PM dehan Misaun FSI nian hotu iha 2012

Hatan ba xefi Estado Maior Jeneral Forsas Armadas Australia nian

Dili, Forum Haksesuk (FH). PM Kay Rala Xanana Gusmao, nudar mos Ministru Defesa i Seguransa, haktuir katak “Misaun Forsa Seguransa Internasional (FSI) hotu iha tinan 2012”. Tenik tan PM, ”kalendariu ne’e haksesuk ona ho Nasoens Unidas no hau rasik apresenta ona ba Sekretariu Jeral ONU nian konaba kalendariu transisaun ne’e”.

Haktuir tan PM, ”Misaun UNMIT ho FSI ne’e pakote ida deit, sira nain rua nia misaun hotu iha 2012”, dekalrasaun PM no Ministru Defesa i Seguransa RDTL, liu husi konferensia imprensa iha Aeroporto Internasional, Nicolau Lobato, wainhira foin fila husi, Juba, Sudaun Sul, Sexta-feira (21/10/2011).

Dekalrasaun PM nian ne’e hodi hatan ba deklarasaun husi Xefi Estado Maior Jeneral Forsas Armadas Australia nian, Jeneral David Hurley katak “FSI sei la retira tuir kalendariu previstu iha tinan 2012”. Haktuir tan Jeneral David Hurley katak ”iha altura ne’ebe atu tama ona ba eleisaun presidensial no lejislativas, iha tinan oin, Timor-Leste sei hasoru pontu kritiku”, defende Xefi Estado Maior Forsas Armadas Australia nian ne’e.

“PM mos husu ba populasaun tomak, iha foho no vila, atu moris hakmatek, labele monu ba violensia, atu kontribui ba sira sai lalais, lalika monu ba buat sira ne’ebe maka sei la kontribui ba paz no estabilidade”.

Iha krise politika i Militar 2006, Estado husu atu rai amigos sira hanesan Australia, New Zeland, Malaysia no Portugal hodi haruka sira nia forsas mai ajuda restaura ordem no fó asistensia ba ita nia Forsas Armadas!