejam incompatíveis com a ausência do pais”. Maibe, pergunta mak ne’e: se mak hanaran “cidadão timorenses”? Constituição dala ida tan hateten kona ba “cidadania originaria” (sira ne’ebe moris mai Timor oan ona, inang-aman husi Timor nanis kedas) no “cidadania adquirida” (ema sira ne’ebe ran kahor, inang ka aman la’os Timor; bele mos ema ne’ebe la iha ran Timor nian maibe hakarak sai cidadão Timor nian liu husi processo loos nian). Atu hatene ida ne’e, ita fila ba lei kona ba cidadania timorense atu defini estatuto Timor oan sira nian. Hodi nune’e, ema ne’ebe hateke ho matan tomak la’os Timor oan lalika lohi tun lohi sae dehan fali Timor oan ho documento falsu.

2. Para efeitos do numero anterior, os cidadãos timorenses podem exercer o seu direito de voto, desde que estejam recenseados e possuam cartão de eleitor atualizado e passaporte valido”. Ida ne’e kona liu ba eleicao. Katak, atu hakat ba eleicao iha rai liur (external voting), STAE sei halao atualização base de dados atu hatene lolos Timor oan hira mak hela iha rai liur. Atu halo programa ida ne’e, CNE mak sei halo supervisão. LEPN/LEPR husu atu eleitor sira iha rai liur tem que iha cartão eleitoral no passaporte Timor nian. Los duni, ita Timor oan sira bele iha dupla cidadania – katak, bele kaer cidadania rai seluk (liu-liu Portuguesa) no Timorense. Maibe, keta haluha katak ita hasoru problema iha fundo – sira tuir eleição, maibe sira bele eleito (sai candidato) ka lae? Ida ne’e ita tem que resolve didiak. Basa, hetan cargo electivo ida, hakarak ka lakohi nia sai representante Estado Timor nian. Tuir hau nia hanoin, ema ne’ebe kaer cargo político ruma tan hetan liu husi eleicao, sei labele usa passaporte portuguesa atu halao knaar. Oinsa ho ema ne’ebe kaer passaporte Portuguesa atu sai assessor internacional hodi manan osan boot, maibe kaer passaporte Timor Leste nian atu hetan posição política (manan osan boot nafatin, inclui hada’u oportunidade atu manan pensão vitalícia)? Ita nia lei seidauk hatur sasukat lolos atu

3. O procedimento aplicável é definido por diploma do Governo”. Ne’e katak, atu bele halao eleição iha rai liur, Governo mak halo fali diploma ida atu CNE no STAE bele la’o tuir. Ida ne’e sai hanesan opção todan no “estranho”, tan karakter CNE no STAE “independente”. Maibe, PN fo fali knaar ida atu Governo bele hatama kanuru tohar iha processo eleição nian. Tuir lolos no di’ak liu karik, Governo hamutuk ho STAE lalika hatama artigo ida ne’e iha proposta lei. Wainhira Governo no STAE hatama ona proposta no PN-AMP aprova ona, tem que halao. Maibe, Governo-STAE-PN aprova tiha lei kona ba votação estrangeiro ikus mai dehan labele. Dalan diak liu atu agora foti mak PN tem que halo fali alteração – hasai tiha artigo 39o – A.

Direito ba votação: globalização eleição

Iha ne’e ita tem que dehan katak votação iha caracter “igualdade”. Katak, ema hotu-hotu bele halo votação. Wainhira Timor oan sira hela iha rai laran bele halo eleicao, então sira ne’ebe hela iha liur mos iha direito. Ho liafuan badak, ema ida labele lakon oportunidade atu vota. Ka, ema hotu-hotu iha direito atu ba vota – iha fatin ne’ebe deit.

Husi biban seluk, eleição mos sai ona sasukat ida ba democracia. Liu husi eleição mak cidadão hotu-hotu bele halo julgamento político ba sira nia ukun-nain sira. Ne’e duni, Estado labele halo impedimento ruma atu cidadão lakon sira nia direito. Constituição rasik hatur katak Estado sei garante direito cidadão tomak.

Maibe, husi biban seluk wainhira Estado ninia instrumento seidauk biban atu hametin direito ida ne’e, sira bele hola decisão atu hein ba loron seluk. Ne’e duni, Governo nudar ai-rin ida husi Estado hanoin katak sira seidauk iha kbiit atu halo eleição iha rai liur. Ho liafuan badak, Governo mak seidauk iha capacidade atu facilita eleição iha rai liur. La’os órgão eleitoral mak la iha capacidade. Nudar órgão ida ne’ebe profissional iha área eleitoral nian, CNE/ STAE bele hala’o. Maibe, Governo mak seidauk pronto atu fo tulun ka fo dalan ba CNE/STAE.

*) Hakerek nain – Direitor CJP Diocese Baucau; Comissário Representate Igreja Católica iha CNE; Coordenador ba sub-comissão educação cívica.

Sem comentários:

Enviar um comentário

Nota: só um membro deste blogue pode publicar um comentário.