Série “esclarecimento eleitoral” (1) ÓRGÃOS DA ADMINISTRAÇÃO ELEITORAL

Série “esclarecimento eleitoral” (1)

ÓRGÃOS DA ADMINISTRAÇÃO ELEITORAL

Martinho G. da Silva Gusmão

Besik daudaun ona eleição, ema hotu sei hateke lisuk Comissão Nacional de Eleições (CNE) no Secretariado Técnico da Administração Eleitoral (STAE). Tuir Lei-Inang artigo 65 no. 6 dehan “A supervisão do recenceamento e dos actos eleitorais cabe a um órgão independente, cujas competências, composição, organização e funcionamento são fixados por lei”. Husi ne’e mak PN halo lei nº. 5/ 2008 no alteração nº 6/ 2011 kona Órgãos da Administração Eleitoral (LOAE). Husi constituição ita hare kedas knaar boot 2 ne’ebe CNE halo mak “supervisão” ba “recenseamento” no ba “actos eleitorais”. LOAE hatur hikas CNE ninia competência (a–k) hodi esplica liu tan kona ba “actos eleitorais”.

Atu hatene didiak CNE ninia competência, ita bele compara eleição ne’e hanesan “jogo” ida (i.e., football karik) iha campo democracia nia laran. Equipa sira ne’ebe atu joga mak partido político. Atu manan ka atu lakon, ne’e partido político mak tama campo laran atu joga contra malu. Atu joga diak no hakarak manan, sira tenki halo treinamento maka’as, halo estratégia programática no esquemática hodi joga didiak. Atu joga foer ka joga mos, ne’e partido mak halo iha campo laran. Atu hetan cartão mean ka kinur, ne’e partido mak sukat ninia jogo. Atu hatama gol ka tebe sai ba liur deit mos, partido mak iha ain no matan atu hare baliza. Dirigente partido sira mak hanesan equipa “treinador”, hamutuk ho equipa “massage” nian. Wainhira dirigente la iha imaginação política atu manan ho elegância, sei mosu joga foer no lakon.

Husi biban seluk, CNE/ STAE ne’e hanesan “comissão organisadora” (panitia) ho ninia “seksi” oi-oin. Sira mak prepara campo, bola, fatin ba jogador sira atu hatais farda, fatin atu ema tur no hare jogo, halo sorteio, simu lista jogador sira, hare documento atu jogador sira diak ka fraku, fo esclarecimento kona ba regra do jogo, hatudu fatin consulta, bolu labarik sira atu hili bola ...! Ho liafuan badak: CNE/ STAE ne’e “seksi sibuk” iha campo ninin. Mak ne’e deit.

Maibe, Parlamento Nacional sai hanesan FIFA/ FFTL. Sira mak determina buat hotu, liu-liu regra do jogo, iha poder tomak atu bele determina jogo ida nia lalalok. Nune’e mos, atu bele hakotu lia iha tan órgão seluk – Supremo Tribunal de Justiça – atu sai hanesan oficial do jogo ka “arbitro” (wasit).

Ho ilustração iha leten, hau hakarak hatudu poder atu halo lei (PN) no tesi lia (STJ) no atu halao lei (CNE/ STAE). Atu nune’e ita la bele kahor órgão ida-idak nia competência. Hanesan iha eleição 2007, iha Deputado/ Membro Governo balun haklalak iha GMT dehan “professor no doutor sira iha CNE halo/ hakerek tiha lei, maibe la hatene implementa”. Deputado balun ba iha CNE hodi hasai lia-foer (tolok) comissário sira. Membro governo balun hakerek carta ba CNE hodi acusa nudar “pior peça” (bahasa Jawa karik: “gombal”, sampah). Deputado balun hamutuk ho media comunicação halo atake ba CNE hodi dehan “impoten”, “tauk ten”, nst. Buat hotu ne’e hatudu deit katak ema barak, liu-liu político-nain sira la hatene órgão da administração eleitoral ne’e. Hela aat liu tan wainhira deputado no membro governo mak iha ulun atu ‘insulta’ CNE [caso quo, STAE la dun hetan problema, tan ema governo nian].

Perspectiva geral ruma

Atenção atu organiza eleição didiak ka “fair and free election” hahu mosu iha 1980 ba leten. Nune’e, dinamika atu desenvolve instituição kona ba administração eleitoral mos hahu. Molok ida ne’e, estado barak mak sei domina husi ditadura sira. Wainhira ditadura sira hahu monu ida-ida, atmosfera política hatudu compromisso atu fo espaço mos ba media no observador sira atu tau matan lisuk ba eleição. Husi ne’e mak mosu promoção ba democracia global no politics marketing. So iha deit 1990 ba leten mak rai barak halo “rede” atu fahe sira nia “technical know how” kona ba eleição. Ho liafuan badak, órgão administração eleitoral sei nurak hela iha espaço democracia nia laran.

Wainhira estado barak sei nakonu ho ditadura, órgão eleitoral mai husi governo rasik ka estado mesak mak organiza. Ida ne’e mak hanaran “governmental models”. Ita fo exemplo: iha tempo Indonésia nian, “Kementerian Dalam Negri” mak organiza hotu processo eleitoral – husi enquadramento legal, regulamento too postura administrativa, inclui orçamento mai tomak husi governo. Ninia resultado mos ema hatene hotu ona – Golkar mak manan hela deit. Maibe, iha nação balun ne’ebe kaer metin nafatin modelo governamental ida ne’e, maski la’os ditadura. Rai sira ne’ebe tuir modelo ida ne’e mak hanesan – Denmark, Israel, Nova Zelandia, Singapore, Suedecia (Sweden), Sucia (Switzerland), Tunísia, Reino Unido no Estados Unidos. Rai hirak ne’e halao eleição tuir dalan democrático tebes, maski organiza husi Governo. Hanesan Israel no Nova Zelândia (2008), maski governo mak organiza, maibe ikus mai “aliança maioria” ida mak kaer ukun. Basa partido “mais votado” ninia forsa (kadeira/ assento parlamentar) la too atu kaer ukun mesak.

Modelo seluk mak hanaran “independent body”. Modelo independente, katak, OAE hamrik mesak no goza sira nia autonomia iha administração no financeira tomak. Ida ne’e hatudu katak sira sei la halo contabilidade ba Governo ka Ministerio ruma. Sira bele hatoo relatorio ba órgão legislatura, ka ba knaar judiciário ruma ka ba Chefe do Estado. Hare husi ne’e, membro OAE labele mai husi executivo (ka nomeia husi Governo). Rai sira ne’ebe hahu sira nia democracia hodi hili modelo ida ne’e mak hanesan – Armenia, Australia, Bosnia-Herzegovina, Burkina Faso, Canada, Costa Rica, Estonia, Georgia, India, Indonesia, Liberia, Mauritius, Nigeria, Polandia, Africa do Sul, Thainlandia no Uruguay. Exemplo boot liu iha mundo mak Brasil. Órgão eleitoral ne’e hanaran Tribunal Superior Eleitoral (TSE) ne’ebe halulik ona iha Constituição 1934. Sira nia decisão sempre “final”. La iha tan órgão seluk ne’ebe aas liu sira. So wainhira sira hakanek Lei-Inang, nune’e Tribunal Constitucional mak bele julga ninia ‘inconstitucionalidade’. Maibe, la julga processo eleitoral rasik.

Dala ruma mosu mos modelo ne’ebe hanaran “double-independent” – katak, harii órgão 2 ne’ebe independente hotu husi executivo. Ida sei hola knaar atu halo decisão politica (policy decision) kona ba processo eleitoral; ida seluk hola knaar atu responsavel ba implementação no halao processo ne’e. Rai sira ne’ebe halao tuir modelo ida ne’e mak Jamaica, Romania, Suriname no Vanuatu.

Ikus liu mak hanaran modelo Misto – katak, modelo ne’ebe kahor husi independente nian no governo nian. Husi ne’e, órgão governo nian mak sei organiza no halao processo eleitoral no órgão independente mak superviziona. Rai sira ne’ebe hili modelo misto mak França, Japão no Espanha, ho rai sira ne’ebe colonizado husi França (hanesan Mali, Senegal no Togo).

Hare husi tabela ita bele halo karakteristika hanesan tuir mai:

Aspecto husi modelo	Independente	Governamental	Misto
			Independente	Governamental
Gestão institucional	OAE hetan knaar no kbiit hodi hamrik mesak no la hakruk ba Governo;	OAE halao ninia knaar tuir regime governamental nian iha direição ka departamento Estado nia laran;	La hakruk ba ramo executivo	Lao tuir plano ne’ebe ramo executivo iha governo laran hatur ona
Implementação	Halao ninia knaar ho kbiit no responsabilidade tomak;	Sira nia lalaok sujeito ba executivo ninia controla tuir direição ne’ebe governo hatudu;	Iha autonomia atu halo monitorização no supervisão, no iha caso balun hatur ‘policy’ ba lalaok eleitoral nian	Halao deit buat tomak ne’ebe governo hatur ona, monitoriza no supervisiona – iha caso balun – tuir ‘policy’ ne’ebe componente independente hatur ona;
Contabilidade formal/ relatorio	La hatoo ba ramo executivo iha governo maibe iha caso ruma bele hatoo sira nia relatorio ba legislatura sira, judiciario ka Chefe do Estado;	Hatoo tomak ba ramo executivo iha governo nia laran;	La hatoo relatorio ba executivo, maibe bele ba legislativo, judiciario no Chefe do Estado;	Hatoo relatorio tomak ba ramo executivo;
Poder	Iha kbiit mesak atu desenvolve esquema regulamentar eleitoral tuir lei ne’ebe vigora;	Iha knaar no kbiit ne’ebe limitado;	Dala ruma iha knaar no kbiit atu hatur rasik regulamento tuir lei; monitoriza no supervisiona lalaok eleitoral nian;	Sira nia kbiit no knaar limitado ba deit implementação;
Composição	Hili husi ema ne’ebe labele mai husi executivo wainhira haknaar an iha OAE laran;	Lidera husi ministro ruma tuir função publica. Dala ruma sira la iha “membro”, maibe iha deit secretariado;	Composta husi membro sira ne’ebe la mai husi executivo wainhira haknar an iha OAE nia laran;	Lidera husi ministro ka função publica ruma. La iha “membro”, maibe secretariado;
Termo de referencia	Fo garantia ba membro sira nia knaar tomak (ho liafuan “inamoviveis”), maibe la kona ba buat hirak ne’ebe la’os politica eleição;	Baibain la iha “membro”. Iha ema ne’ebe tur iha secretariado ne’ebe mai husi membro função publica, maibe la iha termo de referencia ne’ebe metin, la iha garantia permanente ba sira;	Assegura sira nia knaar no kbiit, maibe la’os fixa tiha kedas;	La assegura buat ida;
Orçamento	Dispõe autonomia ida atu halo despesa mesak no la hakruk ba controla governo nian husi loron ba loron.	Osan mai husi ministerio tutela tuir plano governo nian.	Alocação osan ketak atu sira halao knaar tomak.	Orçamento nudar componente ida husi ministerio tutela.

Perspectiva Timor Leste?

Tuir ita nia constituição dehan katak, atu halao eleição tenki iha órgão independente ida tuir lei. De facto, Timor Leste adopta liu “double independent”, katak, CNE no STAE sai independente hotu. Ne’e mos bele! Maibe, lei mak hatur buat hirak ne’e didiak atu labele hamosu “double standard of conduct”, katak, dala ruma STAE hakarak halo buat ida, CNE la fo “lampu hijau”. Bele mos, CNE dala ruma haruka atu halo buat ruma, maibe STAE hamrik metin fali iha “lampu merah” nia oin (wainhira seidauk hetan sinal de transito husi Governo).

Atu bele hatene, husi ne’e ita bele hare CNE ninia competência hanesan tuir mai:

a) “Supervisionar o processo eleitoral” – ne’ebe dala barak liu ita traduz nudar “tau matan” ... hare tuir deit. Maibe, liafuan “supervisionar” dala ruma mos bele dehan “dirigir, fiscalizar, executar ...”, katak, iha knaar no kbiit ida atu bele halao decisão ruma;

b) “Zelar pela aplicação das disposição constitucionais e legais relativas ao processo eleitoral”. Katak, CNE halao buat hotu ne’ebe Lei-Inang no lei-oan haruka kona ba processo eleitoral. Exemplo, wainhira PN hakotu katak sei halo eleição ba Timor oan sira iha rai liur, CNE tenki prepara an. Too ikus mai mak PR, Governo no PN dehan “seidauk bele”, CNE continua prepara atu ba rai liur. Tan Lei sei moris nafatin. Buat ne’ebe bele hapara CNE nia actividade wainhira PN halo alteração no hasai tiha artigo 39° A “Timorenses no estrangeiro” (LEPN/ LEPR). CNE la bele rona deit liafuan mamuk husi Governo dehan “seidauk bele”. Tan liafuan “seidauk bele” ne’e la’os lei, maibe declaração baibain ida.

c) “Aprovar os regulamentos de execução previstos na presente lei e nas restantes leis eleitorais, bem como os códigos de condutas para candidatos, observadores, fiscais e professionais dos órgãos de comunicação social” – atu hatudu katak CNE mak “aprovar” parte técnica nian ne’ebe STAE hatoo. Keta haluha, CNE la aprova lei maibe procedimento técnico atu ‘partido político’ ka ninia ‘seleção’ tomak atu hare (furak liu: halo tuir). Ho liafuan “aprovar”, bele mos CNE la halo tuir STAE ninia hakarak. Iha exemplo uluk, STAE no MAE hakarak halo regulamento ida, maibe CNE haruka modifica hotu kedas.

d) “Promover o esclarecimento objectivo dos cidadãos acerca do ato eleitoral através dos meios de comunicação social” – knaar ne’ebe baibain hanaran “educação cívica”, inclui halo debate ka talk-show iha media TVTL/ RTL no hakerek iha jornal nacional sira.

e) “Assegurar a igualdade de tratamento dos cidadãos em todos os actos de recenseamento e operações eleitorais” – wainhira povo ba tau naran atu hetan cartão eleitoral, CNE tau matan nafatin iha processo ne’e liu husi comissário ninia visita ba distrito/ sub-distrito ka pontos focais CNE nian iha fatin tomak ne’ebe STAE halo recenseamento ba.

f) “Assegurar a igualdade de oportunidade e a liberdade de propaganda das candidaturas durante a campanha eleitoral” – katak, wainhira partido político no coligações partidárias hahu halo campanha, CNE tenki asegura atu labele hadau malu fatin no tempu. Keta haluha – lei la haruka CNE atu “assegurar” hahalok partido sira ne’ebe ohin loron agressivo tebes halo “consolidação partidária” (ne’e bele hare fali lei partido político nian no lei kona ba manifestação nian; la bele kahor ho lei eleitoral). Wainhira lei eleitoral la dehan buat ida kona ba “consolidação partido”, nune’e CNE mos lalika ‘liga rai’ tiha. Ho liafuan aas liu dehan, “nulla poena sine legge” (Latim).

g) “Apreciar e certificar as coligações partidárias para fins eleitorais e as listas de candidatos independentes” – CNE mak sei simu ka la simu lista husi partido/ coligações. Iha problema ki’ik ida – kona ba “candidatos independentes” ne’e la’os ba eleição parlamentar maibe presidencial ne’ebe fo deit ba STJ. La’os CNE.

h) “Participar ao Ministério Publico quaisquiser actos suscetíveis de configurar ilícito eleitora de que tome conhecimento” – wainhira ema hatoo queixas ka reclamações kona ba lalaok eleitoral nian ba CNE, nia sei lori hikas ba tribunal wainhira hare crime ruma. CNE la halo investigação; la halo acusação; la fo sanção (castigo ka multa). CNE la’os “wasit” atu fo kartaun mean ka kinur.

i) “Elaborar e remeter ao STJ a ata provisória com os resultados nacionais, a fim de poder ser validado e proclamado o resultado definitivo das eleições gerais”. Importante atu ema hotu hatene: CNE la foti “decisão final” kona ba resultado eleição. So STJ deit mak tuir constituição hola decisão final ba acto eleitoral tomak. Decisão tomak ne’ebe CNE foti sei iha nafatin “recorribilidade dos atos da administração eleitoral” (art 3° LOAE). Katak, wainhira candidato sira, partido político no coligações partidárias, militantes no simpatizantes la haksolok ho decisão (administrativa) CNE nian no la simu resultado ne’ebe fo sai, sira bele lori ba Tribunal. Sira halo deit queixas no reclamações kona ba processo no resultado husi eleição. Sira la foti processo hasoru comissários CNE nian. Tribunal bele anula resultado no haruka CNE organiza fali eleição (reeleição); bele haruka CNE sura fali votos sira; bele mos rejeita argumento husi partido político/ candidato sira. Bele deit! Tan CNE nia decisão ne’e iha deit nível “provisório” (sementara). Tuir Constituição artigo 126° n.2, STJ mak iha kbiit atu “verificar”, “julgar” no “validar” kona ba lalaok eleição tomak. Sira mak bele hatoo resultado eleição ruma ninia constitucionalidade ka inconstitucionalidade. Maibe, tan ita nia STJ seidauk iha, nune’e Tribunal de Recurso mak kaer knaar ne’e.

j) “Verificar a base de dados única de recenseamento eleitoral” – katak, molok atu hakat ba eleição no loron votação, CNE hatudu lolos tiha kedas base de dados. La bele eleição hotu tiha mak CNE hatoo ba publico kona ba ema hira ba vota. Wainhira base de dados dehan 600.000, nune’e ninia resultado ikus la bele hakat liu numero ida ne’e. Bele tun ba 500.000 mak tuir votação karik, hatudu katak, taxa de participação mak tun. Maibe, wainhira CNE declara katak base de dados 600.000 depois resultado husi participação eleitorado sira too fali 650.000, então ema bele desconfia katak CNE ka STAE halo ona crime ruma ka ilícito eleitoral. Iha duni loron ba “exibição de mudança” – katak, CNE/ STAE bele halo mudansa maibe transparente atu ema hotu hatene. Liu-liu halo publicação acto legal iha Jornal da Republica. La’os halo declaração iha jornal baibain (bele loos, maibe la vale).

k) “Desempenhar as demais funções que lhe sejam atribuídas por lei” – halao tan knaar seluk ne’ebe lei haruka. Wainhira lei la fo atribuição ba CNE, então CNE mos labele tama iha zona ne’e nia laran. Exemplo, lei kona ba partido político la hatur knaar CNE iha laran. Tan ne’e, actividade hirak ne’ebe partidos políticos halao (inclui, harii partido político bara-barak) la’os ona zona cobertura CNE nian. Hanesan: consolidação, eleição directa liderança partido, congresso/ conferencia partidos políticos ne’e la’os CNE nia knaar atu manda. Maibe, iha mos lei kona ba regime financiamento ba partido políticos, fo duni knaar ba CNE atu halo “avaliação” no “audit” deit. CNE la fo sansão wainhira partido sira usa osan la tuir dalan (karik).

*) Hakerek nain, Comissário iha CNE – Representante Igreja Católica, coordenador sub comissão ba educação cívica iha CNE.