Deputados sira foti Rumores sai Deklarasaun Politika

Dili, FH loron 12 fulan Outubro 2011, buka atu konfirma loloos notisia nebe sai tiha ai-han diak ba jornais hirak iha Timor laran iha loron rua ikus, kona ba rumor ne’ebe sai tiha mos hanesan problema nasional ne’ebe ate reperezentantes sira povu nian iha PN foti iha deklarasaun politika hosi bankadas parlamentar balun iha Plenaria Parlamento Nasional laran horiseik, loron 11 fulan Outubro 2011.

Infelizmente FH seidauk konfirma loloos verasidade rumor nee rasik. Maibe FH hetan konfirmasaun kredivel tebe-tebes hosi Embaixador Timor-Leste nian iha Camberra, Australia.

Senhor Abel Guterres, nudar Embaixador ne’ebe reprezenta Estado Timor-Leste iha Australia informa ba korrespondente FH Camberra hateten katak, "nia husu kedan ba autoridades sira imigrasaun Australia nian kona ba detensaun ema sidadaun Timor-Leste nian ruma iha imigrasaun, maibe autoridades sira hateten katak imigrasaun la halo detensaun ba ema Timor oan ruma ne’ebe lori osan $400.000,- tama ba territoriu Australia nian".

Tenik tan Dr. Abel Guterres, "hateten katak rumor ida nee la loos no falsu tanba autoridades sira iha alfandega iha Darwin fo hatene ba Senhor Embaixador katak sira la detein Timor oan ho osan montante nebe refere. Ema australianos sira rasik deklara katak rumores hirak nunee iha Timor-Leste nee nanis ona". Tutan tan katak ema Timor gosta soe rumores hodi estraga ninian maluk sira seluk nian naran, kuantu mais agora besik ona eleisaun.

Tuir mai deklarasaun hosi vitima difamasaun:

Deklarasaun hosi Vitima Hasoru Lian Bosok Ten Hosi Politiku Nain Balu, haktuir Lili Ribeiro nudar Vitima iha konferensia imprensa iha ninia knar fatin, Aitarak laran, iha quarta-feira (12/10/2011) katak:

"*Hau hakfodak no laran dodok tebes ho hahalok deputadu balun hosi CNRT, Fretilin no PUN nebe soe lia bosok ten hodi difama hau hanesan feto no povu kiik nebe kbit laek.

*Durante nee, hau iha hela Timor. Hanesan feto kbit laek no povu kiik ida, hau moris hanesan povu baibain. Iha hau nia moris, hau nunka hare osan ho montante boot tebes hanesan deputadu sira hatete.

*Ambassador Timor Leste ba Australia, Sr Abel Guterres nebe halo konfirmasaun ho autoridade Australia nian mos hatete katak laiha akontesimentu ruma hanesan deputadu sira levanta iha plenaria. Buat sira nee bosok ten.

*Hau kompriende katak atu besik eleisaun ona, politiku sira balu, soe isu bosok bar’barak hodi hetan kadeira no poder. Maibe, hau lamenta tebes, tamba kadeira no poder, politiku nain sira labele sakrifika fali ami feto no povu kbiit laek hanesan nee.

*Hau hatene hau nia an, hau la ba hadau malu kadeira no poder ho politiku nain sira. Tamba nee, labele sakrifika ami hanesan nee.

*Hau husu ba deputadus balun hosi CNRT, PUN no Fretilin ne’ebe hasae lia falsu sira nee liu husi deklarasaun politika iha Plenaria Parlamento Nasional, para aban bainrua, bainhira atu koalia karik, bazeia ba faktus konkretus, laos lia bosok no lia falsu.

*Hau husu ba deputadu sira nebe hasae lia falsu ida ne’e, para labele lori isu bosok ten hodi buka poder no kadeira.

*Husu ba deputadus sira ne’ebe soe isu falsu nee, para sensitivu oituan ho dignidade ema nian, liu liu ho povu kiik no feto kbit laek nia dignidade no labele difama ema ho lian bosok hanesan nee.

*Hanesan feto no povu kiik, hau sugere ba deputadu sira para hatudu etika/moral atu nune povu babain bele banati tuir.

*Hanesan ema kbit laek mos, husu ba deputadu ka politiku nain sira atu labele subar iha imunidade politika hodi hanehan ami feto no povu kbiit laek.

*Ikus liu, hanesan feto no povu kbit laek, hau la iha kapasidade para hasoru politiku nain sira nian bosok ten, tamba nee, buat sira nee hotu, hau entrega deit ba Maromak ho Matebian sira".

FH, Darwin, Australia e Dili!